المدرسة طاقة بنتي

[srsr]

شلونكم معلماتي
امس بنتي آخر الدوام دشت على البيت بالعادة تسلم على وتضحك دشت وشكلها كانت مصدومه ولاسلمت علي وخانقتها العبرة قلتلها وين السلام شفيج جان تبطها بجيا سالتها شفيج جان تقولي الأبلة مالت تنظيم الطابور ودتني انا واربع بنات غرفة وطقتنا كلنا وانا امسكت اذوني او لوتها ورفعتها لين فوق وجنها بتنقطع اذوني في ايدها وكانت في ابلة ثانية تقول حق الأبلة اللي قاعدة اطقهم لاطقينهم جذي طقيهم بالعصاية احسن انا طقتني البوهه وعصبت سالت بنتي ليش طقتج الأبلة لأنه انا اعرف بنتي هاديه وخجووووله لابعد الحدود وكل المدرسات يعرفون هالشيء وانا اول بداية السنه مبلغة الأخصائية النفسية عن خجلها الزايد لدرجة انه ماعندها صديقات المهم ليش طقتج الأبلة تقول بنتي انها كانت بالصف وبعدين طق جرس الطابور واول ماطق رحت الحمام تكرمون واول ماخلصت وراحت الطابور شافتها الأبلة وقالتلها وين كنتي قالت لها بالحمام وقامت المدرسة كمشتها من هدومها ودزتها من ظهرها اوودتها غرفة اللي قلتلكم عنها
الحين انا حزتها قلت والله لو موالدوام منتهي جان سويت سالفة
ابي اعرف هالموضوع عادي بالمدارس واللى ممنوع اللي اعرفة انه الطق ممنوع وانا انشاءالله يوم الأحد رايحة حق الناظرة واذا ماتخذة اجراء بالمدرسة وجدامي راح اشتكي بالوزارة عليها بس ابي اعرف شنو الأجراء اللي راح تتخذة الناظرة مع المدرسة وهل اهو كلام جدامي بس واللى اجراء قانوني

 

[βνĹĂĢŔĨ-Q8]

لا حبيبتى الطق اصلا ممنوع واحسلج تروحين لمدرسة وتشتكين عليهم

 

[<< أزيان >>]

هذي مدرسه ولا معتقل شنو طقيها بالعصا احسن هالسالفه ماينسكت عليها بس تأكدي من بنتك واذا مومسويه شي غلط او مبالغه بشرحها لك لأنها صارت فيني من قبل ورحت المدرسه وانا حدي مدخنه ولما واجهت بنتي بالمدرسه بنتي انكرت كل إلي قالته لي وصرت حدي مصخره شان تقولي المدرسه ياحراااااااااااااااااام مسكينه تصدقين كلام طفله ماتدرين انهم يتخيلون ويألفون شي ماصار ورديت البيت وبردت جبدي في بنتي طق عشان اتوب

 

[srsr]

[color="darkorchid"][/color]مشكووورين على الردود
بس مااعتقد بنتي جذب لأنه كانت صج مصدومه وانا احققت معاها عدل وحاولت اسحب منها الكلام وحاولت اعرف بطريقتي الخاصة معاها انها اتبالغ ولا لأنه وهددتها اذا اجذب راح اعاقبها وحلفتلي انه كل اللي قالته صج

 

[¤§ زيتونة §¤]

حبيبتي

الله يعين بنيتج الصراحة شنو هذا؟؟؟

روحي للمدرسة يوم الاحد وكلمي الناظرة ومالج شغل مو معقولة بنتج الفت كل هالقصة؟؟؟؟!!!

لا خل الناظرة تطلب المدرسة وقابليها وقولي لها شنو السبب اللي طقيتي بنتي عشانه ولا تتنرفزين من اول شي لا خليج عادية كانج ياية تسالين عن السالفة وبعدين اذا انكرت قولي لها البنت ياية غير عن كل يوم واكيد في شي...


حبايبي والله لا تسكتون عن بناتكم عقب سالفة طالبة العارضية الفقيرة اللي راحت من جيس اهلها بسبب صراخ الابلة وخرعتها .. لا تتخلون عن بناتكم لو شنو


انا ابلة بس الحمدلله الطق ما يدور عندنا واساسا اهو ممنوع وهذي يعد تشجع رفيجتها تبيها تطقها بالعصاية؟؟؟




ابيييييييييييه والله انقهرت حدي

 

[xxx]

هلا سرسر

بعد عمري بنتج كسرت خاطري

حتى لو غلطانه شكو تمد ايدها عليها

روحي المدرسه واشتكي لا تسكتين

 

[شووكولاته]

ايه والله لاتسكتين حتى لو بنتج غلطانه مالها حق طقها احنا نودي بناتنا عشان يعلمونهم ولا يطقونهم 0000

 

[التوليب]

حبيبتي الله يعينج بصراحه انا وحده من الناس لما اشوف أي كان ينطق جدامي يعورني قلبي حيييييل بصراحه تحوشني حاله نفسيه مع اني مره اشكبري فما بالج هالبنت الفقيره بس مثل ماقالوا لج الخوات هدي نفسج وسمي بالرحمن وتفاهمي أحسن مع الناظره بعدين خل ينادون لج المدرسه .....وانا مشكلتي الخميس ادهى وأمر بنتي من خوفها من المدرسه ونخاف ان درجتها ماتعجبني مسكينه وفيها ربو اتصدقون دقت علي بنتي الثانيه من المدرسه تقولي يما ترى اختي طاحت غشانه وموقادره ترد علينا وماتفتح عينها وبعدين قلت لها عطيني الأخصائيه قالت لي نفس الحجي تعالي لأنها ماترد علينا عاد انا قمت وطلعت من الدوام ولا البنت الأخصائيه حاطتها بره الغرفه واهي مو عندها جان ادخل على الوكيله وقمت اصرخ عليها اشلون البنت جذي حالتها بالله ماصحت الحين منو المسؤول ؟ طبعا كالعاده طلعتني غلطانه وان المدرسه عندها عاد قلت لها روحي ناديها لي والحمدلله اطلعت انها صج مو بالغرفه هادتها وقاعده اتسولف بالساحه مع وحده ثانيه ةعاد قالت لي الوكيله انشالله الأحد تعالي وتفاهمني معاها وشوفي الصح من منو؟ لما وديتها المستوصف عصب علي الطبيب وقالي لو البنت الحين رايحه منج من المسؤول والمدرسه مايابوها الطبيب ؟لا وكانت على هالحال نص ساعه اتصدقون واهي فيها ربو بالله احنا الحين شنسوي بهالحاله ؟؟؟والله يعين الجميع

 

[بدوره 22]

لا تسكتين اختي الله يخليج وقولي لنا شنو يصير معاج

 

[بدوره 22]

احنا ما نمد ايدنا على عيالنا لشان نمدهم على عيال الناس .. عيالكم امانه عندنا وااااااااااااااااااي

شلون جذي !!!!!

بلييييييييييييييييييييييييييييييز لا تسكتين روحي المدرسه ومثل ما قالوا البنات ساليها بكل هدوء وخليج هاديه بالكلام, بس اذا طلع صج اللي صار وقدرتي تتاكدين ولو بنتج تقول اسامي باجي البنات بعد علشان يكون في شهود ...

اتخذي موقف وكلمي المديره ولا توقفين الموضوع لي عند الاخصائيه الاجتماعيه ترى والله اكو اخصائيات ومع احترامي للكل بس علشان ماتبي تسوي حزازه بينها وبين المعلمات ما تبلغ المديره باللي يصير ...

ووالله صار هالشي بمدرسه من المدراس اللي اشتغلت فيهم .. ( طبعا مو كل المدارس فيها جذي ) بس انا قلت انبهج

 

[رفرف]

لا تسكتين حبيبتي حتى لو بنتج شنو مسوية محد له حق يطقها !!

بس اول تأكدي من بنتج شنو السالفة بالضبط واذا فعلا طاقتها تشتكين عليها وتتبهدل مالها حق تطقها ..
احنا بمدرستنا اي مدرسة تطق بنية الناظرة تخلي مسئوليتها تنادي المدرسة وتخليها تتفاهم مع ولي الامر يبهدلها يشتكي عليها كيفه اهيه اللي جنت على روحها اكيد محد يرضى عياله ينطقون !!

 

[فوفو22]

هوووووووووووووووووووووووووب

شنو شنو شنو


طق بعد



اقري كلامي عدل وطبقيه يا سرسر

الموضوع ما ينسكت عنه ابدا

شنو هذا كل معلمه تطلع عقدها على عيالنا

والله روحي للوكيله واعملي استدعاء لها وطلبي تحويلها انتي وياها الى الشئون القانونية بالمنطقة التعليمية

ولا تكتفين بلفت النظر فقط

هذا اذا عملوا لفت نظر من ادارة المدرسة

احنا نربي عيالنا سنين على الاحترام والحب والدراسة

وتجي معلمه الله يهداها تخرب التربية بسلوك ماله اي معنى

سوى انها تصلح لاي شي غير مهنة التدريس

ولعلمك الخاص لج ولكل البنات

الضرب منوع ممنوع ممنوع

وعندي الرقم الساخن مال نورية الصبيح اذا تبينه

وهي لو تسمع عن هالحاله مارح تسكت

وبانتظار الاحداث

 

[أسرار الطبيعة]

حبيبتي
أنا ثاني يوم كنت في الإداره وطلبت رئيس القسم علشان مدرس فصل بنتي صرخ جدام بنتي على طالب معاها في الفصل
مو من حقه لا يصارخ ولا يلوح بيده فشلون اساسا يمدها على جسم طفل هزيل
والله ثم والله ، لو كنت وزيره التربيه فصل من الوظيفه على طول
قبل أم يكون معلماً المفروض يكون مربي ، وحضرته متربي وآدمي ويفهم بالسلوك الإنساني وواعي
الطلبه عهده في المدرسه بذمة المعلم وبذمه المدير قبل ، واحنا ندري الدنيا فوضي فلا تسكتين برجاء على بنتك ..

 

[اخصائية احتياجات خاصه]

شوفى حبيبتى انا من رايى انك تروحى للابله اولا وتشوفى رد فعلها معاكى ايه وليه عملت كدا مع البنت؟؟
ولو لقيتى انها هترد عليكى باسلوب سئ اتجهى للناظره مباشرة لكن ابتدى بالحسنى اولا يمكن البنت عملت حاجه غلط بس مش واخده بالها علشان تخلصى ضميرك وتكونى عملتى اللى عليكى ولو اعتذرت لازم طبعا توبخيها وتشددى عليها ان ده لو اتكرر تانى هتتخذى الاجراء القانونى المناسب
ده رايى وربنا يلهمك الصواب وبلغينا بالى حصل لما ترجعى

 

[القرآن ربيع قلبي]

مانقول الا لاحول ولا قوة الابالله
التربية خلاص اوضاعها كل مالها تردى
الله يحفظ عيالنا من الحراس
الله يحفظ عيالنا من الفراشين
الله يحفظ عيالنا من المعلمين
الواحد يودي عياله المدرسة وايده على قلبه
بلغينا بالاخبار ولا تسكتين وترى الناظرات يخافون على سمعتهم منهالسوالف فلاتسكتين

 

[توني مترقيه]

لاحول ولاقوة إلا بالله ،،، بعض المعلمين والمعلمات شوهوا صورة المعلم ،،، معقدين نفسياً ،،وعقدوا عيالنا ،،،
إتكلي على الله وكوني ظهر قوي لبنتج ،، وحتى لوكانت غلطانه محد له الحق يطقها،،،
و فيه ألف طريقة وطريقة للعقاب ،،منها استدعاء ولي الأمر وغيره ،،
دافعي عن بنتج جدامهم ولاتتخلين عنها وإذا كانت غلطانه بالبيت حاسبها وقولي لها أنا دافعت عنج بالمدرسة ومرة ثانية علميني بكل شي يصير بالصج موتجذبين وآنا ما أعتقد بنتج تتبلى على الأبلة لأن مثل ما قلتي خجوله وتنقصها الثقة بالنفس،،،
على فكرة الطق بكل المدارس بس ألحين صاير موضه،،
عندنا المديرة المساعدة تذبح الأولاد من الطق بسبب أو بدون سبب طالع من الحصه ( طاخ على راسه ) راح الحمام ( طاخ على راسه ) الأولاد ما يحبون يدشون المدرسة بسبتها عاد تخيلوا المدرسات الوافدات شيسوون بالأولاد إذا هذي تصرفات المديرة المساعدة ؟؟؟ ذابحينهم من الطق،،
وعلى شينها قوات عينها،،تقول الضرب ممنوع وبحولها للتحقيق إللي تطق ،،(وهذا كلامها في اجتماع مجلس الإدارة) ،، وآنا من الحرة جان أرد عليها حولي روحج للتحقيق إنت أول وحدة تطقين ،،(( صكت بيني وبينها)) ،،وقلت لها أنا أول من يشتكي عليج مع أولياء الأمور إذا طقيتي عيالهم ،، وارتبكت جدام المديرة جان تقول من حرصي عليهم أطقهم وبعد الإجتماع كلمتني مع المديرة لاإهي ماتقصد جان أرد عليهم الأولاد أمانه عندنا لو يصير لهم شي إنتم أول المسئولين عنهم إذا إسلوبكم بالإدارة كله طق شنو تتوقعون من باقي الهيئة التدريسية ؟؟؟؟؟
وإذا فيكم عقده لاتطلعونها على عيالنا ،، وكتبت تقرير عن الوضع وإذا صار شي بطلعه في الوقت المناسب أخلي مسئوليتي ،،لأنهم أكيد خايفين مني وبيدبرون لي شيء عشان أسكت عنهم ،،،،،

 

[srsr]

حبيبتي

الله يعين بنيتج الصراحة شنو هذا؟؟؟

روحي للمدرسة يوم الاحد وكلمي الناظرة ومالج شغل مو معقولة بنتج الفت كل هالقصة؟؟؟؟!!!

لا خل الناظرة تطلب المدرسة وقابليها وقولي لها شنو السبب اللي طقيتي بنتي عشانه ولا تتنرفزين من اول شي لا خليج عادية كانج ياية تسالين عن السالفة وبعدين اذا انكرت قولي لها البنت ياية غير عن كل يوم واكيد في شي...


حبايبي والله لا تسكتون عن بناتكم عقب سالفة طالبة العارضية الفقيرة اللي راحت من جيس اهلها بسبب صراخ الابلة وخرعتها .. لا تتخلون عن بناتكم لو شنو


انا ابلة بس الحمدلله الطق ما يدور عندنا واساسا اهو ممنوع وهذي يعد تشجع رفيجتها تبيها تطقها بالعصاية؟؟؟




ابيييييييييييه والله انقهرت حدي

مشكووورة حبيبتي على ردج وانا متاكدة انه بنتي ماالفت السالفة وراح اطلب المدرسة وبسمعها بالأول علشان متسرعة بحكمي والله يعيني

 

[srsr]

هلا سرسر

بعد عمري بنتج كسرت خاطري

حتى لو غلطانه شكو تمد ايدها عليها

روحي المدرسه واشتكي لا تسكتين

هلا فيج بنوته
صاجه حتى لوبنتي خلطانه مالها حق تمد ايدها عليها انا امها عمري ما لويت اذونها
واكيييييد ماراح اسكت وانشاءالله ابلغكم شصير معاي

 

[srsr]

ايه والله لاتسكتين حتى لو بنتج غلطانه مالها حق طقها احنا نودي بناتنا عشان يعلمونهم ولا يطقونهم 0000

ماراح اسكت بعد عمري
انا اتوقع المدارس صارت معتقل تعذيب موعلشان تعليم

 

[srsr]

لا تسكتين حبيبتي حتى لو بنتج شنو مسوية محد له حق يطقها !!

بس اول تأكدي من بنتج شنو السالفة بالضبط واذا فعلا طاقتها تشتكين عليها وتتبهدل مالها حق تطقها ..
احنا بمدرستنا اي مدرسة تطق بنية الناظرة تخلي مسئوليتها تنادي المدرسة وتخليها تتفاهم مع ولي الامر يبهدلها يشتكي عليها كيفه اهيه اللي جنت على روحها اكيد محد يرضى عياله ينطقون !!

زين تسوي الناظرة علشان كل مدرسة تعرف حدودها لي وين وكون رادع لها عن اي تصرف تسويه مع الطالبات
وياريت تخليني اتفاهم مهاها بطريقتي