أولويات زوجي

[الكويتـ80ـية]

السلام عليكم اخواتي

الموضوع واضح من عنوانه

زوجي يقهرني بتعامله معاي

مقصر بشكل فضيع معانا

ما يصرف علينا و لا يطمن علينا بالتلفون ( شغال برا الكويت)

و لما اقوله اذا ما تبي تصرف علي اصرف على بنتك يقولي انتي امها و عندج راتب قوي صرفي عليها انا اللي فيني كافيني و انا اجمع فلوس

ابي افهم الحين يصرف على امه و اهله و احنا لأ؟

و لما يبي يشوفنا انا احجز له تذكرته عشان اغريه ايي و طول مدة قعدته 3 أو 4 أيام اصرف عليه و لا يسحب شي من كرته
يقولي ليش اصرف فلوسي و احول عمله انا و انتي واحد و يتحسس و يزعل .

و المشكله و الطامه الكبرى توا شاري تذاكر حق امه و اخته ( المو متزوجة) و خدامة أمه عشان يروحون يقعدون عنده يغيرون جو ... و طبعا هالمصاريف عسل على قلبه ... و لما انفجرت قالي هذيل اهلي أولى منج و هم أولوليه بحياتي


الحين ابي اشوف ردودكم ؟؟؟ صج أهله اولى مني أنا و بنته ؟؟؟

قاعد أفكر بالانفصال من هالمشاكل ؟؟ لاعت جبدي :yaaaaaarb:

 

[bnt_kwt]

طبعا ملزوم يصرف عليكم
بيعطي اهله كيفه بس مو من حقه يبخل عليكم
ملزوم يصرف عليكم انتي وعيالج ويوفر لكم السكن والخادمه
واذا ثبتي انه طول فتره زواجج منه ما صرف عليج تلزمه المحكمه بدفع النفقه المجمده حتى لو كنتي على ذمته من غير طلاق
غير انه يحكمون لج بنفقتج ونفقه عيالج ويخصمون دايركت من معاشه

هدديه اذا ما تفاهم بالطيب وباللتي هي احسن تقدرين تاخذين حقج و حق عيالج منه بالقانون والحمدلله انه محاكمنا مناصره المره

 

[امـ خــزامـى]

بصرااااحه زوجك ماامنه امااااااااااااان

اهله وملزوم فيهم وماشاءالله فاهم هالجزئيه ومطبقها بحذاافيرها


طيب بنته وزوجته ؟؟؟؟؟؟؟؟؟؟؟؟؟؟؟؟


مادري حبيبتي ماابي اقول كلام وازيد همك انصحك تستخيريييييييييييييييييين

 

[M!SS.LOBY]

الله يكون بعونج

خلي ابوج او اخوج او اى احد كبير بالعائلة عندج يكلم زوجج ويتفاهم معاه ويقوله تراك مقصر بحق مرأتك وبنتك

الله يهديه ويسخره لج

 

[* حبيبي يشوّق *]

أول شي :

أكيد أمه أهم منج ..
أصلا امه رضاها يدخله الجنه .. و اهي جنته و ناره .. و اهي الجنه تحت اقدامها ..
انتي ولا شي بالنسبه حق أمه ..
أصلا لاتفكرين يوم من الايام انج تحطين راسج براس أمه ..
ولا تفكرين تقولين له اهي اولى مني ..
لأأن أكيد انها اهم منج مليون مره .. و لاتغارين من معاملته لهم ..
حمدي ربج لأمه و اخته مو لوحده غيرج !
و اذا اهو حجزت حق اخته و خدامة امه فهذا لطلب أمه فقط لا غير
و السبب هني كله انه يحب امه و يموت فيها حيل ..

ثاني شي ...
قبل كل شي نقولج صح أهو مقصر وايد مو شوي ...
لكن راجعي حساباتج معاه ..
هل انتي ونيسه و اذا دخلت هللتي و رحبتي ..
ولا مليقه من يدخل انت وينك وين ماتصرف علينا ..
و ليش دافع حق امك و ماتدقع لنا
و من هالحجي اللي يقث و يخلي الريال ما يشتهي يشوفج
و من هالمقارنات اللي تسوينها بينج و بين اهله اللي مايجبها الريال ..
غيري طبعج ..
ولاتلومينه و دايمه كوني له الشي الحنون الدافي اللي مهما لف الدنيا مايشوف غيرك ..
لاتصيرين نكديه ..

و اذا مافاد معاه و تم مقصر ..
فهذي حياتج ان ما يعجبج الحال مو ملزومه تعيشين معاه ..
ترى حياتج ماتوقف عليه ..

 

[حبيبي مالكني]

والله ريلج لا يطاق
الله يعينج عليه
اذا اهله من اولوياته انتي وبنته بعد من اولوياته
والله انا الغريبة احتريت
وانتي وايد مدلعته شنو تشترين له تذكره عشان ايليج
حبيبتي ريلج ذيه ماله امان
وانتي مو ملزومة تصرفين عليه
والله صج بعض ريايل هالزمن يخرعون
فوق شينه قواة عينه
انا اقولج خشي بيزاتج وجبريه يصرف على بنته على الاقل

 

[Pinky -cat]

حبيبتي مبين عليه يستعبط وايد مو شووي ويبي يحلل راتبج وعينه عليه انا اقول انتي سوي مثلة بعد قولي اهلي يبون مني
وبساعدهم وخليه يحس انج بعد تساعدين وفلوسج رايحه يمكن يحس شوي انه مقصر وانه معطي غيرج اولويه وانتي لا

ونطري وشوي شوي وبالكلمة الحلوة لا تشكين وتقولين وتكشرين ووشوفي اخرتها واللى مرتاحة له سويه ما عليج
من الناس .

 

[Lubna85]

في الدين الرجل ملزم بزوجته وأولاده أولا ثم أمه لأن الأم لها من يعيلها.. حسب كلام دكتور إبراهيم الخليفي، الكلام ماخذه من أحد المشايخ ما يحضرني أسمه للأسف

 

[PuPa^^SWeeT]

غلطااان ريلج


وانتي غلطااانة


عاادي خير يا طير زعل الريال


مرة مرتين بيزعل

بعديين بيحس بدمه



لا يتصل ولا يسال ولا يصرف


وفوق هذا انتي اتقطين علييه من معاشج


ساعات بعض المشاكل تحتاج تكبر


لسببين


اما انه ممكن الوضع يتعدل فا تستمرين


او ماراح يتعدل فا يكون لج حرية القرار بالبقاء او الرحيل



اسفة على الكلمة


بس ساعات لازم اتكونين حااااااااااااااااااااازمة



علشان تتنفذ حقووووقج



لو ماعنده قلنا اوكي


بس يصرف على اهله


قلنا مافيها شي يصرف على اهله بس همن انتي وين



لازم لج مصرف يتحول على حسابج

 

[Perfume]

مع حبيبي مالكني و lubna

 

[غرام القمة]

الله يعينج

 

[غلايو]

غلطانه
قدمي استقالتج و روحي عيشي معاه

خليه يربي بنته مو بس انتي تربينها

وو الشغل قوليله بشتغل بنفس المكان الي انت فيه البلاد اقصد
و انج مليتي من الوحده وماتحسين انج متزوجه وجذي

 

[أسرار الجمال]

لا حبيبتي امه مؤ اهم منج بالدين الرجال قوامون على النساء بالله بشنو اذا ما يبي يصرف بشنو ريال روحي خطاياه حد رسائلي اخر زمن يبي عيال ببلاش قطيعة خله كان عند أهله وهبهم كانوا ييي له عيال

 

[أسرار الجمال]

من الحرة اكتب غلط خطاياه=حطيله و رسائلي=رياييل

 

[توتة UAE]

اللي تقول أمه أهم منج غلطانة . . طبعا الجنة تحت قدم الأم
لكن مب يعني عادي يقصر مع الزوجة وبنته المهم الأم والأخت
مستانسين !! مب معقولة . . الحين هو متزوج يعني أولوياته
الزوجة و بنته . . هو مسؤول عنهم . . الله بيحاسبه ع تقصيره
وياهم . . حرام جذي أنا حاسة ف صاحبة الموضوع

أخوي متزوج وعنده ولد بس مستحيل نرضى يهتم فينا ويقصر
ويا عايلته . . خلاص هذا قبل لما كان عزوبي يهتم فينا ويطلعنا
الحين يعطي حقوق زوجته وولده قبل كل شي . . مب ملزوم
يسوي لنا شي . .

حبيبتي لو زادوا راتبج ولا غيره لا تخبرين ريلج هالشي مب لازم
يعرفه دام هو حاط عيونه ع راتبج . . ومقصر وياج لاخر درجة و
يسفر أمه واخته حرام عليهم مايفكرون عنده حرمة وبنت مقصر
وياهم . . أنا ماعرف عن أمه وأخته المهم انتي لا تسكتين بس لا
تطلبين الانفصال بس خبريه انج من اليوم ورايح ما بتصرفين ع
بنتكم قولي انته الريال وانته ابوها طرش مصروفها كل شهر . .

اذا ما سوى شي خبري أبوج يرمسه . . ييلسون ويا بعض وابوه
وباهم ويتفقون ع كل شي . .

لازم تسوين شي وتبينين انج وصلتي حدج (مب يعني تتضاربين
وتصارخين) ويفهم انج جادة . .

ربي يوفقج ويهدي ريلج

 

[الأميرة جوري]

معقوله مو لهدرجه لازم يصرف اقل شي علي بنته

 

[زوجة عزيز]

المفروض تعيشين معاه عشان يحس بالمسؤوليه مايصير جذي شايل يده منكم انتو في ذمته حتى لو راتبج 3 اضعاف راتبه اهو الملزوم فيكم اول مفروض يصرف عليكم وتالي اهله

 

[am-abood]

استغرب من الاخت حبيبي يشوق على كلامها
اوكي امه ولها حق عليه
بس مو لدرجه يهمل زوجته و بنته !
دامه مو قد المسؤولية لايتزوج !!!
انتي غلطانه بعد مدلعته وتصرفي عليه
لاتزعلي مني بس زوجج والله لا يطاااااااااق

 

[طريق السعاده]

اهلها محد ينكر بس انتي وبنته وينك بحياته !!

اذا مو شايل همكم واصلن مايسال ولا يدق الا لما تدقين ولا يجي الا لما تتحايلين عليه معناته مستغني اعذريني بس الغلط راكبك انتي وياه اوكي ساعديه ارفعي عنه نص المسؤوليه والحياه مشاركه بس مو كل شيء عليك عشان فلوسك !

والله لو منك بحط فلوسي باي داهيه المهم مايستغلني اذا يبيك يصرف عليك وعلى بنته حتى لو بغربه وحتى لو مضغوط لازم يحسب حسابكم بزحمه دنيته

سوري لكن القرار الصحيح اكتبي كل خاطرك بمسج وقولي له 123 هذا الي علي و123 هذا الي عليك لان فعلا ابي احس وراي رجال وسند وابي احس ان فيه احد يهتم فيني ويبي سعادتي وسعاده بنته اذا مافي تفاعل ولا تغيير افضل تتصرفين وتدخلين اهلك

 

[طريق السعاده]

ولا تقارنين نفسك باهله ولا تطرينهم بنقاشك معه خلي النقاش حياتك وحياته وبنتكم مالك شغل بغيرك المهم حقوقك ماتتنازلين عنها ومنها النفقه !! حتى لو شيء بسيط المهم مبلغ ينصرف ك نفقه بحسابك وانتي صرفي راتبك خذي قرض او افتحي حساب جامد وحطي فيه الدنيا مالها امان ماتدرين بكرا من تسندين ظهرك عليه ولاتتركين شغلك الا لو تقدرين ترجعين له ممكن تاخذين اجازه بدون راتب وتروحين تسافرين معه اما تتركين شغلك لا والله ماتدرين عن الدنيا والله لايحوجك لاحد ..