حياتي تغيرت للأفضل تعالو شوفوا كل تجاربي

السلام عليكم بنات ..
حبيت أشاركم تجاربي من عمليات تجميل سويتها والحمدلله كلها كانت ناجحه وكانت لها تأثير كبييييير بنفسيتي ورفعت حيييييل ثقتي بنفسي...مع ان وايد بنات مايحبون يقولون شنو سووا ومشالله كله يقولون طبيعي ومن الله بس أنا راح أقولكم وانشالله تستفيدون مني..
أول شي ودي أقولكم قصتي أنا تزوجت وحملت وولدت بنفس السنة وكنت ناويه أسوي خطة طويله عريضة بعد ماشفت الآثار اللي سببتها الولادة بجسمي وتوني ببدي الخطة جان أحمل مره ثانيه بالغلط وبعد ماولدت الخطة صارت دبل لأن جسمي تبهذل :eh_s(11):..
أول عملياتي كانت تكبير الصدر وكانت قبل الزواج وطبعا ريلي من أهلي وكنت أشوفه وطبعا كنا على علاقه وكان دايم يلمحلي ان يحب المره اللي عندها صدر وطبعا أنا كنت مسطره وكنت أحشي ستياني كل أنواع الدلاقات .. ولما خطبني وأول مايابو مهري طرررررررت حق دكتور اسمه عبدالمحسن أبو الدهب بعيادة الشعب كلينك وسويت عنده تكبير صدر وخذى مني تقريبا 2000 دينار وبعد ماسويت أخرت حفلة عرسي لين يلتئم الخياط وظليت مملوجة 6 أشهر كل مره يقرب فيها زوجي مني أنحاش وأبجي وأهو على باله الحيى ذابحني ومايدري عن موضوع تكبير الصدر..المهم صار العرس وكان الجرح تقريبا ملتئم ومو واضح الخياط إلا حق اللي يدقق والمشكله ريلي كان واااايد يدقق وظل يحن علي شنو هذا شنو هذاا وأنا جذبت عليه قلت له كان فيني جيس دهن وشالوه :eh_s(16): المهم أهو سكت لأن كان عاجبه الموضوع ومرت على خير وحملت وبدى صدري يكبر زيادة بالحمال وصرت إلييسا ولما ولدت ودرر الحليب قام صدري يعورني وااااايد وصار نازل وقام السيلكون يصير مو متساوي يعني مثل بروزات بس كان شكله عادي ..أنا رضعت 30 يوم وبعدين وقفت خفت لا يخترب شكل صدري وكنت وايد متضايقة على اللي صار في بطني من تشققات وترهلات وسواد ودشيت بحالة اكتئاب فظييييييييييع ...ولما طلعت من الأربعين كنت كله ألبس كورسيه مابي ريلي يشوف بطني لأن كان شكله خاااايس وكالعاده ريلي لاحظ اني خاشه شي وأصر أشيل الكورسيه ولما شلته قعدت أبجي لأن شفت نظرات الشفقه بعيونه..وبصراحه ثقتي بنفسي انهزت واااايد لأن كان جسمي قبل الزواج ميريام فارس وبعد الحمال صرت حمار وحشي مخططه من فوقيلي تحتي ..وحسيت ريلي قام يتغير شوي ومايطالع بطني ..بس الحمدلله بعد 6 شهور بدت الخطوط تخف شوي .. بس مامداها تخف إلا حملت مره ثانيه بالغلط....

المهم بختصر وبروح حق خطتي مالت بعد ولادتي الأخيره....
1- أول شي سويته رحت سويت هوليوود سمايل عند بيلا كلينك عند دكتور عبدالهادي شهاب خذا 900 حق 8 أسنان اللي فوق واللي تحت سوالي قالب تبييض اب 50 أظن وبصراحه شغله واااااايد حلو بسس عواااااار مو صج وماتقدرين تاكلين ولا تشربين عدل أول اسبوعين..
2- بعد ماخلصت جابلت روحي ليزر عند ياكوو أبولو قبل لا يرفعون أسعارهم الحين كان الجسم كامل 300الحين صار 350..سويت 3 جلسات ووقفت والحين الشعر طلع مره ثانيه:eh_s(10):
3-بعدين عدلت خشمي عند منذر العجمي بهيلث كلينك ..خذى علي 1250مع دخول المستفى (الهادي).بصراحه خشمي ماتغير وااايد بس صار وااااااايد أحلى بالتصوير لأن قبل كان منحرف وفيه كسر قديم ماعالجته لين صرت أشخرررررر .
4- عالجت شعري ميزو ثيرابي عند محمد يحيى بعيادة فرجينيا كلينك ..عجييييب وايده ايده خفيفه بس وايد يغازل..أنا شعري خفيف وراثه
5-سويت تفخ خدود عند منذر العجمي شي بسيط بس واااااايد حلو وحيل عجبني وناويه بعد اتفخ شوي لأني سويت رجيم وويهي ضعف وايد
6- سويت ابر هيدروبروكسي عند منذر العجمي توخر الهالات السودا بصراحه صارلي جلستين كل شهر مره أحس بفرق لأن افتحوا شوي ويبيلي بعد 4 جلسات لأن أنا وااايد سواد تحت عيني.
7- الحين حجزت موعد شفط وشد بالليزر عند دكتوره ميسون أبو شاويش علشان تعدل ما افسده الحمال..بسوي بطني خصري اب 1000 ..هذا انشالله آخر شهر 9 ادعولي
8- وعندي موعد باجر عندها بعد بسوي ابر حق الخطوط البيضا اللي تارسه فخوذي والحبيبه اللي ورى.


وبنات أحلفكم بالله لاتسووون أي شي إلا اذا كنتوا صج محتاجين تسوون ويكون الشي مأثر عليكم صحيا ونفسيا..

لأن أنا ثقتي تحطمت بعد الولادتين خصوصا ان زوجي وايد دفش وتعليقاته تجرح من دون مايقصد
..
ادعولي الله يسخرلي زوجي وعسى ربي يسامحني اذا كنت سويت شي مايرضيه والله يعلم ان كل اللي سويته كنت محتاجه أسويه وكان حيل مأثر بنفسيتي .. الحمدلله الحين نفسيتي تعدلت وحياتي صارت أحسن خصوصا ان زوجي لاحظ اهتمامي بنفسي ولاحظ التغيرات اللي صارت لي وطبعا كل شي كان بعلمه وموافقته ..إلا موضوع صدري ليما الحين ما أعلنت له مع انه يدري بس ساكت مايبي يحرجني وبنفس الوقت عاجبه.....


آسفه اذا قرقت وايد بس أنا اختصرت لكم سنتين ونص من حياتي وانشالله تستفيدون..وأي وحده تبي أي استفسار أنا حاظره :eh_s(7):

نسيت أقولكم ان قبل لا أبدي الخطة حطيت لولب عند نجيبه القطان اللي ولدتني يزاها الله خير وكانت مسويتلي خياط تجميلي والله ردتني بنت الحمدلله..

أنا والله ما أصح بالسيليكون لأن يخترب والحين بعد حمالي الثاني صار الملس ماله جنه فيه شي داخل..أصحج تسوين ابرة فلير عند دكتوره ميسوون بعيادة بيلا كلينك تكبر الصدر لمدة 3 سنين وعندها بعد للمؤخره آمنه ومافيها مضار نفس السيليكون..أنا انشالله ودي أعدل صدري لأن خايفه يكون في حليب داخل لما الحين لأن مارضعت عدل..

والله مادري بس حماتي كانت ناويه تسوي عندهم وسعر الإبره الوحده 450 دينار. علعموم أعطيج رقمهم دقي استفسري أحسن 22622528

مشكوره حبيبتي كراميل على كلامج الحلو وصح الوحده لازم تجابل عمرها عدل لأن الزمان تغير وأنا بعد ناويه اتفخ شفايفي لأن صج أحس راح يصير شكلي أحلى وتأكدوا يابنات الريال يحب البنت اللي تهتم بجمالها حتى لو كان مايبين لها .. أنا أعرف وحده كان ريلها يقولها أنا أحبج بكل حالاتج حتى لو صرتي متينه ومسكينه لما حملت انتفخت وصارت بطه وبالإخير جكته يكلم بنات سمباتييك ولما قالتله ليش تسوي جذي قالها انتي مو مهتمه بجسمج

شكرا لكل البنات اللي استمتعت بردودهم الحلوه ... الحين برد على وحده وحده :

الله يخليني : انشالله من عيوني بس أشوف انه في نتيجه حلوه أقولج.

mareea : ههههههه حلوه ماعرفتيني اي عاد تدرين كل اللي شافني يقولي محلوه بس موعارفين شنو لأن كل الللي سويته حيييييل طبيعي ..وانشالله بس اروح أقولج شنو يصير معاي بالتفصيل .

حكاية قلب : والله صح كلامج الثقة أهم شي وترى أنا جدامه أسوي روحي واثقه بس والله مرات تعليقاته تجرح عن غير قصد ، الله لا يطيج بزوج حييييل على النيه وكلامه دفش وملاحظته قويه .

الجادل الصعب : الله يعلم بالحال والله عانيت وايد بس الحمدلله كل شي مر بسرعه وعلى فكره ترى عملية صدري كانت قبل لا أتزوج وبس أول اسبوع ورى العملية كان صعب بس بعدين عادي ماكو ألم ، وعملية خشمي أول خمس أيام بعدها ماكنت أشم وخشمي مسدود بس ماكان فيه ألم كللللللش وبس بعدين صار الوضع طبيعي.

القطوة : بعد قلبي مشكورة .

حياتي تكنولوجيا : والله أنصحج تسوينه عند منذر العجمي لأن دكتور راقي وفاهم ومايلعب بالخشم كللللش يعني يسوي اللي خشمج يحتاجه وبس ،أنا حنيييت عليه يصغر خنفوراتي مارضى وقالي لأ بس بسوي الكسر القديم وبس وبطلع خشمج طبيعي ، أهو مايسويلج خشم ثاني أهو يشوف خشمج شنو محتاج ويسويلج بس اذا شاف خشم مو محتاج مايسويلج.

كراميل :مشكورة على مداخلتج الثانيه وانشالله أشوف الثالثه والرابعه ، وصح كلامج بصراحه الثقه اهي اللي تحلي الوحده بعين الريال بس مايمنع ان هالثقه تكون يمها نسبة جمال معقوله ولازم البنت تهتم بنفسها حق نفسها بالدرجه الأولى بعدين حق زوجها ، وأنا أدري لو أصير قمة بالجمال ماراح أقدر أخلي زوجي مايطالع هالبنات المفاصيخ اللي بره إلا في حال اني قمت و بطيت عيونه P:

سوري في بنتين توني أشوف ردودهم :

رتبة دبلوماسية : آمييين مشكورة حبيبتي

autralia girl : شوفي ما أنصحج بالسيليكون لأن صج أنا بالنسبة حق حالتي اخترب شوي .. أنصحج بالفيلر عند بيلا كلينك دكتوره ميسون الإبره الوحده 450 والدكتوره تشوف انتي جم تحتاجين ..ويظل 3 سنين وبعدها روحي سوي مره ثانيه .. أنا بعطيج رقمهم وانتي روحي كلمي الدكتوره تشرحلج أفضل لأن أنا دقيت وسألت وقالتلي بس جذي والتفاصيل عند الدكتوره.

بنات ترى ما أقدر أدز على الخاص ..حاولت بس طلعلي ان مشاركاتي قليله ومايصير ...أنا راح أكتب كل التفاصيل اللي تطلبونها