موت وميلاد
New member
- إنضم
- 22 أكتوبر 2009
- المشاركات
- 2,994
- مستوى التفاعل
- 1
- النقاط
- 0
السلام عليكم ورحمة الله وبركاته
طبعا كلنا سمعنا بالرجيم الكيميائي وشلون اذا قرر الانسان ينظف جسمه من كل السموم فيحددله نوع معين من الاكل مثل العنب او التفاح او يكتفي بس بجاي الاعشاب لمد معينه مرات 3 ايام او اسبوع او عشر
وبعد هالمده راح يلقى جسمه تنظف من السموم والوصخ والاعضاء صارت اقوى والبشره صفت وفوق هذا نزل جم كيلو
بس انا عندي رجيم من نوع ثاااااااااااني
رجيم حق القلب ووالروح
طريقه جربتها قبل فتره وعجبتي وقلت انقلها لكم وان شاءالله تطبقونها
اولا تختارونلكم فتره معينه كل شهر
يعني مثل بعد الدوره تحددون اسبوع او عشر ايام
وبهالفتره راح تمنعين نفسج من كل شي حرام وكل شي سلبي
يعني تعيشين هالاسبوع
- بدون اغاني
- بدون حش
- بدون طنازه
- بدون تذمر او تشكي من اي احد واي شي
- بدون عصبيه حتى لو وصلتي حدددج ميخالف كلها اسبوع وبعدها طلعي كل حرتج
- بدون جذب حتى الجذبه البيضه ممنوعه
- بدون لاظنين ظن السوء بالناس حتى لو حاسه انهم متعمدين ميخالف طوفي وظني فيهم الظن الخير
- بدون لاظنين ظن السوء بالناس حتى لو حاسه انهم متعمدين ميخالف طوفي وظني فيهم الظن الخير
- بدون زعل .. يعني لو تضايقتي حدج ميخالف قوي نفسج وطردي الزعل من حياتج وقولي هالفتره ممنوع علي الزعل
- واهمممم شي بدووووون ياس خصوصا الياس من الله سبحانه
((ولا تيأسوا من روح الله إنه لا ييأس من روح الله إلا القوم الكافرون))
يمكن تقولون وبعدين شنو راح نستفيد!! انا اقولكم
انا شبهت هالموضوع بالرجيم الكيميائي لانه مثل ماقتلكم بعده راح تتغير اشياء وايد داخلكم
اولا كل هذي الاشياء الي حطيتها يمكن تشوفونها صغيره
بس بالحقيقيه هذي الامور الصغيره اذا تراكمت على بعضها راح تصير جبال من الاثام وهالجبال من الاثام اهيا الي قاعده تسببلنا حزن وهم ومشاكل وضيقه بالقلب
واهيا من الاسباب الكبيره الي قاعده ترد دعائنا
ويمكن راح تلاحظون وانتو تنفذون هالشي انه اشياء وايد بحياتنا غلط
يعني مثلا انا لما وقفت اني احش باحد حسيت انه نفسيتي مرتاحه وقاعد احط راسي على المخده ضميري مرتاح
ولما كنت الاحظ البنات واهما يتذمرون ويشتكون كنت اقول معقوله انا كنت جذي تافهه وسلبيه!! لانه كل ما تذمرو واشتكو احس بطاقه سلبيه قاعده تطلع منهم
والله لما تطبقون هالشي راح تفهمون كلامي
ولازم هالموضوع اتكررونه كل شهر لو 3 ايام على الاقل
لانه التكرار يعلم الشطار
وبعد فتره راح تلاحظون انه خلاص هذا صار اسلوب حياتكم
حياة بدون حش بدون تذمر بدون اي من هذي الاثام الصغار الي قاعد تقسي قلوبنا وترد دعائنا وتسببلنا احزان ومشاكل
وفوق هذا راح تحسووون بويهكم نووور والناس صارت تحبكم اكثر من قبل وصداقاتكم زادت خصوصا مع الناس الصالحه لانه الله سبحانه اذا حب عبد جعل كل اهل السموات والارض يحبونه
واذا في شي بحياتكم تحسون انه مسببلكم ضيقه وذنب ودكم لو تقطعونه للابد بس ماعندكم القوه والاراده
جربو قطعوه بهالفتره من الوقت لين تتعودون على عدم وجوده في حياتكم والله يوفقكم ان شاءالله
وسامحوني على الطواله :hjy5jewf:
التعديل الأخير:
