إنسداد بمثانه الجنين والكليتين متضخمين :(

[ليلى رمضان]

بنات قالولي الدكاترة ان المثانة والكليتين للبيبي مليانين ماي وحجمهم فوق الطبيعي
البعض قالي انه انسداد بمثانه البيبي والماي حوالينه جداُ جداُ قليل وانا توني داخلة شهري السادس
مادري أذا أحد مر بهالتجربة
بيعيش البيبي ولا لأ؟؟ نفسيتي تعبانه يا رب ارحم حالي

 

[غنوة ستايل]

والله ما عندي فكره
بس عسي الله يكمل حملج ع خير ويقر عينج بمولودج

 

[غير عن كل البشر]

ربي يكون بعونج عزيزتي ، ما سبق لي ان مريت بهالتجربة او احد اعرفه ، بس حبيبتي خلي يقينج بالله قوي وعسى البيبي يعدي هالمرحلة وان شاء الله الأخوات يفيدونج

 

[*ماي الورد*]

فيه علاج برا الكويت يحطون حشوة اسمها الدفلكس مكان الصمامات علشان البول ما يرجع الكلية
اما بالكويت يحطون البيبي تحت المتابعة مع دكتور مسالك بولية و احتمال يعطونه مضاد حيوي لفترة معينه من عمره
طبعا اول ما تولدين راح يحتاج يسوون له اشعة نوويه و صبغة
بس انا افضل تتاكدين من التشخيص من دكتور ثاني مثل ماجد الشمري

 

[english muffin]

ان شاااااء الله بيعيش

 

[dlll3]

الله يشفيه وتفرحين بشوفه معافي ياااااارب

 

[أأأميرة الورد]

فيه علاج برا الكويت يحطون حشوة اسمها الدفلكس مكان الصمامات علشان البول ما يرجع الكلية
اما بالكويت يحطون البيبي تحت المتابعة مع دكتور مسالك بولية و احتمال يعطونه مضاد حيوي لفترة معينه من عمره
طبعا اول ما تولدين راح يحتاج يسوون له اشعة نوويه و صبغة
بس انا افضل تتاكدين من التشخيص من دكتور ثاني مثل ماجد الشمري

نفس كلام الاخت انا ولدي جذي من الشهر الثامن اكتشفوا فيه ضيق في الحالب وتضخ بالكليه والحين عمره اسم الله عليه سبع شهووور وللحين متابعه مع دكتور مسالك بوليه وعنده موعد بعد شهرين يشوووفون الماي اذا ماراح يسووون له عمليه
والله يشافي ولدي وولدج يااااارب :yaaaaaarb:

 

[ام_ركون و دندون]

ربي يشافيلج اياه وتفرحين بشوفته

 

[ام الحلوااات]

اللــــــه يـــحـــفـــظـــج ويـــقــــــومـــــج بــــاالــــســـــلامـــــه انـــتــــي والـــبــــيــــبـــــي​

 

[ام طوني]

حبيبتي لاتحاتين انا ولدي كان فيه انسداد بالحالب وكان البول يرجع عالكلية وتضخمت وتغير شكلها عن الطبيعيً وكانت كل اسبوع يزيد حجمها من الشهر السابع بالحمل وولدت طبيعي بالتاسع وسنوا البيبي العملية ب مستشفي بن سينا ولله الحمد والشكر نجحت العملية وضليت اراجع فيه ل ٥ سنوات والحمدلله

 

[travel_addicted]

يا رب يشافي ولدج و يقر عينج بشوفته سليم كامل معافى
بس بنات بسالكم هالاشياء تبين بالسونار العادي ؟
لانه احس السونار بس اشياء سوده بدون تفاصيل

 

[&موناليزا&]

عزيزتي من خلال خبرتي هذا السبب يكون من ضيق حالب الكلى (عيب خلقي) يسبب تضخم بحوض الكلى الذي يسبب امتلاء بالمثانه البوليه
وهذا فيه 5 درجات اشدها الرابعه والخامسه يحتاجون لابوريشن =عمليه​

طبعا الخوف من ان البيبي ما يستطيع التبول اعزكم الله فيرجع جزء من البول للكلى ويسبب تلف وضمور بالكلى​

واعتقد ان الجنين راح ياخذ مضاد حيوي من اليوم الاول لولاده اذا ولدتي في مستشفى حكومي خوفا من حدوث التهابات بالبول​

انتي طلبي تحويل لعيادة جراحة الاطفال لابن سينا
وطلبي بالاسم دكتور مسالك بوليه وليس جراحة اطفال شامل
ومن خلال معرفتي بدكاترة ابن سينا الافضل لهذه الحاله الدكتور السعيد طلبيه بالاسم عند الرسبشن​

سووي تحاليل للبيبي خصوصا مزرعة البول
وراقبي حرارة البيبي ​

طبعا بهذي الحاله يسوون للبيبي تحاليل شامله وسونار لحوض الكلى واشعه نوويه ​

طبعا تضخم حوض الكلى للجنين يبين بالسونار ويكتشفونه اذا شافوا بالكلى دوائر لونها اسود تعني ان المانه ممتلئه​

انا شرحت لج الحاله من خلال خبرتي المتواضعه بهذا المجال لان مجال تخصصي الاساسي مو مسالك بوليه لكن درسته بشكل عام​

والله يسهل ولادتج وحملج ان شالله​

 

[c a t w o m a n]

يا عسى ما تمر الشهور إلا و الجنين بحظنج بصحة و عافية وسلامة

ما عندي فكرة عن الموضوع الله يكون بعونج و تعدي الشهور على خير انشالله

 

[يا عيون سمي]

حييبتي روحي عند اكثر من دكتوره تاكدي ترا تشخيص عن تشخيص يفرق انصحج تروحين للدكتور ماجد الشمري اذا ماني غلطانه شاطر بعلم الاجنه

 

[موجة ~ بحر]

ماعندي فكرة ربي يشفيه
وتشوفينه بصحه وعافيه

 

[ليلى رمضان]

شكرا من كل قلبي لخواتي على تجاوبكم والله يسمع منكم أشوف ولدي بحضني بصحة وعافية ،انا سويت سونار تقريبا 3 مرات بخاص وحكومي والكل اكدلي الحالة
الدكتورة تقولي هالحالات غالبا تصيب الذكور البعض يتشافى ويتبول اول ما ينولد والبعض الثاني يحتاج حق عملية ومتابعة مستمرة وانشالله علاجه موجود بالكويت وسهل
انا سجلت عندي الملاحظات وأسماء الدكاترة اللي ذكرتوها ما قصرتو حبايبي ولكل من دعى لي الله لا يوريكم مكروه في عيالكم ويشافي ولدي يااارب
الله يستر من الأيام الياية قلبي يعورني لما احس رفساته في بطني مادري شنو مصيره انشالله خير ياااارب ياااارب

 

[*ماي الورد*]

نسيت اقولج لمن تسوون له اشعة صبغة يبين اذا توسع بالحالب او ضيق بالحالب
اذا ضيق بالحالب العملية سهلة يسوون قسطرة يوسعون الحالب اذا توسع ممكن يروح بروحه مع العمر و برا الكويت يحطون حشوة تمنع ارتجاع البول
الله يهون عليج
لاتحاتين

 

[rahafel7ob]

انا اتعامل مع عياده وايد دكاترتها شاطرين
و هذي ارقامهم
22655888
60777749

 

[ام عفراء]

الله يشافيه ويجي بحضنج بصحة وعافية

ماشاءالله البنات ماقصروا بمعلوماتهم المفيدة

نصيحتي لج اولدي بالحكومة دام ولدج حالة خاصة احسن لج
ولاتنسين الصدقة ' داووا مرضاكم بالصدقة '

الله يطمن قلبج

 

[لهفة المشتاقه]

حبيبتي انا كتشفو انه الكلي ضخمخ وقالولي لازم اجهاض بس بسرعه عرفووو

من اول الرابع عرفو واجهضته سبحان الله بسرعه طاح ماطول قالي الدكتور انه

هالبيبي ماراح يعيش الله يعينج وتكون حالة البيبي احسن لاتحاتين اللي ربج كاتبه بيصير

قولي الحمدلله علي كل حال ولاتنسين اذا الله حب عبده ابتلاه عسي ربي يفرحج بشوفته سليم