موضوع خاص للأستفسارات المتعلقة بالأسنان

[sHa6o0ra]

يزاج الله خير على الرد السريع ماقصرتي

مادري ليش بس قالولي ان ظروسي ماتنصك على بعض وحطولي اول شي اكسباندر وشالو ظرسين بعدين صار عندي مشكله بظرس وشالوه بعدين تقويم وشالو 4 ظروس وبعدين
عمليه وشالو 3 وبعدين ظروسي الي بقو كنت شايله منهم العصب ومالبسوهم لانهم قصار وايد وتنتفو قامو يتكسرون وشالو4 ظروس صار فكي
صغير وويهي صغير مضيق خلقي حتى الياهل بو سنه ويههه اعرض من ويهي
يعني 14 ظرس شايلين مني


مافي حل اكبر فكي بعد مره وازرع ظروس زياده ؟

 

[نعوومه الطيوبه]

مرحبه دكتوره
بغيت اسال
انا عندى ضروس العقل الى فى الفك العلوى طلعو فى نفس الوقت من حوالى 7 سنوات قبل لايطلعو كانو اسنانى ماشالله صف واحد بس بعدين صار عندى تدافع فى الاسنان لان فكى ضيق
واحده من اضراس العقل طلعت كامله والثانيه طلع منها بس جزء
انا الحين ماعرف هل ادا شلتها رح ترجع اسنانى مثل اول وماحتاج اسوى تقويم
وانا سمعت الناس تقول ان ضرس العقل المغروسه داخل شيلها يسبب مضار كثيره مثل النزيف ويصرب اعصاب الوجه وغيره
الصراحه انا متخوفه
شورى على دكتوره من فضللك

 

[دلـــع_الكويــت]

الله يعطيج الف عافية دكتورتنا..

انا كنت حاطة تقويم لمدة سنة وشلته..والحين الدكتور عطاني الرتينر بس شكله صاير جنا قال بلاستيكي شفاف..يعني لما احطه ما يبين اني حاطة شي...وطبعا لما ابي اكل اشيله...

انزين اهني السؤال...اشلون لما اشرب شي...هل لازم اشيله ولا لأ والي انا اعرفه ان المادة البلاستيكية لازم ما يحوشها حراره..انزين انا هذا صارلي الحين شهرين تقريبا استخدمه ولما اشرب جاي قهوة نسكافيه ما اشيله وبصراحة الحين قمت اوسوس تتوقعين دكتورة ان خلال هالشهرين أثر علي بشي لا سمح الله..ولا عادي..لاني بصراحة خفت وقررت استخدمه بس وقت النوم..مع ان الدكتور قالي اول 6 شهور تستخدمينه 24 ساعة وال6 شهور الثانية بس وقت النوم...!!

وتتوقعين اروح اسوي فحص للفم ولا ما يحتاي..؟

اسفة عالطوالة والله يعطيج العافية

 

[دكتورة أسنان]

مشكووووووووووورة يادكتورة الله يعطيج العافيه

اليوم احس الالم خف شوي علي بس الله يعين

ماقدر اشيله حرام اضيع تعب سنه ونص تقويم ثابت

بتحمل امررررررررررررري لله 00

حياج الله حبيبتي الله يعافيج ..

الحمدلله عسى دوم يخف الالم و حاولي تبتعدين عن العصبيه و الضغط النفسي اهي اللي تزيد الالم ..

ديري بالج و الله يسهل عليج

 

[دكتورة أسنان]

قوه دكتوره .. مشكوره على جهودج مع البنات وانشاءالله الكل يكون مستفيد

مشكلتي ان ابي اسوي تقويم ولما رحت قالولي لازم اسوي عمليه توسيعة الفك ولازم اسويها قبل لا اركب تقويم
ورحت دكتور خاص وقالي نفس الكلام بس الجكومه ما يقدرون يسولي اياه الحين لان العياده ما خلصت او شي جذي
وحبيت اسويه بخاص بس ما اعرف الطريقه .... وشنو احسن تقويم تنصحيني فيه ...واحسن عياده ... ابي يكون مفعوله بسرعه ومضمون وابي اعرف اكثر عن العمليه و عن النتيجه واذا كانت تحتاج الى بنج كامل ولا لا وعن وضعي بعد العمليه
:eh_s(22): اتمنى انج تفيديني

هلا حبيبتي حياج الله ..

بالنسبه للعمليه انا انصحج تسوينها بالحكومه .. اما التقويم فحسب حجم المشكله يعني اللي يقرر اهو الدكتور اللي بيسويه لان في نوعين ثابت و متحرك اذا تبين مفعول اسرع طبعا الثابت ..

العمليه اهي زراعة عظم اما من نفس الجسم او عظم صناعي .. اذا كانت الكميه كبيره احتمال يسوولج بنج عام اما اذا المكان صغير فعادي الموضعي يكفي .. طبعا النتيجه بيد الله ما ادري حسب الدكتور و حسب تقبل جسمج للوضع .. اما بعد العمليه باذن الله لاتحاتين بيعطونج مسكنات اكيد اول ما يفج البنج بتحسين بالم بس مقدور عليه و راح يخف بالمسكنات .

 

[دكتورة أسنان]

السلام عليكم

دكتوره ابي اسالج عن ولدي

اسنانه القواطع طاحوا وطولوا على ماطلعت وحده والثانيه للحين ماطلعت صار سنه

عادي والا اوديه دكتور اسنان

دمتى بود الرحمن

وعليكم السلام ورحمة الله و بركاته ..

حبيبتي عادي مو شرط الاسنان لمن تطيح تطلع الدوائم بنفس الوقت ممكن الاسنان تطيح قبل فتره .. القواطع الاماميه تبدا تطلع من سن 6 الى 7 سنوات بعد ال 7 سنوات اذا مافي اي اثر لها بالمره سويله اشعه تطمني انها موجوده ولا لا اذا موجوده و قريبه نطري عادي مافي مشاكل مو موجوده خليهم يركبوله حافظ مسافه علشان اسنانه لا تتحرك باتجاه السن المفقود..

اول شي لا تستعيلين عمره اكبر من 7 سنوات للحديث بقيه

طمنينا عليج ناطره ردج

 

[دكتورة أسنان]

يزاج الله خير على الرد السريع ماقصرتي

مادري ليش بس قالولي ان ظروسي ماتنصك على بعض وحطولي اول شي اكسباندر وشالو ظرسين بعدين صار عندي مشكله بظرس وشالوه بعدين تقويم وشالو 4 ظروس وبعدين
عمليه وشالو 3 وبعدين ظروسي الي بقو كنت شايله منهم العصب ومالبسوهم لانهم قصار وايد وتنتفو قامو يتكسرون وشالو4 ظروس صار فكي
صغير وويهي صغير مضيق خلقي حتى الياهل بو سنه ويههه اعرض من ويهي
يعني 14 ظرس شايلين مني


مافي حل اكبر فكي بعد مره وازرع ظروس زياده ؟

حياج الله حبيبتي ..

ممكن حبيبتي اسوولج توسعه للفك بعمليه جراحيه يزرعولج فيها عظم .. راجعي دكتور متخصص في زراعه العظم و الجراحه .. ان شاء الله في حل للموضوع لاتحاتبن بس تحتاجين اخصائي جراحه فكين ..

 

[د.شريفة]

الله يعطيج العافيه وحياج الله بيناتنا الصراحه اول مره اشوف الموضوع وما اقول الا بارك الله فيج ان شاءالله ووفقج قولي امين

حبيبتي دكتورتنا الفاضله

انا من النوع اللي يحافظ على اسناني وايد مو شويه خيط وافرش اسناني مرتين باليوم
بس اعاني من مشكله ان اسناني وايد متلاصقه ببعضها البعض
مسوي تقويم من زمان ظل مدة 6 سنوات
وخلالها تم خلع 6 اسنان ومازالت في تراص وتلاحم حلوه الكلمه السابقه

المشكله يا دكتوره تصير السوسه بين الاسنان ما تبين من بره الاسنان نظيفه ولانقطه فيهم
فجأه احس بالم اروح الطبيب يفتح لي ضرس الا واصل لي العصب الضرس اللي يعورني والضرس اللي يمه الحين تقريبا كلهم صار معاي هالحاله
ماظل شي
حتى هاليومين احس بعوار يخيليني انقز اذا حاش واحد من ضروسي شيره او حلا للعلم ان واحد فيهم مسويته عصب والثاني مشتغلين فيه بس الظاهر بيناتهم في سوسه شسوي شنو الحل تعبت والله تعبت من كثر ماا اراجع طبيب الاسنان

 

[دكتورة أسنان]

مرحبه دكتوره
بغيت اسال
انا عندى ضروس العقل الى فى الفك العلوى طلعو فى نفس الوقت من حوالى 7 سنوات قبل لايطلعو كانو اسنانى ماشالله صف واحد بس بعدين صار عندى تدافع فى الاسنان لان فكى ضيق
واحده من اضراس العقل طلعت كامله والثانيه طلع منها بس جزء
انا الحين ماعرف هل ادا شلتها رح ترجع اسنانى مثل اول وماحتاج اسوى تقويم
وانا سمعت الناس تقول ان ضرس العقل المغروسه داخل شيلها يسبب مضار كثيره مثل النزيف ويصرب اعصاب الوجه وغيره
الصراحه انا متخوفه
شورى على دكتوره من فضللك

هلا حبيبتي

من رايي طالما ضروس العقل ماطلعت كامله او سببت تراكب الاسنان او اي الم بالفك .. شيليها احسن

غالبا الاسنان راح تاخذ راحتها بس مع الوقت و احتمال تحتاج تقويم و هالشي يفرق من مريض لاخر .. بالنسبه للمعلومه اللي قلتيها فهي غير دقيقه ابدا ..

عصب الفك يمر من اخر الفك الى الانياب تقريبا .. يعني اذا هالكلام صحيح معناته اي ضرس بينشال بياثر عليه ؟ لا طبعا .. اللي حاصل ان ضرس العقل في بعض و ليس جميع المرضى قد يكون مغروس على العصب او قريب جدا منه و هالشي يبين بالاشعه قبل العمليه .. فخلال العميله قد يحدث شرخ في العصب يؤدي الي الاحساس بالتنميل المؤقت قد تدوم فتره من الزمن وقد لا تزول .. كل هذي احتمالات و لا تخافين من الورقه الي يوقعون عليها كل المرضى قبل العمليه فهي لا تعني ان حالتج انتي بالذات خطره .. لا الكل يوقعها تجنبا للمسؤوليه لما قد يحدث باذن الله و خارج عن ارادة الطبيب ..

من رايي سوي اشعه و سالي طبيبج عن خطره الوضع احتمال كبير جدا مايكون في اي مشكله لانها ناااااادره توكلي على الله

 

[سمار الشمس]

مرحبا دكتورة بغيت اسال عن طريقة تبييض الاسنان بازالة الطبقة الرقيقة ووضع مكانها نفس القشرة عشان تصير نفس الفنانين بيضة وحلوة والله ناسية اسمه

بغيت اسال عن النتيجة هل بيصير تغيير على اسناني غير اللون اقصد بالشكل و البياض هل بيصير اوفر لاني شفت وحده مسوية ضروسها بيضة لدرجة اني قمت اشوفهم زرق وشكل اسنانها تغير بس ماعجبتني موحلوة وهل الافضل هالطريقة ولا الزووم؟


وهل صج في طريقة طريقة تترتيب للاسنان غير التقويم؟ وشنو ايجابياتها وسلبياتها؟
ومن قبل قالي كذا دكتور ضروس العقل لازم اشيلهم ال 4 لان طالعين غلط بالجراحة فجم يوم راح اعاني من الجراحه وهل اشيلهم كلهم بوقت واحد ولا واحد واحد ولا شنو بالضبط وسامحيني عالاطالة

 

[مــسـك]

وعليكم السلام ورحمة الله و بركاته ..

حبيبتي عادي مو شرط الاسنان لمن تطيح تطلع الدوائم بنفس الوقت ممكن الاسنان تطيح قبل فتره .. القواطع الاماميه تبدا تطلع من سن 6 الى 7 سنوات بعد ال 7 سنوات اذا مافي اي اثر لها بالمره سويله اشعه تطمني انها موجوده ولا لا اذا موجوده و قريبه نطري عادي مافي مشاكل مو موجوده خليهم يركبوله حافظ مسافه علشان اسنانه لا تتحرك باتجاه السن المفقود..

اول شي لا تستعيلين عمره اكبر من 7 سنوات للحديث بقيه

طمنينا عليج ناطره ردج

الله يعطيك العافيه دكتوره

بوديه دكتوره ونشوف وان شاءالله خير

اذا على العمر هو كمل ثمان سنوات في 13|2

تسلمين على اهتمامك

 

[BlackRose]

سلام دكتورتنا

عندي سؤال

اسناني الامامية على طول احس جنه فيهم هوا بارد

يعني اهما حساسسين؟؟؟؟

شنو اقدر استخدم لهم

علما اني استخدم معجون كلوس اب وغسول سنسوداين للاسنان الحساسة تقريبا 3 مرات في اليوم




سؤال ثاني



انا عمري 35 سنة واكو فتحات بين اسناني اقدر اسوي لي تقويم؟؟؟؟


سؤال ثالث

اسناني الامامية التحتانية من كثر التنظيف صاير شكلهم من تحت مثل بينهم فتحة بس من فوق ملصوقين ببعض

شنو الحل


ولج جزيل الشكر

 

[نوف الكويت]

مرحبا دكتوره

شلونج ان شاء الله بخير

بغيت استفسر عن عمليه تنظيف الاسنان

رحت للمستوصف الحكومه قالت لي الدكتوره مااقدر اسويلج لان

اللثه عندج تعبانه !! عطتني علاج!!

رديت مره ثانيه لقيت دكتور جان يقولي

ماراح اسويلج لان اسنانج ماتحتاج تنظيف@@!!

طيب بسوي شلون يعني!!

تخيلي رفض!!

طبعا مالي الا الخاص!!
دقيت على احد العيادات وسالت عن السعر طبعا

قالت لي اذا عند استشاري ب 20!!
واذا عند دكتور ب 30 وطالع الى ال 80@@!!
سالتها الفرق
قالت
الدكتوره اعمق تنظيف!!

طبعا انا مافهمت شي!!

وحبيت اسالج هو التنظيف درجات وشلون يصير!!

ويعطيج الف عافيه

 

[روح البنفسج]

السلام عليكم دكتوره

حبيت استفسر عن شغله انا اللثه عندي صارلها فتره كل مره تقمج والحين لونها بنفسجي قامج حتى الشفايف قمجت واللي يشوفني يقول انتي ادخنين انا مادخن فيني ربو رحت دكتور سولي تنظيف اللثه وقالي اللثه مافيها شي وتعالي شهر 5 اسويلج تنظيف ثاني سألته عن الليزر موعارف اللي ابي اعرفه جم جلسه احتاج حق تفتيح اللثه دقيت علي عيادات يقولون جلسه وحده بس معقوله والشفايف انا سمعت اني في ابره حق المدخنين يشلون الدم الفاسد منها ادري قرقت على راسج سوري اتمني ردج لاني محتاره

 

[روج كرزي]

السلام عليكم ..

يعطيج العافية دكتورتنا .. والله يرزقج على قد نيتج ..

بغيت اسأل شنو علاج الأسنان المتقدمة ؟ هل هو التقويم ؟ والا مافي ؟

 

[AlZeenah]

دكتورة بغيت استفسر عن التقنية اليديدة في تلبيس الاسنان بدون برد يعني بس يحطون قشرة ضعييييييفة على كل ضرس لحمايتة وعشان مايتغير لونهم اسمها المينيريال اتوقع

انا حابة اسويها عشان اسناني يصيرون بيييييض مثل الفنانات واتمتع بابتسامة هوليود
بس شرايج بهالتقنية منها ضرر؟ مع العلم انها مكلفة

 

[قلب راشد]

كان فيه اعلان من فتره بجريده بس ناسيه اسم العياده

يسوون تقويم اسنان بستة شهور فقط

هل تعرفين هذه العياده ؟؟

وما رأيك بالمووضوع ؟؟

 

[fashionistaq8tya]

انا حطيت تقويم اسنان من اربع اشهر والحين حط لى الدكتورمسامير باللثة وآنا ما ادري هذي المسامير طريقه يديدة ولا لأ لأن اختي حطت تقويم اسنان عند دكتور ثاني بس ماحط لها مسامير افيدوني

 

[رشنا]

مساء النور حبيبتي ..

والله حق الفلجات انا افضلها بالمقارنه بالحلول الاخرى طبعا .. اهي الاقل ضررا و شكلها حلو بس لها شروط يعني مو اي مسافه ممكن تتسكر فيها فلازم تروحين تتاكدين قبل ..

طبعا انصحج بالخاص حق هالموضوع بس منو مادري والله ماعندي علم ابدا اسمحيلي

شكرا على ردج دكتورة

انا الحمدلله سويتهم طلعوا يهبلون :eh_s(6):ومومتحسفه على الي قطيته عليهم

بس شلون احافظ عليهم سألت الدكتور قالي بس فرشيهم مرتين او ثلاث باليوم

في شي ثاني

انتي دكتورة باي مركز

اسناني ذبحهم التسوس كل ماروح التخصصي يحفرون منهم شوي وبالتالي التسوس للحين موجود وسيء

وماعندي ميزانيه للخاص

شكرا

 

[دكتورة أسنان]

الله يعطيج الف عافية دكتورتنا..
انا كنت حاطة تقويم لمدة سنة وشلته..والحين الدكتور عطاني الرتينر بس شكله صاير جنا قال بلاستيكي شفاف..يعني لما احطه ما يبين اني حاطة شي...وطبعا لما ابي اكل اشيله...
انزين اهني السؤال...اشلون لما اشرب شي...هل لازم اشيله ولا لأ والي انا اعرفه ان المادة البلاستيكية لازم ما يحوشها حراره..انزين انا هذا صارلي الحين شهرين تقريبا استخدمه ولما اشرب جاي قهوة نسكافيه ما اشيله وبصراحة الحين قمت اوسوس تتوقعين دكتورة ان خلال هالشهرين أثر علي بشي لا سمح الله..ولا عادي..لاني بصراحة خفت وقررت استخدمه بس وقت النوم..مع ان الدكتور قالي اول 6 شهور تستخدمينه 24 ساعة وال6 شهور الثانية بس وقت النوم...!!
وتتوقعين اروح اسوي فحص للفم ولا ما يحتاي..؟
اسفة عالطوالة والله يعطيج العافية

الله يعافيج حبيبتي ..
لا توسوسين هالماده مو بلاستيك اللي انتي متخيلته :eh_s(6): له مواصفات معينه انه ينلبس 24 ساعه مع الاكل و الشرب بارد او حار باذن الله ماياثر على شي ..
سمعي كلام دكتورج علشان اسنانج لا ترجع مثل ماكانت و تخترب ..
حياج الله يعافيج