أسناني فيها بروز بس مابي تقويم!!!!!!!!!!!!!

[kanana]

السلام عليكم

الفك العلوي عندي شوي بارز و يتلاحظ هالشي في حالتين اذا بضحك و اذا بتكلم و بضم شفايفي لان شفايفي اصلا مليانين يصير شكلهم غلط
ابي اعدلهم من غير تقويم لاني ما اتحمل شكل التقويم في وجهي صراحة واللي اعرفه ان التقويم يضعف الوجه و انا وجهي بيضاوي مايل على طول يعني احسه بيصير كريه لو يضعف زيادة

سمعت انه في عمليات جراحية تعدل الفك و تحسن شكله من غير ما نتحمل التقويم لمدة طويلة و انا بنفسي شفت في برنامج the swan يسوون لهم عمليات تجميل للاسنان و بعد 3 شهور يظهرون اسنانهم روووعة !!!!!!!!!!!!!!!!!!!!!
عندنا هالشي في الخليج؟؟؟؟؟؟

 

[كويتية أمورة]

مشاركة: أسناني فيها بروز بس مابي تقويم!!!!!!!!!!!!!

شوفي اول شي الاسنان اذا مخلية الفك بارز معناته لازم تقويم
اذا ماسويتي تقويم واكتفيتي بالتلبيس السيراميك او البورسلان اللي تشوفينه ببرنامج ذا سوان هم بيظل الفك بارز بس الضروس سيدة وبيض
شفتي الصمخة الشقره اللي بذا سوان؟ شفتي شلون سووا ضروسها سيده بس موحلوين لانه وايد بارزين بس لو مسوية تقويم جان دشوا لي داخل وصاروا حلوين
انا كنت بسوي نفسج بس شحقه الاحسن انج تعالجين المشكله من عرجها وترى التلبيس هذا له مشاكل ووايد ناس اشتكوا انه يطلع ريحة ويخلي اللثة تلتهب
شوفي عيادة الحكمة بحولي بمجمع البلازا عندهم دكتور هندي ممتاز خلال سنه انتي مخلصة وترى السنه دقيقة تطوف ماتحسين فيها
احسن من اللي ياخذون جم سنه ولاتتعدل ضروسهم
وتدفعين على دفعات اول ماتروحين 300 او 400 وبعدين كل شهر 50 لين تخلصين

هذا رقمهم 2641445

انا ان شاء الله بسوي عندهم

 

[ريفيل]

مشاركة: أسناني فيها بروز بس مابي تقويم!!!!!!!!!!!!!

انا اتفق مع كويتيه امورة حجيها صحيح والسنة تشك بم خلصت

 

[بريسم]

مشاركة: أسناني فيها بروز بس مابي تقويم!!!!!!!!!!!!!

فيه الحين التقويم الخفى اللى ينحط من داخل ما يبين

اتوقع هذا بيحل مشكلتج

 

[كويتية أمورة]

مشاركة: أسناني فيها بروز بس مابي تقويم!!!!!!!!!!!!!

لا ترى مو زين الخفي اولا يأذي تخيلي بيشقق لسانج كل ماحاش الحدايد وثانيا يطول اكثر لانه مايشد نفس التقويم العادي
قلتلج روحي الحكمة ترى انا شايفة شغلهم عجيب هالدكتور الهندي ونظام الدفع مريح ومايطول سنه وتخلصين ان شاء الله

 

[kanana]

مشاركة: أسناني فيها بروز بس مابي تقويم!!!!!!!!!!!!!

خواتي يمكن ما فهمتوا علي
انا اسناني مافيها شي الحمدلله بس الفك اهو اللي فيه بروز
يعني لما اضحك تطلع اللثة شوي و هالشي اللي مضايقني يعني البروز من الفك نفسه مو من اسناني
وانا سمعت ان فيه جراحات تصير بس للفك اذا الاسنان سليمة!!!!!!!!!!!!!
ما تحجيت عن التلبيس و هالسوالف هذي اشيا ثانية اتوقع

 

[الكرملين]

مشاركة: أسناني فيها بروز بس مابي تقويم!!!!!!!!!!!!!

اذا تقصدين ان اللثه العلويه نازله في وحده سوت عمليه لهلمشكله بطيبه كلينيك وقصو لها جزء من اللثه تغير شكلها حيل حتى خشمها صار احلى وشكل الوجه صار احلى الكل منهبل من التغير الفظيع اللي صارلها

 

[لمسة فن]

مشاركة: أسناني فيها بروز بس مابي تقويم!!!!!!!!!!!!!

بالضبط أنا مع شاطره ....
أنصحك بالدكتور حسام عبدالباقس في عيادة الفوزان ..
إنت عندك البروز في " خط الإبتسامة " ..
وأنا شفت نفس حالتك بالضبط عنده ... قام بقطع جزء بسيط من اللثة
وقص شوية من الأسنان بعد اللثة حتى يتوازن كشكل عام ...
توكل على الله ... وروحي له .. وإن شاء الله ما عليك إلا العافية

 

[متميزه]

مشاركة: أسناني فيها بروز بس مابي تقويم!!!!!!!!!!!!!

شوفي حبوبه ..انا بقولج سالفتي لعل يصير فيها فايده لج

انا نفس الشي الفك الي فوق بارز شوي رحت على اساس بسوي تقويم ..

ركبولي جهاز يسموونه ال هد قيير .. مشيت معاهم سنتين تقريباً

عقب مليييت عاد باقيلي 4 ملي و اخلص يعني .. هونت و ما رحت عقبها !

الحين لو ابي ارجع مره ثانيه لازم ابدي من الصفر .. يعني اروح المستوصف و يعطوني تحويل للاميري من جد و جدييد

 

[كويتية أمورة]

مشاركة: أسناني فيها بروز بس مابي تقويم!!!!!!!!!!!!!

عاشقة الدار شنو هالجهاز اول مرة اسمع فيه؟؟

كنانا روحي حق عيادة ابها في دكتور ولد العلي ممتاز وهو تخصصه لثة وهالسوالف
وان شاء الله بيحل لج المشكلة والدفع على دفعات بدون فوائد

 

[kanana]

مشاركة: أسناني فيها بروز بس مابي تقويم!!!!!!!!!!!!!

اختي شاطرة اهي البنت سوت عملية و خلاص؟؟؟؟يعني شكثر وقت خذت لحد ما تشفى و كم كلفها
بس يمااا احس يخرع ان يقصون اللثة!!!!يعني ما بيأثر على مضغ الاكل و النطق!!!!!!!!!

عاشقة الدار و اشصار عموما ما صار لج تحسن؟؟؟؟وانتي ليش تهدين العلاج قبل ما تشافين و انتي صابرة كل هالمدة!!!!!!!!!!!!!!!
أمووورة حبيبتي مشكورة على تواصلج معاي بالموضوع و ان شاءالله بحاول اشوف الدكتور

 

[FOZQ8]

مشاركة: أسناني فيها بروز بس مابي تقويم!!!!!!!!!!!!!

انا تقريبا فهمت عليج موسالفت لثه اظن
انتي نفس اختي الفك نفسه صاير جدام شوي
مالج الا انج تروحين تراجعين وتشوفين شنو الحل
لانه في حالات يصير فيها تجميل للفك والبعض يكون تقويم
ودي اختي تسوي بعد

 

[كويتية أمورة]

مشاركة: أسناني فيها بروز بس مابي تقويم!!!!!!!!!!!!!

اذا قصدج عملية للفك ترى هذي صعبة ودقيقه وتحتاج تقويم لمدة سنه قبلها وبعدين يسوولج العملية
وعلى فكرة بالكويت فيه دكتور مصري يسويها بالاميري بس يوقعج على 90000 ورقه انه ماله شغل بأي شي يصيرلج من مضاعفات
والخاص مايسوونها لانه قلتلج دقيقه وخطرة
في ناس عندهم بروز بالفك بس مو لدرجة انه يحتاجون عمليه حتى الدكتور بيقولج مايسوى التعب
بس انا حالتي للاسف لازم عملية لانه اساسا الفك العلوي موراكب عدل على الفك السفلي فيسوي طقطقة على جنب صوب المفصل ويعورني غير ان ضروسي ماتتعدل بالتقويم بروحه لازم عملية وطبعا ماراح اسويها بالكويت لو شنو
رفيجة اختي مسويتها بلندن رايحة على حساب الحكومة طبعا بواسطة املج يسفرون اي احد
وتقول هي العملية زينه بس تتعب لانه يظلون رابطين حلجج حاطين نفس سيور قوية على التقويم عساس يثبتون الفك الفوقي والسفلي على بعض مايتحركون لين يلتئم العظم وماتاكلين شي كلش كله سوائل وتتمين على هالحال 3 شهور يالله تقدرين شوي تاكلين اشياء لينه
يعني العملية عباله مو اي احد يقدر عليها وعلى فكرة وايد غاليه