ودي اقول ملاحظة للمبتدئات بخصوص وقت التخمير للعجائن:🍘🍞🍕
.
بمجرد تشوفين العجينة تضاعفت اعرفي إنها صارت جاهزة👍🏼 لاتتقيدون بالوقت اللي مذكور بالوصفة عشان تخمرون العجينة
لأن وقت التخمير يختلف **حسب حرارة وجو المطبخ عندك وحتى حسب الفصول يعني بالشتاء غير بالصيف و**أيضا حسب كمية الخميرة !
أحيانا بالجو الحار خلال نصف ساعة تكون جاهزة مع إنه مكتوب ساعتين تخمير!!
وأحيانا العكس يعني بالوصفة مكتوب تحتاج ساعة لكن عندك تحتاج ساعتين ! لان لو شفتيها بعد ساعة بتلقينها ماارتفعت الا ارتفاع بسيط!
لان ممكن الماء كان بارد او الخميرة كميتها قليلة تحتاج وقت اطول تتفاعل أو الجو بارد عندك .
بكل الأحوال العجينة معك راح تختمر سواء الخميرة قليلة أو كمية عادية او سواء كان الجو حار او بارد أو الماء كان عادي أو بارد لكن المدة تختلف وأنتِ تحددين متى تكون جاهزة عجينتك من ارتفاعها.👍🏼 .
✔️طيب وش يصير لو اشتغلت عليها وهي ماتخمرت وقت كافي أو بالأصح ماارتفعت الارتفاع المطلوب:
راح تكون زعلانه ومتماسكة وماتطيعك وكل مامديتها (فردتيها)تعاند وترجع تكمش لأنها ماشبعت راحة إلى الحين بعد الخلط والعجن اللي جاها 😂 .
✔️طيب ولو تخمرت أكثر من اللازم ؟
راح ترتاح بزيادة 😕و تتمزع معك وتتقطع هذا غير ريحة الخميرة القوية اللي راح تفوح😷 .
✔️طيب متى أعرف إنه خلاص عجينتي مستعدة؟
إذا تضاعف حجمها وفيه طريقة إنك تغرسين إصبعك بوسط العجين إذا رجعت العجينة وتغطت الفجوة مكان إصبعك معناها تحتاج وقت تخمير زيادة ⏰ وإذا ظلت الفجوة معناها جاهزة👍🏼 .
✔️وترى مع الوقت والتعود ماتحتاجون لااختبار للعجينة ولا شي هي بتصير صديقتكم وتفهمينها وتفهمك وتطيعك وتسمع كلامك من أول نظرة قصدي من أول عجنه