شريت بيت حلو بس قلت بضيف له شوية تعديلات ... اثاري الشويه صاروا وااااايد و قام شي يسحب شي .
بالبدايه حسيت اني ضايعه و متوهقه من قلب و ماني عارفه شسوي و شحط .. الفلوس الحمد لله متوفره بس ماني عارفه من وين ابدي و حسيت كل شي صار حوسه و حسيت اني عفست الدنيا ( لاني كنت بروحي بعدين خليت اختي تساعدني و طبعا ريلي بس عليه يدفع و مايحب هالسوالف ولا الفراره بالمحلات) و نوعي بيتوتيه ما اروح بيوت الناس و لا اشوف شنو حاطين و شمسوين .
قلت قصه حياتي هههههه ... كيفكم تحملوا ... المهم قلت مالي الا النت بشوف صور علشان اخذ افكار .. و بما اني عضوه بجم منتدى .. قمت ادش يوميا اقسام الديكور .. و استفدت وااااااااااااااااااااااااااااااااااااااااااااايد بشكل ما تتصورونه
بعدين بديت افتر عالمحلات و الحمد لله الله سهل الامور
اكثر شي تعبت عليه بالبيت هو الحمامات عزكم الله ... و وراهم المطبخ
هالاثنين صج شيبوا براسي ...لانج اول شي تحطين ابالج شنو ستايلج؟ تبين شي ناعم و عملي ولا شي فخم ... انتي نوعج تحبين الموديرن ولا الكلاسيك؟ وهالشي تعرفينه و انتي اطالعين الصور بالنت .. تشوفين شنو اللي يعجبج؟ ... بعدين تحوسين عالبورسلان و السيراميك و الالوان و الموديلات بس اطلعت النتيجه حلوه
ترا مو مهم السعر ولا الماركه ( يعني يحلاتي و انا شاريه طاوله اكل فندي ولا ارماني ) ... انا اقول المسأله بالنهايه ذوق و تنسيق مع طبعا جوده و متانه لانه بيت العمر و مو كل سنه بتغيرين .
الحين ادري تبون الزبده ....
المصعد .. شركة مترو للمصاعد
الشتر شركة العيسى
محلات السيراميك ... شريت من محل اسمه جداول بالري
شريت الرخام من محل اسمه اضواء الشمس اذا ماني غلطانه بالشويخ
شريت جرانيت من محل اسمه دارا بالشويخ
اطقم الحمامات و الجاكوزي من الحميضي
مطابخي فصلتهم بالشويخ محل اسمه العالميه ( المطبخ الرئيسي ) و محل اسمه السفير ( مطبخ التحظير)
شريت غرف نوم عيالي من جملة الاثاث ( ميداس ) كلهم كوين
شريت طاوله الاكل اليوميه من صفاه الغانم
و طاولة الاكل الرئيسيه من بنتا
فصلت قعدة المعيشه من عبدالرضا كاكولي
شريت مغاسل الضيوف و الثلاجه الرئيسه من المبروك
شريت جريل ( هوت بليت للجاينيز فود) من برازيليا
شريت الثريات من محل بالفروانيه اسمه المنار اذا ماني غلطانه
غرفة نومي سر علشان محد يقلدها
شريت كونسول و مكتبة تلفزيون و بار( لجناحي ).. و كراسي للمطبخ و كفرات عيالي و سجادهم و ستايرهم من هوم سنتر
باقيلي الحين بس اثاث الاستقبال و الاكسسوارات و شوية حركات وول بيبر
