بسم الله الرحمن الرحيم
السلام عليك
شخباااركم بناات؟ شلوونكم وشحاالكم؟
عساكم طيبين..
وشلوون إدمان وتاشري الميكب وياكم؟
اليوم يايبتلكم موضوع
طبعا فكرته مب غريبة وكذا وحدة غيري سوتها
بإختصار.. منتجاتي المفضلة للشهر اللي طاف
وبما إن خلصنا نص هالشهر تقريباً.. ولاحظت إن الأشياء المفضلة للحينها مفضلة عندي
فخليته مفضلات يناير وفبراير
صورتلكم المنتجات.. وحاولت أحط كل مجموعة بصورة بدل ماصور كل شي بروحه..
عشان يكون عدد الصور معقول ومايثقل الموضوع
تحت كل صورة بشرح بإختصار المنتج.. وبحط مكان الشراء والسعر إذا كنت متذكرته
بسم الله نبدأ
أول شي نبذة عن نوعية بشرتي ولوني
- بشرتي فاتحة تميل للصفار Yellow Under Tones
- لونها بالنسبة لماك بين NC25 - NC30
- نوعيتها مختلطة دهنية شوي في منطقة التي زون وساعات تزيد حسب الجو
- تقريباً صافية بس احيانا تطلعلي حبة صغيرة او مجموعة صغار بس يروحون
- عادية مب حساسة
- ماعندي هالات بس ساعات يكون تحت عيني منتفخ على حسب الوضع
: : :
ميكــب الويــه
الفاونديشن والباودر
- الفاونديشن / ريفلون فوتو ريدي Revlon Photo Ready
الدرجة اللي استخدمها رقم 8 - Golden Beige
أنا من النوع اللي احب الفاونديشن يكون مضبوط مع لون بشرتي ماحب أغمجها ولا أحب أفتحها
قبل فترة.. كنت أعاني لما أشتري فاونديشن من أشتريه أجربه بالمحل وأحس الدرجة مناسبة وأستخدمه مرة مرتين أحسه حلوو بعدين أبتدي أحسه يميل للرمادي عالبنفسجي ويطلع ويهي شاحب وساعات جنه محتقن
عقب استخدمت في حفلة ماك ستيدو فيكس NC 25 وناسبني بالضبط.. مناسب صفرة بشرتي بدون مايطلعني فاتحة ولا غامجة
بس تعرفون هالفاونديشن وايد ثقيل وانا تقريبا احط ميكب بشكل يومي أو يوم وترك لمدة ساعات
فدورت شي خفيف، وكنت اوردي مستخدمة ريفلون فوتو ريدي بس درجة مب مناسبة
تميت ادور فالنت الدرجة المناسبة لماك NC25 وتناسب الـ Yellow Undertones
كنت متحيرة بين رقم 4 ورقم 8 "الأرقام اللي بينهم تقريبا كلهم يميلون للوردي" بس فالأخير استقريت على 8
والحمدلله وااايد ارتحت على اللون.. النتيجة طبيعية وهالفاونديشن خفييف ومايسوي طبقة
هذي صورة مصورتها قبل فترة مادري حطيتها او لا:
نتفة فاونديشن على يدي:
بعد الدمج:
الحلو في هالفاونديشن انه فيه Pump فتقدرين تحطين الكمية المناسبة
الحجم: 30 مللي
السعر ومكان الشراء: طالبته أون لاين من Drug Store بس موجود عندنا في سنتر بوينت والستاندات بالسوبرماركت أونلاين $8.95 (تقريباً 3.50 بحريني / 2.50 كويتي ) بسنتر بوينت حوالي 8 @@ / تقريباً 6 كويتي
- الأسفنجة / بيوتي بليندر Beauty Blender
طبعا أشهر من نار على علم <3
أستخدمها لتوزيع الفاونديشن السائل، دمج الكونسيلر، أحياناً لتوزيع البلاشر الكريمي
صارلها عندي كم شهر.. وللحين بنفس الجودة والمستوى
طريقتها طبعا اهي اسفنجة صغنونة على شكل بيضة
قبل ماتستخدمينها تبللينها بالماي "مباشرة بيتضاعف حجمها"
عقب تعصرينها عشان تتخلصين من الماي الزايد.. وتعصرينها اخر شي بفوطة
بعدين تستعملينها تحطين فاونديشن على سطح يدج او المكان اللي ترتاحين عليه
عقب تاخذين منه بقاعدة الاسفنجة.. وتوزعينه على ويهج بالترتبيت "مو بالسحب"
مجرد تربتين بالقاعدة لين يتغطي ويهج كله... عقب بالجوانب تدمجين
والراس يستخدم للأماكن الصغيرة مثل تحت العين وحوالين الخشم.. ومناسب للكونسيلر تحت العين
فيديو:
http://www.youtube.com/watch?v=UMUPn8dxkKY
http://www.youtube.com/watch?v=PIpJlazEjRg
بس عيبها الوحيد التنظيف.. اهي في لها منظف سائل خاص من نفس الماركة وقبل فترة نزلوا منظف صلب
بس انا يوم شريتها خذيت العلبة اللي فيها اسفنجتين.. بس بدون منظف
بس عقب تحسفت شوي.. لأن مهما نظفتيها يتم لون خفيف من الفاونديشن او المنتج ><
وقريت بكذا بلوغ إن ماينظفها عدل الا المنظف الخاص.. كل مرة اقول بطلبه بس ماطلبته للحين
أنا طريقتي بتنظيفها.. أستخدم شامبو بيبي جونسون واعصره شوي في القاعدة بعدين اغسلها وافركها
وساعات احط بكاس شوي ماي فاتر مع شامبو وانقعها ليوم ثاني
هالطريقة تقريباً تنظفها كامل بس يتم لوون خفييف
وعقب مانظفها من الشامبو عدل اخليها تجف عادي
لما تجف ترد تصغر
كيوووت ^.*
انا مالتي صايرة فوشية فاتحة.. اهي فوشية فاقعة بس مع الاستعمال والغسل يفتح لونها
بس للحين أحسها تؤدي مفعولها كامل.. أول ماحسها بدت تموت بستخدم الثانية
مكان الشراء: طالبتها من سايت www.Cherryculture.com
وموجودة بسايتات ثانية مثل أمازون وإيباي
السعر ومكان الشراء: العلبة اللي فيها اسفنجتين ماذكر عدل بس اعتقد حدود $26 - $29 يعني تقريبا 10 - 11 بحريني / 7 - 8 كويتي
- الباودر / ماك مينرلايز سكن فينش MAC Mineralize Skin Finish Natural
الدرجة اللي استخدمها Medium Plus
هالبودرة خذتها على مدح البنات هني في التجمع وفي المواضيع الثانية واايد يمدحونها خاصة للاستعمال اليومي وانها خفيفة وماتضر
وشريتها اممم من كم شهر يمكن 5 شهور أكثر.. وتميت استعملها بشكل يومي تقريبا
وااايد ارتحت لها.. في البداية كنت دايما أستخدمها فوق الفاونديشن
كنت اظن انها بروحها ماتغطي بس مرة قلت بجربها وطلعت لا والله تغطيتها خفيفة لمتوسطة
فتميت أستعملها للدوام بس مع كونسيلر بدون فاونديشن
أستخدمها بفرشاة Stippling من سيقما أو إيكو تولز
وإذا حبيت تغطية أكثر أستخدمها مع كبوكي إيكو تولز
طبعا تشوفون إني وصلتها للقاع.. بس ما شاء الله تدوووم
أكيد بشتري غيرها
السعر ومكان الشراء: من ماك خذيتها بـ 13.5 بحريني يعني تقريبا 10 كويتي
البــلاشر والكونتــور
- الكونتور / من سليـك Sleek Face Contour Kit
الدرجة Medium
هالمنتج أول منتج أجربه من ماركة سليك
هالكونتور من وصلني وهو صديقي استعمله بشكل داائم
اللون حلووو مب غامج ولا انه برتقالي والاهم انه مات
وبسهولة يندمج ويتوزع
الصوب الثاني الهايلايت ماستعمله وايد كثر الكونتور
بس حلوو بعد
السعر ومكان الشراء: هالماركة بريطانية مب موجودة عندنا بالخليج بس من عندهم توصيل من موقعهم www.sleekmakeup.com
انا خذيت الكونتور من ايباي.. لأني كنت باخذ بس شي واحد وفي ايباي الشحن بالحبة
سعره مع التوصيل $14 يعني حول 5.200 بحريني - 3.900 كويتي
بصراحة الماركة تينن كوالتي وباكجنغ وسعر.. ناوية أطلبلي منهم كم شي خاصة البلاشرات
- البلاشر والهايلايتر / من نارس Danmari Palette
اللونين المفضلين عندي للبلاشر:
Orgasm الوسط فوق.. طبعا هاللون أشهر من نار على علم وردي وبشيمر ذهبي خفيف وااايد جميل
Sin الأول من اليمين تحت.. مادري شلون أوصفه بنفسجي موف يمكن؟ بس حبيته واايد على البشرة واحلى مافيه انه الشمر خفييف
ومن نفس الباليت اللون الصدفي Hungry Heart Duo (I) استعمله كهايلايتر
طبعا الجودة معروفة في بلاشرات نارس.. هذي اول تجربة لي مع الماركة وحبيتها وايد
في هالباليت حجم البلاشر تقريبا 75% من حجم البلاشر الكامل.. وكل الالوان الموجودة تنباع بروحها
السعر ومكان الشراء: حاليا مو موجود كان لمتد إدشن لسيفورا بس نهاية السنة اللي طافت
وانا فزت به من مزاد في إيباي وخذته بـ $90.5 بدون التوصيل - تقريباً 34 بحريني 25 كويتي
سعره بسيفورا كان $65
: : :
ميكــب العيـون
الكونسيلــر والبيــس والآيشــادو
الكونسيلر: NYX Concealer in a Jar
الدرجة Beige
هذا كونسيلري المفضل من جم سنة للحين
كريمي وتغطيته ممتازة ويتوزع يندمج بسهولة
الدرجة اللي عندي طبيعية تميل للصفار
ايي بعلبة صغيرة بس تدوم فترة طويلة
السعر مكان الشراء: أنا كنت آخذه من سنتر بوينت بـ 3.5 بحريني، وآخر مرة طلبته ويا باقي الاغراض نسيت جم طلع علي يمكن 2.5
Garnier Eye Roll
الدرجة: Light
شفته بالدعاية ورحت شريته.. عجيييب الصراحة
اهو مرطب وبنفس الوقت كونسيلر خفيف ويبرد تحت العين
أحب أستخدمه حتى بدون ميكب إذا كنت مب نايمة عدل وتحت عيني تعبان
السعر ومكان الشراء: نسيت سعره بس اظن دينارين وشي.. من السوبرماركت بس ساعات يكون مخلص ><
البيس: Too Faced Shadow Insurance
معروف طبعا هذا من احسن بيسات العيون اهو واربان ديكاي
هالشهر وايد استعملته.. نقطة صغيرونة على الجفن اوزعها وانطر دقيقة تقريبا وبعدين أبتدي بالشادو
السعر ومكان الشراء: مجان ويا باليت تو فيسد سويت دريمز.. ينباع بروحه بس مادري بكم صراحة بس أكيد إذا خلص بشتري غيره
الشــادو
Urban Decay Naked
طبعا محبوب البنات في كل أنحاء العالم.. يحتاج أتكلم عنه؟
أحلى شي فيه إنه ألوانه متدرجة من الفواتح للغوامج.. يعني تقدرين تخففين وتثقلين على راحتج
بس الشي الوحيد اللي احس ناقصنه ألوات مات أكثر.. في هالباليت لونين مات البني والبني الغامج.. جانزين فيه هايلايت مات
السعر ومكان الشراء: طالبته من سيفورا أمازون من زمااان يمكن بكمل سنة - $48 بدون توصيل - حول 18 بحريني 13.5 كويتي
Wet N Wild Color Icon Palette
الدرجة / Vanity
هالباليت ايي فيه 6 ألوان.. 3 مات و 3 شيمر غالبا تدرجات نف اللون
انا عندي 3 باليتات وهذا وايد استعمله.. تقريبا بشنطتي على طول
الألوان المات أحبهم كلهم.. الفاتح خوش هايلايت.. الثاني خفيف.. الثالث بني غااامج بس أحبه للكسرة.. آخذ نتفة بالبرش وأحطه بالكرة وأوزعه وأدمجه عدل.. اللون يتخفف يصير وااايد حلوو.. وبعد أحبه لتحت عيني
الألوان الشيمر اكثر شي أستعمل الذهبي اللي بالوسط
السعر ومكان الشراء: طالبته من drugstore وسعره بـ $4.5 وانا حصلته بسيل $3.99 يا بلااااش صراحة تقريباً 1.5 بحريني 1.1 كويتي @@
الكحـل : مايبلين الكريمي - اللون الأسود
أنا استخدمه مع فرشاة مكياجي المايلة الصغيرة، نسيت أصورها ><
عجييييب غامج ومايسيح بسهولة..
أفكر آخذلي الكحلي
السعر ومكان الشراء: سنتر بوينت بـ 4 دنانير
الحواجب
الغرشة الصغيرونة اللي عاليسار
هذا تاتو حواجب.. بس يروح بالماي
قوامة كريمي شمعي جذي كثيــف وايد وتيي معاه فرشاته ونسيت أصورها بعد ><
الحلوو فيه إنه يملي الفراغات ولو حابة تغيرين شوي برسمة حاجبج.. يرسم على الجلد بعد
بس يبيله شوي دقة وتحطين نتفــة بالبرش وتوزعينها.. لأن إذا كثرتي بيطلع وااايد غامج وصعب تمسحينه
الغرشة صغيرة والتاو لفوق النص بشوي.. بس واااايد تدوووم.. أنا للحين ماخلصت علبة وحدة
عادة ماستخدمه ببداية حاجبي.. أرسم بداية حاجبي بشدو بني "ماك كورك" والتاتو استخدمه لباجي الحاجب يصير احلى
السعر ومكان الشراء: 3.5 دنانير مع الفرشاة يبيعونه بمحل عندنا اسمه مدهش
والمنتج الثاني قلم الحواجب من مايبلين
انا بصراحة ماحب أتعامل بأقلام الحواجب.. بس هذا مرة قريت وحدة تمدحه وهني وشفته بدبي وتشجعت اجربه
وااايد حبيته.. يعطي حواجبي لوك واايد ناتشرال قمت أستعمله كل يوم خاصة الصبح
السعر ومكان الشراء: كنت شاريته بسيل وويا جم غرض فماتذكر بجم >< بس يمكن دينار ونص دينارين.. من سنتر بوينت
الماسكــرا Rimmel Sexy Curves
هالماسكرا طلبتها على مدح سباركل.. وااايد حبيتها، في البداية حسيتها تتكتل بس يوم تعودت عليها حبيتها واايد.. وإذا اعقص رموشي أول تصير :rerrerek:
: : :
ميكــب الشفايــف
المرطب EOS بطعم الفواكه.. اكثر شي أحبه فيه إني أقدرأحط فوقه روج ويكون لونه واضح.. مايسوي طبقة عازلة
السعر ومكان الشراء: طالبته من Drugstore بـ $3 تقريباً 1.1 بحريني 800 فلس كويتي
الروج البنفسجي الفاتح أول واحد من اليسار.. ماخذته من تاجرة من زمان مادري شسم الماركة جنه فكتوريا.. لونه بنفسجي فاتح على وردي أحبه واايد.. بس لازم مرطب تحته
الثاني من ريفلون Super Lustrous اللون Berry Haute بنفسجي حلووو واايد جميل.. أول أستخدم محدد وردي على شفايفي كله وبعدين هذا.. يطلع اللون وايد مميز
الثالث غلوس ريفلون بنفسجي ليلكي.. وااايد أحبه
هالروجين ساعات أخلطهم مع بعض وفوقهم هالقلوس.. عجيييب اللون يسألوني عنه وايد
اللون النيود الفاتح من NYX اللون اسمه Pimpkin Pie نيودي بطيخي فاتح حلوو للصبح
البرتقالي الفاقع Revlon Colorburst Lipstick الدرجة Coral للمناسبات استعملها بروحها واذا ابي اخففها اخلطها بالنيود اللي فوقها او بقلوس بيج.. احلى مافيها انها ماتنشف الشفايف
آخر لون اللي طايح.. هذا عندي من زمااان من ماركة مكياج ويا قلوسين.. فوشي باربي مات.. وااايد احبه
الأسعار بصراحة ماتذكر >< بعضهم طلبية وبعضهم من هني
: : :
الفرش
البنفسجية الكبيرة مالت الباودر من سيجما.. احبها للبودرة أو للتنظيف النهائي
اللي عقبها فرشة الكونتور من سيجما بعد.. أحبها للكونتور وللبلاش ساعات
السودا Elf Powder Brush وااايد أحبها للفاونديشن
فرشة Duo من سيجما أستخدمها لبودرة ماك، للاضاءة ساعات على خفيف، ولدمج الفاونديشن
الصغيرة المايلة من إيكو تولز أستخدمها لبداية حاجبي، وأموه الشدو تحت عيني وإذا أبي أموه اللاينر
فرشاة الكونسيلر من سيجما
فرشاة الدمج السودا هذي حبييبتي متعددة الاستعمالات، أدمج فيها الكونسيلر، أدمج فيها الشدو، وأستخدمها إذا بوزع الاضاءة بس بشكل خفييف فوق خدودي، واذا بدمج كونتور الخشم
فرشاة البنسل من سيجما بعد هذي حبيبتي.. لتحت العين، للكسرة، للزاوية الخارجية
الفرشاة اللي شعرها قصير شاريتها من زماان من مدهش نفسه، بعد مفييدة لتحت العين تركز اللون
فرشاة سيجما القصيرة الفضية مالت الدمج.. ماستغني عنها لدمج الشدو
فرشاة المشط من إيكو تولز
فرشاة الشدو العادية من إيلف.. بدولار بس ماستغني عنها للشدو عالجفن المتحرك.. تحط الولن عدددل
آخر وحدة فرشاة ايكو تولز للبلاشر... أحبها توزع اللون عدل
الصغار اللي تحت من ايكو تولز.. المدببة للكونسيلر ادمج فيها الكونسيلر تحت العين
الثانية للكونتور عجيبة خاصة من فوق مدببة شوي
السعر ومكان الشراء: طقم سيجما من موقعهم طقم 12 قطعة بـ 100 دولار تقريباً 37.700 بحريني 27.800 كويتي
فرش إيكو تولز أطقم مختلفة واحد من Drugstore والباجين من أمازون
فرش إيلف من سايتهم السودا 3 دولار والعادية بدولار @@
: : :
الأظــافر
من اليسار
مقوي الأظافر من مافالا طلبته من إيباي.. يقوي الأظافر بس يستعمل مرتين بالاسبوع في البداية بعدين مرة كل أسبوع.. ينحط على أطراف الأظافر بس وينشف لمدة دقيقة
OPI Original Nail Envy مقوي ومغذي ويستعمل كبيس مرة وحدة.. هذا عندي تقريباً من رمضان اللي طاف أستعمله باستمرار بس ساعات أنسى >< شاريته من نزيه
Burt's Bees Lemon Butter Cuticle Cream اهو اسمه زبدة بس قوامه ثقيل شمعي.. يلين الجلد حول الظافر وريحته ليمون.. واايد مفيييد.. علبته معدنية صغنونة آخذها معاي كل مكان.. وصج صغيرة بس تدوم وايد لان الكمية اللي استعملها شووووي.. طالبته من Drugstore
انا أظافري يطولون بسرعة ما شاء الله.. بس جلد يدي جاف وخاصة حول الأظافر.. وأظافري ضعيفة تتكسر بس الحين لاحظتهم قووا.. ينكسرون بس واايد اقل من قبل
الفوشي من OPI ماعندي اسمه لأنه بالبيت.. بس اللون فوشي باربي جمييييل بعد من نزيه وسعره 3 دنانير
لحمي فاتح من جاينا غليز Innocence نعوووم.. وعلى حسب الكوتز.. كوت واحد يكون تقريبا شفاف بيج خفيييف بس يحلي الأظافر ويصلح للفرنش.. طبقتين او ثلاث اللون يكون أقوى وايد حلوو بروحه.. ينحط بسهولة ويجف بسرعة نسبياً.. شاريته من دبنهامز وسعره 4 دنانير
: : :
الترطيــب والعنايــة
من اليمين مرطب اليد المركز بزبدة الشيا وريحته Sweet Pea ريحته تينن وترطيبه عجيب.. من باث آند بدي وورد بـ 4 دنانير وكان مسوين اوفر اشتريت هذا وحصلت ثاني مجان
الثاني سكراب من Soap & Glory من صيدلية بوتس.. سكراب حلووو خفيف يستعمل للويه وللجسم طريقته جنه رغوة وافرك لين تختفي الحبيبات وبعدين أغسله.. منعش، نسيت سعره ><
الثالث والرابع كريم ومعطر جسم من مجموعة الكرسمس مالت باث آند بودي.. كان في ثلاث ألوان وردي وأحمر وأخضر
عجبتني ريحة الوردي أكثر شي.. خفيفة وسويت.. وبما إن المجموعة لمتد إدشن خذيت الحجم الكبير.. سعرهم كل واحد بـ 5 دنانير وكانوا مسوين أوفر 2 بقيمة 1
العلبة الدائرية الفوشية True Blue Spa هالاختراع عجيييييب.. مقشر خاص لليد
أول مرة جربته عندهم يسوي اليد ناعمة جنه سحر.. بس قلت يمكن مفعوله دقايق فطلعت وماخذته.. شفت إنه النعومة تمت لي يوم ثاني واكثر.. رديت وخذته.. ريحته جذي شي يشبه البرتقال واشياء ثانية.. وطريقته تاخذية نتفـــة ويدج رطبة وتدلكينه حول يدج واظافرج لمدة 60 ثانية وبعدين تغسلينه وبتحسين بالنعومة مباشرة.. خذته من باث آند بدي وسعره 6.500 دنانير
هالمجموعة تيي بـ 4 ألوان وكل لون لجزء.. الوردي لليد وفي أخضر وأزرق وبرتقالي نوع للويه ونوع للجسم ونوع للريل
: : :
وبــس
خلصت أخيراً
إن شا الله يعجبكم الموضوع.. والتصوير
في إنتظار ردودكم واللي جربت شي منهم رايها مرحب فيه
صورة جماعية في الختام
مع الســلامة
