- إنضم
- 14 مايو 2010
- المشاركات
- 76
- مستوى التفاعل
- 0
- النقاط
- 0
السلام عليكم
ببدى بالموضوع على طول وياريت يابنات تنصحوني لأني أحس إني صرت إنسانه ثانيه غيري صرت إنسانه حقيره ومادري شلون صرت جذي الزمن خلاني إنسانه ثانيه غيري..سالفتي طويله ومو عارفه شلون راح أرقع موقفي بالأخير بس أتنمى إن التعليقات تكون شوي خفيفه وماتجرح مع إني أستاهل
بدت سالفتي قبل 4 سنوات تزوجت من رفيج أخوي بالبدايه كنت متردده لأن أخوي هذا راعي سوالف مغازل وجذي وهو معترف بهالشي بس حلفلي إنه خوش واحد وإنه لو كان من ربعه اللي مو مضبوطين كان ما وافق إنه يخطب إخته..وأخواني همن يمدحونه ووظيفته ضابط فوافقت وأنا ماعرف أهله ..ولمن تزوجت الحمد لله كانت حياتي ماشيه وحلوه بس مارتحت حيل لخواته مع إنهم كانو كلهم متزوجات ماعدا وحده حسيتهم حيل مغرورات ويحبون الكشخه بس بالجمال عاديات بس اللي مو متزوجه فيهم هي اللي كانت ملكة جمال شوي عليها كنت أخاف أنزل عند حمولتي لأن كانو حيييل أوفر بالمكياج واللبس ومع إن لبسي حلو بس كنت أحس نفسي حيييل سنبل معاهم ..ليما حماتي الصغيره وإهي أصغر مني بسنه بس كنت أنا أدرس بالكليه وإهي بالجامعه صارت تجيني الشقه وبصراحه مع إنها حيييل مغروره وحشاشه صارت بينا صداقه وسهر وسوالف بنات حبيت القعده معاها ولمن تصير عندهم مناسبه لوخفيفه تصعد تسوي مكياجها عندي وتسويلي معاها وبصراحه مكياجها ولا صالون يهبل .. المشكله بدت بعد سنه من زواجي زوجي سافر مرافق للعلاج بالخارج مع أخوه الكبير وضليت عند حمولتي عشان كان سايق أهلي مسافر فأخلي سايق حمولتي يوديني الكليه وهني صارت حماتي تنام عندي ونقعد نسولف ونسهر وهني إنصدمت منها إن عندها علاقات مع شباب وقتلها لازم توقفين هالشي وماهتمت لكلامي والصدمه إن واحد من اللي كانت تكلمهم يصير ولد عمتها ..فقالت لي إنها مو ماخذه صيفي وأبوها مايخليها تطلع مع السايق بروحها فتبي تروح معاي الكليه ومن هناك تواعد وتطلع مع اللي تبي لا تسألوني بنات شلون وافقت إنها تروح معاي الكليه بس خليتها توعدني إنها ماتطلع مع أحد وهناك كشتت فيني وركبت مع واحد جدامي وماعرفت شسوي دقيت عليها طنشتني دقيت دقيت سكرت جهازها نطرتها ليمن جت حتى محاضرتي من الخرعه طوفتها لمن جت مع إني دايما أحترمها وتقريبا أخاف منها لقيت نفسي أسبها قامت تخزني وتقولي شفيج شسويت يعني لاتقوليلي إن ماكان عندج هالعلاقات قلت شلون عندي هالعلاقات واللحين متزوجه قالتلي مو شرط تكون علاقه جنسيه هني قتلها اللي تركب مع واحد مايندرى عنها قامت تفلت بوجهي كأنه أنا اللي غلطانه..وركبنا السياره ومن وراها مانتحجى مع بعض ..رد زوجي وسألني ليش متهاوشين ماحبيت أقوله ومع الوقت لاحظت إن زوجي متغير علي خفت إنها تقوله كلام جذب عني صار يشك فيني ويسألني عن مواعيد الحاظرات وفجأه قالي ماتروحين مع السايق انا أوديج صار يوم يوديني ويوم مع السايق ومره وأنا رايحه مع السايق ولا عمي أبو زوجي يصرخ بوجهي والله أول شي ماعرفت شنو قاعد يقول بعدين فهمت إنه يقول ماتروحين مع السايق إذا حابه تخربطين وتطلعين تخربطين روحي مع سايق أهلج لا تجيبين لنا الشبهه هني إنصدمت صدمت عمري وقعد أبجي وأقوله أنا ياعمي تقول عني جذي أكيد فاهم غلط قال لا السايق يقول إنه ينزلج وتروحين تركبين مع واحد جدامه قلت أنا ولا فلانه < بنته أكيد السايق مخربط قام نزل عقال وسوى روحه بيطقني ولا حماي الكبير توه جاي ومسك أبوه وقالي دشي داخل..لمن جا زوجي قتله السالفه سكت وقام يخزني ..جنه مو مصدقني هني بطيت الجربه وقتله إختك تكرهني أكيد إهي اللي قايله لسايق يقول جذي ومو بعيده تكون هي معطيته فلوس .. وأصلا لمن كانت تنام عندي لمن كنت مسافر كان معاها تلفونات غير تلفونها فيها خطوط وتسولف مع شباب هني صارت الطامه نزل عند إخته وماحسيت بنفسي نزلت وراه ودخل غرفتها وكانت نايمه قالها إذا عندج تلفون غير تلفونج طلعيه تخيلو يا بنات إن كيدهن عظيم شسوت قالت تقصد تلفون مرتك اللي خاشته عندي وقامت بكل برود وطلعت تلفون من كبتها وقالت كاهو وروح شوف الخط بإسم منو الخط بإسم أخوها !!! والجهاز بعد وإذا مو مصدق إسأل أخوها..!! قمت قلت لا والله وإنت مصدق رحت شلت هدومي وزوجي تخيلو ما قال شي ظل ساكت ورحت لأهلي ولا هو جاي وراي وراح للدوانيه ولا يدق على أخوي وأخوي راحله كنت بشوفه قبل لايروحله مالحقت عليه ولا زوجي يوريه التلفون أخوي طلعت عيونه قاله زوجي ليش معطي هالخط والتلفون لإختك قال أخوي إختي!! إهيه أنا معطي إختي هي تبي تلفون عطيتها طلعت هالجلبه هم تحاجي أخوي وهو معطيها الخط والتلفون وإخترع لمن شاف أخوها يسأله وتطمن لمن قاله إختك عني أنا مايدري إنه بجذي يخرب حياتي ويظلمني ووراها بشهر تطلقت .. مو حرام عليها اللي سوته فيني ليش كل هذا يعني ..اللي بعمري توهم يعرسون وانا مطلقه حييييل حقدت عليها وقررت إني أنتقم ماخليها أدري إنه المفروض ما أصير مثلها بس زهقت إني أخذ دور المظلومه.. طبعا حظها قايم قبل سنه إنخطبت وتوقعون حق منو طلع أخو ولد عمتها اللي كانت تكلمه ولا زوجها محترم ودين وبعد زواجها رحت لتلفون أخوي وطلعت رقم زوجها ولقيته لأن إسمه صعب ونادروأنا أدري انه أخوي يعرفه وكتبت مسج طويل وطرشته له كتبت إنها كانت تكلم أخوك وطلعت معاه أكثر من مره وإذا مو مصدق روح حلف أخوك على القرآن ولو أخوك كان بالكويت الفتره اللي ملجت فيها كان مارضى إنك تاخذها لأنها منتهيه ومو مخليه واحد بالكويت مو محاجيته وكتبت كلام واجد وبينت إني أقصدها بالإسم الكامل
واللحين مادري شنو صاربس المسج طرشته من 3 أيام وضميري حيل مأنبني أحس إن هذي مو أنا وحده ثانيه شريره ..بنات أدري اللي سويتها غلط بس هم هي ماتستاهل تعيش وتستانس وهي مخربه حياتي ..مادري أحس إني كتبت هالموضوع ودي أحد يطمني ويخفف من تأنيب ضميري أو حتى طليقي يقراه ويعرف الصج مع إن هذا حيييل بعيد ماهمني يردني همني تنرد لي كرامتي..
تكفون قولولي شلون أصلح غلطتي والمسج متأكده إنه وصله لأنه قام يدق ورحت سكرت الجهاز وكسرت خط الخدامه
التعديل الأخير:
