اقماع الدجاج او اللبنه

المقادير ؛
٢ ونصف كاس طحين
ملعقه كبيره خميره
٢ ملعقه زبادي
٢ ملعقه حليب بودره
٢ ملعقه كبيره سكر
ربع كاس زيت
ثلاث ارباع كاس حليب دافي
الطريقه :
يذوب السكر والخميره مع الحليب الدافي (وليس الحار ) لان الحراره تقتل الخميره و تفشل العجين
نتركها في مكان دافي لين تتفاعل وتطلع ع السطح فقاعات بعدين نضيف باقي المقادير .. نتركها تتخمر نصف ساعه
بعدين نفردها ع شكل مستطيل كبير
يقطع الى مستطيلات ضعيفه نوعا ما
ناخذ الاقماع الحديد الخاصه بعمل القمه بالعجين ندهنها بالزيت
ونبتدي نلف مستطيل العجين عليه ونحطه
ع ورق زبده ممسوح ب شوي زيت او زبده
نمسح الوجه ب صفار بيضه مخلوط مع شوي خل عن ريحه البيض واذا حابين حطو شوي سمسم او حبه سوده طبعا عند الرغبه
نتركها ترتاح كذا عشر دقايق قبل دخول الفرن
ندخلها فرن ساخن لين تنضج ،، اول ماتطلع من الفرن توضع في حافظه لين تبرد شوي حتى تحافظ ع طراوتها ،،
اذا بردت نشيل الحديده
ونحشي باللي نحب ❤️ لبنه ، خضار ، دجاج اللي تحبون انا حشيتها دجاج
طريقه الحشو
اسلق دجاج مع بهار و ملح بعدين اسحب الدجاج بعد مايبرد شوي ( اقطعه)
اقطع بصل قطع صغيره واحطها مع شوي زيت لين يذبل
احط الفلفل الاسود والبهارات واخلط
احط الدجاج المحسب واقلبه مع البصل اخليه شوي مع التقليب
اضيف له ملعقتين جبن سائل او مايونيز حسب الرغبه واخلطه معاه
واخيرا
رشه سماق وبس نحشي فيه القمع
انا افضل احشي بدايه القمع باللبنه بعدين الدجاج حتى مايصير ثقيل و يغث😅والحشو طبعا حسب الرغبه وبس ❤️❤️