من تعاني مثلي من هالمرض ...ارجو المساعده

السلام عليكم ورحمة الله وبركاته
اتمنى كل وحدة تقرأ موضوعي انها بخير وان هاليوم بالنسبه لها اجمل من أمس
خواتي انا ماكتبت الموضوع الا لان الدنيا صاكه فيني والحمدلله على كل حال
ابي آرائكم وردودكم ...اذا وحدة بتجرح او بتقول كلام بذي اقولها الله يجزاج خير اللي فيني مكفيني ولاتزيدين اوجاعي ...

بالبداية كنت مطلقه وشآءت الظروف ورجعت لطليقي بعد مدة طويله صارلي عنده الحين سنه ..طبعا تغير في بعض الاشياء والبعض الاخر لا..
وكان كل هدفي من الزواج اعف نفسي بالحلال واعيش مع واحد احبه ويحبني ويجيني طفل يترس علي حياتي ..
بداية زواجنا كان يعايرني بالمغربيات انهم حلوات وانهم وانهم ..
وكذا مره يقولي بسافر واتهاوش معاه واقوله لاماتروح يقولي مو انتي تمشيني على كيفج ..
وصرت بصراحه اشك بتصرفاته عنده تليفونين وكلهم رمز حمايه وكله بالديوانيه ووو,,,,الخ
سبحان الله حملت والحين انا بالثامن ..الله يسهل علي وعلى كل بنات المسلمين حملهم وولادتهم اللهم امين ..
المهم جاني مره قال بروح لرياض بروح عزا حق ناس وبآخذ فلان معاي طبعا رفيجه هذا انا اكرهه لانه رفيق سؤ..وقعدت اصيح وابجي واقوله كذاب انت رايح للبحرين عند .... وكلام ما اقدر اقوله هنا لانه كلام ماينقال ...ومن ضمن الكلام قلت له خاف ربك انا بنت ناس شريفه نظيفه حرام تجيب لي مرض ..باجر يصير فيني ايدز ولا مرض جنسي وش بتفيدني ..
قلت له روح لكن والله ان كانت روحتك لغير الرياض ومو عزا وطلعت رايح تصيع بالبحرين والله ماتلمسني ولاتقرب صوبي ..
المهم راح واخوه راح وياه وكان يقولي اخوي مو رايح وياي حتي قلت له لو قايل اخوك بيروح كان ماصار كل اللي صار وفعلا راحوا العزا و رجعو .. وكم يوم وتصافينا ..
المهم مرت الشهور الى ان وصلت لسابع ..وصار اللي مو متوقعته ابد ..بدأت تظهر علي النتوآت (ثآليل) تحت الله يعزكم ماكانت تعورني بس مضايقتني وبديت الآحظ كل ما زادت التهاباتي احس بشي زي الجرح يومين ويصير مكان الجرح ثالول عنقودي زي العنب بس صغير حيل ..
رحت للمستشفي وقلت لدكتوره شنو هذا قالت فايرس يجي من العلاقات الجنسيه واسمه الورم الحليمي البشري(HPV)
قلت لها بيروح قالت الله اعلم بس عموما هو ممكن يرجع رحت يابنات سويت عملية كوي وشلت بعضه ومافاد الكوي راحت خيطتني ثلاث غرز وخبركم انا بكريه مو متعوده ع الخياط والالتهبات ...
المهم الحين الاحظ زادت فيني والكوي ذابحني ومكان الخياط متعبني ..
واللي عرفته انه جتني العدوى من زوجي من العلاقات المحرمه طبعا قبل رجعتي له اكيد لاني رجعت له بشهر يناير وقبلها بشهرين رايح للمغرب طبعا عرفت هالشي من شفت جوازه ..
الحين بنات تظنون زوجي بيروح يخربط ويسافر وخاصه انه يسأل ليش ماطلع فيه طبعا على حسب ما قرأت ان الرجال ناقلين وممكن مايظهر عليهم مثل النسااء ولاني حامل ومناعتي قلت طلع فيني ..ودزيت له مواضيع عن المرض بالواتساب واكيد انه واثق انه هو اللي معديني :eh_s(2):
والله يعلم ماكنت اعرف خطورته شلته عشان زوجي مايتضايق معاي بالفراش وعشان لاقدر الله طفلي مايجيه شي وقت الولاده ..
المهم فعلا طلع لو اولد طبيعي ينتقل الفايرس للبيبي ..
الافضل عمليه ..
وهالفايرس قالولي يسبب سرطان عنق الرحم ...
زوجي احسه حاس بالذنب واحس نظرات عيونه فيها ألم ..
بنات منو جاها هالفايرس ؟؟
هل تعتقدون انه بيرجع زوجي للخرابيط ويسافر مع ربعه ؟؟
شنو علاجه ؟؟
كيف ارتاح منه ؟؟
انا شلته من عشر ايام والحين رجع طلع فيني ...
بنات ساعدوني الله يعافيكم ... منو احسن دكتورة أمراض تناسليه ..؟؟
شسوي قولولي احس نفسي مشتته وضايعه ولا علمت احد الا زوجي وانتم
ادعولي ترى دعوت المسلم لأخيه المسلم بظهر الغيب مستجابه
ارفعوا الموضوع الله يرفع قدركم يابنات

ابي ردودكم
ارفعوا الموضوع الله يرفع قدركم

الله يجزاكم خير يابنات ولا يحرمني من دعواتكم والله محتاجه هالدعوه الله يفرج هم كل وحده فيكم ارفعوا الموضوع

اه يابنات والله والله كلما اشوفه قدامي احس حره بصدري
المشكله مقدر احاسبه لانه لما خربط كان قبل يرجعني لذمته
حسبي الله عليه وعلي الحقيرة اللي ماهمها الا الفلوس ..
داليا اختج تتعالج عند مين وهل راح منها امانه قوليلي ش سوت
والله والله اني اروح الحمام الله يعزكم البول يحرقني واغسل بمايً
اجلس انط انط انط بالغرفه من الألم والله وانا حامل لدرجه مرة مغصني بطني
من كثر ما نطيت ..امشي فاتحه رجولي مقدر اضمها اذا جت لي الحاله
الله لايبلاكم والله يحفظ لكم صحتكم