تعالي معاي نجهز روحنا حق رمضان & اسراري في ادارة وقتي من غير خدامه

[حرم راشد الماجد]

مشرفة القسم / أحلى همبه كويتية






بسم الله الرحمن الرحيم


السلام عليكم ورحمة الله وبركاته


طبعا رمضان قرب ما بقاله جم شهر ويهل علينا :eh_s(17):

اذا الله سبحانه جعلنا من الحيين وعطانا عمر ما نبي نستهلك وقتنا كله بالطبخ والنفخ

اللي يعرفني يدري ان ماعندي خدامه وحاليا اداوم بمعهد الصبح لي الساعه 1.30 وطول عمري اللهم لك الحمد بيتي يلق وسفرتي فيها مالذ وطاب من كل شي حتى بالايام العاديه


انا معوده ريلي وبنتي ماكو اكل مطاعم واللي يحبونه من اكل المطاعم اسويلهم اياه بنفسي والمطاعم ماناكل منها الا مره بالاسبوع لما نكون طالعين >>>>>>>> ما اثق باكل المطاعم



المهم مالكم بالطويله



الحين ابيج تيبين معاي ملف اللي اوراقه تكون شفافه تحطين فيه اوراق

مثل هذا يعني

وتقسمونه أربع أقسام


القسم الأول : مقبلات & سلطات &شوربات

القسم الثاني : الاكلات الرئيسيه

القسم الثالث : حلويات

القسم الرابع : مشروبات وملاحظات


تبلشين تسوين جدول فيه ثلاث خانات وتكتبين بالخانه الأوولى : القسم والخانه الثانيه نوع الاكل الخانه الثالثه المكونات


مثال

القسم الأول >>>>>>>>>> الخانه الأولى
الخانه الثانيه : سبرينغ رول بالجبنه والنعناع المجفف
الخانه الثالثه : 3 عجينه صينيه + جبنة فيتا سعودي نص كيلو + نعناع شدة تقريبا
وتكتبين ملاحظه انج بتسوينه باليوم ( الجمعه تاريخ ....../....../.....)

لين تترسين الملف وتكتبين جم حبه سويتي منه وتقسمينه على وجبات بكل مره مثلا 6-8 حبات وتحطينا بجيس وتفرزينه


وتكتبين قائمة بكل شي بتفرزينه


مثال

50 حبة كبة بطاط
50 حبة كبة برغل
50 حبة كبة عيش
50 سبرينغ رول
50 سمبوسه
50 كبة الدجاج بالتوست >>>>>>>>>>>>> تهبل انا وبنتي ادمان عليها
50 كبة البطاط بالتوست والجبن >>>>>>>>>>>>> اختراعي اقولكم طريقتها بعدين
كبة عروق

طبعا الكميه هاذي وايد انا اسوي ربعها تقريبا واحنا مو ذاك الزود ع الكبه ( بطاط + عيش ) فاشتريها جاهزه 50 حبه بدينارين تقريبا ونفس الشي مع كبة العيش انا اخذ 50

اليحن نيي حق اللي احنا نسويه بالبيت

كبة برغل امي تسويها وتسوي حسابي معاها
سبرينغ رول

عادة احشيها قشقوان مع جزر أو كرفت تشيدر أو كيري

وعادة الكيري اخليها مع الشيره تصير الذ حلو

سمبوسه : لحم مفروم + سمبوسة جبن بالنعناع

كبة التوست

تيبين ديايه متييييييييييييييييييييينه ام 2 كيلو >>>>> انا اخذها فرش واقول له يصلخها يعني يشيل الجلد وتفوحينها لين تذوب تالي تطلعينها وتنتفينها تسوينها مسحب يعني

بعدين بمقلى كبير تحمسين بصلتين كبار وعليهم شدتين بقدونس تحطين عليهم الدياي وتالي ملعقة كركم
الحين تيبين 3 أكياس تقريبا وتقصصين اطراف التوست وتبلين ايدج بشوية حليب تبللينها تحشينها بالخلطه وتلفينها اصابع مع الضغط عشان تسكر تالي تغمسينها بالبيض والبقسماط

تحيطنهم بصينيه وتخلينها بفريزر لين تثلج شوي وتوزعينها بأكياس


وبالنسبه للبطا تفوحينه وتهرسينه مثل الماشد بوتيتو وبعدين تخلطين البطاط مع موزاريلا وجزر وذرة

تدهنين التوست بخلطه ( ملعقتين مايونيز + ملعقتين فرنش صوص ) وتسوينها نفس طريقة الدياي


تقريبا هالانواع وهالكميه تقعد عندي السنه كلها مو بس رمضان :eh_s(1):

كبة عروق تقصصين خضرتج ( انا احط بقدونس + كرفس + بقل + ثوم + طماط + ربع كوب طحين نخي + نص كوب طحين عادي + ماي شوية بهارات اللي تفضلينها انا احط بهارات مشكله وفلفل اسود شوي )

تخلطينهم وتعبينهم بأكياس وعالفريزر اول ما تيين من داومج طلعي الجيس وخليه على ما يجي وقت الاذان الا هو فاج من الثلج



الحين

نجهز الشوربات

شوربة دجاج بالذرة >>>>>>>>>> ملكة الشوربات
شوربة عدس

طبعا اسوي الشوربة بمكيات كبيره مثال ترس جدر وسط واقسمها بأكياس وسيييييييييده عالفريزر من النار عالجيس عالفريزر

وكل يوم اطلع جيس واحطه بجدر واخليه يطبخ عالراحه على نار هاديه


القسم الثاني

الوجبات الرئيسيه


................................ يتبع

 

[متوترة]

ماشاء الله تبارك الرحمن
بس انا فريزري صغيرررر والله يعين.....
كان سمبوسه بثلج هي الي شغلها يلهد والحشوات

متابعتج فديتج

 

[**فديت عيونه**]

بانتظاااارج يام السنع انا بتكون عندي شغاله ان شااءالله

بس احب شغل ايدي .. واكون مواجب ويا اهل زوجي واخوانه المتزوجين
يعني كل يوم ع واحد والله يبارك لنا بجمعاتنا ويطول باعمارنا ويبلغنا رمضان غير فاقدين ولامفقودين

 

[حرم راشد الماجد]

مشكورين كل اللي ردو



نكمل اطباقنا الرئيسيه


طبعا اكثر شي ياخذ وقتنا برمضان هو المرق ومالنا غناة عنا حق التشريبه

تعالي اقولج شتسوين


قومي لبسي عباتج وسييييييييييييييده عالجبره


يبي بطاط قد ما تقدرين اهم شي ان البطاطا تكون كبيره نوعا ما وما وقشرها خفيف يكون لون القشر فاتح بس مو مخوضر

وتقشرينه كللللللللللله

وتقصصينه حق المرق وبجدر كبيييييييييييييير تغلين الماي مع نص كوب خل واول ما يبتدي يغلي تحطين البطاط يدوب خمس دقائق وتحطينه بماي بارد وتشيلينه وتصفينه على فوطه نظيفه ومعقمه لين يبرد عدل وتقسمينه بجياس الثلاجه


الكوسا & الجزر

تقصين الراس وتقصصينها وتحطينها بماي يغلي مع ملح وتخلينها 5 \قائق وتشيلينها من النار على الماي البارد 3 دقائق تنشفينه مثل البطاط وتقسمينه بالاجياس

بحيث يكون عندج بالجيس الواحد جم قطعة جزر وجم قطعة بطاط وجم قطعه كوسا

القرع تقصصينه وتحطينه مثل ماهو

الطماط

تاخذين الطماط الاحمر حيل ويكون لين نوعاما مو متماسك وايد وتقصينه اربعه وتحطينه بجدر لين يذوووووووووووووووووووب وتشيلينه وتقسمينه بأكياس وعالفريزر كللللللللله


الثوم

تدقين الثوم او بالماكينه اليدويه مع زنجبيل كله وتزعينه بقفشه على قصدير

تفرشين قطعة قصدير
وتاخذين نص قفشه او قفشه حسب الكميه اللي تحتاجينها بكل مره
وتحطينها عالقصدير وتقصصينه بالمقص وتلفين القصدير عالثوم مثل الجاكليت



الدجاج

انا ما اخذ لا دجاج التموين ولا دجاج الجمعيه

لان عادة يكون شكله جذي ومعناته ان الدجاج فاسد

أروح محل الدواجن واختار الدجاجه مثل هالحلوه واشوفها تتمشى جدامي

اهم شي ريشها ابيض مو مصوفر ومنقارها مو مخوضر
يكون وزنها تقريبا 1000

واخذ 12 تقريبا حق الشهر كله واحيانا يقعد اكثر من شهر

5 من غير جلد
و 5 عادي وكلهم مقصصين اربع قطع
2 مقصصين قطع صغيره


نغسلهم عدل بملح وفلفل اسود
وبعدين نكون مجهزين خلطاتنا بالنسبه لي ثلاث خلطات تتبيل ما استغنى عنها

تتبيله 1
- ليمون
- زنجبيل
- علوب اخضر مقطعه
-ثوم
- بهارات مشكله
-روب


تتبيله 2

- صويا
- ليمون
- بهارات
-زنجبيل

تتبيله 3
- نص قلاص اجار مانجا
- نص قلاص روب
- ربع قلاص ليمون
- بهارات تندوري + بابريكا
- معجون طماط
- ثوم
تخلطينهم بالخلاط وتتبيلن فيهم ديايتين ثلاث

الخلطه رقم واحد >>>>>>>>>>> مجبوس + برياني ( البرياني استعمل معاه الدياي اللي من غير جلد + المرق بعد من غير جلد عن الزفره )
الخلطه رقم 2 >>>>>>>>>>> ( دجاج مشوي بالفرن )
الخلطه رقم 3 >>>>>>>>>> ( دجاج 65 أو برياني أو تندوري )


الحين نيي حق اللحم

اللحم الزين يكون لونه احمر على وردي والشحم ابيض مو اصفر
اللحم الفرش يكون عليه ختم المسلخ وتاريخ الذبح لازم يكون مال اليوم


وهذي صوره اللحم الفاسد او القديم

اخذيلج نص ذبيحه فرش توها مذبوحه

وخليه يقسمها لج

ريش >>>>>>>>>>>> راح اقولج شتسوين فيه
قطع حق مرق ومجبوس
شرايح من الظهر حق الشاورما
مفروم


الحين


الريش

تشيلين كل 5 قطع او اكثر مع بعض ( ماعندج وقت كافي وتبين طبق يترس العين ومميز تحطين الريش بمقلا غزير او صينيه فرن وتعصرين عليها ليمون وملح وفلفل اسود وبصل وممكن علب فلفل وتخلينه لييييييييييين ينشف مايه وتقدمينه )

القطع تقسمينه وجبات وتشيلينه ويفضل تشيلين اللي فيه عظم حق المرق والهبر حق المجبوس

المفروم

شي تطحنينه مع كوب فول الصويا منقوع لمدة ساعتين تقريبا ومصفا من الماي وتضفينه عاللحم وتعجنينه شوي وتحطين عليه ملح وفلفل وبهارات نتفه عن الزفره
وتسوينه همبرغر

تاخذين من المفروم وتطحنين معاه بقدونس وبصل تكورينهم او طوال حق الكباب وداوود باشا

الشرائح
تشيلينه حق العشا واطباق الفناتق

يتبع ........................................

 

[M!SS.LOBY]

يعطيج العافية

 

[noonaa-thn]

متابعتج واااااايد

 

[أحلى همبه كويتية]

الله يعوده علينا شهر الخير
لا فاقدين ولا فاقدين
وكل سنة وانتو طيبين


موضوع حلو ما شاء الله
خوش تجهيزات

الله يوفقك بدراستك ويخليك لأهلك وبيتك حبيبتي


انا مثلك كرهت الخدم والحين ما عندي
اسوي شغلي بروحي والحمد لله انا موظفة
والله يعينا على التعب بس لما تشوفين عيالك وريلك مستانسين على شغلك
هذه تسوى الدنيا وما فيها




يعطيك الف عافيه



​

 

[.:lady bug :.]

الله يوفقج وتسلم ايدج خوش موضوع

 

[حرم راشد الماجد]

آسفه بنات تأخرت عليكم حبايب قلبي كل اللي قدروني بردودهم الحلوه وعلى رأسهم مشرفةالقسم


أحى همبه وانتي فعلا أحلى همبه من زمااااااااااااان وانا اتفحص ملفج وعلى طول متابعتج واحب اطباقج وجربت صب القفشه كانت تهببببببببببببل ووردات الخبز عجيبه بعد


نكمل مواضيعنا


ألحين بعطيكم مجموعة أطباق تسوينها ب 3 دقائق


انا كل رمضان قبل الاذان بساعة تقريبا اكون خالصه شغلي كله
وواقفه عالقلي اخر ربع ساعه

فعندي وقت فاضي تقريبا 45 دقيقه


فاسوي واحد من هالأطباق


خبز بالجبن ( مثل خبز بالثوم )

خبز فرنسي المطاحن اللي بالحبوب

تقصصينه شرائح او وراب يعني شريحه بس عالجنب >>>>>>>>>>>>>> اتعب عالوصف

ألحين بطاسة صغيرونه

3 ملاعق زيت زيتون
بقدونس
رشة ملح + فلفل أسود
تخلطينهم كلهم مع بعض عددددددددددل وتصبينه عالخبز
وبعدين ترشين عليه الموزاريلا
وتحطين قطعه ( نتفه مو قطعه كبيره ) زبده عالجبن من فوق

واذا تحبين خبز بالثوم تحطين مع الخلطه ملعقة بودرة الثوم

وذووووووووووووووقي الطعم


بيتزا التوست

شرائح توست منزوعة الأطراف
تحطين عليها صلصة المعكرونه العلالي وفوقها اللي تبين
انا عادة اسوي بيتزا عاديه ( مشروم + فلفل بارد + زيتون + جبن موزاريلا )
والنوع الثاني ( نفس الصلصه لكن معاها شوية كتشب وجبن موزاريلا +تشيدر اللي تكون بقوطي أزرق مدور )

ممكن بعد تسوين قواعد بيتزا وتثلجينها

تسوين العجينه اللي تفضلينها

ا, اخذي هالطريقه
3 قلاصات طحين ابيض
3 ملاعق سكر
3 ملاعق حليب بودر
1 ملعقة خميره
1 ملعقة روب
رشة ملح
نص ملعقة بيكنج باودر
زيت ثلث كوب
ماي حسب الحاجه وانتي تعجنين لين تصير العجينه متماسكه ما تلزق بايدج وايد يعني خل تلزق بيدج شوي عادي مو مشكله بس مو وايد اللي ما تقدرين تعجنين منها

واهم شي بهذا الموضوع وقت العجن كل ما طولتي بالعجن صارت العجينه أحلى

وتخلينها تخمر وبعد ما تخمر وزعيها بأكياس وثلجيها
أو تشتغلين فيها عادي

يعني تحشينها وتخبزينها بالفرن وتخلينها تبرد شوي وتوزعينها بأكياس وتثلجينها ونفس الشي قواعد البيتزا


واذا بغيتي تستعملينها
تطلعينها شوي يفج ثلجها وتالي حطيها بالمايكرويف أو بالفرن شويه


وبتصير عندج أحلى فطاير




طبق 3

روبيان منزع الرأس فقط يعني القشر موجود بس الراس ماكو
تحطينه بمقلا وتصبين عليه صويا 3 ملاعق + عصير ليمونه
وتخلينه 15 دقيقه لين ينشف الصوص

وتعالي اكلي احلى ربيان مشوي


طبق 4
الريش وذكرته فوق

طبق 5


شاورما التونة بالشبنت

تحمسين تونه بالزيت اللي بالعلبه نفسها وتضيفين عليها شبنت وعلبة كريمه ومكعب ماجي
تحطينه بتوست منزوع الاطراف
وتلفينها بقصدير


طبق 6
بطاط ودجز على طريقتي

تيبين خلطة الدجاج بالتوابل من كنور
تقصصين البطاط قوارب لان ودجز
تخلطين خلطة الدجاج مع زيت زيتون وشوية صويا او ملح
وتصبينه على البطاط وتحطينه بكيس الفرن وتخلينه 45 دقيقه

والطعم رهييييييييييييييييييييييييييب



بس جذي سفرتج انترست أكل




كيكة ما تاخذ 3 دقائق
علبتين قيمر أوال
علبتين ايس كريم فانيليا
ظرف دريم ويب
باوند كيك شيكولاته
هيرشي سيرب

تخلطين القيمر مع الدريم ويب والبرد
وتقصصين الكيك تجينه بماعون
وفوقه الخلطه والهيرشي وما تحتاج ثلاجه هي جذي لذيذه وما عليها قاصر


حلو الكريم كراميل بجوز الهند

بسكوت المطاحن بجوز الهند ( اسمه نايس )

حليب جوز الهند ملعقة

قيمر

نص كوب جوز هند محمص


تذوبين حليب بودر تقريبا 2 ملعقة لكل كوب ماي وعليهم ملعقة حليب جوز الهند
ولما يدفى شوي تحطين عليه الكريم كراميل 3 دقائق
وتشيلينه من عالنار
وتصبينه على طبقات البسكوت ( تصفين البسكوت طبقات بمواعين او بايركس )
وتحطين فوقه شرائح أناناس + جوز الهند المحموس او المحمص


المهلبيه انا احط معاها فواكهة عشان بنتي ما تحب الفاكهة فأبشر تفاح معاها وهي عالنار يصير طعمها روووووووووووعه


طبعا ما أوصيج الفيمتو هالسنه تسوينه بالخللاط مع قوالب ثلج وماي ورد يالله يروي

أبيكم تسوون كساد حق المطاعم الخايسه اللي يوكلونه هالاكل المعفن واللحوم الفاسده : (



معظم أكل المطاعم أسويه بالبيت يعني اذا ببالج اكله لا يردج الا الكيبورد غلاتي


راح انزل لكم مجموعة أطباق تصلح حق رمضان في المره اليايه وانتي عليج تسوين كوبي عالوورد وتحطينه بملفج

 

[حرم راشد الماجد]

الله يعوده علينا شهر الخير
لا فاقدين ولا فاقدين
وكل سنة وانتو طيبين


موضوع حلو ما شاء الله
خوش تجهيزات

الله يوفقك بدراستك ويخليك لأهلك وبيتك حبيبتي


انا مثلك كرهت الخدم والحين ما عندي
اسوي شغلي بروحي والحمد لله انا موظفة
والله يعينا على التعب بس لما تشوفين عيالك وريلك مستانسين على شغلك
هذه تسوى الدنيا وما فيها

اي والله وانتي صاجه

كافي ريلي وبنتي ما يحببون ياكلون الا بالبيت ريلي حتى لو معزوم بمكان ياكل اي كلام وايي يكمل بالبيت

 

[شادن33]

مشكوووووووووره
جزاج الله خير هالموضوع لاااازم يثبتونه لرمضان الصراحة
لان طبخاتج سهله وسريعه وتعينا على طلبات العيال اللي مايعجبهم عجب !!

بس لي ملاحظه

الشوربه لاتحطينها حاااره مباشره بالاكياس موزين يتفاعلووون ويسبب ضرر
خليها تبرد اشوي

ومتابعينج حبيبتي

 

[أحلى همبه كويتية]

تم تثبيت الموضوع لأنه يستاهل

و سيتم نقله لقسم المائدة الرمضانية لاحقا قبل رمضان
​

 

[أحلى همبه كويتية]

آسفه بنات تأخرت عليكم حبايب قلبي كل اللي قدروني بردودهم الحلوه وعلى رأسهم مشرفةالقسم


أحى همبه وانتي فعلا أحلى همبه من زمااااااااااااان وانا اتفحص ملفج وعلى طول متابعتج واحب اطباقج وجربت صب القفشه كانت تهببببببببببببل ووردات الخبز عجيبه بعد

تسلمين يا قلبي من ذوقك وطيب اصلك :eh_s(7):​

هذا القيمر المفضل عندي وما أستخدم غيره
طعمه ولونه ناصع البياض ومو ثقيل مثل باقي الأنواع ​

اخذخ من جمعية السالمية دايما يسوون عليه عرض 3 علب ب 450 فلس
سعره الأساسي اقل من الدينار بشوي ​

 

[حرم راشد الماجد]

مشكوووووووووره
جزاج الله خير هالموضوع لاااازم يثبتونه لرمضان الصراحة
لان طبخاتج سهله وسريعه وتعينا على طلبات العيال اللي مايعجبهم عجب !!

بس لي ملاحظه

الشوربه لاتحطينها حاااره مباشره بالاكياس موزين يتفاعلووون ويسبب ضرر
خليها تبرد اشوي

ومتابعينج حبيبتي

:eh_s(7): حبيبتي عليكم بالعافيه مقدما والله يبلغنا رمضان كلنا يارب بخير وصحه


الشوربة ابردها اول ما احطها حاره بس اقصد اخليها بالجدر وبعدين افرغها بالاكياس
بس يمكن ليش مستعيله خرت الدنيا وانا اكتب

ومشكوره عالنصيحه وانج اضفتيها لموضوعي :eh_s(17):لان فعلا في بنات ما يعرفونها

 

[حرم راشد الماجد]

تم تثبيت الموضوع لأنه يستاهل

و سيتم نقله لقسم المائدة الرمضانية لاحقا قبل رمضان
​

:eh_s(9): بعد عمري تسلمييييييييييييييين عالتقدير حياتي :eh_s(17):

 

[حرم راشد الماجد]

تسلمين يا قلبي من ذوقك وطيب اصلك :eh_s(7):​

هذا القيمر المفضل عندي وما أستخدم غيره
طعمه ولونه ناصع البياض ومو ثقيل مثل باقي الأنواع ​

اخذخ من جمعية السالمية دايما يسوون عليه عرض 3 علب ب 450 فلس
سعره الأساسي اقل من الدينار بشوي ​

وانا اضم صوتي لصوتج طبعا

خفيف وتحسين طعمه قشطه وما يقعد عالجبد >>>>>>>>>>>>>> جنه سويناله دعايه ببلاش

 

[حرم راشد الماجد]

طبق عجييييييييييييب لرمضان تأليف واخراج : حرم راشد الماجد

واخذ عليه برائة اختراع


احب الاطباق اللي اعدادها سهل وما تاخذ وقت


دجاجة كامله مقطعة اربع قطع مغسوله بملح وفلفل اسود
تقلينها بزيت خفيف مجرد تاخذ لون بسيط
تحطينها بصينية الفرن
تقلين بالزيت مال الدياي
بصل شرايح كمية رااااااااااهيه
+
جزر نفس الكميه
تقلين البصل لين يصير اصفر وتالي الجزر فوقه وترشين عليه فلفل اسود وملح ونص ليمونه

وتسوين الصلصه :
- 3-5 ملاعق دبس رمان
- عصير ليمون
- 3 ملاعق صلصة hp
- 1 ملعقة كبيرة عسل
خلطيهم عدل وحطيهم فوق البصل والجزر لين تصير الصلصة متماسكه
صبي خلطتج فوق الدياي ودخليها الفرن 45 دقيقه او اكثر كيفج بس اهم شي تكونين مغطيتها بقصدير عشان تتشرب الصلصه عدل وتالي ربع ساعه تنشفينها من الماي من غير قصدير


وبالهنا والشفا اللون بني عذااااااااااااب والطعم حامض مو حالي كللللللللللش بس حموضه معتدله جدا جربوها وادعولي من الاخر


المسقعه

حق اللي ما يعرفها
باذنجان مقشر ومغسول تقصينه على طول الباذنجانه تصير طول التلفون او اطول بعد >>>>>>>>> لوووووووووووووووول

تقلينها شويه وتصفين دهنه
احط ورقتين جرايد بصحن وفوقهم ورق نشاف راح تحسين انها نشفت مو ناقعه


بالمقلا
ملعقة زيت
بصل مفروم مكعبات تحمسينه عدل لين ياخذ لون وتالي تحطين لحم مفروم وتحمسينه لين ينشف مايه عدل ويصير لونه بني تحطين عليه الطماط اللي ثلجناه تذكرون وفص ثوم ومعجون طماط ( بهارات الحمسه هذي : لومي اسود + كاري + فلفل اسود او بابريكا )
وتحطينها عالباذنجان اللي قليتيه عقب ما تصفينه بصينية الفرن
ودخليه شويه ويا حلوه مع خبز الصاج

على فكره شكلها أحلى من الصوره بوااااااااااااااااااااااااايد

مسخن أردني أصلي

- دجاجه مسلوقه ببهارات عدله
خبز ايراني كميه حسب الدجاج اللي عندج
زيت زيتون تقريبا نص كوب
بصل كميه راااااااااااااااااااااااااااااااااااااهيه جدا + صنوبر + سماق
تقلين البصل بزيت الزيتون عدل وتسكرين الجوله وتضيفين الصنوبر والسماق ورشه محترمه من الدارسين ( القرفه )

الحين نييب صينية الفرن
تغمسين الخبزه بماي الدجاج وتحطينها بالصينيه وتحطين عليها ملعقة من البصل اللي سويتيه
تسوين هالحركه كذا طبقه وتحطين ديايتج وتحطين عليها الخلطه بنفس الطريقه وتدخلينها الفرن تتحمر شوي وبعدين تغطينها بخبزه بنفس الحركه اللي سويناها من قبل وتدخلينها شوي تنشف


وذوووووووووووقي وادعيليييييييييييييييييييييي

 

[زعفرانة_73]

تبارك الرحمن موضوع رووعه مثل صاحبته
ربى يبلغنا الشهر الفضيل لا فاقدين ولا مفقودين .​

 

[طريق السعاده]

موضوووعك جمييييييييل بسم الله عليك

سيفته عندي صراحه يجنن لرمضااان مع اني ماشتغل بروحي امي واختي معي بس طبخاتك وافكارك روعه صراحه لان احيننا اذا صرنا نسوي الفطور ننحاس ويصير مليون شغله تقابلينها

مجهود تشكرين عليه حبيبتي

( الله يبلغنا وياكم الشهر لافاقدين ولا مفقودين يارب)

 

[حرم راشد الماجد]

تبارك الرحمن موضوع رووعه مثل صاحبته
ربى يبلغنا الشهر الفضيل لا فاقدين ولا مفقودين .​

تسلمييييييييييييييين حبيبتي وعساج من عواده يارب