Shasawi
New member
- إنضم
- 19 نوفمبر 2009
- المشاركات
- 557
- مستوى التفاعل
- 0
- النقاط
- 0
اشلونكم ا شاءالله بخير
قبل ما اكتبلكم مشكلتي او قصتي ابي انوه على جم شغله...
1- انا عضوة قديمة بالمنتدى بس ماحبيت اكتب مشكلتي بنكي.
2- انا موكاتبه المشكله عشان اتينني ردود تقولي الغلط نهايته غلط وحرام ومايجوز لأني ادري والله أدري.
3- عذروني عالعنوان بس لانه هذا اكثر عنوان يوصف شعوري.
4- سوري اذا الحجي مافهمتو نصة تره ماعندي اسلوب كتابه ومن النوع اللي ادخل سوالف بعض
أنا عندي مبدأ في ناس اذا قدرت تخدعهم هذي غلطتهم ومالك ذنب.. في ناس اذا قدرت تخدعهم انت احسن ممثل وأحقر مخلوق
مادري شقولكم عن نفسي انا من النوع المرح واللي احب الغشمره وماحب اتشكى واتحلطم على حظي وحياتي والله دايما اقول الحمدالله.. مع كل هذا فيني جزء سلبي كبير اني دايما اتوقع الأسوأ ومايونسني اي شي يعني الناس لمه احد يمدحهم يستانسون انا ماستانس كلش واحس مجاملات.. الحمدالله كل الناس اللي عرفتهم بحياتي ماحسيت احد متضايق او يتهرب مني او يستملقني بس مع ذلك انا ماحب اتقرب حق الناس وعندي رفيجه وحده وتسوة عندي الدنيا كلها اما باجي صديقاتي او قريباتي ممكن اشوفهم بالسنه مره اكلمهم بالتلفون بين فتره وفتره واكثر شي بالنت..
موضوعي بختصار مثل اي بنيه حبت واحد واخر شي عطاها 1-0
بدت معرفتي بالشخص هذا عن طريق النت سنه 99.. انسان مرح وغشمرجي وشيطان وكنة اصدقاء علاقتنا كلها ضحك و وناسه.. اكثر شي عجبني بالشخص هذا انه على شطانته وعلى انه كان بسن المراهقه وعلى انه بهالفتره الزمنيه ماكو واحد يسولف مع وحده بالنت بدون مايحاول يضبط على قولتهم الا ماندر.. أنا ماشفت منه اي حركه من هالحركات.. واستمرت العلاقه بالنت وعقب 3 سنين انا عطيته رقمي عشان يدزلي مسجات عاديه كنت توني ماخذه خط وبدز حق رفيجاتي مومصدقه على الله... وفعلا دزلي مسجات وماحاول عقبها يدزلي ولانص مسج ولا شي الا من عيد لي عيد يدز مسج تهنئه حق كل اللسته عنده... وعقب 3 سنين ثانيه تخرج وصار يشبك بشكل اكبر وقمنا نسولف اكثر وكانت اول مره فيها يعرف شنو عايلتي يعني حتى مافكر يسالني من قبل.. المهم وصلنا لي مسجات بين فتره وفتر وينك موشابك ها وينج مختفيه... شوي شوي صار في اتصال مره بالاسبوع والاسبوعين.. وشفنا بعض وتوقعو المكان؟؟ سوق الحمام <- شر البلية مايضحك انا احب الحيوانات وكان بيودي اخوه الصغير وانا رحت.. وظلت المكلمات جنه ربع بين فتره وفتره ومسج وشفنا بعض مره ثانيه بعدين شوي شوي تطورت العلاقه قمنا نشوف بعض كل يوم...شنسوي؟ بس مجابلين بعض وسوالف بالساعات وقوت علاقتنا اكثر في فتره كان عنده اجازه وانا دوامي يخلص مبجر وصرنا كل يوم نروح حديقه الحيوان هم لأني احب الحيوانات ونقعد من 10 الصبح بحديقه الحيوان لي 10 بليل طبعا قسم الحيوانات يسكر لكن الحديقه تكون مفتوحه سبوعين واحنا كل يوم هذي حالتنا ولانمل واذا بتسالوني اهلج وينهم؟ امي تدق اقولها بحديقه الحيوان تقول زين لانها تدري اني احب هالسوالف عندها احسن من اني اكون بمكان ثاني.. صار الجو حار حولنا قمنا نطلع بالسياره كل يوم يرد من الدوام بالحر يدش البيت ماياكل اقوله يافلان تغدا يقولي لالا خل اروح النادي عشان اخلص بسرعه وايلج ابجر امس ماشبعت منج.. صرنا كل يوم نطلع 5 6 ساعات بس نتمشى بالسيارة وانا استغرب اقول فلان حركي شخصيته موجذي يقعد بالسياره بس يسولف مايحب سوالف وقرقه البنات اصلا.. وبس يطالعني ويسمعني وانا اقرق على راسه ولمه اطاالعه اشوفه مبتســم احسه صج مستانس..
عنه اهوا من خلال معرفتي فيه لمه كنه ربع.. عنده صديقات وكان يسولفلي عنهم بس ولامره سولف عن وحده معينه انه يحبها او بينهم شي لا مجرد كله عبط وتقزير بتقزير الا وحده كان يشبكني معاها بالمسنجر واهي تحبه وهو يقول ماحبها ومن كلامها هذا الواضح انه اهي اللي لازقه فيه.. وكان يقول انه يبي بنت عمه.. وعقب سنين لمه طلعت علاقتنا عن اطار النت قالي انها تزوجت وماكان مهتم... ليش يافلان فليتو وتزوجت؟ قالي والله انتي تعرفيني انا مومال افلام هنديه وهذي بتعيش فلم هندي وهذي اول مره اقول عن وحده اهي هدتني موانا هديتها.. وانا كنت اقول يمكن اهو عنده تخوف من الارتباط عشان جذي ماطل بموضوعه مع بنت عمه لين ملت.. لانه قالي حتى لواهي ليلحين معاي مافكر اتزوج الحين...اهو مثل ماقت شخص غشمرجي وعبط وضحك وبنفس الوقت اسمع من الكل انه نجري وفي اعصاب ودفش.. ونسيت اقولكم انه ساعات كان يخلي امه تكلمني بس الوضع كان عنددي عادي لانه امه تكلم اي وحده يكلمها عادي..
المهم نرد على علاقتنا كل مالها تصير اقوى ومن الأشياء اللي خلته يكبر بعيني صج..
1- ما تقرب من اول العلاقه مثل اغلب الشباب شلون يهبون بالبنت وبعدين يملون ويبدون يوخرون اهو العكس كل يوم اشوفه يهتم اب اشياء يديدة ويتقرب اكثر.
2- ماتفلسف مثل وايد شباب اب اول العلاقه دايما يطلع روحه بصورة الكريم اللي يدفع ويسوي.. انا معاه العكس. انا طبيعتي ماحب احد يعزمني ولمه كنت ارفض انه يعزمني يقولي وفرتي... ولمه تطورت العلاقه فيني خير افكر اعزم يعصب.. اهديته كذا شغله ولامره اهداني شي هم لين تطورت العلاقه صار كل ماطلع مع ربعه وطلعته تره مره بالسنه.. لازم يتذكرني بشي تره والله موهامتني الهديه مومحتاجتها.. بس لمه شخص كل الناس تقولج عنه همجي ودفش.. يطلع مع ربعه مره كل جم شهر ويتذكرج تحسين انج صج على باله.
3- مايطلع مثل ماقلت كل طلعاته دوانيه ونادي ولمه يطلع مره كل جم شهر ساعات يصور ولا اشوفه عقب طلعته.. طالعق بتريننق جنه رايح يلعب كره ولاجمعيه.. وانا لمه ايني يحلق ويتضبط ويلبس جينز معنه التريننق اريحله ومعنه شبعان من كثر ماكل يوم يشوف ويهي.
4- على كثر ماكنه قراب وكنه 24 ساعه مع بعض ماقالي احبج الا عقب 7 تشهر.
5- دايما قد كلمته معاي اب اتفه شي لويقولي فلانه بدق بعد دقيقه يدق بعد دقيقه.
6- مثل ماقتلكم كل الناس اهله والكل يقولونلي عصبي همجي دفش وكنت اشوف اعصابه بعيني بس معاي.. لويعصب علي لازم يتفاهم بنفس الوقت واذا حده معصب يقولي فلانه لاتدقين علي نطري انا اهدا وادق ويدق يحاول يتفاهم.. ولو ازعل ماينام لازم يراضيني يالله ينام..
7- الانسان الوحيد بالدنيا اللي لمه كنت اقعد معاه ويكون مستانس ويقولي انا مستانس معاج كنت احسه صج ومومجامله كنت احسه فعلا موبسمستانس الا مبهور حتى اخوانه قامو يحبون ايون معانه من اخوه بوخمس سنين لي اخوه بو19 سنه واخوه اللي اصغر منه بسنه هذا نحيس مع الكل ويقولي فلانه انا مستغرب منه هذا ليش يستانس معانه هذا نحيييس بالله شمقعده بحديقه الحيوان 12 ساعه ومستانسسس شلون جذي..
8- واهم سبب.. شاب تدرين انه شيطان وبينكم علاقه صداقه سابقه تقعدين معاه بالست والسبع ساعات كل يوم موكل يوم وترك لا كل يوم لمده 9 شهور.. ولايحاول يجيسج كنت اقول اذا فلان مايعزني.. ليش مجابلني وهاد الدنيا وربعه والكل ومجابلني طول هالوقت؟؟ لامستفيد مني ماديا ولاجسديا؟؟ اكيد فلان يعزني صج
9- معاشه قوي واهو موبخيل ومع هذا سيارته تلوع الجبد يقول موهامني المهم سياره توديني وتيبني وتلفونه حتى كامره مافيه يقولي ماحب هالسخافات
المهم استمر الحال صداقه وضحك وطلعات وصارت شغله بايخه منه بيوم من الايام اني اسولف معاه بالنت وطنشني حضرته قاعد يقرقلي مع وحده وانا عصبت قتله سولف مع اللي تبي بس احنا ربع عيب تحقرني عشان ناس ثانين وياني واعتذر وسامحيني وحسستيني اني تافه والله ومن هالحجي وعقبها بجم يوم قالي انا ماقدر تظل علاقتنا جذي انا من يوم حسيت انج بتوخرين عني عرفت اني صج احبج وماقدر اوخر ومن يومها تحول مسمى العلاقه من صداقة الى حب مالت على هالحب ...
مسح البنات اللي عنده بالمسنجر كلهم من كيفه معني اصريت انه مايمسحهم.. وكان عندي باسورد ايميله طبعا وكان دايما ينسخلي كلامه مع وحده من صديقاته وتقوله يافلان عمري ماشفتك تتكلم عن وحده مثل هذي.. وانا كنت اقول ويه متفق معااها.. يقولي امي اخواني اعز ربعي يقولونلي عمرنا ماشفناك تتكلم عن وحده مثل هذي.. وهم كنت اقول ويه افلام ... كنت اشك في معنه كان مجابلني 24 ساعه مثل ماقتلكم كنه نطلع كل يوم لمده 9 اشهر ومن صار رمضان خففنا صرنا مرتين ثلاث بالاسبوع لين وصلنا لي يوم اليمعه بس.. كل يوم شنو روتينه مايتغير نهائيا..
6:10 الصبح انا اقعده حق الدوام طريج دوامه يدق يكلمني وبالدوام مسجات واذا قدر يشبك يكلمني او مسجات
1:45 يطلع من الدوام طريج الدوام يكلمني قبل لايدش البيت لازم يقولي خلج يم التلفون بس اتغدا واطلع ادق
2:45 يطلع من البيت طريج النادي 14 دقيقه يكلمني يدش النادي 3 ساعات هم ادق عليه او مسجات يطلع طريج ردت البيت 14 دقيقه هم يكلمني
يدش البيت اذا بيروح دوانيه ولاعنده شغل مع ربعه يسبح ويروح يقولي وبالطريج يكلمني
اذا بيقعد مع اهله يشبك ييسولف شوي ويقول يالله بقعد معاهم بس بشغلج الكام عشان ماتحسين انج بروحج
11 ونص يدق قبل لاينام حتى لودايخ لازم يدق يسولف ومرات اتنيحس اقوله لا ماتنام يقولي خلاص خليني بس اناملي ساعتين بعدين قعديني اسولف معاج ومسكين فعلا يكون تعبان يعني ماينام باليوم الا 4 ساعات اروح واقعده ويكون دايخ وازعل اقوله خلاص باي يقولي لالا بس الحين اغسل ويهي واصحصح واكلمج لاتزعلين
يعني مجابلني 24 ساعه وهم كنت اشك فيه.. مع انه باسورد حسابه عندي يعني لواقل شي عنده خط ثاني يدفع مكالماته بعرف..
كل شي كان تمام التمام بس انا فيني عيب اني وايد حنانه وكنت كل يوم والثاني اقوله انهد بعض... وكان يقولي يافلانه والله انا مستغرب من نفسي انا ما ارد على احد انا موفخر بس امي وابوي اذا عصبت ازعلهم ووماراضيهم الا بعد فتره الا انتي الله يخليج لاتضغطين علي اكثر من جذي تره بيي يوم لوتموتين مارد عليج فيه..وانا مومصدقه ومستانسه كل ماقتله لانكلم بعض يهد شغله كله ويفشل نفسه جدام ربعه وايي لي عند بيتنا.. والله في ناس سولي نفس الشي.. بس منه اهو كنت احسها غير.. كنت احس صج مايسويها حق غيري ويسويها لانه صج لي مكان عنده مولاني بنيه وبس
وصج يا هاليوم.. عقب سنه ونص صارت سالفه واحس من حقي اني كنت اشك فيه وقتله لانكلم بعض وترجاني اني ماقول هالكلمه واقوله باي واهو مصمم مايسكره ويقولي عيب انتي كبيره اللي تقولينه عيب سكرته.. صار باجر مادق؟؟ دقيت انا مارد!! قلت لا اكيد بيرد باجر عيدميلادي!! اقل شي عشان عيدميلادي!!(على فكره معطيني الهديه قبلها بسبوع اهو جذي مطفوق) دقيت 12 بليل!! سكره بويهي دقيت مره ثانيه مشغول دقيت مره ثالثه خط ثاني!!؟ يعني بيعاندني؟؟ ولاعنده وحده ثانيه زين متى مسرع؟؟ انا من اول يوم طحت ماقوم من الفراش بس بجي تره مادري اني احبه صج! كنت اقول حق رفيجتي فلان مريحني فلان يهبل من كل النواحي بس انا ليش ماحبه؟؟ المهم امي لاحظت وعلى فكره امي تدري بالموضوع بس موتفاصيل تدري في واحد يبيني وامه تتصل علي بس ماتدري نشوف بعض وجذي ووحبيبتي امي شكثر كانت تزعل مني وتقولي غلط وماغلط اقولها مابينه علاقه ومابيدها شي تتضايق وتسكت لاتقدر تمنعني ولاتقدر تقول حق ابوي.. المهم انا الاخ مايرد علي ولاعلى مسجاتي عقب يومين دزلي مسج.. يافلانه كان بينه ايام حلوة بس اللي بينه انتهى ولاتخليني اقول عنج لزقه!! ياسلام؟؟ طول عمرك نتهاوش وتردلي وتدزلي مسجات تترجاني عمري ماقلت عنك لزقه!!!انا شفت المسج هذا انهرت ولأول مره بحياتي تجرأت ودقيت على امه معنه لو وحده ثانيه جان من اول يوم داقه لانه امه حبووبه ودايما تدق علي وتسولف وتتغشمر.. دقيت قتلها بقولج شي ومنحرجه كيت كيت السالفه.. قالتلي والله انا اشوفه صارله جم يوم متضايق وصدقيني اهو لمه يعصب يقط حجي مايثمنه ويسوي اشياء غلط ويغلط ويغلط بس مرده يرد حق الصح.. وانتي الصح.. وين يلقى جذي مدلعته وكل شي مسويتله ولدي واعرفه لمه اطالع بعيونه انتي عنده غير عمره مامدح وحده ولاتكلم عنها مثل مايتكلم عنج وعن اهلج ولاتخافين مرده يرد واذا ظالمج الله مايضيع حق احد وحوبتج ماراح اتعداه هذا ولدي بس انا مع الحلق..
كلمت اخوه اللي دايما معانه بالنت قالي من صجج هذا شفيه لاماتوقع مايرد عليج قتله اخاف ماشوفه طول عمري قالي موعلى كيفه..
مرو 5 تيام من ادز مسجات لين الاخ تعطف ودق علي.. وانا جنه محكوم عليها بالاعدام وافرجو عنها هال5 تيام اللي حقرني فيهم مرو علي دهر انا ماقوم من الفراش بس بجي انا اللي اكل الخضر واليابس مااااااكليت شي فيهم الا قوطي عصير
انشالله بعدين اكملكم باجي مشكلتي...
كملي كلامج ترا اندمجت معاه وايد 
