عاد اليوم يقولون اخر يوم بالمربعانيه وبتجي عقبها الشبط وهي صززز البرد .. المهم مع هالبرد يحب الواحد ياكل التميرات او شي بوه تمر مثل الحنيني والقشد عاد هالمره انصحكم ببسبوسه التمر والهيل خطييييييره وتوكل دافيه تسنها حنيني من زين طعمه ابد زينوها قبل قهوتكم علي عطول .. .
الطريقه مثل ماهو واضح لكم بالخطوات نستخدم تمر مهروس او تمر خلاص عادي تفصصونه قبل .. بقدر صغير كاس تمر واذا حابين التمر يكون اكثر حطوا كاس ونص + كاس ماء يحرك علي نار هاديه ويهرس ونترك الخليط علي جنب يبرد .. وطبعا عارفين طريقتي بالبسبوسه علبه القشطه هي المكيال .. وبخلاط الكيك نخلط بالترتيب ٢ بيض + علبه قشطه + مقدار العلبه سكر وممكن اقل لان فيه تمر + ملقعه صغيره فانليا ونخلط خمس دقايق حتي يمتزج زين + علبه زيت + خليط التمر نضيفه علي دفعات + ملعقه صغيره هيل مطحون ونخلط خمس دقايق بعد + علبه جوز هند + علبتين سميد + ملعقه كبيره بكنج بودر ونخلط بعد خمس دقايق .. بعد كيذا نصبها بصينيه تيفال اللي يجي معها غطاء وبالفرن من تحت وبعدين فوق واول ماتخلص نقطعها ونشربها نستله خفيف مانكثر لانها بالتمر اكيد بتكون حاليه .. وبالعافيه وصدقوووني بتعجبكم وخاصه امهاتكم ربي يطول بعمارهن يارب ❤️ حركوا الصوره حتي تشفون الخطوات واذا اخذتي الوصفه طقي اللايك يابعدي تراي تعبت وانا اصور لكن الخطوات 😅 عاد تستاهلون يالغالين انتم ..