أفـكـآر إبـدآعـيـة مـن بـنـات الـكـويـت ..

[SosAlKhaldi]

السلام عليكم ورحمة الله وبركاته :eh_s(17):

شلونكم بنات ؟



قبل المعارض أغلب اللي يدشونهـا شركات , مراكز تطوعية , أو تجار بيمشون بضايعهم !
لكن ..
الحين تغير الوضع وصار في لمسات شبابية , وأفكار رهيبة .. مثلاً
- وحده تكتب لج اسمج بـ لغة معينة , وتكتبه لج على الشكل اللي إنتي تختارينه برجج , قلب .. إلخ
طبعاً غير هبة الكب كيك , التيشيرتات وغيرهـ ..

الحين أبي كل بنت صاحبة حس فكري مُبدع تشاركني بـ هالموضوع وتجاوبي على سؤال :

لو عندج بوث بأي معرض كان .. شنو ودج تسوين ؟ شنو فكرتج اللي حابه تقدمينها للناس !

أما اللي عندها وسوت .. تقولنا التجربة اللي مرت فيها وشنو الشغلات اللي غلطت فيها عشان نتعلم كلنا ..

بليز أبي تفاعل :eh_s(22):

 

[AFRoDiT]

انا اول وحده برد عليج واتمنى اكون راح افيدج

انا فنانه تشكيليه ومصممه , ومثل اي بنت اهتم بمجال الموضه والاناقه

صارلي 6 سنوات اشارك في معارض اكسسوارات شغل يدوي
والحمدلله .. مافي احد يقدر ينافسني ويسوي نفس شغلي لأنه صعب يبيله وحده لها خلق تتعامل مع شغل النجاره والتشكيل, واكثر شي انشهرت فيه بروشات واكسسوارات ستاربكس ..
والحين اسوي جناط وفايلات هم بطريقه فنيه ..

جم نقطه احب اقولها من تجربتي ..

- بالنسبه لي زبايني ناس نادره جداً ,لأن الاغلب يبون شي يكون هبه.
نادر وحده تتجرأ اهي الي تبلش وتهب بالشغله + مو أي أحد يقدر الفن والشغل اليدوي , وانا مااحب ارفع بأسعاري وايد .. يعني بالعربي مادياً مااستفيد الا القليل والحمدلله

- تعلمت ادرس كل معرض يناسبني او مايناسبني وصرت اعرف الزين والشين ووين اشارك على حسب هدفي,
في معارض اشارك فيها عشان ابيع, وفي معارض اشارك فيها لمجرد الاعلان ادري محد يشتري زحمه ع الفاضي بس ابي أعرّف عن نفسي كـ فنانه ومصممه كويتيه

- الي عندها طموح وودها تفتح محل بالمستقبل لازم تعرف شلون اتيمع ارباحها من المعارض
ماتصرف اول بـ أول وهذي غلطتي , لأن المعارض سلبيتها ان صعب تطورين تجارتج , وانا كنت الي اطلعه من المعرض اصرفه داخل المعرض

- وحالياً من بعد تعب السنين قررت اترك المعارض فتره واشتغل ع الطلب بس لأن زبايني صارو عارفيني ويعتمدون على ذوقي واستقبلهم عندي بالبيت
ومابي ارجع للعرض الا وانا معاي فكره يديده ومميزه مثل ماعودت الناس, وبنفس الوقت ابي اتفرغ لتعلم تكنيكات فنيه حرفيه يديده

- اطير من الفرحه لما اشوف اي شخص عنده حرفه ويشتغل بيده وينتج اشجعه بكل مابيدي من وسائل والحمدلله الي ساعدتهم وايد من غير ذكر قصص واسماء, وكوني اعرف حق الفوتوشوب اصمملهم شعاراتهم و اعلاناتهم دعماً لهم رغم اني حالي حالهم ابي من يدعمني ..بس التعاون حلو
وانتو اي احد يبي شي لايرده الا لسانه ,, احب ادش معرض القى الكل متحمس للابداع والشغل

هذا مشواري باختصار
والله يوفقنا و يوفقكم

 

[أبلة فاتن]

ودي اشتري من بعض الاخوات اللي يسوون مشغولات يدوية بس صراحه الاسعار مبالغ فيها

في محل باحدى مجمعات السالمية صاحبته كويتية بس بضاعتها اقل من عادية بس في شوية اشياء

كان ودي اشتري بس استخسر فيها اكسسوار بو شوية ترتر ومادري شنو ب 10 !!

شدعوه عليهم عموما كل مشاريع بنات الديرة ما حبها لان الاسعار مبالغ فيها توني دشيت

الانستغرام واحد حاط غوري شاي وبيالت مزخرفه ب 71 دينار ههههههههههههه

يقول بولندي ههههههههه

​

 

[AFRoDiT]

عزيزتي ابله فاتن
انا معاج ان البعض يبالغ بالاسعار

بس 10 وايد زين بالنسبه للهاندميد
السوق كله شغل الصين على 10 وفوق

بالاضافه الى ذلك ..

مو كل من شرت شوية كلف من البلوكات ونسقتهم بشكل حلو ولا شكتلها خرزتين صارت فنانه و مصممه ..مع احترامي للي يسوون جذي
بس اغلبهم يبالغون بأسعارهم بشكل خياااااااااااااااااااااالي ..


وياريت الخوات الي يشترون هاند ميد دايماً يحطون نفسهم مكان المصممه

يعني لو انتي الي مسويه القطعه وتعبانه فيها بجم تسعرينها للزبونه؟

 

[الباسمه]

انا معاج حبيبتي ولكل مجتهد نصيب وهذا تعبكم
انا اذا الشغل احترافي وفيه فكره ماعندي مانع اقط اكثر
ليش نستغلي على بنات ديرتنا والغير يجيب بضاعات من لندن والا الصين ويضرب بالعالي مع العلم انه التسعيره وحده بكل الدول
عموما بالتوفيق كويتيات خواتنا واهم شي الابداع والاتقان والتميز
عساكم عالقوه