إنتي مدرسة .. وتكررهين التدريس .. تفضلي نتناقش لإيجاد الحل

خلونا نتناقش مع بعض

:gathering:

إذا تكرهين التدريس ... شنو إللي مخليج تتمسكين بالوظيفة ؟
شلون ممكن تخلوني أحب التدريس؟
خلونا نبحث الحل لهذي المشكلة مع بعض

​

انا اضم صوتي لصوتك
اذا انت يضيق خلقك انا يجيني الموت اذا تذكرت المدرسه :cxxxp:

احب التدريس بس اكره التحضير

شكرا على مروركم
بس تتوقعون شنو إللي يخلينا نحب الدوام ؟؟ :cxxxp:

المدرسة حلوة والتدريس حلو والتحضير شي موطبيعي يونس حده


بس تنقلب الآية اذا كنتي بمكان فيه مشاكل بتكرهين حياتج

غيري مدرستج
كنت اكره التدريس مووووووووووووووووووووت بسبة المدرسة كانت الناظره والوكيله ورئيسة القسم شده وانظباط فيهم شي مو طبيعي جنج بالعسكريه او اكثر والطالبات ملااااااغه ودلع وكسل
غيرت المدرسة ارتحت وحبيت التدريس الحمدالله
الناظره احبها ارفيجتي ورئيسة قسمنا شحليلها والوكيله روعه
ماكو تشدد سهاله جزاهم الله خير
والصبيان روعه صج شطانه بس دمهم خفيف ونشيطين وشطار

انا بعد اضم صوتي لصوتج ياريت الوقت يوقف مالي خلق اداوم ماشبعت من العطله

بالنسبه للتدريس

ياحلات الطلبه واولياء الامور لما ينادونج ويقولونلج ابله

واحلى شي لما تشوفين ثمرة تعبج وشقاج وتشوفين الطلبه اللي درستيهم

يطبقون الاشياء اللي علمتيها لهم وتشوفينهم متفوقين

انا في حفلة التفوق بجيت لما شفت طلبتي يكرمونهم جنهم عيالي معنى انا مومتزوجه

وتحسين باحساس موعارفه شلون اوصفه لما تشوفينهم كبروا وراحوا صف ثاني

ووناسه لما تدرسين بالصف وتصلحين الكتب والامتحانات

وياحلات الطلبه لما يذكرونج بالخير ويسلمون عليج ويقدرونج ويكون بينج وبينهم ود ويسألون عنج ويحبونج

هالاشياء احلى شي بالتدريس

بـــــــــــــــــــــــــــــــــــــــــــس

ياكرهه الانشطه اللي يجبرونا نسويها
وتحسين انها موشغلتج ومالها معنى ولا منها فايده ولا عايده

وياكرهه التحضير لما تسوينه بالبيت ماتحسين بطعم الحياة شغل بالبيت والمدرسه
وجنج طالبه راده البيت ولازم تسوين الواجب

وقعدي سوي وسايل واشتري وسايل والمعاش كلا طاير ياااااااااااااااااااا حلات
ايام قبل الابله بس تستخدم الطباشير واللوحه السوده
وياحلاتنا شطار من غير هالسوايل والخساير اللي مالها معنى <<<مااقول الا الله ياخذ نوريه الصبيح

ويا ملق الاحتياط والمناوبه ودرس النموذجي والنشاط الاذاعي

صج التحضير ممل وما أحبه
والأعمال إللي يكلفونا فيها و مو من صميم عملنا تحسسنا بالظلم

عموما الله يعينا وشكرا على المرور

كلامكم صحيح

المعاش + العطله + وعدم الاختلاط

الحسنه الوحيده

الشكوى لله شنسوي بعد انا مطبقه مقوله احمدحلمي بفلمه >>>>>>حب ماتعمل ولا تعمل ماتحب<<<<<<<هههه

لا العطلة تخليني ابي اقعد ولا المعاش الحمدلله على كل حال وياما ناس تتمنى الي انا فيه

يعني انا مو متمسكة بالوظيفة اهي الي متمسكة فيني حاولت اطلع بس ماقدرت الي عندها حل ترسلة لي عالخاص

^ حـلـــــوى و رهـــــش ^ قال:

التدريس نفسه حلوو وممتـع ..
ومجالـه أجمل من مجالات كثيـره يعني لافي روتين ولا في ملل خاصه اذا انتي حاولتي تحبين المجال نفسه ..

لكن المشكله ..
بـ المهام اللي يلقونها على عاتقـج وهي مو من مسؤلياتـج ..
مناوبه .. ومربيه .. مشرفه .. احتياط .. وغيرهـا ... :cxxxp:

وكذلك اللي ستاف العمل اللي معاج ..


بالنهايـه ..
اذا ما تحبين التدريس .. حولي اداريـه .. وريحي نفسج ..

أو ..
حاولي تحبين المجال .. لان أذا قعدتي جذي ما راح ترتاحين ولا تريحين نفسج ..

:tek:

أنقر للتوسيع...

بالضبط نفس كلامج اختي المهام اللي يكلفونا فيها و اهيه مو من صميم شغلنا كأبلات اهية اللي تكرهني بالهوظيفة :tomato2::eh_s(14):

اي صح انا معاكم ... بس اكره التحضير ... و الكراف الللي يكرفونا ... و تقدير ماكو و كل يوم واحد داش عليج
جنه بس يبون يتصيدون اخطاء الابله و اقل شي انتي محاسبه عليه ... حلاته الابله اهيه تسوي اللي تبيه و لو يخففون نصاب الحصص وايد زين ... مناوبه احتياط و اذا شافوا مدرسة تشتغل بضمير يكرفونها و المدرسة ام السان مالهم شغل فيها يعني الله كريم

اي والله ياسمين المدرسة ام السان محد يقرب صوبها و اللي عندها ضمير اهي اللي تاكلها عدل

التدريس حلو

بس مشكلته
بلاحيتاط والمناوبه وبرنامج الاذاعه( ووووووويع)

خــــــــــــــــــــــــــــــــــــوش موضوع

تدرين جم مرة بغيت أطلع من الوزارة والسبة إن حظي بالمدارس مو شي!!!!

الله لا يوريكم.....والله....طحت بمدرستين كلللللللللش زفت زفت بالمعاملة.....
بس آخر مدرسة زينة وحبيت مكاني.....



تسألين عن الشي اللي يخليني أكره كوني مدرسة!!!!
أقولج.....
أنا درست وتعبت واجتهدت وتخصصي مو تربوي.....ليش أصير فراشة....؟؟؟؟ إحنا نخم وننظف....وإحنا نصير أبلات احتياط...وإحنا نصير أبلات المقصف....وإحنا نصير مناوبات ونوقف بالحر والخيسة....وإحنا نسوي ونسوي مع إن وظيفتنا (((تدريس)))...مو ((تكديش))....!!!!

في فرق كبير بين اللفظين


والله.....لو مو ريلي مانعني من إني أحول....جان من زمان منحاشة.....والسبة الكرف اللي يخليج ترجعين البيت مسطولة من الحر والتعب ومالج خلق تقابلين بيتج وريلج...وفوق هذا شغلج كله معاج ليلبيت....

الأوادم كلهم من يطقون كرتهم يطلعون من الدوام خلااااص ماوراهم شي...ليحطو روووسهم عالمخدة مايحاتون اللي ناطرهم بالجنطة.....!!!!!!!
ولا يخترعون....يقومون من النوم مخترعين عبالهم الصبح.....والدنيا توها ماصار مغرب....ولا صوت الجرس يظل عالق بأذانهم طول النهار...جن صمخان...والله!!!!!


وتقولون.....ليش عندنا عطلة؟؟؟؟

يبه العطلة كا.....كل ماله وتنكمش....والله بالأخير....ماراح يصير لنا عطلة...وبيسوون السنةالدراسية 3 كورسات عشان مانعطل هههههههه....والله أ/وت عقب هالقرار إذا طبقوه


يعني من صج....أنا متعجبة......هذا كوم...والظغط النفسي كوم ثاني.....

يعني الوكيلة ولا الناظرة....مو مشتهينج....ولا وحدة بالقسم تحفرلج.....ولا ولا ولا ولا .....


اللي تهملين نفسج......وبيتج...عشان ناس يمكن مو حاسين انتي شكثر مظغوطة......


واي تعبت....وانا اكتب

يعني هذا جزء من ولا شي.......