أحب ولد خالتي وأغار عليه :(

[بآتونيآ]

السلام عليكم ورحمة الله وبركاتة

أنا ربي بلاني بحب ولد خالتي ماشاءالله اخلاق وعايله محترمه وجمال واحاول انساه بس بمجرد ما أشوفه ارجع احبوه من جديد ، احبه من 3 سنين وعمري دحين 19 سنة
واغار لو شفت وحده معلقه على صورته بالفيس بوك وأعتبرهاا تتميلح وماعندهاا حياء
واختوه انا وياها علاقتناا حلوه وبيناا ميانه بزياده وعندهم عادي الوحده تقول احب اخوكي
بس انا عندي الوضع عيب
وخالتي مره تحبني وتمدح جمالي دايمًا بس علاقتهاا بماما مو قوية عاديه مره بس دايم تحب تواصل ماما وماما من النوع اللي مومتواصله معاها
ايش الحل بنات واذا تعرفو استشاريه أجتماعيه ارسلولي رقمها او صفحتهاا بالخاص :eh_s(2):​

 

[بآتونيآ]

فوق الـ 100 وحده شافت موضوعي ولاتكرمتي تردي وتساعدي أختك فالله !!
الله يغنيني عن النااس

 

[عتآق الخيل]

الله يوفقك
رفع لموضوعك ..
​

 

[muhrat uboha.]

ادعي ربج انه يكووون من نصيبج واستغفري
up
up

 

[Patcholli]

عيب لاتفكرين تصارحينه ولاتفكرين تقولين حق خواتج
يمكن الولد مايتقبل هالشي
ويمكن بيوم من الايام الله كتبله وتزوج وحده غيرج
صورتج بتكون مو حلوه جدام الناس كلهم بيشوفونج بنظرة شفقه وبيقولون مسكينه ماخذاها
لا يبا احشمي نفسج عن هالسوالف واتمسكي بمبدأج ان هالشي عيب
وحاولي تنسينه وتشغلين وقتج بشي ثاني لاتحرقين قلبج على وهم وشي مجهول انتي مو عارفه شنو نهايته
لاتعلقين روحج بتخيلات
واجهي مشكلتج وحطيلها حد
وحاولي تحلينها
لاتبنين اوهام وتقولين خالتي وتعلق على جمالي ترى ساعات تكون مجامله او نوع من المدح بس مو شرط بقصدها شي
مالج الا الدعاء وبنفس الوقت حاولي تسيطرين على مشاعرج ولاتخلينها تزيد وتوصلج لمرحله التعب والانهيار ..

 

[برنسيسة2007]

اخيتي...
هل تقبلين النصيحه؟؟؟
الدين امرنا بغض البصر وغيرها من الامور التي لها علاقه بموضوعك اتوقع انتي تعرفينها...الدين حرمها لعبره لامر في مصلحتنا..انا يا اختي تنجرفين وراء الحرام اي علاقه غير مبنيه على المحارم محرمه..هذي من جهه
من جهه اخرى..لو اعترفتي بحبك لاخته واخته اخبرته تتوقعين راح يحبك بالعكس لن يحبك ويمكن يعيشك في دوامه ويتركك ذليله

اتركيه عنك ولاتراقبينه بالفيس بوك ابداً اترك الفيس بوك عنك
ولا بأس بان تدعين الله ان كان خيراً زواجك منه ان يجعله من نصيبك
وصدقيني لا علاقة امك بخالتك ولا علاقة اخته بك ولا مشاعره اتجاهك هي التي تجعله من نصيبك وزوجاً لك
الله والدعاء والنصيب هم من يحددون زوج المستقبل

عليكبالثقل عند امه وخالتك وان شا الله اذا كان فيه الخير يكتبه الله من نصيبك

 

[بآتونيآ]

الله يسعدكم يابنات ويجزاكم خيرًا
انا ابدًا ما افكر اقول لاخته واصرف النظر عنه ومكتفيه على الدعاء والله وحده قادر على كل شيء
وانا الحمدلله ثقيله وماعمري جبت طاري لهم او لمحت لهم بحبي لولدهم او اخوهم
الله يمحيه من قلبي ويرزقني بصالح
والاخت اللي قالت اغض نظري : فعلاً كلامك صحيح المفروض ما اناظر بصورته ابدًا ، الله يهديني وبنات المسلمين الى طريق الحق

 

[Huda.A]

إنتي تحبينه لإنه ماتشوفين حد غيره و طول الوقت وياهم
وبعدين مشاعرج في هالوقت مب مكتمله أحيد أنا كنت أحب
ولد خالتي من يوم ماكنت صغيره لين كنت قدج بس ماكان يعرف
و خطبني و غيرت راي لإنه حسيت إني ماأحبه
لإنه في هذيك الفتره صارت عندي إنشغالات ثانيه

إشغلي نفسج من هالمشاعر إلي تحسين فيه مو حب
و لا تخبرين إخته تحملي ، و ببساطه لا تشوفين صفحته


لو هو من نصيبج راح تتزوجينه


و الله يوفقج حبيبي و إيسر لج أمورج

 

[orange blossom]

حبيبتي خليج على الوضع اللي انتي فيه
لا تفكرين ابدا انج تقولين حق اي احد
بس لا تتعلقين فيه وايد يمكن الله ما يكتب لج نصيب فيه

 

[مدّهره !]

حااولي تبتعدين عن صفحته بالفيس ومتاابعته لأن هالشيء بيزيدك تعلق

وإدعي إذاا فيه خير لك يكوون من نصيبك ^^

 

[(حكاية قلب )]

انتي بفترة مراهققة

انسى هالشي لهي نفسج باشياء ثانية

 

[سندس 90]

الحين تبين استشاريه بشنوو

ماعندج مشكللله تستدعي استشاريه


شووفي ياقلبي كثييييير غلطو غلطتج وقالو اللي بقلبهم
نصيحه
نصيحه
نصيييييحه
لاا تقولين لاحد اللي بقلبج
اللي بالقلب خليه بالقلب
ماتدرين عن الظروووف يمكن ماياخذج
ادعي ان الله يرزقج بالزوج الصاااالح وبس
لا تحددين الاسم


وربي يفررح قلبج ويسعدددج

 

[Mrs.H]

مبين عليج انج بنت عاقلة وفاهمة.. وانج بتتخلصين من هالمشكلة بس انتي بالسعودية فما اقدر افيدج

حاولي تدورين دكتورة تساعدج على النسيان وتخليج تركزين على امور ثانية.، لان 3 سنين مانسيتي فحلو انج تستشيرين مختصة تساعدج بهالموضوع والله يوفقج

 

[عزوتي خمس صقور]

لا تعلقين عمرج فيه يمكن يكون مايفكر فيج
تميلحي له وترززي بوجهه وسوي نفسج سنعه عنده
سوي حلى ووديه لرحتي بيتهم وهيك شغلات يعني

 

[عبق الورود]

صغيره ع هالسوالف!
بس عموما
الله يسعدج وياه بالحلال​

 

[روجَ آحمرَ ..×]

شكلك بتتعذبين كثير
عشان كذا انسسسسيه
دام امك وخالتك علاقتهم
مش ولا بد

 

[دلوعةمآمآ]

سُبحان الله نفس سالفتي مع ولد خالتي بس أنا العكس أهو يحبني وخطبني وانا رفضته مأبيه

وأهو للحين ميت علي !!

بس ترى انتي راهقتي علييه

أتركي إي شيء يذكرك فييه ,لاتفكرين فيه واهو مو جايب لك خبر كِذا بتتعبين نفسياً

اهتمي بدراستك ومستقبلك أفضل

وصدقيني لو لك نصيب فييه بتأخذينه ,

الله يرزقك بالزوج الصالح انتي وبنات المسلمين يارب