مزيونه وشقره
Active member
بسم الله الرحمن الرحيم
شلونكم حبايب قلبي
يااااي اشتقت حق هالقسم وااايد احس اني مستحيه هههههههه
هذي افضل خطوات واسهل نصايح و خطوات لتوحيد وتفتيح لون الوجه والرقبه ومن تجاربي الشخصية :klhfl:
أهم شي أهم شي تعرفين شنو نوع بشرتج وتختارين لها المرطب المناسب واحط الف خط تحت كلمه المرطب المناسب
وترا اللي يناسب غيرج ممكن مايناسبج حتى لو كنتي مثل نوع بشرتها يعني شنو راح تسوين عليح انج تروحين دكتور جلديه توصفين له بشرتج وحالتها عشان يعطيج مرطب مناسب حتى لو مافيج شي اسم الله عليج هذا في حال اذا ماتبين تجربين في بشرتج بس لازم يكون شي طبي ومناسب واذا ما تبين تروحين لدكتور جلديه جربي من تجارب البنات لاقرب شي لبشرتج يعني قبل لا تستخدمين المرطب سالي البنت شنو نوع بشرتها
انا اللي ناسب بشرتي مرطب افين نوع مخصص للي بشرتها دهنيه وممكن تطلع حبوب من أي مرطب انا الحمدلله بشرتي مافيها حبوب بس قبل لا استخدمه كانت تطلع فيني حبوب من كريمات المرطبه العاديه وهذا اسم كريمي المرطب cleanance Avene
وهمن حمايتي من افين نوع للبشره الدهنيه فيه خط صغير ازرق اشتريهم من صيدليه المهلب ولاتطلعين الا وانتي حاطه كريم حمايه
وثاني اهم كريم مرطب تحت العين وانا ارشح للكل مرطبات تحت العين من جيرلان وفي انواع اختاري اللي يناسبج وممكن تستخدمين أي نوع تبين من ماركات ثانيه بس افضل يكون احد مجربه من قبل
وثالث أهم شي ههههههه كله مهم كله مهم
ثالث شي السنفره مرتين بالأسبوع وانا بشرتي دهنيه ساعات استخدمها يوم وترك
وترا السنفره تصفي البشره وتشيل الدهون والنقط السوده وانا أرشح سنفره سيت ايفيز وهذي اهيا العلبه نوع المشمش يا مشمش :dddds:
هذي صورتها
ورابع اهم شي مو قلتلكم كل شي مهم
بخاخ صغير فيه ماي ورد اختاري نوع زين ورشيه يوميا على بشرتج عقب كل وضوء او عقب ماتغسلين ويهج وخليه على ويهج وحطي مرطبج وانتي فيج ماي الورد خليه يتشرب في بشرتج
وخامس شي
صابونة الويه انا نوعي ما احب الغسول ما احسه ينظف ويهي عدل ترا اقولكم هالشي وانا بشرتي دهنيه في منطقة T zone
انا ارشح صابونة لايف بوي الحمرا
وصابونة البابايا فور ان ون وهذي صورتها
واللي بشرتها جافه افضل تستخدم غسول او صابونه للبشره الجافه
وسادس شي
الماسكات الطبيعيه للوجه
واغلى ماسك عزيز على قلبي ماسك الهرده وحليب البودر وايد نصحت فيه بنات وعقب فتره شكروني عليه
وهمن ماسك الهرده مع النشا للي بشرتها دهنيه مثلي وايد حلو وهالماس لو تحطينه يوميا عادي نتايجه عجيبه
وهمن النشا مع ماي والورد برحهم حلوين
او روب ونشا
واللي بشرتها فيها كلف تحتاج ماسك روب وشكر
او هرده وشكر
واللي بشرتها جافه تحط الهرده مع الروب ومع الشكر وتحطهم كماسك
هالخلطات لو تنحط يوميا عادي ولوتنحط على البشره اكثر من ساعه همن عادي
ولازم تغسلين ويهج بماي دافي وعلى طول تحطين الماسك
وفي ماسك المره وماي الورد وااايد حلو للبشره الدهنيه بس ديروا بالكم مو يوميا لان المره قويه اشوي مره او مرتين بالاسبوع كافي
وفي ماسك للعرايس ونتايجه تهبل بس للي لها خلق انا يوم كان لي خلق اسويه شوفوا الرابط
http://www.q8yat.net/showthread.php?t=45808&highlight=%C8%D8%C7%D8
وسوي تنظيف بشره مره كل اسبوع شوفي الرابط واذا نوعج كسوله مره كل اسبوعين ياااربي واذا نوعج حيل حيل كسوله مره بالشهر
http://www.q8yat.net/showthread.php?t=32410&highlight=%CA%E4%D9%ED%DD+%C7%E1%C8%D4%D1%E5
وبنات بقولكم شي
مو تملون ومالقينا عنايه يعني مو معقوله بتحطين الماسك الحين وبتغسلينه بتصير معجزه وتتسكر المسام وتفتحين مليون درجه وخدودج تصير ورديه لااااا مو من اول مره ممكن انتي ماتلاحظين بس ممكن مع الايام تمرين يم المنظره مرور عادي وتوقفين تقولين أي والله جنه بشرتي تغيرت
وممكن احد يلاحظج
وممكن اذا حطيتي اساس ومكياج تلاحظين ان صح بشرتج منتعشه وفي اثر من العنايه يعني لاتدققين حيل وتقربين يم المنظره وتقولين ماكو فايده
بالعكس توكلي على الله
وبعدين العنايه
والكل راح يلاحظ عليج وانتي راح تلاحظين على ويهج بعد
ونصيحتي لكم بعد ونصيحتي لعمري << أي والله علمي روحج اول
الماي
شربوا ماي كثر ماتقدرون وخصوصا الصبح
ونصيحه بعد
وانتي على الدش والماي الدافي خلي الماي على ويهج وسوي مساج هادي لويهج بحركات دائريه وانتي مغمضه عينج وللخدود واليبه الكريمه ولخشمج الموقر هههههه والحنج الحلو
ونصيحه بعد
لاتنشفين ويهج في فوطه ابدا ابدا دايم نشفي ويهج في كلنكس عن طريقه الطبطبه يعني ياطبطب يادلع هالغنيه تمشي مع البشره بس مو تمسح لا تطبطب ههههههه و الفوطه ممكن تسبب حبوب وتخرب البشره ما ادري هالشي انا اشوفه على بشرتي
ونصيحه بعد
لاتلمسين بشرتج وايد بايدج اتركي لها العنان هههههههه ولا تلمسين ويهج وايدج مو نظيفه او توج راده من بره او منظفه الغرفه ام ماسكه شي مغبر ترا البشره بسرعه تتاثر
ونصيحه بعد
الاسكينول يوميا بليل سوي لرقبتج وصدرج وتحت صدرج والابط ورشي ماي ورد للوجه سوي بس مو يوميا يعني مره بالسبوع او مرتين
ونصيحه للشفايف
اختاري مرطب شفايف حلو انا بصراحه ما طحت على مرطب وااو بالكويت دايم اشتري من بره
يوميا بليل حطي مرطب شفايف والصبح حطي مرطب شفايف يكون فيه نسبه حمايه واذا مافيه حطي مطبج وفوقه كريم حمايه اذا كنتي بتطلعين وديروا بالكم من الفازلين تحطينه وانتي طالعه ترا يحرق البشره يخليها تقلب سوده يعني للبيت عادي
وفي سنفره حلوه للشفايف
اول شي
حطي فازلين طبقه كثيفه مده ربع ساعه وبعدين اخذي خام قطن او فوطه خفيفه ومسحي الفازلين بطريقه التدليك والضغط القوي على شفايفج بعدين سوي سكراب زيت زيتون وشكر وفركي شفايفج وغسلي وحطي مرطب هالطريقه سويها مرتين ثلاث اربع بالاسبوع عادي طبيعيه وحلوه الطريقه
وعندي نصيحه يمكن تقولين مزيونه موصاحيه كبرت وقعدت تخوره علينا خخخخخخخخ
لبسي الوان تناسب بشرتج وخصوصا ملابس البيت تعطي اضاءة لبشرتج يعني انا لو البس لون برتقالي او اصفر او اسود يااااالهوي بشرتي تصير تخرع شاحبه
ولو البس رمادي او ازرق او احمر او وردي او عنابي أحس تنعكس الألوان علي وأصير أحلا
يعني لبسي هدوم تهدي مزاجج وتهدي بشرتج وتحليها والذكيه اللي تفهم كلامي هههههههه
وبنات في شغله اشوفها ان وحده تكت في ركن الاستفسارات الجماليه بشرتي فيها حبوب شنو الحل وبشرتي طلعت فيها بقعه شنو الحل هذي ممكن يكون حبوب مفاجاه بسسب التها لاسمح الله يعني البشره ملتهبه يبيلها علاج طبيب مايبيلها تجارب بنات والا بقعه ممكن تكون حساسيه مايبيلها سنرفات وكريما ممكن تزيدها
اتمنى اني فدتكم وحاولت امسك الساني وما اقرق وايد هههههههههه
واي استفسار حاااضر من عيونــــ@@ـــي
ودعواتكم لي ولعيالي وابو عيالي
:stars:
:stars: :stars:
مع تحياتي ياحياتي
مزيونه وشقره
