ابي اسافر فيينا

[شرطيه]

السلام عليكم



بنات عندي جم استفسار

بنات ابي اسافر فيينا اول شهر مارس 3 على طيران الوطنيه واول مره اروح وماعرف شي بروح انا واهلي

منو سافرت فيينا وشلون الجو هناك الحين؟؟ منو سافرت على طيران الوطنيه ؟؟ وجم تستغرق الرحله؟؟ وشلون السوق

والاسعار؟؟؟ وين احسن الاماكن السياحيه؟؟ وشنو احسن الفنادق؟؟ عفيه لاتبخلون علي بالرد وشاكرتلكم

 

[اللولو الحلوه]

اول شي اقولج الله يهنيكم حبيبتي على سفرة فيينا

انا رحت لها 3 مرات ولو يحصلي اروح لها بعد ، لأن ما ينشبع منها ، فيينا كل شي فيها حلو وخاصه المناطق الثانية مثل زلامسي وسالزبورغ . والجو في هالوقت روعه يعني اخذوا معاكم شتوي وربيعي احتياط للنهار .

بالنسبة لطيران الوطنية زين مافيه شي واهم شي انه دايركت ، وتقريباً مدة الرحلة بين 4 ساعات ونص الى 5 ،

والحين راح اقولج عن الأماكن والأسواق والرحلات بس ان شالله ما انسى شي .

بالنسبه للفندق ، احنا عادة في اوربا نختار الفندق الي يكون بجانب الاندر قراوند ( او المترو ) عشان اغلب مشاورينا تكون عن طريقه ، وايد سهل وتكلفته رخيصه .

وافضل فندق في فيينا سكنته اهو هيلتون ، سعره معقول وموقعه حلو وبجانبه الاندر قراوند ومقابله حديقه كبيرها وفيها بحيره ، وليس بعيد عن المنطقة الحيوية ستيفن . وبجانبه جمعيه صغيره .

أولاً المناطق السياحية في فيينا :


- اهم مكان في فيينا هو ساحة ستيفن ، هذه المنطقه منطقة حيويه فيها الفنادق والمحلات ( وفيها محلات الماركات العالمية ) والمطاعم والكافيهات وكنيسة مشهوره كبيره وبالقرب منها الحناطير إلي تفتح النفس ، وفيه مطعم ايطالي مشهور اسمه جاكوب ، وفي المساء تكون هناك عروض ومهرجانات ، يعني المنطقه خرشه ليما الساعه 11 مساء ومليانه ناس .

وبالقرب من هذه المنطقه في مطعم ايطالي اسمه بيتزا بيتزا وايد حلو ، ومالك هذا المطعم مصري . وبجانبه محل للآيس كريم وايد حلو .

- ملاهي بلاتر ، العاب للصغار والكبار ، كبيره وحلوه وخاصه بالليل .

-قصر الشانبرون ، قصر يمكنكم دخوله والتجول فيه ، وخلف هذا القصر حديقه كبيره تفتح النفس .

- قصر هوفبورج .

- الزحلاقية الصيفيه ( والله نسيت اسمها ) وايد حلوه وانتي الي تتحكمين في العربه الي تركبينها .

- منطقة الأوبرا ، وهذه أيضاً منطقة حيوية فيها المطاعم والكافيهات ، واهم كافيه بالقرب من المنطقه هو كافيه موزارت ( موزات فنان موسيقي مشهور في فيينا وموطنه في سالزبورغ ) .

- رحله ( من ضمن الرحلات إلي ينسقها الفندق ) وطبعاً الحجز يكون مسبق .

رحله إلى منطقة WACHAU وهي تبعد عن فيينا ساعه ونص بالباص وتطل على نهر الدانوب ، والذهاب إلى قرية والتسوق فيها ، ثم الذهاب الى القصر الامبراطوري ( متحف ) وإلي سكن فيه ريتشارد قلب الأسد حاكم انجلترا سابقاً ، بعد ان هرب من انجلترا ولجأ إلى امبراطور النمسا واختبأ فيها . ثم التوجه الى منطقه اسمها ميلك وركبنا سفينه صغيره وتجولنا بنهر الدانوب لمدة ساعه إلا ربع .

- رحلة إلى قصر اول امبراطوره في فيينا ماريا تريزا + كهف هتلر . ( عن طريق الفندق ) .

- نهر الدانوب ، حيث فيه الكافيهات والمطاعم والقوارب انتي تسوقينا بنفسج .


ثانياً : الأسواق :

- اول شي الآوت ليت ( لازم لازم لازم تروحون له ) محلات الآوت ليت ديزاينر آوت ليت باراندورف ( Designer out let Parandorf ) ، عن طريق الباص ( ومحطة الباص موجوده مقابل الأوبرا ) .

محلات الآوت ليت ، هي مجموعه من محلات مختلفه وأغلبها من الماركات العالميه ( بربري / سكادا / برادا / قوتشي / ديزل / كلفن كلاين / رالف لورين بولو ( عشق ولدي وطبعاً غطس بالملابس وخم منهم خم ) / نايك / بوما / اديداس / لاكوست / تومي / تيمبرلاند / بالي / قلوي / دي كي ان واي / آغنر ........... )

وهذه المحلات تكون عليها خصومات تصل من 30% - 70% ، وهو خارج فيينا ويبعد عن فيينا 45 دقيقه بالباص .


- ساحة ستيفن ، تتفرع هذه الساحه الى عدة اتجاهات وسكك .

- شارع ماريا هلفر ، وهو محلات على الشارع ( نفس طريقة السالمية القديمه ) ، ومافيه شي زايد .

- سيتي سود مول ، مول كبير وحلو وبعيد بعض الشي بعد ما تركبون بالاندرقراوند ، تركبون بعده الترام .


واذا بتروحون سالزبورغ راح اقولج عن الاماكن والاسواق الموجوده فيها .

 

[شرطيه]

بعد عمري فديتج مشكوووووووووره ماقصرتي اخيرا احد عبرني

حبيبتي صج يقولون انها غاليه؟؟؟ نفس الكويت ولا اغلى بالنسبه حق المطاعم

وشلون على الملابس ؟؟ يعني الاسعار بشكل عام؟؟ انا بس بروح فيينا بس يمكن نعر مني ولامني

تتوقعين اذا باخذ مصروف معاي شكثر اخذ حق 7 ايام انا ماني مخربطه بالسوق اهم شي اشوف الطبيعه

واشكرج حبيبتي واسفه على الازعاج

 

[شرطيه]

اب
اب
اب

 

[اللولو الحلوه]

الديره اسعارها مثل الكويت تقريباً ، بس نصيحه لا يطوفج الآوت ليت ترى وايد وايد حلو

اتصدقين انا بس بالاوت ليت صرفت 500 دينار ، قمنا نشترى اشياء بالهبل من الأشياء الحلوه .

وساحة ستيفن كل يوم احنا نروح لها بالليل ، نتعشى فيها او بمطعم البيتزا ، او نشرب قهوة او شاي .


وبالنسبة للمصروف اخذي معاج كاش 200 دينار والباجي خليه بالفيزا .

واي سؤال انا حاضره ، ولا يردج إلا الكي بورد

 

[هنـــد]

من صجج تروحين فيينا وماتمرين زيلامسي عالاقل يومين

زيلامسي مو طبيعيه اتجنن اشوي عليها

 

[شرطيه]

مشكوره يالغاليه ماقصرتي

 

[ام مهاوش]

نصيحه دام رايحين فيينا روحو زلمسي لاتحرمون نفسكم من الجنة الارض واذا على السكن انصحكم بالشقه اللي سكنت فيها او شقق ثانيه جدامنا هم حلوه قريبه من البحيره ويديده وكل شي فيها اذا تبين اسمها قوليلي اعطيج الرابط انا حجزتها من بوكنق