العميله القيصريه من الألف إلى الياء.....

بعد العمليه القيصرية


راح تحسين بألم بس ماراح يخلونج اتألمين راح يعطونج ابر مسكنه ومنومه وماراح تحتاجين انج تقومين للحمام لانهم راح يكونون حاطين لج قصطره ويخلونج نايمه يوم ومريحه ثاني يوم من العمليه
راح يشيلون القصطره وشيلتها مؤلمه نوعا ما بس مو حيل راح تقولج الممرضه اخذي نفس وتسحب القصطره بعد ماتاخذ منها عينه للبول وانتي حاولي تساعدين نفسج بأنج ماتكونين شاده ومريحه نفسج كأنج بدفعين البول راح تكون سحبه البربيش (القصطره) اهون عليج
عقب يعطونج مسكن ويشيلون لج الدرب (المغذي) وتساعدج الممرضه على الوقفه وممكن تساعدج على اللبس والحمام
حاولي وانتي بالفراش اج تحركين اقدامج وتحركين ايدينج ترفعينهم وتنزلينهم
اذا وقفتي حاولي انج تحطين ايدج على مكان العمليه بدون خوف وتضغطين او تمسكينا مو بقوه عشان تثبتين بطنج واوقفي شوي شوي لين تقدرين انج تصلبين طولج او توقفين مستقيمة الممرضه او احد من اهلج لازم يكون عندج عشان تساعدج او لاسمح الله اذا اغمى عليج
حاولي شوي شوي اذا حسيتي انج دايخه اقعدي على الفراش واذا زاده الدوخه انسدحي وعيدي الكره واضغطي على نفسج عشان تطيبين بسرعه
الحمام راح يكون نوعا ما متعب اول مره راح تبولين عزج الله راح تحسين بحرقه خفيفه لا تدخلين بروحج الحمام او لاتصكين الباب لانج راح تكونين مرهقه ودايخه
اول يوم راح يسمحون لج بالسوائل وثاني يوم اكل خفيف حاولي والافضل انج تاخذين سوائل اول يومين وبعد اليومين اكل خفيف وعبدها براحتج
طبعا ماراح يخلونج تطلعين من المستشفى الا لما يتطمنون على صحتج الجرح لازم يكون زين ونضيف
ويسون لج تحليل عشان نسبة الدم ويشوفون اذا الحمام معاج اوكي يعني اذا بلتي وخرجتي وانتوا بكرامه
الخروج راح او بعض الاحيان يكون مؤلم او ماتقدرين تحسين ان معاج امساك اطلبي من الممرضه تعطيج حقنه شرجيه راح ترتاحين عليها
واي الم اطلبي مسكن واذا حسيتي انج مو قادره تامين اطلبي ابره منومه طبعا الطبيب يكون كاتب لج المسكنات بالملف واغلب المسكنات تكون منومه مثل كودئين codeineبثيدين pethidine
مورفين morphine
حاولي قد ماتقدرين انج ماتكحين بقوه او تعطسين اذا بتكحين او تعطسين حطي ايدج على العمليه واضغطي عليها بأيدينج الثنتين
وحاولي انج تكحين كحه الدلوعه (ياعيني على الشرح) اذا فيج بلغم

المستشفى راح تقعدين فيها اربع الى خمس ايام وبعد مايتطمنون ان الامور كلها سليمه راح يرخصونج
بالبيت مو تستسلمين لنوم على انج تعبانه لا حاولي تمشين وتمشين مستقيمه عشان ينمس الجلد او ما يتشبن
اول الايام عليج بالكمون او الزعتر اوالكراويه عشان الغازات والمغص
وشربي جاي الاعشاب اللي يسمونه دوى الغوري خلطة اعشاب
اول عشرين يوم الحلبه ضروريه مطبوخه مع الاكل او بودره ترشينها فوق الاكل بس لازم تنطحن بنفس اللحظه او مستنبته يعني تحطين مشخال وتحطين فيه حلبه وترشين عليها ماي اكثر من مره باليوم راح تنبت غسليها واكليها مافيها طعم مروره ولذيذه
بعد العشر ايام الاولى اكلي حسو وسفوف لمدة عشر ايام
حطي لج فنجال قهوه وحطي فيه كسرة مقل او مقله تلقينها بالحواج واهي زينه حق الهوى
التمره ضروريه جدا كل يوم حتى لو خاليه بدون اعشاب او حطي معاها 7 حبات بركه (حبه سوده او سويده)
تجنبي الفلفل اول 10 ايام
لازم ماتجوعين لان الجوع مو زين للنفاس مو تخافين من الالام وقت الحمام اذا كنتي تعانين من امساك عليج بالملينات او اذا كان الالم قوي حقنه شرجيه مثل (حقنة الجلسرين)
جرح العمليه حاولي انه مايصير رطب اذا تسبحتي نشفيه عدل
وحاولي انج تشترين صراويل واسعه حيل وتكون تغطي نص البطن او توصل لتحت الصدر
ولازم تكون قطن ميه بالميه

بعد ال15 يوم حاولي انج تشفطين بطنج شوي شوي عشان تقوين العضلات
وممكن تربطينه بس مو حيل والشفط افضل من الربط لانه يخلي العضله تشد
الرياضه يفضل استشاره طبيب فيها
الترديد بعد اليوم 30 اذا كنتي بتسوين ترديد
والتمريخ ممكن بعد 10 يوم بس انها ماتقرب صوب العمليه
وديري بالج من البرد عدو النفاس​

اذا رحتي المستشفى لاتنسين هالاشياء


1- مره نقعيها قبل العمليه بيوم وتذكري ان المره ماتخليها اكثر من ثلاث ايام يعني ثلاث ايام ونقعي وحده ثانيه وباليوم اكثر من مره راح تشربينها وتشمينها ويستحسن انج تمررينها بحلجج كله كأنج بتمضمضين وبعدين تبلعينها
2- صراويل وساع ولاتفكرين انج تلبسين شي يضب البطن ابدا ويفضل انها تكون فوق العمليه
3- دلاغات طوال او اللي بس تغطي الساق لانج ماراح تقدرين تلبسين البنطرون القطن واذا كنتي بتلبسين بنطرون حاولي انه يكون واسع او بدون سير عشان مايضغط على العمليه
4- عطر فرنسي ودهن عود معلومه يمكن تساعدج دهن العود والبخور مايخلون الجرح يشم المشكله بالعطورات الفرنسية وخصوصا اذا جوو زوار متعطرين طبعا ماراح تمنعينهم او تقولين لهم لاتدخلون فالحل بأنج تاخذين اجرائات الامن والسلامه واللي اهي قبل العمليه اذا قالوا لج تسبحي اخذي شور دافي واطلعي نشفي شعرج ميه بالميه وتعطري بالعطر الفرنسي وقبل يدخلونج العمليات تعطري واخذي شويه دهن عود وحطي على خشمج ورقبتج واشربي مره شويه وبعد امسحيها على خشمج واذا طلعتي سوي نفس الشي بس هالمره المرافقه وياج امج او اختج اهي اللي تسويها لج اول ماتطلعين راح تكونين مو واعيه وكل يوم مره وشويه عطر عشان مايشم عليج الجرح (ممكن في ناس يستغربون ان الجرح يشم فعلا انا كنت استهزء بالهشي واكتشفته او جربه لما سويت عملية اللوز ) طبعا هالطريقه تصلح حق كل العميليات



كم عدد الولادات المسموح بها بالعمليه القيصريه

عدد مرات الولاده تختلف من سيده الى اخرى ولاكن غالابا مسموح بالعدد من 4 الى 7


وهذا شكل شق العمليه


​

تم بحمد الله​