أعيش حالة حزنّ هذي الأيـام ( ساعدوني )

[مهوب لآزم أسم]

السلام عليكم

بنات عفيه بقولكم سالفتي حححدي منضايقه من نفسي وأبيكم تساعدوني
بنات تعرفون المقرود بحياته وين مايطقها عويه هذي أناا
بنات صارلي فتره طويله طويله من تخرجت من الجامعه ماحصل لحياتي اي تغييير
بنات عمي وبنات خوالي وبنات جيراننا وصديقاتي الي تزوجت والي توظفت والي ملكت ربي يهنيهم بس ماظل غيري لاتوظفت ولاتزوجت وانا من فتره أنتظر ساعه فرررح بحرقه وحزن
بنات انا عمري بدخل الـ 29 سنهّ. ماأنخطبت أبد أبد أبد
والله يابنات انا بالزين ماينقصني شي وبالاخلاق كذلك وماأزكي نفسي
محافظه ع صلاتي إنسانه هادية جداً وطبعي الأحترام
دعيت وصليت طبقت الرقيه الشرعيه للي تتاخر عن زواج لزمت الاستغفار وصلاه الوتر

لازلت أدعي ولازلت متفائله
بس جد ججد بنات نفسي محبطه للاخر

فجاااه يابنات وقفت عن الاستغفار ووقفت عن صلاة اليل ووقفت حتئ عن الدعاء بكل ووقت وكل حين

بات نفسب صاارت محبطه الدمعه تنزل من عيني ع اقصر شي
بنات الكل صار يتكلم فيني اني جمال واخلاق وبنت عايله معروفه ليش للان ماتزوجت
اوقات فيه ناس صارت تبعد عني لمن تشوف ذا الزين ومحد تقدم لي

يظنون فيني عيب او شي
والله يعلم بحالاتي الان جف لساني عن كل شي موقنوووط لازال التفائل موجود
بس تبلد أحساسي

عفيه بنات ابيكم تدلوني ع اشياء ترجعني للدعاء والاستغفار
والاهم صلاة الوتر حدي مشتاقه لها بس فيه تبلد باحساسي يخلينه اتهاون فيها

تكفون ادعولي بالي يسرني والله والله صارت دمغي نقطه ضعفي
بعد ماكانت اقوئ من القوي

حتئ جسدي بدا يتعب من التفكير والارق والمغاث
قل النوم عندي وصرت انمرض بين فتره وفتره

والسبب التفكيررر ووضعي
الله مقلب الاحوال اساله بكل اسم هو له ان يقلب حالي من احسن حال يارب

بنات انا برجع لسجادتي ووقراني
ججد ججد أبيهم

خايف يصيبني قنوط لان دايم اقول بيني وبين نفسي انا دعيت كثير واستعغفرت كثيرر
وخالي هو خالي وغيري مايهتم ولايتعب

وهذل هو متهنيي وسعيد

اللهم لاأعتراض
ربي لاسالك رد القضاء ولاكني اسالك الطف فيني

دعواتكم + نصائحكم

جسدي الضعيف ماعاد يتحمل حزن اكثررررررر من الي انا فيه
خايفه ع نفسي وصحتي*

 

[dalo0oa121]

احمدي ربج عندج شهادة جامعية تقدرين بأي مكان
توظفين يعني ماناقصج شي وانتي ماشاء الله تقولين
جمال وحلا وكل شي فيج حلوو ليش تزعلين وتتضايقين
في ناس عندهم السرطان في ناس عندهم تشوهات خلقية
في ناس مايمشون في ناس مايجيبون يهال يعني احمدي
ربج على النعم اللي انتي فيها واشكري ربج والزواج
قسمة ونصيب مته مالله كاتب لج بيصير لاتيأسين
بيجي اليوم اللي بتفرحين فيه وتفرحين هلج وانتي يمكن
تحسين بشهالشعور بسبب الفراغ وقعدة البيت حاولي تسافرين
تغيرين جو تغيرين من شكلج نيو لوك يمكن تتعدل نفسيتج
اقري مجلات عن الموضة او تعلمي الطبخ وانا ترا نفسج
بس انا مب جامعية وجمالي عادي واقل من عادي لكني
انتظر وصابرة وكل شي بيد الله مب بهالدنيا احنا نقرر
شنو راح يصير احنا بشر مانضر ولاننفع بس
اللي اقدر اسوي لج اني ادعي لج يارب ان شاء الله
يعجل فرحج ويرزقج الزوج الطيب امين عاجلا غير اجل
ويحقق لج امنياتج

 

[لمى الهاجري]

انا حالتي نفس حالتج بس انتي الحمد لله لك الحمد عندج شهادة جامعية وفوق هذا عندج رفيجات انا ماعندي والزواج نصيب ويمكن لو حد تقدم لج اهلج يرفضون ما تدرين يالله كلنا نبي نتزوج بس الظروف منعتنا والحمد لله على كل حال

 

[طعنـــة غـــدر]

ربـــي يرزقج من واسع نعيمه وان شاء الله تتوظفين باقرب وقت الوظيفة اريح من الزوااج وان شاء الله تتزوجين منو يسعدج يااارب

 

[هيبة فتاه]

ااااااااااااخ همخ ما يلتم انا نفسج وظروفي العن ما اقدر حتى اشرح الله كريم

 

[ام الدرر]

ياحياتي
هذا ابليس يقنطك من رحمة ربي
ادع واستغفري واجتهدي وانت موقنة بالاجابة
اذا ماكان بالدنيا فباذن الله بالاخرة
اسال الله العلي العظيم ان يمن عليك برحمة وفرج من عنده
ويكتب لك من كل هم فرجا ومن كل ضيق مخرجا
ويرزقك من حيث لا تحتسبين​

 

[** شمس **]

إنّ الله تعالى خلق الدنيا وجعلها دار ممرٍ وليست بدار مقرّ، وحفّها بالمحن والابتلائات وغمرها بالمصائب والفتن.. لحكمة جليلة ذكرها الله تعالى في قوله : { الذي خلق الموت والحياة ليبلوكم أيكم أحسن عملا وهو العزيز الغفور } [ الملك : 2 ]
فالدنيا هي دار التكليف والعمل وليست بدار النعيم والأمل.. ومع ذلك فقد غفل كثير من المسلمين عن تلك الحقيقة ! فإذا أقبلت المصائب والابتلائات (والدنيا لا تخلو منها) ترى الناس يفزعون، بل ويتسخّطون على قدر الله، وذلك لأنهم لم يتحصنوا بالإيمان عامة، وبالإيمان بالقضاء والقدر خاصة الذي هو أصل من أصول الإيمان. ومن تأمل في أحوال الخلائق علم علم اليقين أنه ما من مخلوق إلا وكان له نصيب من آلام الدنيا وأحزانها… كما قال عبد الله بن مسعود رضي الله عنه ” لكل فرحةٍ ترحة، وما مُلئ بيت فرحاً إلا وملئ ترحاً ” والمؤمن هو الذي يعلم أنه مسافر إلى الله، وأن كل ما هو من حطام الدنيا فسوف يتركه لا محالة.. إما بالفقر أو بالموت،

 

[نونه المنكوشه]

حبيبتي تري اللي اتمرين فيه طبيعي لانه احنا بشر وساعات اتينا مثل هالحالات بس انتي حطي ابالج هذي الدنيا فانيه وماراح انكون فيها ع طول انتي ضامنه بتعشين باجر محد ضامن فعلشان جذي خلي كل شي ع الله انتي سوي اللي عليج والباجي ع الله انا ساعات ايني نفس بس اشوف حال اللي حولينا واقول الف الحمدالله ويكفي نعمة الصحه هذي بحد ذاتها اكبر نعمه وكل تاخيره فيها خيره والله يرزقج من واسع فضله

 

[أنسأنة غير]

قرب اجابة الدعاء تحسين نفسك تكسلتي يصيبك كككسل تفكرين ان مراح تتزوجي هذا ربي يختبرك ياليت ماتركتي هالشي وشفتي العجب سبحاان الله ربي يختبر العبد وانا مريت بهالشي
الله يوفقك اهتمي بصلالاتك والاستغفار ورضى الله وكوني صلاتك علىى موعدها ولاتفكككرررين ابد بالزووااج تخيلي انك متزوجة وابتسمي واتوووكي على ربي وووشووفي العجب



بالتوفيق,,

 

[زهرة دلقينيوم]

الله المستعان لو تشوفين مصايب الناس تهون عليج مصيبتج قولي الحمدلله انت بخير
واذا على حالج انه مافي شي تغير فالسبب انتي تحركي سوي شي يعني حاولي انج ماتقعدين بروحج راجعي نفسج شوفي شنو السبب اللي يخليج جذي راكده

 

[فراشه بيضا]

خلي عندك حسن ظن بالله
انا ظروفي سيئه اكثر منك
والحمدلله على كل حال وطلبت المساعده من كل البشر محد قادر يحل موضوعي بنسبه حتى 1 %
مالي غير الرحمن اللي قادر على كل شي
يحققلي اللي اتمناه
عندي امل كبيررررررررررررررررررررررررررررررررررررر بالله يفرج همي
ولا تخافين ماكو ليل يطول لابد من فجر جديد
الحمدلله

 

[وردة الدوحه]

sort elbakara

3n tajroba

iqreha kl youm

 

[بطوووطة$بيضة]

حبيبتي هذا نصيب

الله يرزقج انشالله على قد نيتي

 

[om MaRyooM]

ليش مأزمة الامور ؟؟!!!!!

الحمدلله عايشة بنعمة
وبعدين كل شي ربج كاتبه لج بيصير لا تخافين ولاتستعجلين
ويمكن لو تتزوجين تقولين وينك يابيت اهلي

كل شي يصير بحياة البني ادم في حكمة ورحمة من رب العالمين

اذا كان عندج مجال تروحين للعمرة روحي وانشالله بتتحسنين

واقري بعد كل صلاة دعاء تيسير الزواج

 

[ترنيمة سكون]

نفس حالتي

آآآآآآآآآآآآآآآه من اعماقي اكتب لج وانا اصيح

نفسيتي سيئه لدرجه ماتتصورينها بس الفرق اني انا ملكت وانفصلت يعني الحين على همي فيه هم وعلى جروحي فيه جرح

وحيده خواتي متزوجات وموظفات وانا لوحدي بالبيت وامي مو موجوده وصديقات ماعندي يعني وحيده وحزينه ومهمومه


تخيلي حياتي فاضيه مافيها ناس ولا زواج ولا حتى دراسه متوفقه فيها للحين ماخلصت جامعه


شقول اكثر فيني غصه وحزن وهم ووحده فوق ماتتصورين مخنوقه


الله يفرج همج وهمي يااااااااااااااااارب قريبا عاجلا كلمح البصر أو اقرب ان الله سميع قريب مجيب

 

[معزوفة عشق&]

لا تقولين ع نفسك حظك مقرود بس قولي الله بعد ماكتب لي وكل شي حلو بيجيني بس لاجل غير معلووم
وثقي تماما ان البني ادم مايموت ولا ورزقه كامل اصبري واحتسبي اجر صبرك من الله ..
استعيذي بالله من الشيطان الرجيم واتوكلي ع الله وكرري يارب اعني على ذكرك وشكرك وحسن عبادتك ,, عاندي شيطانك وماخاب من قال يااااارب ..
لا تقولين سويت وفعلت وعملت ووو... الحي في الدعاء والزمي الاستغفار والبقرة والصلاة عالرسول الكريم وشوفي كيف ربي يغير حالك لاحسنه باذن الله بس اهم شي توكل وحسن ظن بالله..ولاتخلي همك الدنيا قولي ( يارب اجعل همي الاخره )
اسال الله ان يحقق لك كل ماتتمنين ويسخر لك كل من حولك ياارب ..

 

[دلوعة أبوهآ]

مآبي أقولك كلآم مثآلي وانه المفروض مآتفكري بالزواج
لآن الحياه والسعاده مو بالزواج
صعب اقول هآلشي لاني ادري انه كل بنت تحلم بيوم زواجهآ وانهآ تكوّن بيت خآص فيها وتجيب آطفآل وتحقق الامومهـ
لكن كل شي بيد رب العآلمين ولكل شي سبب وحكمه احنآ نجهلهآ ..
ولو ندري ليه الله مأجل الاشياء اللي نتمنآهآ كان حمدنآه الف مره ..


بس بنفس الوقت لآزم الانسان يعمل بالاسبآب
اسباب الرزق وأسباب السعآده ..

حآسبي نفسك وتصرفاتك واعمآلك ..
شوفي كيف صلآتك وخشوعك ..!
التزمي بسورة البقره يومياً و يس ..
آقرأي سورة الملك يوميا قبل النوم ..
استغفري كثير , صلي ع الرسول ,
رددي ربي اني لمآ انزلت الي من خير فقير ..
حسبنا الله سيؤتينآ الله من فضله انا الى الله راغبون
ربي لآتذرني فرداً وانت خير الوارثين ..
حسبي الله ونعم الوكيل ..
حصني نفسك يومياً بالاذكار

النت مليآن محاضرات لشيوخ رائعين يتكلموآ عن هالامور
فضل الاستغفآر والادعيه والاذكار
اقرأي مواضيع كثير آستفيدي وتعلمي ..



وآلله يرزقك الزوج الصالح عاجلاً غير آجل
ويرزقك الوظيفه وكل اللي تتمنينه

 

[خجل انثى]

حبيبتي والله حاسه فيج
انا عمري 32 سنه مو متزوجه واهلي متوفين وكل البنات الي بسني والي اصغر مني متزوجين
وماباقي بالعايله غيري
تصدقين اتعب اذا باروح لتجمع وياهم كلهم ينظرون لي نظره شفقه مدري شو
بس الواحد يحمد ربه ويقول الحمدلله ع كل حال وانا الحين اتقرب اكثر لرب العالمين وعسى الفرج قريب
ع الاقل انتي عندك ام وعندك اب تناديهم _ بس انا وش اقول ياما تمنيت امي تكون جنبي ولا ابوي
بس للاسف ابوي توفى وانا عمري تقريبا 6 سنين وامي توفت لما عمري 20 سنه
والحياه ماشيه _ فقدت اهلي وعزوتي الله يرحمهم
مافيني ابكي وانا اكتب والله العالم والشاهد وش قد صارت لي مواقف ماترحم ربي يرد كيد كل من كادني بنحره ويارب كل من وثقت فيه وخان ثقتي فيه وريني فيه عجائب قدرتك
الفرج قريب
وربي ما راح ينسى ولا دمعه نزلت من عيوننا ولا ينسى الامنا واحزانا كل شي بأجره
وصدقيني بكره راح تضحكين وتسولفين عن ايام العزوبيه وراح تحنين لها
:yaaaaaarb:يارب وفقنا بأزواج صالحين​

 

[تبسم لمغليك]

حبيبتي الله يصلح حالك ويرزقك ويردك لطاعته ردا جميلا اختي الغاليه موشرط كل الناس لازم يتزوجون تحت الثلاثين لا ياحبيبتي والزواج سبحانه وحده كاتبه لك متى يناسبك يعن انا بنت اعرفها والله اكبر خواتها وعمرها اربعين والله تزوجت واحد عزب ومزيون واخلاق ومهندس وملتزم ومدللها الله يهنيها مايشوف الاهي وعوضها عن كل شي يعن لاتقنطين ولاتملين بالعكس الزواج صح ستر بس تبي تنطوين وتقعدين تقولين انا ماتزوجت والله تهمين نفسك وتمرضينها لاحبيبتي اشغلي نفسك بما يفيدك يعني اشتركي بدورات وغيري موبشكلك ولبسك وتهملين نفسيتك لازم تنظرين لنفسك من الجانب المشرق يا حياتي الرزق مو بس رجال لا الرزق نعمة العقل والتوحيد وصلتك بربك وصلاتك وقيامك وعبادتك وطمئنينة القلب والسمع والبصر ووسلامة البد والحركه والتنفس الله يمتعك فيهم حبيبتي حرقتك على صلاتك وعبادتك سببها اكيد قسوة القلب اراجعي نفسك انت ترا بعض الذنوب تمنع الطاعه اختي اسمعيني ماتقدرين تروحين دورات عنك اليوتيوب دوري الي يناسبك واسمعي مقاطع للشيخ محمد محمد الشنقيطي وعبد المحسن الاحمد والله لتغير نظرتك ان سمعتي لاتحزن لعايض القرني لان فعلا اذا شفت نفسي مليت اسمعه واسمعي محمد حسان اسمعي المقاطع اله للمشايخ انصحك بالشنقيطي عجيب وطيب اشتركي بحلقات المساجد النسائيه سوي جدول لك احضري دروس تلين القلب طولت عليك بس الله يغنيك بحلاله عن حرامه ويشغلك بطاعته عن معصيته ويرزقك بالزوج الصالح

 

[فآنيلا]

بسم الله عليج
لاتكدرين خاطرج هالكثر ع الدنيا
الزواج قسمه ونصيب وانتي نصيبج ماجا
ماتدرين الله شاللي كاتبه لج
يمكن قاسم لج احلى رزقه بس يمتحن صبرج
لاتأيسين من رحمة الله الواسعه قوي ايمانج با الله
ولاتتحطمين من كلام الناس لا جاج شي من هالحزن اللي انتي حاطه نفسج فيه
بشنو ينفعونج
لاتنتظرين احد يجي ويفرحج ترى الناس تنفر من الانسان المكتئب الكل كافيه اللي فيه انتي فرحي نفسج
وانتظري البشاره والفرح من الله
والله يرزقج إن شاءالله