أحبه أموت فيه .. بس اهوا لأ :(

[أعرفك نفسي]

علمتني وشلون احب وشلون احن
علمني كيف انسى واقسى

انا عضوة يدية وهذي اول مشاركاتي معاكم .. مع اني دايما متابعة بهالمنتدى لكن ولا مرة تجرأت
بس من التعب .. ومن الضيقة اللي فيني .. قاعدة اشتكي وافضفض

ومالي غيركم .. احبه واموت فيه .. بس اهو ما يحبني ..
بتقولون ليش تزوجج لو ما يحبج ؟؟
اقولكم تزوجني عشان احساسه بالشفقة علي وخايف اني اضيع منه لان وقتها تقدملي غيره
اول شي قال الله يوفقج معاه وسكر الخط وبعدها بساعه دق قال ارفضيه وانا اتقدملج وفعلا تقدملي وتم الزواج

كانت بينا علاقة حب .. احلى قصة عشتها بعمري واحلى احساس حسيته معاه
3 سنين وانا اعطي من قلبي وروحي وعمري عشانه .. كان يوهمني انه يحبني .. بس الحين كل شي واضح .. ما يحبني .. تصرفاته .. وهواشه معاي طول الوقت
اقوله احبك بأحلى لحظات رومانسية بينا .. شنو يرد علي تتوقعون ؟؟ يقول أدري :eh_s(2): ما يقول احبج
مو مرة او مرتين ولا والله يمكن مليوووون مرة

انا يا بنات مو كويتية واتحفظ عن التفاصيل عشان احافظ على هويتي انا خليجية هذا كل شي اقدر اوضحه
واهو مركزه الاجتماعي فوق .. وانا عايلتي على قدها وناس محترمين بس الفقر مو بالفلوس الفقر فقر الاخلاق وهذا شي محد يختلف علي
يشتريلي كل شي بخاطري ومستعد يعطيني من الدينار للالف بس احبج ما يقولها ؟؟؟
مقصر معاي بالاحساس فوق ما تتخيلون بس بالماديات لأ .. عشان يسكتني وما اعاتبه بتقصيره

وفوق هذا كله احسه مو صوبي جنسيا .. احسه بارد تجاهي .. وانا متأكده انه مافي مرض عضوي لا سمح الله

تغيرت عشانه سويت اللي يبي وهم ماكو فايدة .. مشكلتي حساسه حيل والحين دايم دمعتي على خدي وحتى صديقات ما عندي اشكيلهم وما اشتغل واهوا كل حياتي

يقول تغارين بطلت الغيره .. يقول تدقين وايد ... خففت اتصال .. اقول يمكن انا خانقته ويمكن يحس فيني ويحبني

امي مرة كبيرة مابي اقولها شي موناقصتني .. وخواتي لو اقولهم هم بيمسكونها عليه وانا مالي خلق المشاكل
وانا لي الحيني في بيت اهلي والعرس ما تحدد .. باجر لي صرت عنده شلون بتحمل
مابي اتطلق لان حياتي بتصير مستحيلة .. لاني ادري بظروفي والمجتمع اللي انا انتمي له
وانا احبه ماعيش من غيره .. ومابي اتم معاه واهو مو مشتهيني ... ؟؟؟
حتى اني فكرت انتحر .. بس خفت على امي والله تموت من بعدي ... ؟؟؟

شسوي بنات ؟؟ ليش يصير معاي جذي ؟؟؟ والله تعبت
اسفه طولت السالفة عليكم
وأمانة الله يخليكم اللي بتجرح فيني خل تخلي رايها لها تراني مو ناقصة

 

[AL ANOOD]

والله مادري شقولج بس اذا اهوا ما يحبج شاللي يجبره وانتي تقولين ٣ سنين يعني فترة طويله
اكيد احساسج غلط تعوذي من الشيطان وشيلي هالافكار ولو ما يحبج اقل شي يسويه ما يصرف عليج مثل ما اتقولين
والله يريح قلبج ،، هذا اللي اقدر اقوله لج

 

[•Brown•Sugar•]

يمكن اهو بخيل بمشاعره
في وايد رياييل يحسبون لا تكلم كلام حب وغزل بتقلل من رجولتهم

 

[المرتاحة]

عيشي حياتج و ابتدي بنفسج

كوني لج صديقات وسوي لج برنامج يومي تمشين عليه

و بسج من ملاحق الريال و محاتاته .. يحبج ما يحبج شتسوين يعني؟؟!! من صجج بتنتحرين؟!! لا يصير تفكيرج محدود وللأسف تافه(والسموحه على هذي الكلمه)

المهم انتي عايشه حياتج و مستانسه ارضي ربج بالاول في كل شي و الباجي كله بيصير سهالات و ربي يسهل لج كل شي

 

[ماني من الناس]

لا تركزين عليه وايد ولا تخلينه محور حياتج عشان ما تضيق فيج الدنيا


إلهي نفسج بالعباده والصديقات

ما يسوى عليج تتعبين نفسج واهو مو حاس اصلا في تعبج

 

[غنآآآتي]

كان بينكم حب وتزوجج معناته يحبج بس صح كلام اختي براون في رياجيل ما يعبرون يخافون تقل قيمتهم !!
بس حاولي تلهين بنفسج شوي تغيرين من نفسج عشان يلتفت لج لا تحنين خليه هو من نفسه
والله يصلح بينكم ان شاء الله..

 

[تعبت اداري...~]

الله يً صلح حآلكم...

 

[* بنت المطر *]

كل اللي صار بينكم وليلحين ماتزوجتوا اوكي شدراج ان موصوبج من ناحية الجنس !!!

بعدين كل رجال يترجم مشاعره بطريقته الخاصه واهوا يحب يعبر بالماديات وهذا احسن شي لظروفج اللي انتي

فيها احمدي ربج وحافظي ع زوجج لاتخسرينه وانتي تظنين قاعده تكسبينه انشغلي عنه موفيه حتى لوتنشغلين عنه

يالتفكير فيه بس لايدري بدال لاتفكرين بالانتحار وتفكيرج ماساوي بالعكس اهتمي بنفسج بجسمج وشعرج وبشرتج عشانه

واستانسي ع الاقل خذيتي اللي تبينه ترا اللي يحبج يدل خدج خليه واثقلي عليه واهوا راح يفقدج ويجي لج

 

[غـرامـي أنـت]

لا تخلييييين كل تركييييزك عليه خفي شوووي

وقللي كلام الحب خليه يمكن يفقده شوووي

وكوووني لنفسك صديقات خلي حيااتك لها

قيمه موبس مركزه عليه ,,

وماتزوجج الا انه يحبج ّّّّ

الله يوووفقكم

 

[شوكولآ]

شلون يعني بارد جنسيا وللحين حتى ماتزوجتوا؟
انتي وايد حساسه وتبالغين لان مسويه كل هالمشكله وانتوا للحين حتى ماجمعكم بيت واحد

وبعدين اي ريال هذا اللي بياخذ حبيبته عشان شفقان عليها ؟؟؟
مستحيل حبيبتي الرياييل بطبعهم انانيين مستحيل يتقدم لج وهو مايبيج !

خلج واثقه من نفسج شوي واقنعي نفسج ان هو يحبج
وصارحيه بالشغلات اللي تضايقج
قوليله يافلان انا مضايقني جي وجي

حطي النقط على الحروف من الحين واتفقي معاه وشوفي شو يقول

اما انج تقعدين جذي مسويه كل هالسالفه وهو مب داري عنج مايصير

الله يوفقج ويسعدج

 

[جـــواهر]

حبيبتي الرجل مخلوق صااااامت يعني يحبج بس مايجي يقولها لج
يعبرلج بالاهتمام وانه مااايقصر عليج بشي
اانا اقول اانتي حيييييل مكبره السالفه وبعدين شنو شفقان عليج
شهالحجي ؟ هذي جزاته انه حبه شريف وشعوره تجاهج صاااادق

 

[عيوني مودي]

لحظة لحظة احسة بارد جنسا تجاهي وللحين ماتحدد العرس كيف تجي هاذي انتم تطلعون مع بعض

 

[reem83]

اولا : ماتزوجج شفقة لو مايحبج جان خذج
ثانيا : سالفة الجنس احيانا بعض الريايل حتى لوكنتي تطلعين معاه وتروحين وتجين مايتهور في الملجة مايحب يسوي هالسوالف اذا ماتم العرس وانا معى هالشي
ثالثا : تفكيرج دايما فيه راح يتعبج تسلي بحياتج ولا تخلينه محور حياتج 100% كوني لج صداقات توظفي طلعي روحي مو بس تفكرين فيه 24 ساعة لان راح تمللينه وتتمللين

 

[كارلوفي فاري]

اختي انتي اللي معاج خوف منه وعشان جذيه منتي متطمنه حددي موقفج لا تندمين بعدين

 

[عاشقة هواك]

الله يسخره لج

 

[غنوة ستايل]

احسج مكبره الموضوع وخانقه الرجال
لا ادقين عليه وايد ولا تنتقدينه وايد

 

[dectora 7elwa]

البنات ما قصروا قالوا كل اللي فبالي

 

[OM-TURKY]

الجأي لربج ومراح يخيب ظنج .. الله يهديكم​

 

[FeShinGoOo]

حبيبتي لو مايحبج مايقرب صوبج نهائيا وانتي تقولين ان بينكم لحظات رومانسيه يعني ماتوقع واحد كارهج بيقرب صوبج

وثاني شغله حتى لو حالته الماديه زينه لو مايحبج ماهو مجبور يقط عليج فلوس

ولو مايحبج جان مادق عليج عقب ساعه وقالج بخطبج والريال كان قد كلمته وتقدملج وخذاج

وسالفة الهواش ترى ماكو زوجين يخلون من المشاكل خصوصا اول سنه زواج تكون كلها نجره ومشاكل وخلافات

انا اقول قضبي ارضج ولا تحسسينه انج عابدته استغفر الله خلاص مره وحده قلتيله احبك وكسر فيج وقالج ادري شماله تعدينيها مليون مره ؟؟

ليش ماتخلين شخصيتج قويه ؟؟

انتي الي حاطه روحج بموقف الضعيفه والمظلومه ومخليته يسوي فيج كل هاذا

حبيبتي خلج لج راي وكلمه شي ماعجبج واجهي .. شي ظايقج اتحجي .. شفتي الغلط بعينج لاتسكتين وتروحين دراج تبجين وسوالف فاتن حمامه

خلي لج كلمه وافتخري باصلج وفصلج واهلج لاتقولين اهلي حالتهم جذي واهو احسن مني ماكو احد احسن من احد حبيبتي لاتحسسين روحج بالنقص واتحسسينه انه اعلى منج غلط بالعكس حسسيه انج واثقه من روحج وانج معجبه بنفسج ولج راي وشخصيه وكلمه

 

[ạ7ạśêś ~]

وفوق هذا كله احسه مو صوبي جنسيا .. احسه بارد تجاهي .. وانا متأكده انه مافي مرض عضوي لا سمح الله

سوري بس شلون جنسيا وانتو ما صار عرسج .!؟
ثاني شغله ريال ما يحب البنت اهي لي تقول له احبك وجذي ثقلي شوي عليه وان شاءالله يتغير معاج