أعـامل رفيجــتي جنها تشتغل عنــدي -مشـكله- !!

[عود جبريت]

قوه خـــواتي :*


شوفوا الله يسلمكم قبل لا ادش بالموضوع ترى انا وايد وايد وايد طيــــــــبه وصديقه وفيــه لأبعد الحدود وكله افزع مع رفيجاتي ضد اي شخـص يضرهم

الحين ندش بالموضوع:

انا رفيجاتي ماشاءالله وايد وكلنا كبر بعض 21 سنه, بس طبعا لازم تكون وحده بينهم مفضله بالنسبه لي!!

بس مشكلتي اني اعاملها جنها تشتغل عندي يعني اصارخ عليها واتأمر واطرشها وافشلها جدام البنات والمشكله الاكبر انها عادي عندها ترضى والله اتمنى مره تزفني او تجعمني بس مااااااااكو

واذا بنطلع تقول وين تبين (اهيا اللي تسوق طبعا) اقول سوقي وانتي ساكته وانا اختار الاماكن وانا اختار الوقت واذا تأخرت ياوييييلهاا لوووووول والله كاسره خاطري كل يوم اقول اليوم خلاص بعاملها عدل ومراات اقعد افكر بالليل واخطط انه باجر اذا سوت جذي بسوي جذي ومن اقوم اليوم الثاني ارد نفس ماكنت!! ماقدر ماقدر ماقدر

شكثر بنات قالولي حرام عليج ليش جذي بس احس عادي لأنها ساكته وتسوي اللي ابيه يعني لو مو عاجبها ليش ماتقول مابي مثلا يعني وترى اهيا نوعها نفسيه وعصبيه وكذا مره شفتها تتهاوش شوي وتمد ايدها واهلها يخافون منها بس معاي انا لا مادري ليش تصير وحده ثانيه

وفوق هذا كله مو اهيا وبسس!! كلهم عادي ازفهم واجعمهم
سواء صديقات المتوسط والا الثانوي والا الجامعه معقوله ولا وحده تقولي انطمي جب شي مني مناك

انا ادري انهم يحبوني بس انا لو وحده تقولي كلام نفس الكلام اللي اقوله لهم جان لعنت خيرها!!

بس يسكتون وااااااااي يبطون الجبد والله

ولما ازفهم واصارخ عليهم عقبها بدقايق ارد اسولف عادي يعني مفروض مايكلموني بس عادي يردون يسولفون معاي جنه مو صاير شي.. انا استغرب!!

ومرات اقول خل اغيب عنهم فتره يمكن متحمليني مجامله بس لاتشوفون يطلعون لي بكل مكان يدقون مسجات واتساب بكككككككككل مكان ودي اسألهم شتبون فيني يعني لووووووول احسهم مو صاحين

المهم الغرض من الموضوع ابي وحده تقولي ليش كل رفيجاتي جذي؟ الغلط مني والا منهم؟

وشلون اتخلص من عصبيتي؟؟ لأني عود جبرييييييت خلاص مابي ازف احد ولا اسوي مشاكل

ومشكورين وماقصرتوا والله يحفظ لنا الكويت واهلها من كل شر

 

[عود جبريت]

اي ونسيت اقول شغله احنا مو من زمان رفيجات يعني صارلنا 3 سنين تقريبا والباجي لا قدم

 

[أإلع ـشق دلع ـهـأإ]

رفيجتج هذي شكلهآ طيبه وسآكته من بآب الميآنه أولآ ..

وثآنيآ أكيد سآكته وموعآجبهآ طريقة تعآملج س مو من طبعهآ تغلط عليج لآنج رفيجتهآ ..

وصدقيني عبآلج رفيجآتج عآجبهم طبعج !!

غلطآنه والله شكلهم بآلعينهآ وسآكتين لآنهم مآيبون يحرجونج ويدرون إنج موقآصدتهآ

ولأنهم يحبونج سآكتين ..

عندنآ بنت قبل بالكليه نفسج والله جم بنت من ورآهآ قآلوآ هذي قآمت تأمر وشآفت نفسهآ و و و

يعني حشو من ورآهآ


اللي عليج هذولآ رفيجآتج وسآكتين لأنهم يحبونج ويعرفون إنه اللي تسوينه مو من قلبج بس يآحبيبتي كل شي زآد عن حده ينقلب ضده !!

يمكن بآجر وحده منهم تنبط منج وتقعد تغلط عليج ويقومون كلهم معآهآ ..

حآولي قد مآتقدرين تغيرين الطبع الخآيس لأنه بيفقدج بآجر نآس عزيزين


وأنتي مبين عليج طيووبه وحبوبه وتحبين رفيجآتج والميآنه طآيحه بينكم


الله يخليكم لبعض

 

[لحظآتَ]

كلام العشق دلعها صحيح !

أنا لو وحده تزفني وتهاوشني والله اقعد ابجي أول شيء
بعدين أستجمع قواي وأروح ازفها <<< اخسسس يالقوية


,

لا صج كل شيء الا المعاملة السيئة
حتى لو صديقتي يعني
لازم يكون فيه شوية احترام

وصديقاتج ساكتين من حبهم لج واحترامهم لج
اجل انتي تكافئينهم على سكوتهم بإن جيلة الهواش والزف تزيد ؟؟؟


,

بالعكس مفروض تسعين بكل الوسائل انج تتغيرين للأفضل لإنهم ياما صبروآ عليج !

 

[teen girl]

تذكريني بوحده من رببعي
نفس حالتج بالضضضضبط
وانا تقريبا نفس رفيجتج هذيك
لدرجة انه فيه بنات قالوا لي : هي ليش تعاملج جذي؟ ليش ماتحبج !
وانا عارفه انه قلبها طيب وتنحب بس مشكلتها عصبيتها صح قلبها طيب بس محد يعرف الا اللي يعرفونها
و صح انا مرات واااايد اتحسس منها واتضايق بس ماابين لها ابدا

يعني باختصار ~ انتي بهالطريقة تعرضين رفيجتج للكلام فـ حاولي مع نفسج واضبطيها

 

[جلكسيه اس 3]

تذكري انه كل شي اتسوينه بدنيا متسجل ملكين واحد على يسارج والثاني على يسارج
طبعا ما يجوز وحرام الواحد يتعامل هالمعامله حتى لو انهم راضين و ساكتين
و اعتقد انج عارفه الغلط مو فيهم. فيج انتي
فلازم تتعاونين مع نفسج اكثر و تغيرين
فكري بكلامي و راح اتشوفين انه

 

[ام حسين 80]

يمكن لانهم عارفين قلبج طيب و عشرتج حلوة و مطوفين حقج عصبيتج المؤقتة

لا تمصخينها يمكن على يوم يبتعدون عنج و انتو تحبون بعض

 

[أأأحبه]

يمكن مايبون يزعلونك
اكيد مو عاجبهم الوضع
بس حرام تسوين كذاا معاهم
اوكي عصصصبي بس مو تغلطين
وتقللين من احترامهم !
حاولي مره ثانيه وثالثه ورابعه
حرام تخسرينهم علشان انك عصبيه بس

 

[الهنوؤوفـ]

منو انتي حتى تعامليهم كذا منو انتي حتى تأمري على البنت منو انتي حتى تزفيهم

اسالج سؤال انتي ترضي احد يعاملج كذا اكيد لا بس ترضي تشوف احد يعاملج اختج كذا اكيد لا والله لترويهم الويل

ولا هم يرضون على انفسهم بس هم عندهم احترام النفس واحترام الناس تعلموا على اشياء صح انا اقولج انا تربيت نفس تربية البنت اني لو شو يقولون ما ارد على احد لان الحقران يقطع المصران

انتي اليوم كذا تعامليهم باكر ربج يخلي لج ناس قريبين منج حيل يعاملوج نفس المعاملة وانتي ساكته ما تقدري تسوي شي ولا تردي عليهم

حبيت اذكرج بشي من حياة سيد البشرية محمد عليه افضل الصلاة والسلام كان عنده خادم والخادم يقول:لي عند رسول الله سنين ولم ارد من سوءا قط...........تخيلي هذا خادم فما بال الصديق

اختي انتبهي لتصرفاتج عاملي الناس نفس ما تحبي انهم يعاملج

انا اكره شي فحياتي وهو الاحراااااج كيف ترضي تقولي لربيعتج سوقي وانتي ساكته ياربي شو هالسلطه بصراحة لج قواة عين والله على فكرة حاولي تغيري من اسلوبج ترى ما حلووووو ابدا وزفت زفت زفت وايد لان كل ما كبرتي يكبر الطبع وباكر وراج مسوولية كذا راح تعاملي الناس

اقل شي تسويه في حق ربيعتج ان تيلسي انتي وهي وتتسامحي منها او ارسلي لها مسج اعتذري لها على الاقل صدقيني ما تعلمي يمكن هي تفكر ونفسيتها تعبانه ليش ربيعتي كذا تعاملني بس ما تبين لج تشكي لغيرج صدقيني

هم كلهم اخواتج ليش كذا المعاملة ليش التكبر على الناس

لا تخلي البنات يتكلموا عن تربيتج

كل ما حسيتي بعصبية استغفر الله وذكري الله وصلي على النبي وان شاء الله تروح العصبية وراح تتغيري ان شاء الله دام انج عندج عزيمة حراااام اختي تخسري صديقاتج

 

[عادت ذكرياتي]

كل شي يزيد عن حده ينقلب ضده


ولا صار حبيبك حلو لا تاكله كله


واتقي شر الحليم إذا غضب

 

[Queenleo]

كما تدين تدان
وابشرج
تمي على هالطريقه الين يكشون منج الناس واتمين بروحج
واخر شيء انتي الي بتلزقين فيهم
هذا اذا الله ماسلط عليج بنات يعاملونج بالمثل
ولاهي شطاره انج تتعاملين مع الناس جذي
لان الواحد شنو يبقاله بالدنيا غير ذكر طيب وناس تدعيله ووصحيفه متروسه حسنات
خلج على اسلووبج الين تطلعين من الدنيا مفلسه ايد ورى وايد جدام
وهذه الي مصخرتها اهيا الربحانه لان كاتم الغيض انذكر بالقرأن وبالسنه
وله اجر عظيم عند الله خصووصا اذا كان قادر يطلعه

 

[solitude]

يمكن يسكتون خوف منج مب حب
حسني اسلوبج وياهم لاتخسرينهم ومايبقالج حد

 

[Killer^Girl]

اهمه محترمينج
الدور عليج تحترمينهم
كل شي له حد
ولولا معزتج ماصبروا عليج

 

[سفييره الكويت]

شخصيتج متسلطه وهذي الشخصيه مرض عالجيها بنفسج قبل ما تتفاقم هالمشكله تستغلين طيبه الناس اذا سكتت من طيب اصلها

عدلي من نفسج اسلوبج غلط ..!

 

[أسيرة_أحزاني]

وايد معطينج ويه

يمكن يعتبرونها ميانه بس مصختيها مثل ماحترموج احترميهم

 

[ya al3rosa]

الغلط منج طبعااا
اقولج ليش لانهم
يحـــــــــــــــــــــــــــبـــــــــــــــــــــــــــــــــــــــــــــــــــــــــــــــــــونج وما يبــــــــــــــــــون يخســـــــــروووووووووووووونـــــــــج فعامليــــــــنهم مثل مـــا يعـــــــــاملــــــونج بــــــاجر لى هـــدوووج ببتحسفين صدقينى لان ماكو بــــــهالزمن صـــديق واااافى والصــدوووقة

 

[SuGar-kuw]

انتي اعصاب جنج تحجين عن اختي جذي داايم اسلوبها خايس بس اتحملها لان اختي الله يعينها عليج

 

[Môre N!Ce]

دامج عارفة غلطج صححي من نفسج !!

وين المشكلة بالضبط ؟

:\

 

[عود جبريت]

وااااااااااي بنات قريت كل ردودكم وحسيت بالذنب :\

انا اساسا ادري انه غلط بس كتبت هالموضوع لانه ابي احد يقولها لي لاني مو حاسه انه شي غلط محد محسسني بهالشي

وفعلا كل يوم افكر مثل ما قلتوا انه ممكن خلاص مايتحملوني ويكرهوني

الله يعلم اني دايما اقول خلاص هذي آخر مره بس مااااااااااقدر شي صعب

 

[عود جبريت]

دامج عارفة غلطج صححي من نفسج !!

وين المشكلة بالضبط ؟

:\

اي عارفه المشكله بس مو عارفه الحل شلون الواحد يصير ريلاكس وشلون اصير من النوع اللي ما يطنقر بسرعه

شي متعب صراحه