قوه خواتي
اشلونكم .. ان شاء الله بخير
توني واصله البيت ومن حر ما بقلبي ما رحت بدّلت ملابسي .. سيده شبكت أبي حل حق هالبلشه اللي انا فيها
قبل كل شي بقول لكم اشلون تعاملي مع الناس عموماً ومع محيط الدوام خاصة
مسالمه مسالمه مسالمه .. ما عندي حزازيات مع أحد كلش كافيه خيري شرّي
لا سمعت كلمه من أحد ولا جني سمعتها مالي شغل بأحد كلش وعلاقتي زينه وطيبه مع الكل
أعامل كل البنات سواسية وحتى لو أرتاح حق وحده أكثر من الثانية أحاول قد ما اقدر ما أبين هالشي ولا طلعنا من الدوام اهني أكون قريبه من البنية بس بالدوام اهتمامي يكون بالشغل وسوالف الشغل .
وين المشكله؟ من كثر ما أعامل الكل بسلام البنات قاموا إيوني ويطلعون حجي عن بعضهم ومو شرط حجي جذب , ممكن كلام صح بس حجي المفروض ما ينقال ودام فلانه شايله على فلانه المفروض تواجهه وتصارحها ..
وضعي صاير زفت , تخيلوا تييج وحده تتكلم بوحده غاليه عليج وتحبينها وعارفتها عدل أخلاق تنحط عالراس
من كثر طيبتج وما تبين المشاكل ما تقدرين تردين عليها وان رديتي بتقول إي انتي تحبينها أكيد تدافعين عنها !
على قولتهم .. ان سكت واويلاه وان حجيت هم واويلاه
والله العظيم قلبي يعورني أشوف الخراب يزيد وكل وحده ماخذه فكره غلط عن الثانيه وماني قادره أتصرف
ترا حدي مو راعية مشاكل , لا صارت مشكله دايماً أكون برا الملعب
احنا عددنا ما شاء الله وايد بالقسم 8 بنات
مره جذي صار سوء فهم بين بنتين .. قلت خل أحاول أصلح بينهم
قلت حق الأولى ميخالف انتو خوات ذكروا الله
انقلبت السالفه علي! الأولى سوتني واقفه بصفها
الحمد لله يا ربي أشوه انه الثانيه عارفتني .. قالتلي لو تلحفين مني لي سنه انا عارفتج
اوكي اهي عارفتني بس لو وحده غيرها ممكن تصدق صح والا لا؟
وأطلع المنافقة الفتينية أم ويهين !
واي واي شقولكم سوالف ما تخلص , آخرتها اليوم هم بعد صار موقف يلوع الجبد
وقاعده أحس بتأنيب ضمير مو عارفه شسوي .. أخاف أتكلم أدش بالغيبة واذا سكت هم بعد حرام تسمعين كلام مخربط عن فلانه مادري هالموضوع مأزمني مثل الجبل على قلبي ..
استغفر الله العظيم
عطوني حل يا بنات تعبت
