أحتاج نصيحة منكم

[book84]

بسم الله الرحمن الرحيم

السلام عليكم ورحمة الله وبركاته

أمر بتجربة محتاره فيها ومحتاجه نصيحه تساعدني ،، ولد عمتي يبغي يتقدم لي..

ذي ثاني مره يكلموني عنه .. وطلبت منهم فتره أفكر وأصلي استخاره..

سألت أخوي عنه .. قالي هو طيب وقلبه نظيف ،، بس شخصيته انطوائي وايد حتى بالديوانيه بين الشباب مايتكلم يقعد ع جنب ويسكت .. متردد وايد .. متعلق بأمه وممكن يقولها كل شي .. قريب من خواته مايقصر معاهم.. ومايعرف يتكلم لو واجهته مشكله يتوهق..
وهو خجول جدا ... وحساس جدا يزعل ويشيل بقلبه


أخوي قالي إن شخصيتي أقوى من شخصيته وإن ما أستعجل ... يمكن يجيني نصيب أفضل منه..

ماعرف أقرر .. هل شي التردد والانطوائية ممكن بتأثر علي إذا ارتبطت فيه .. أنا اجتماعيه بس مو كثير ..

أخته كلمتني طبعا وايد تمدح لأن أخوها،، وهو بيتوتي ويحب يشوف الأخبار حياته سياسة ونظامي جداً..

صارلي فتره أدعي ربي يرزقني الزوج الصالح وأنا رفضته أول مره،، بس هو رجع كلم أخته عشان أرجع أفكر بالموضوع ..

أنا مو صغيره .. عمري 27 .. وهو أكبر مني بسنتين .. بس بعد مو عشان مجرد الزواج أوافق هل خطوه تخوف وايد .. مابي أندم ..

 

[مناير ...!]

عليكم السلام
استخيري
والله يكتب لج الي فيه الخيره لج

 

[&&&&&&&&]

من ندم من استخار

استخيري ربك​

 

[غلات اهلها]

استخيري ربك هو اعلم و انتي اعلم بامور خطيبج

 

[لمى الهاجري]

تبين رايي شخصيته حلوة على الاقل مو رجال يصرخ وعصبي ويهاوش فكري تبين واحد شخصيته قوية وممكن بيستقوى عليج او واحد هادي وطيب ومثل ما قلتي ما يقصر على خواته واهله وامه عمتج مستحيل تاذيج انا اجوف انه رجال زين وطيب احسن تا1ين واحد مع ربعه 24 ساعة وعصبي على الاقل هو بيتوتي وبالمستقبل بيجابلج وبيجابل عياله بالبيت تعرفين مسولية

 

[بوح الحنين]

انا مع لمى الهاجري وافقي وشخصيته حلوة وبتقدرين عليه بالمستقبل

 

[رنا 2012]

اذا اتاكم من ترضون دينة وخلقة فزوجوة
سالفة الانطوائي مهي مشكلة مع الايام يتغير ويمكن انتي تغيرينه
المشكلة اذا كان ماعندة شخصية
لان مهم يكون شخصيتة موقوية قوية بس له كلمته

 

[أكذب عليك]

الله يكتبلج الي فيه الخير
اعرف واجد من نوعيته بس اشوفهم تزوجوا وعاشوا حياتهم عادي
فكري واستخيري

 

[ماتغير شي]

استخيرررررري

 

[ام خوووخه]

حبيبتي عسى الله يكتب الي فيه الخير لج بس بقولج شغله انا طبع زوجي مثل المواصفات الي قلتيها باستثناء انه انطوائي بس حيل قريب من اهله لدرجة حتى اول زواجي والله بليل مايقعد عندي لي الفجر عند اهله وانا اسهر بروحي ومايعرف يتصرف لمن اسافر او اطلع او تصير لي مشاكل صرت ما آخذ رايه بشي لكن حاولت اغير شغلات بسيطه مع العشره ومثل ماقالت الاخت لمى اهم شي مايغلط عليج اقسم بالله مومصبرني على زوجي الا طيبته ولأن انا شخصيتي الحمدلله قويه واعرف اتصرف صرت امشي امور حياتي بنفسي ومشيت حياتي في شغلات واجد بالدنيا لازم نتجاهلها عشان نقدر نعيش مرتاحين والله يوفقج يارب

 

[رانس]

استخيري انا اساسا ماايد زواج ولد العم او ولد الخال احسها دايمن تفشل بس كيفج انا اشوف ان شخصيته عاديه جدا حلووه

 

[X SHOOSH]

انا بعد مع الاخت لمى الهاجري

 

[ام الحلوااات]

اســـتـــخــــــييييــــري واللــــه يــــكـــتـــــب لـــج اللـــي فـــيـــه الـــخـــيـــر

 

[دندون ام عبود]

انا اقولك استخيري ربك
وماخاب من استخار
واقري دعاء الاستخارة وكرري الاستخارة وكثري استغفار ووتر تالي الليل
ياحياتي انتى كبري وان بغيتي شي ارسلي ع الخاص
عسى ربي يوفقك ويكتبلك الي فيه خير وخيره

 

[كليـ دلعـ]

انا بعد مع لمى


الله يرزقهااا بالريل الصالح اللي يستاهلها

 

[سوسو حبيبتى]

خذيه يابنت الحلال

شدراك باكر يطير من ايدك وتقعدي تتحسفي عليه

طالما دينه عدل واخلاقه عدله

ومش عيب انه متعلق بامه بالعكس هايكون حنون عليكي

والراي رايك ف الاخر

 

[انا لحبيبي .]

الله يكتبلك يلي فيه الخير

 

[أمي قرة عيني]

أولا أستخيري هدا اهم شي

وثانيا" رايي من راي البنات شخصيته ممكن تكون ايجابيه مستقبلا وشلج بواحد هذره وعصبي ؟

الله يكتب اللي فيه الخير معه والا مع غيره