قصة حب بين طلال وشيخة ... مو صج!!عجيــــــــــــبه... "قصة حقيقية"

[esperanza]

كملي حبيبتي .. نبي أحدااااااااااااث أكثر

 

[Girlicious]

يعطيييج العافية بليييز كملي لا اتنطرييييينا

 

[rawona]

بيت بو مشعل


شيخه مندمجه ادور صفحه 4 بجريدة الوطن .. وقامت ادور الخبر اللي قالت عنه حنان .. بس تفاجأت انه المكان بالصفحه على اليمين كان محطوط فيه اعلان من وزارة التعليم العالي عن فتح باب التسجيل في خطة البعثات الخارجيه لخريجين الثانويه .. وكان مكتوب بنهاية الاعلان انه التسجيل بعد يشمل خريجين العام اللي طاف بعد لانهم العام طبقوا شرط اجتياز اختبار القدرات اللي تسويه الجامعه للطلاب اللي بيدرسون بره بعد .. وعلشان هالسبب مااقبلو طلاب وايد بالبعثات العام ولقوا ان الافضل الغاء هالشرط وعلشان اللي انظلموا العام وما انقبلو بالبعثات .. افتحو باب التسجيل لهم!!

قرت الاعلان مره ثانيه .. وثالثه.. وعاشره!! مرت على كلمه كلمه .. وحرف حرف..غورقت عيونها واهي تحاول تطرد الشعور القديم اللي ردلها.. الحنين الغريب للغربه!! .. احساسها ان الاعلان المحطوط بالجريده نزلوه علشانها .. اهي وبس!
ارجعت احلامها تناديها! .. بس شلون؟ .. مستحيل.. لازم تقاوم هالاعلان .. لازم!

سكرت الجريده بعصبيه .. كانت معصبه على عمرها!! ومعصبه اكثر على حنان اللي خلتها تشوف هالاعلان!!

شيخه واهي تفكر بينها وبين نفسها: لا ماراح ارجع لاحلامي السخيفه! ماراح ارد اعيش بوهم وضياع!! انا قاعده امشي صح الحين .. تحسنت درجاتي وفي امل اني استمر بالجامعه وانجح!! لا ماراح اتخلى عن هالشي علشان سرااااااااب .. مستحيل .. مستحيل اضيع نفسي مره ثانيه ..!!

كانت شيخه غرقانه بافكارها ومشاعرها وماحست بامها تدخل الصاله ..

بدريه: هلا شيوخه انتي اهني.. قاعده مبجر اليوم؟

بس شيخه كانت "متنحه" مو صوب امها بالمره!

بدريه: هاو! شيخه.. شيوخه؟؟

شيخه: ................ << للحين عايشه بال 3D Dimention

بدريه: يمه بنيتي اشفيها؟! شيخه!! شيوووووخ!! (صرخت)

شيخه: هلا يمه .. شلونج؟؟ (وراحت تسلم على امها)

بدريه: علامج؟ اكلمج وماتردين علي؟ اشفيج؟

شيخه( تصيييييييييييح فجأه)

بدريه: اسم الله عليج!! اشفيج شيوختي؟؟ فيج شي؟؟

شيخه: يمه .. يمه الله يخليج .. يمه مابي كليتي .. مابي اكمل اهني .. يمه الله يخليج .. بليز .. لا تخلوني اضيع.. الله يخليكم يمه .. ماببي اضيع!!

بدريه( مخترعه على ماتدري شالسالفه): هاو! اشفيج يمه؟ ليش بتضيعين؟؟ اشفيج شيخه؟ لا تخليني احاتي .. تحجي قولي اشفيج؟؟

يدخل بو مشعل الصاله ويشوف الموقف..

خالد (مخترع): اشفيكم؟؟!! شصاير؟؟

بدريه ( مرتبكه): والله مادري يابو مشعل .. دخلت عليها لقيتها على هالحال .. مافهمت منها ولا شي .. ماغير تصيح وتبجي .. وتقول لا تخلوني اضيع!!

خالد: شنو؟؟ اشهالخرابيط؟؟ شيخه! شفيج؟؟!!

ارفعت شيخه راسها ودموعها مغسله ويهها .. خذت الجريده وافتحتها على صفحه 4 وأشرت على الاعلان!!

قرا بو مشعل الاعلان .. وفهم السالفه

خالد: والله لو مو تضيعين .. لو تموتين .. مافي طلعه بره! غسلي ايدج! ( وطلع من الصاله معصب)

بدريه (ضايعه بالطوشه و موفاهمه شاللي قاعد يصير): شيخه! اشفيه ابوج؟ عن شنو يتكلم؟؟ قوليلي لا تخلين اعصابي تحترق اكثر من جذي!

واقعدت شيخه تقول لامها عن كل شي .. رسوبها بالكورس.. الانذار .. روحتها مع ابوها للكليات والتعليم العالي .. كل شي .. واخر شي قالت:
يمه .. هالاعلان فرصتي الاخيره علشان اعيش مرتاحه وسعيده!! هالشي الوحيد اللي ابيه! حلمي الكبير مو اهني .. اهناك .. بره! ينطرني بمكان ثاني! يمه الله يخليج .. بليز .. كلمي ابوي .. حاولي تقنعينه يسجلني .. الله يخليج يمه .. علشاني .. هذا املي الوحيد واذا ضااااااع .. ضعت انا! وضاع مستقبلي!

(ادري وايد بيقولون اشدعوه!! مو لي هالدرجه!! بس اللي كانت تمر فيه شيخه مو طبيعي .. شي نفسي اكبر منها ! شي فعلا كان يتحكم بحياتها ! ولانها تعودت من صغر انها تحصل كل اللي تبيه وتتمناه (مو دلال او دلع) لا بس اهي جذي من صغر .. اذا بغت شي تاخذه! واذا اصرت على شي سوته! حتى على مستوى درجات وامتحانات .. اذا حطت في بالها اتييب درجه كامله اتييبها .. ولانها دايما كانت حاطه في بالها انها بتدرس بره.. وكانت واثقه من هالشي بحكم ان ابوها كان يطمنها وما يعارضها ويوافقها على خططها واحلامها .. حطمها قرار ابوها بالرفض .. وما اقدرت تتقبل تعيش عيشه اهي مو متقبلتها ولا كانت مخططه لها .. واللي زادها بلى .. لما راحوا رفيجاتها بره (واهم اللي كانوا ما يبون) واهي اللي تبي تسافر بره ماراحت.. يعني بالعربي كانت بتنفجر!!)

انكسر خاطر بدريه على بنتها .. وقالتلها تروح تغسل وتصلي وترتاح بدارها شوي .. وانشالله اهي بتتفاهم مع ابوها!

بدريه: بو مشعل

خالد: هلا ..

بدريه: انا خايفه على شيخه..

خالد: مافيها الا العافيه!

بدريه: يابو مشعل البنت حيل تغيرت .. ماهي الاوليه .. ضعفت وايد .. وصحتها كل مالها بالنازل! ما تشوف ويهها شلون اصفر؟؟ انا خايفه يصير لبنتي شي!

خالد: شلون يعني؟؟ تبيني اطاوعها واسفرها بره؟؟ تبين الناس تاكل ويهي؟؟

بدريه: انا ما اقول جذي ..

خالد: ها عيل فهميني.. هذي بنت يابدريه .. ما اقدر اخليها تسافر بره بروحها! والله انها كاسره خاطري بس لا تلوميني .. اهي صغيره وموعارفه مصلحتها عدل ... بس باجر لي افهمت بتعرف اني كنت خايف عليها وعلى مستقبلها..وانتي لا تقنعيني وتقولين انج تقدرين تفارقينها!

بدريه: لا طبعا ما اقدر! بس انا باقترح عليك حل وانت فكر فيه ..

خالد: شنو؟

بدريه: انت روح اخذ شيخه معاك التعليم العالي .. وقدم لها على بعثه بره .. وسجلها .. بالتخصصات اللي تبيها .. وتعال

خالد: لا والله؟!

بدريه: اسمعني بس .. جم واحد بيقدم على بعثه؟؟ وايد اكيد.. وشيخه شهادتها قديمه الاولويه للمتخرجين هالسنه .. وغالبا ياخذون شباب اكثر من البنات بره .. يعني اشدعوه اذا قدمت لها على بعثه بيقبلونها؟ منها ارضيت البنت وكسبتها .. ومنها اذا انرفضت ماراح تلومنا على شي وبتقتنع ان الله مو كاتبلها هالشي .. وبتكمل حياتها عادي .. حالها حال غيرها!

خالد ( واعجبه تفكير مرته): والله صاجه بكلامج! والله وطلعتي مو هينه يابدروووه ! وبجذي ماراح يكون لشيوخ عذر في انها ماتكمل دراستها بالكليه.. خلاص عيل خليها تزهب اوراقها وشغلها وقوليلها تعمل حسابها علشان تروح معاي يوم السبت انسجلها ..

بدريه( فرحانه لانها بتفرح قلب بنيتها): خووش .. يالله انا باروح ابشرها الحين!

ماصدقت شيخه اللي صار .. مرت الايام التاليه وجنها عايشه بحلم! راحت سجلت مع ابوها .. وسجلت التخصصات اللي تبيها .. وخلصت قدمت كل اوراقها .. مو باجي الا انها تصبر وتنطر النتيجه .. وتشوف شاللي مكتوب لها..

الله ياطــــــــــــــــــول الوقت .. متى ايي يوم الخميـــــــــــــس .. متى؟؟ مستقبلها كله متعلق بهاليوم!


****************************** انشالله تعجبكم هالبارتات .. اكمل معاكم العصر باذن الله .. كافي الحين تعبت من الصبح وانا افكر واطبع وانزل .. اشوفكم على خير :bye22:


​

 

[New Mum]

يعطيج العافيه رونه
القصه اتينن مافينا صبر للنهايه عذرينا

 

[» мσσ∂ч ģίяĻ «]

مشكووووووووره حبيبتي كفيتي ووفيتي ناطرينج العصر ان شالله

 

[الغاليه ام احمد]

رووونه والله شوقتينا ان اللي ما افتح النت الصبح من امس اول ما اقعد من النوم افتحه وهذا يدل على سردك الحلو والمشوق الله يعطيك العافيه واحنا بنتظارك بس الله يخليك لا اتطولين حبيبتي

 

[najdeya]

مشكوووووووووره....ناطرينج

 

[احساس طفلهـ]

روووووووووووووووووعه

نصدفين والله صرت اخر نومه العصر لين اقراء الباااااااااارتاااااااااااات

الله يسعدك على هالتحفه بصراحه

اسجل اعجابي ومتابعتى

 

[SupeR-GirL]

زييين تسوي الام
عاد ان شاء الله تنقبل وتروووح امريكا

ناطرين التكمله

 

[شباصه ريش]

يعطيج العافيه عالمجهود اللي تبذلينه بس بقولج شي واتمنى ماتزعلين مني
مطيتيها وايد والقصه للحين ما بدات
سرعي الاحداث الى ان تتعرف شيخه على طلال وبعدين مططيها على كيفج
ارجو ان تتقبلي النقد بصدر رحب))))مصدقه روحها ناقده

 

[rawona]

يعطيج العافيه رونه
القصه اتينن مافينا صبر للنهايه عذرينا

مشكوره حبيبتي .. ومعذوره..​

مشكووووووووره حبيبتي كفيتي ووفيتي ناطرينج العصر ان شالله

وانا انشالله عند وعدي.. اشوي وانزل بارتات يدد..​

رووونه والله شوقتينا ان اللي ما افتح النت الصبح من امس اول ما اقعد من النوم افتحه وهذا يدل على سردك الحلو والمشوق الله يعطيك العافيه واحنا بنتظارك بس الله يخليك لا اتطولين حبيبتي

حبيبتي.. كلامج وسام على صدري.. مشكوره على المتابعه والتفاعل..​

مشكوووووووووره....ناطرينج

العفوووووووو ​

روووووووووووووووووعه

نصدفين والله صرت اخر نومه العصر لين اقراء الباااااااااارتاااااااااااات

الله يسعدك على هالتحفه بصراحه

اسجل اعجابي ومتابعتى

مشكوره عزيزتي .. هذي شهاده اعتز قيها.. ولو انج كاسره خاطري .. لا تأخرين نومتج .. نامي وارتاحي وتالي لي قعدتي وصحصحتي .. تابعي باجي القصه :eh_s(17):​

 

[rawona]

يعطيج العافيه عالمجهود اللي تبذلينه بس بقولج شي واتمنى ماتزعلين مني
مطيتيها وايد والقصه للحين ما بدات
سرعي الاحداث الى ان تتعرف شيخه على طلال وبعدين مططيها على كيفج
ارجو ان تتقبلي النقد بصدر رحب))))مصدقه روحها ناقده

هلا حبوبه..

عزيزتي رايكم يهمي اكيد وبالعكس احب اسمعه سواء كان مديح والا نقد.. وهذي اول مره اكتب فيها بحياتي "باللهجه العاميه" واكتب حالا بنفس اللحظه.. يعني مو كاتبه القصه على ورق وتالي ناقلته لكم.. لا والله قاعده اكتب وانشر.. لحظه بلحظه.. وصج انا مططت اشوي بالاحداث لاني اكتب باسلوب الروايه.. مو القصه القصيره .. بس انشالله باحاول اختصر واسرع اشوي ..

ماتدرين.. يمكن انا تعمدت امطط البدايه علشان اختصر بالنهايه وما اعلمكم باسرار العشق والهوى! لوول
​

 

[rawona]

بعد اسبوع..

بيت بو مشعل "يوم الخميس" .. الساعه 3 ونص الفير!

شيخه غاطه بسابع نومه بدارها .. وكانت نايمه بعمق .. لدرجة انها ما حست ان احد فتح عليها باب الدار .. وبطل كل الليتات .. !!

سمعت احد يناديها: شيخه .. ! شيخه.. شيوخ! قومي .. شيخه .. قعدي يالله .. شيخه..! وحست بايدين تهزها!

بطلت عيونها بالغصب .. وشافت عزوز اخوها قاعد يكلمها .. بس ما استوعبت شيقول.. كان في بالها انها اتحلم .. وردت غمضت عيونها تبي تكمل نومتها..

هل مره الايد اتهزها حيل !! والصوت نبرته صارت اعلى واقوى : شيخه! شيوخ قعدي!

افتحت عيونها وهل مره شافت ملامح اخوها واضحه!

شيخه: عزيزان! خير اشفيك؟
عبدالعزيز: قومي بسرعه وتعالي معاي ..

شيخه: ليش اشصاير؟؟

عبدالعزيز: لحقي .. ابوي قاعد تحت بالصاله .. مو نايم من امس .. سهران ناطر الجريده اللي فيها اسامي المقبولين بالبعثات .. اسمج معاهم!

شيخه: قول والله؟ صج اسمي معاهم؟

عبدالعزيز: لا اجذب عليج انا! اي والله صج اقبلوج بامريكا ..تعالي بسرعه وبتشوفين!

هالمره ما اهتمت شيخه لكشتها ولا لبجامتها! ونزلت تركض للصاله ..

بو مشعل: بسم الله الرحمن الرحيم! شمقعدج هالحزة!

شيخه: صج يبه طلع اسمي وياهم؟ اقبلوني بامريكا؟؟

بو مشعل: منو قص عليج وقالج هالحجي؟ لا ما اقبلوج!

شيخه: امبلا اقبلوني .. توه ياني عزيزان وقالي .. صح عزوز؟ والتفتت وراها بس ما شافت اخوها!

اشوي والا بدريه نازله السلم تركض .. وتبجي.. ووراها عزوز ..

بدريه: صج انقبلتي يامريكا؟؟ والا اتقصون علي؟؟

شيخه: اي يمه انقبلت .. صدقيني .. اقبلوني !

بو مشعل (مبتسم): اي صج يابدريه اقبلو شيخه بامريكا !

قالها بفخر.. ولاول مره يحس بشعور حلو .. فرحه على احساس بالفخر لانه بنته انقبلت من غير واسطات وتوصيات! حس بالفرحه لانه شيوخه تستاهل هالشي .. وفرح من فرحتها .. ما حس بهالشعور لما انقبلت شيخه بكلية العلوم الاداريه ... يمكن لانه اهوا اللي راح وسجلها بالكليه وعارف ان قبولها فوري .. وكان شعوره عادي.. وهم بعد لان شيخه ما اختارت هالتخصص .. بس الحين يحس بشعور ثاني ... بفرحه الانتصار! .. الفرحه اللي اتيي من بعد طول انتظار .. غير شعور ما ينوصف!


****************************** يتبع!

​

 

[rawona]

كانت الايام اللي مرت فيها شيخه من بعد اعلان النتيجه حلوه وصعبه!! اهلها افرحوا لها في البدايه .. بس بعد ماخلصت لحظة الفرح .. تراجعوا ! حاولوا يخلونها تغير رايها وماتسافر! بس شيخه هالمره اصرت على رايها وموقفها وتمسكت بالامل لاخر لحظه .. وحاولت امها تخليها تشيل فكره الدراسه بره من بالها مره بالدموع والبجي ومره بالصراخ والتهديد .. بس ولاشي من هذا كله حرك شعره من شيخه وخلاها اتنازل عن احلامها !!

بدريه: شيوخه حبيبتي .. مو خلاص شفتي اسمج بالجريده؟ واقبلوج؟ وفرحتي؟ خلاص يمه مو لازم تروحين!

شيخه (مصممه على رايها اكثر من اول): لا يمه لازم اروح .. قبولي بداية المشوار مو نهايته!

بدريه: يعني ماكو فايده؟

هزت شيخه راسها تأكد انها مصممه على اللي تبيه!

بدريه: انزين عندي لج راي .. سمعيه واذا بعده ما اقتنعتي سوي اللي تبينه..

شيخه: يمه بليز خلاص .. لا تحاولين .. انا قلت لكم وانتوا بكيفكم! اذا مارحت ادرس بره باسحب اوراقي واقعد في البيت! وكيفكم انتوا تحملوا النتيجه!

بدريه: يا ام راس يابس ! سمعيني!

شيخه: يالله قولي (واهي حدها ماله)

بدريه: انا باتصل برفيجتي سعاد –تعرفينها؟

شيخه: اي وحده؟ انا اصلا مو شايفه ولا وحده من رفيجاتج!

بدريه: سعاد رفيجتي اللي كانت معاي بالدوام.. اللي على طول اكلمها .. اللي قلتلج سالفه ولدها اللي ودوه بره؟؟

شيخه: امممم اي ذكرتها .. هذي اللي ولدها انفصل من الجامعه ودزوه يكمل بره؟؟

بدريه: اي اهي .. الحين راح اتصل عليها جدامج .. وباحط السبيكر وشوفي شتقول وشنو رايها اوكي؟ مو خسرانين شي احنا خل نستشيرها!

شيخه (واهي تتحلطم وتكلم نفسها: واشدعوه عاد باخذ برايها!) : اوكي دقي عليها وخلينا نشوف شتقول!

** ** **

اتصلت بدريه برفيجتها سعاد .. وبعد السلام والمجاملات والسوالف عن اخر اخبار الاهل والاصدقاء ، سألت بدريه عن طلال ولد رفيجتها وشمسوي بالدراسه اهناك .. واذا كان ماشي الحين من عقب جامعه الكويت والا لا..

سعاد: اي والله الحمدلله .. وايد مرتاح من العيشه اهناك .. وماشي بدراسته عدل وهالسنه حولوه على حساب التعليم العالي لانه اجتاز كل الشروط وتفوق..

بدريه: ماشالله.. الله يوفقه انشالله ويبلغج فيه ويرد لج سالم غانم وبايدينه شهادته يارب ..

سعاد: مشكوره بعد قلبي .. والله يبلغج في عيالج انشالله..

بدريه: اللهم آمين.. اقول سعاد .. انا داقه اول شي ابشرج بنتي شيخه اقبلوها بالبعثات بامريكا..

سعاد: ماشالله! يالله على البركه انشالله ..

بدريه: الله يبارك فيج ياعمري .. ووالله انا متصله عليج اليوم علشان هالموضوع.. ابي رايج .. اهي وضعها تقريبا مشابه لوضع ولدج .. (وقامت تشرح لها السالفه بالتفصيل )

واخر شي قالت: علشان جذي انا الحين محتاره.. مادري اخليها تروح والا لا؟

سعاد: والله خليها تروح!

شيخه (اللي قاعده تسمع المكالمه كلها من السبيكر): هيااااااااااااا! سمعتي اشقالت؟؟ ايي هذي الامهاااااااات! خالتي تكفين ماتصيرين امي يوم واحد بس؟!

بدريه: هين اوريج!

سعاد: هيهيهي .. شوفي بدريه اهي صج صعبه لانها بنت .. بس بصراحه عقب اللي شافه طلال.. والله قمت أأيد الدراسه بره! .. انتي ما شفتي ولدي شلون كان وشلون صار!

بدريه: يعني انتي تشوفين روحتها احسن؟

سعاد: القرار قراركم اول وتالي .. بس انا اقول ودوها.. والله اهناك غير .. حتى شخصيتها بتتغير وبتعتمد على نفسها وبتتفرغ للدراسه .. وانشالله ربي يوفقها ويبلغكم فيها..

بدريه: يزاج الله خير .. ومشكوره بعد قلبي تعبناج معانا!

سعاد: لا بالعكس تعبكم راحه.. واذا احتجتوا اي شي او تبون تستفسرون عن الجامعات اهناك او اذا تبون تعرفون تفاصيل او شغلات معينه بلغوني .. وانا اسألكم طلال ولدي وانشالله ما يقصر ..

بدريه: تسلمين حبيتي.. ماتقصرين.. خلاص بنشوف الحين ابوها شيقرر عليه .. وانشالله خير ..

سعاد: انشالله.. ولا تحاتينها .. وعفيه طمنيني شيصير معاها..

بدريه: انشالله.. مشكوره ياقلبي .. ماتقصرين..

سعاد: هلا والله..


******************************يتبع!

​

 

[rawona]

ارتاحت شيخه بعد هالمكالمه.. امها اقتنعت براي سعاد.. وابوها بعد ماهان عليه يكسر بخاطر بنته وخصوصا عقب ما يتها هالفرصه..

مرت الايام بسرعه .. وربكه .. وكلها اكشن!

وشيخه كل يوم والثاني رايحه التعليم العالي << لووووول

راسلت 3 جامعات وخلصت كل الاجراءات .. وكان مابدينها شي غير الانتظاااااااااااااار..

بعد فتره اسبوعين او ثلاث .. ردت عليها وحده من الجامعات اللي راسلتهم .. وارسلولها رد باستعدادهم لقبولها بالجامعه .. خذت اجراءات القبول والمراسلات مابين التعليم الخاص والملحق الثقافي في واشنطن دي سي والجامعه وقت كبير .. وبعد وصول القبول بشكل رسمي.. استلمت شيخه ال i-20 .. وراحت تعابل مع ابوها باجراءات الفيزا الدراسيه..

*(ال i-20 ورقه قبول رسميه من الجامعه تقدم للسفاره الامريكيه كاثبات بقبول الطالب في احدي جامعات امريكا ويتم التوقيع عليها من قبل الجامعه في كل مره يقوم فيها الطالب بالسفر الى دولته والرجوع الى امريكا ومن دون هذا التوقيع لن يسمح للطالب بالدخول الى الولايات المتحده الامريكيه)

وطبعا من اول ما ياها القبول بالبعثات .. راحت شيخه سيده واسحبت اوراقها من الجامعه كنوع من الحمايه! (لانها فكرت اذا سوت جذي راح تحط اهلها امام الامر الواقع وراح يضطرون يخلونها تسافر لانها ماراح تقدر ترجع الجامعه بعد ما اسحبت اوراقها!) << والله مو هينه!!

وقرر ابوها ان مشعل اخوها يروح معاها في البدايه.. يرتب امورها ويدبر لها سكن وسياره ويقعد معاها لين تستقر وتعرف ادبر نفسها..

خلصوا الحجوزات .. كلها وكان موعد السفره اخر السنه! لان كورسها راح يبدي بشهر واحد ويبيلها وقت على ما تشتري سياره وتفتح حساب وتأجر شقه وهالامور هذي كلها قبل لا تبتدي السنه الدراسيه..

طبعا حنان افرحت حيل بقبول شيخه بس بنفس الوقت ازعلت وايد لانها بتفارق اعز صديقاتها عندها.. صديقه الطفوله والصبا مثل مايقولون.. وقبل السفره بيوم.. كان الجو عجيب .. راحت شيخه مع حنان يتمشون بالسياره على شارع الخليج.. مع ان الساعه كانت 3 العصر بس الجو كان اينن! غيم وبراااد.. والشوارع فاضيه.. لان الناس هالحزة صيام ومايطلعون ..

وقفت شيخه سيارتها جبال البحر.. وبطلت الدرايش .. كان الجو مو طبيعي! البحر هايج وصوت الامواج واهي تضرب اليال .. روعه... لون السما .. البراااااد... الهدوء... صوت عبدالمجيد واهو يغني :

قلتله كفكف دموعك وابتسم .. قال هذا ياحبيبي لا يهم
المهم انت فهل انت معي.. بعد ماطال التجافي والغياب!

الجو ساحر.. وحزين.. واللي زاده حزن.. دموع حنان.. وشيخه.. وصوت البجي والصياح!



**************************************** يتبع!

​

 

[rawona]

يوم السفر..

اصعب اللحظات اللي ممكن تمر على الانسان بحياته.. اهي لحظة الفراق! كانت شيخه واهلها كلهم متواجدين بالمطار ومعاهم حنان.. وحتى عيال اخوها مشعل كانوا معاها بهاللحظه! في الايام اللي طافت ماكان يمر يوم على بدريه او شيخه من غير مايبجون.. بدريه حست انها منهاره.. ومو قادره تتخيل انها ماراح تشوف بنتها الوحيده لفتره طويله! وكانو اهلهم وربعهم لما ايوون يباركون لها على قبول شيخه كانت بس بتجي ويصيح.. اللي قاموا يواسونها بدال مايباركون لها!

كانت شيخه ماسكه دموعها وحابستها.. وناطره اللحظه اللي تنهار فيها امها علشان اهي بعد تنهار وتبجي! بس اللي صدمها وبنفس الوقت زاد من اعجابها لامها.. ان بدريه اقدرت تمسك دموعها وتضحك وتسولف معاهم بالمطار من غير بجي ودموع! وحاولت تخفف عن شيوخه خوفها ووصتها حيل على نفسها.. وبلحظة الاعلان عن رحلتها .. سلمت شيخه على ابوها ولمته وباست راسه.. وهمست باذنه.. بارجع رافعه راسك باذن الله! .. ابتسم لها ابوها وقال : ادري فيج قدها واقدود!

سلمت على دلال واليهال واهي تسمع توصيات مرت اخوها وتشوف دموعها وحزنها.. وحست بالذنب لانها بتاخذ مشعل من مرته وعياله لفتره ..

وتالي التفتت على عزوز:: وسلمت عليه .. بس اهو ما هدها ولمها حيل.. وباسها على راسها .. وماقدرت تمسك دموعها اكثر! ادمعت عينها والتفتت على امها ولمتها حيــــــــــــــل .. لمتها جنها اخر مره تضم فيها امها بحياتها.. وخذت نفس عميق جنها بهالحركه بتي تخزن ريحه امها بروحها وكيانها علشان تذكرهالريحه الطيبه كل ما اولهت عليها! ولما لمتها حنان .. حست انها بتموت.. وانها ينت (جنت) يوم ظنت انها قادره تعيش من غير الناس اللي تحبهم ويحبونها لحظه وحده! وقبل لا تتحول لحظة الوداع الى فيلم هندي.. مسكها مشعل من ايدينها وسحبها صوب بوابة الاقلاع!



******************************* يتبع!

​

 

[حور العيون]

كملي فديييتج

 

[aldana]

مرحبااااااااااا بنااااااااااااااااااااااات
انا وصلت .......... خوش بارتات اليوم رونه الى الامام ياعسل
ولهت عليكم

 

[عاشقة الصمت]

كملي روون

اااااااااااه ما اصعب لحظاااااااات الوداع

 

[aldana]

عاشقه شلونج ......... ماشفتج من امس
خوووووووووووش قصه صح
شخبار صاحبتنا نونو وينها اليوم