ولد خالتي خاطبني اوافق او لا

[رنـا**]

بنات انا من قبيله بس متحضره وساكنه مناطق داخليه طول عمري

امي حضريه من نجد بس وحدده من خالاتي متزوجه واحد عن حب

وهالواحد مو اصيل


بنات انا ولد خالتي حيل زين وطيب وكريم وكلشي فيه اوكي وخاطبني


وانا مادري شسوي؟ مرات احسه مو مهم الاصل اهم شي الانسان انا الي بعيش معاه مو ناس



ومرات اقول اخاف من كلام بنات عمي وصديقاتي




جد مادري شسوي ؟عمري 21 ونص

 

[A L F A J R E Y]

حبيبتي الريال مو باصله !! شبتسوين ب اصله بفهم اصله اهو الي بيخليج مستانسه بحياته والا اسلوبه وتعامله واخلاقه اهيا الي بتخليج سعيده ؟؟

لاتخلين تفكيرج مثل تفكير بنات عمج ورفيجاتج مو اهما الي بيسعدونج اهو الي بيسعدج اذا انتي تقولين انه زين استخيري وتوكلي على الله

والله يالف بين قلوبكم ويكتب الي فيه الخير

 

[سويت فانيلا]

حبيتي شوفي انامتزوجه اجنبي وايد مرتاحه له وخلوق وماعليج من كلام الناس * دام انه خوش ريال توكلي على الله وافقي

 

[عاشقه رويشد]

عن تجربه ابتعدي عن زواج الاهل بس مو معناته كل زواج الاهل مو زين استخيري والله يكتب اللي فيه الخير

 

[روح مغليهاM]

استخيري
وشوفي راي اهلك
وربي يوفقك

 

[DALALEY]

اهم شي الاستخاره بعدين الريال مو باصله صدقيني والله يوفقج حوبي

 

[الهنوؤوفـ]

انا عن نفسي اشجع زواج الاهل

شوفي راي امج وابوج واذا موافقين وافقي وتوكلي ما فيه شي

والله يوفقج ويسعدج وياااااه

 

[لمى الهاجري]

توكلي على الله مو مهم الاصل دامه طيب وتعفونه خلاص

 

[<<المها>>]

استخيري مره و2 و3 و10 بعد ولازم لازم تكونين مقتنعه بهالسالفه اقصد تكونين مقتنعه ان الاصل مو مهم وكلام الناس والخ الخ

لانج اذا مو مقتنعه بداخل وراضيه تماما صدقيني بكره من اقل موقف بتتحسفين ولا من تقط عليج وحده نغزه بتتحسسين ولا من

يجي طاري الاصل بدون قصد بتحسبين الكلام عليج وتقعدين توسوسين .... ومن اقل مشكله تصير بينكم ممكن تبطينها بوجهه بدون

قصد عاد هني ماتترقع كلش الرجال كلشي ولا كرامته ولاحظي انتو اقارب واهل يعني ممكن الزعل يطول العايله وتصير قطاعه

وهالكلام اقوله لج من واقع مواقف صارت جدامي اعرف وحده خذت ولد عمتها ومااتفقوا وتطلقوا عقب جم شهر حول السنه

والحين لهم تقريبا 5 سنين من تطلقوا والاخوا مايكلم اخته والعايله تقاطعت والسبه هالزواج واختلاف العيال ..

حبيبتي فكري عدل وادعي ربج واستخيري واجد والاهم الاهم انتي من داخلج مقتنعه يعني بعدين تحطين على اذن طين والاذن

الثانيه عجين ولاتسمعين من احد شي مهما تكلم لانج راضيه ومقتنعه وماراح تتحسفين ..

الله يوفقج ويكتبلج الخير والصالح يارب ..

 

[Nanoosa]

و الله ما ادري شقولج

اذا عن الاصل انا الصراحة اكره ما عندي لما الواحد يفرق يقول هذا مو اصيل و هذا اصيل!

اذا الولد مو زين شراح ينفعني اصله و فصله؟ الناس يشترون الريّال

و اذا عن انه ولد خالتج انا مو مع زواج الاقارب بس وايد ناس متزوجين من الاهل و مرتاحين و في ناس عكس يعني مو شرط

استخيري و الله يوفقج

 

[RAHAF Q8]

اذا انتي حابته وحابه صفاته +أهلج ماعندهم مانع وافقي

أما اذا موضوع الناس وكلامهم عن الأصل يأثر فييج وتحاتيين نغزاتهم من الحين

أنصحج تفكرين عدل وفكري بعد بعيالج ان ماراح يكونون كويتيين

بس آنا مافهمت قصدج ان مو أصيل
شنو أصل ولد خالتج؟؟يعني عنده جنسيه خليجيه أو بدون > الحين بتقولين هذي أول وحده بدت تسألني عن أصله

الله يوفقج ومثل ما قالو استخيري

 

[لحظآتَ]

أنا اقول دامه زين ورجال بمعنى الكلمه !
وافقي عليه ..
الفُرص الحلوة مو كل مرره تتكرر
باجر لا سمح الله اذا جاج وواحد اصيل بس ماعنده رجوله وبلا اخلاق
شراح تستفيدين من اصله ؟

,

فكري بعقل .. جماعتج بيتكلمون شهر شهرين وبيسكتون ..
حالج حال خالتج كاهي تزوجت اللي تبي وعاشت وجوها عيال وكبرتهم ^^
ماصار لها شيء
لذلك فكري بإيجابيه واستخيري
واذا هو من نصيبج بتاخذينه غصباً عن الكل ^_^

 

[* ليــــدي *]

آول شي استخيري ..
واذا إرتحتي وآفقي
موفقه ..

 

[رنـا**]

بنات انا ولد خالتي كويتي


بس قصدي بكلمه مو اصيل يعني اصله ما يرجع لقبيله وبس


اهوا خوووش واااحد وهم ابوه للحين يدلل خالتي وما يناديها الا حبيبتي



ما تتخيلون شكثر زينييين


يعني اهوا معاشه الف وشي

ولدخالتي

اهله زينين

وجمييييل


وانا من داخلي ارتاحله بس مشلكتي بنات عمي وصديقاتي مرات احس اني متخلفه لما افكر هالتفكير


بس هم اقول في بنات وايد سوو جذي وكلنا بشر


بس لما اتذكر اني لما كنت قاعده مع فلانه او فلانه وتقول اي فلانه خذت فلان كفوها احس مابي احد يقولي عني جذي


معنه هالشي غلط



ومشكووورين عالردود

 

[Patcholli]

ان اكرمكم عند الله اتقاكم . صدق الله العلي العظيم

وفي الحديث الشريف : اذا جائكم من ترضون دينه وخلقه فزوجوه .


الرسول صلى الله عليه وسلم جعل الدين والخلق هو مقياس التفاضل وهو مقياس اختيار الزوج الصالح .. ولم يذكر الاصل او العائله الفلانيه ..
طالما انه مشهور بالخلق الكريم والسمعه الحسنه واهله كذلك فتوكلي على الله ..

عزيزتي كلنا مخلوقين من طين واسم العائله لن يدخل معك في القبر ولن تحاسبي على الزواج من اصيل او غير ااصيل

 

[ام حموديNEW]

استخيري اكثر من مره لحد ماتقتنعيين عدل عقب وافقي
دام خالتج خذت منهم يعني ماعليهم شي
واذاا ابوج واخوانج ماقالو شي تفكرين بكلام الناس ليش غير اهلج لاتسمعين لكلام احد ولا يهمج احد

 

[دلوعة أبوهآ]

بنات انا ولد خالتي كويتي

بس قصدي بكلمه مو اصيل يعني اصله ما يرجع لقبيله وبس


اهوا خوووش واااحد وهم ابوه للحين يدلل خالتي وما يناديها الا حبيبتي



ما تتخيلون شكثر زينييين


يعني اهوا معاشه الف وشي

ولدخالتي

اهله زينين

وجمييييل


وانا من داخلي ارتاحله بس مشلكتي بنات عمي وصديقاتي مرات احس اني متخلفه لما افكر هالتفكير


بس هم اقول في بنات وايد سوو جذي وكلنا بشر


بس لما اتذكر اني لما كنت قاعده مع فلانه او فلانه وتقول اي فلانه خذت فلان كفوها احس مابي احد يقولي عني جذي


معنه هالشي غلط



ومشكووورين عالردود

مو أصيل و مو اصلي و مو قبآيل ..!
لسه فيه احد في الدنيآ يفكر هالتفكير ..

يعني بيكون الرجآل تقليد مثلاً ......!


ايش بيفيدك آصله وفصله وقبيلته لو كان مو زين ..!

آنتهى عصر التحجر والقبآيل وهالآمور ..
دامه قريبكم وانتي بنفسك مدحتيه وقلتي انه طيب و و و و
وخالتك مبسوطه مع زوجها ويحبها شتبين آكثر ...!

والرجآل كويتي يعني مآقلنا مو عربي ولآ آفريقي ..!!!
وشدخل قريباتك وبنآت خالاتك فيكِ .؟؟
اولاً الناس ماترحم ولا بآي حآله
لآ ان تزوجتي هذا ولآ غيره
ولو تزوجتي قبيلي في نظرك ماراح يتكلموا عنك ...!
بيطلعو آلف عيب وعيب بس عشان يتكلموآ

طنشي كلآم النآس وطنشي كل شي ..
لو رفضتيه ورفضتي كل شخص طيب تقدم لك عشان هالسبب ؟؟ بكرا لآ عنستي راح يتكلموا عنك وقتها ويقولوآ عنست .. ( شفتي !! بالاخير الكلام وراكِ وراكِ هذا طبع النآس )



صرآحه انصدمت من الموضوع وان فيه ناس للحين بهالتفكير ..!


يكفينآ حديث وكلآم الرسول صلى الله عليه وسلم .. عشآن نقتدي فيه : )​

 

[اسيرة جروحي]

اهم شي الاستخارة
الا صل ولا بدون اصل ماراح تنفعك ابد اهم شي الاخلاق وحسن التربية والدين
كم واحد قبيلي مايعامل زوجتة معاملة حسنة طبعا مو الكل
وبعدين مو الي راح يعيش معة انتى ولا بنات عمك وصديقاتك
حكمى عقلك ولك الاختيار بلول والاخير

لك تحياتى

 

[نكهة التوت]

سلام حبيبتي انا اقول صدقيني اذا كبرتي وعنستي بتندمين وتذرفين بدل الدموع دم على هالفرصة ترى يمكن تكون فرصتك الوحيدة واغلب الفرص ماتجي الا مرة اذا الرجال اخلاقه زينة مو راعي مشاكل استخيري ربك وصلي الاستخارة وافقي واذا ماكان فيه خير لك ربك بيرده عنك اذا استخرتي ترى الرجال بهالزمن قلوا ويمكن بعد فترة تتمنين لو نص رجال

 

[قمر بيت أبوها]

شوفي من ناس لناس يفرق
بس انا عن نفسي عادي جدآآ مو أصيل أصيل مااذبحنا غير هالعصبيه القبليه يعني افتتحوا فلسطين ولا انسخوا القرآن
كلنا عيال تسعه ومااحد أحسن من أحد
أذا اهلك موافقين ومواصفاته الباقيه مناسبتك وافقي
وبنات عمك وصديقاتك اذا انتقدوك قولي مااحد يفكر بهالطريقه غير الناس الجاهله
لا الدين ولا المنطق يفرق بينا اتركيك من كلام هالناس
انا عن نفسي لو اتزوج لقيط مو مهم بس اهلي ناس متشددين بهالسوالف
بس لا كان الموضوع بيدي باشوفه جدآآ عادي