كاني بنااااااااااااااااات
اسفه طولت توني شفت المووضوع ..
انا اقولكم قصتي ...
اول شي سجلت بالديوان ونزل اسمي بالجريده وزارت التربيه ..
رحت راجعت وزارت التربيه ما اذكر اي مبنى اعتقد 2 ...
طلبوو مني 6 صور وصوره اصليه من الشهاده وصوره من الشهاده مالت الثنويه والبطاقه المدنيه والجواز والجنسيه والميلاد ...
كلهم سويت منهم نسخ ووديتهم .. هذا اول شي سويته بعدين قالوو لي راح نتصل عليج حق المقابله ..
نطرت 10 ايام ويأست قلت بس خلاص ما راح يدقون .. بعدها دقووو وقالوو لي مقابله الاسبوع الياي المبنى الفلاني الساعه الفلانيه ...
رحت كاشخه وشكلي مرتب .. والاهم من هذا اني كنت ميته من الخوف والتوتر ..
بس رفيجتي متخرجه معانا من نفس الجامعه وكانت مقابلتها قبلي ومجبربه كل شي .. وقالت لي لازم اكون واثقه من نفسي لان هذا اساس الاختبار ... حتى لو جاوبت خطأ اكون واثقه من نفسي حيييل وما احسسهم اني متوتره وخايفه ما ابين هل شي ..
المهم صار يومها ورحت المقابله اول ما دخلت ولا معاي بنتين كبار في العمر موظفات في اماكن ثانيه ويبون يحولون وزارت التربيه يصيرون مدرسات ...
واثنينهم قاموو يراجعون الاوراق ويدرسون قمت اسولف معاهم ولا مساكين الي صاقطه 5 مراث والثانيه 7 مرات .. بس اهما يبون حق الفلسفه وهل مواد يعني حق الثنوي ..
اخترعت اكثر قلت بس خلاص ما راح انجحح دام السالفه جذي .. شوي ولا ايلنا المسؤول .. مويفرق كل وحدا في غرفه ويوزع عليهم اوراق الامتحان ...
انا اخترعت اكثر لما ودوني غرفه بروحي وقالوو لي امتحان .... احس كل شي تبخر نطرت 10 دقايق بروحي وما عطوني ورقه ولا شي على اساس اني بختبر ...
جان يقولون لآلا هل بنت تربويه يعني متخرجه من الجامعه العربيه المفتوحه تخصص تربيه ماله داعي اختبار كافي مقابله ...
دخلوني مقابله اول ما دخلت ولا 3 موجهين واحد على المكتب واهوا مسؤول الموجهين في الكويت كلهم مال مادة الاجتماعيات ما اذكر اسمه .. والاثنين واحد ريال والثانيه حرمه ..
اول ما دخلت حسيت اني مرتبكه ... بس حاولت اخفي هل شي .. سلمت السلام وقالي تفضلي .. قعدت
جان يطالعوني .. وانا ساكته اقول بقلبي شفيهم حمدالله والشكر ...
جان يقولي المسؤول الكبير الي قاعد ونفسيته خايسه ... عرفي عن نفسج ... عرفت عن نفسي .. طبعا بنات التعريف عن النفس تبع اسألة المقابله ... لازم
تقولين اسمج الثلاثي اي جامعه وشنو تخصصج ... وتكونين واثقه من نفسج حيل ووصوتج عالي ...
انا سويت العكس .. لوول من الخرعه الي على المكتب المسؤول خوفني احسه شوي ويقوم يعطيني طراق ...
طبعا واهم يسألوني ملفي عندهم وعن كل المعلومات الي عني .. وانا ما عندي اي شهاده غير شهادتي مالت الجامعه حتى الاي سي دي الل ما عندي ...
غير هذا سألوني جم سؤال جاوبتهم خطأ وسويت نفسي عادي اضحك .. ومشوني واسألتهم كلها عن الي درسناه في الميداني ...
طرق التدريس انواع التدريس اساليب التدريس شلون تتعاملين مع الاطفال .. وليش اخترتي التدريس طبعا مو تقولون عشان الراتب لا عشان تحبون هل وظيفه وتحسون انكم تقدرون تتواصلون مع اليهال وهل امور ..
وقالي المسؤول شنو الطريقه الي تحبين ادرسين فيها اليهال .. ؟
قتله العب قالي ليش ؟ قتله تركز المعلومه في بالهم اكثر ويستمتعون بالدراسه يحبونها .. احس هل اجابه الي شفعتلي لان كل اجاباتي كانت خطأ وما ادري وين الله قاطني نسيت كل شي درسته لان بنات انا بعد ما تخرجت قعدت 6 شهور في البيت والله اكثر بعد .. كل شي تبخر ...
وعندكم الاهداف الوجدانيه والمعرفيه والنفس الحركيه راح يسألونكم شنوو انواعها عددوها .. ومن هل حجي ..
وبعدها قالوو لي خلاص سلمت ومشيت وثاني يوم تطلع النتيجه واناا ادري اني مو ناجحه ...
رحت ثاني يوم ولا يقولون لي ناجحه وانا منصدمه شلوون جذي ؟؟؟ :| فرحت وخذيت اوراقي بعدها بسبوع من المبنى ما ادري اي واحد نسيت رقمه ... عساس اسوي فحوصات في مستشفى الصباح الي بشويخ الي يمهم ما ادري شسمه اعتقد الصباح والله نسيت ...
خلصت كل التحاليل بسبوع ورديت الوزاره وديت اوراقي وبعدها بجم يوم استلمت الاوراق من الوزاره ورحت المنطقه التعليميه الي تبع محافظتي واهم حولوني على المدرسه الي فيها نقس يبون مدرسات ... والحمدالله ياربي سهالات
الله يوفجكم واي استفسار لا تترددون ..
اسفه طولت
