لقيماتي بالجبن لذيييييييذه

السلام عليـكم

صوم مقبول وذنب مغفور ان شاءالله

هذي لقيماتي بالجبن لذيذه وموطبيعيه وهششششه نصيحه جربوها باسرع وقت انا يوميا اسويها

للامانه الجبن خذيت فكرته من خدامة اختي ومن بعدها دايما اضيف الجبن للقيمات

المقادير

1ونص كوب طحين ابيض

1 ملعقة حليب بودر

نص ملعقة بيكنج بودر

ملعقة خميره

نص ملعقة كاستر او نشا

بيضه

ملعقتين زيت

3 حبات جبن كيري

شوية هيل وزعفران وماء ورد

ماء دافي تقريبا ثلاث ارباع كوب حسب الحاجه

الطريقه:

نخلط المقادير الجافه اولا ثم السائله بالمكسر او باليد براحتج

لما تكون العجينه ثقيله شوي

نغطيها ونخليها بمكان دافي تختمر من ساعه الا ربع الى ساعه

نقليها بالزيت ونضيف لها الشيره او الدبس براحتج

نصيحتي جربوها والله لذيذه وسهله وبتدمنونها طبعا

انا الحين مخليتها تختمر وبعد شوي بقليها ان شاءالله اصورها لكم

وهذي نصايح مني لنجاح اللقيمات:

العجينه لازم تكون ثقيله لانها تخف وقت التخمير

اذا بتعرفين ان العجينه ناجحه خلطيها بالمكسر اذا ارتفعت فوق وايد يعني يبيلها ماي واذا وصلت العجينه لي النص يعني ثقلها زين

لازم الزيت يكون غزير وحارر

قبل ماتصبين اللقيمات خففي عالنار حيل وصبي اللقيمات ولا تقلبينها الا بعد خمس دقايق عشان ماتشرب زيت

صبة اللقيمات للي ماتعرفها مسحي ايدج بشوية زيت واخذي شوية عجينه بايدج وعصريها بين الابهام والسبابه اعتقد اساميهم جذي واخذي الكره بقفشه صغيره مبلله بماي وقطيها بالزيت

الشيره لازم تكون باااارده واللقيمات تكون حااره عشان اللقيمات تسير مقرمشه وهشه

للي يحبون اللقيمات وايد مقرمشه

اقلي اللقيمات شوي لما يسير لونها اصفر مو ذهبي

وطلعيها من الزيت وبعدها بخمس دقايق ردي اقليها عادي لما تسير بنيه

وعليكم بالف عافيـه


بنات ادعولي ان الله يشافيني بهالشهر الفضيل