افكاركن للقاء الطالبات في أول يوم دراسي ؟

[Q8Buying]

السلام عليكم ورحمة الله وبركاته

معلماتي العزيزات وطالباتي العزيزات ...

شنو تقدمون من أفكار لأول لقاء يجمع الطالبات بالمعلمة ؟

شنو تناقشون فيه أو تخلونه يوم دراسي عادي!

 

[jen2n]

موضوع جدا ممتاز وياي بالصميم لووول

وجان زين لو حطيتي حتى مع الناظره والوكيله وباقي المدرسات اشلون؟

يعطيج العافيه كويت باينغ ونحب نستفيد من باقي المدرسات

 

[miele]

انا تعيين جدييد .. ودي تكون المناقشه تشمل الاداارة بعد ....وشلون طريقة التعامل معاها

يعطيييج العافيه حبيبتي موضوعج مفيد صرااحة

 

[بنات حواء2]

امم اي ياريت تفيدونه احنه يلي تعيين يديد >>>>>>>>>شفيني صرت عبد الحسين عبد الرضا انا اللي
هههههههههههههههههههههههههههه
مادري وي الطالبات انا افضل اني احط النقاط علحروف و افهمهم قوانين الصف و انظم المتطلبات

 

[النوراء]

ياليت يفيدونا صاحبات الخبرة
احنا تعيين جديد

 

[بنات حواء2]

اهم شي الاداره علمونه و الي يعافيكم

 

[مشغوله و محتاسه]

تقصدين بالحصة يعني ؟؟


اول يوم يكون خفيف ظريف ..


تعارف و سوالف خفيفه و سؤال عن العطلة و رمضان

و عقب شرح ما تتوقعه المعلمة من طالباتها

و اعطاء فكره بسيطه عن المنهج و متطلباته

 

[مشغوله و محتاسه]

اهم شي الاداره علمونه و الي يعافيكم

شلون الاداره ما فهمت قصدج


؟؟

 

[@ نجمة العطااا @]

السلام عليكم ورحمة الله
اولا مبروك التعيين والله يوفقكم يارب
ثانيا :
نصيحة لوجه الله لا تعطون كل ماعندكم من اول يوم من افكار واقتراحات والخ لا سووا لكم دفتر صغير وحطوا الأفكار فيه ولا تعطونه لاحد خلوه لكم ووقت ماتحتاجونه موجود نصيحة لا تندفعون من اول اسبوع وكل الأفكار تطلع لا خلوا افكاركم لكم وطلعوها بالقطارة وقت حاجتكم انتم لان في ناس ما تخاف الله تسرق الأفكار وتنسبها لنفسها مهما كانوا طيبين او او او انتبهوا
ونصيحة حطوا لكم نوتة صغيرة بالمناسبة اللي بتمر علي المدرسة بهالكورس وشوفوا وضعكم وأي مناسبة تقدرون عليها<< وهذي مرتبطة بدفتر الأفكار ولو من الحين تخلصونها احسن اقصد المناسبات وترتيب الأفكار
و سووا لكم ملف إنجازي بشكل حلو ومرتب لكل شي تسوينه تصورين نسختين وحده للملف هذا ووحده لملف ريسة القسم ضروري عشان حقكم لايضيع.

هذي نصايح مهمة حييييل

والحين التعامل ::
الطالبات كبداية خلكم شديدين شوي عشان تضبطون الصف ويتعودون علي نظامكم وقوانينكم وتالي بعد فترة تقدرون تفكون عنهم ههههه اهم شي الفترة الاولي
وترا الانطباع الاول عند الطالبة المعلمة مهم جدا وعلي اساسه يكون التعامل

المدرسات اللي معاكم بالقسم او المدرسة كلها خلكم رسمييين معاهم وانسوا شي اسمه رفيقتي او صديقة هذي زمالة فقد وتاكدوا ان كل وحده منهم همها مصلحتها قبل مصلحتك!!! اقولكم هالشي عشان ما تنصدمون منهم انتبهوا وأسرار بيتوكم والأمور الخاصة خلوها بيتكم والمدرسة السوالف العامة وبس ونصيحة ابتعدوا عن سوالف امن الدولة خخخخخخ ترا مالهم أمان الحريم هههههههه
واذا تبي شي منك اي مدرسة عطبها علي قد ما تعطيك نصيحة ولا تخليين أغراضك سبيل !!! لان بعد فترة اما ضايعين او خربانيين ما ينفعووون وطبعا محد خسران الا انتم !! فنصيحة لا تخلونهم سبيييل وكل لوحة او وسيلة حطوا اسمكم عليها ولا تقولون لا عادي يعرفون او خلوها للقسم كلله ترا في ناس تاخذ الشغل وتنسبه لنفسها سوا عند موجهه او ناظرة وانتم يتكونون بالحصة او غايبين !!
تستفيدوا من الخبرات بالقسم من حيث التحضير وطريقة الشرح والامور الادارية فقط وماعليكم من التحبيط والتهميش لأي فكرة عندكم طنشوا وكملوا اللي تبونه

ريسة القسم
مثلها مثل المدرسات فوق بس ازيد علي اللي قلته فوق خلوا لكم نوته اي طلب من ريسة القسم وهي تطلبه اكتبيه بالنوته بالوقت والساعة والتاريخ والحصة وكل شي كل التفاصيل حتي منو كان موجود وقتها هههههههه لان بتمر عليكم استغفر الله ناس تتقلب الف لون ولون اقولكم شي تالي تقول ما قلت لاوتعصب وتشهد الناس استغفر الله والله ينتقم لي عاجلا غير آجلا يارب
ولا تخلونها تحس أنكم مو مستعدات او ماحضرتوا او او او انتبهوا خلكم في نظرها دائما بيرفكت خاصة أنكم جدد

الادارة عموما :
احتكاكم فيهم قليل وقت بس الدخول والخروج والاستيذانات وهذي عند الوكيلات خلكم دائما مبتسمين حتي لو الوكيلات شريرات خخخخ ابتسموا دائما وسلموا وصباح الخير أخبارك ابلة فلان وانت ابله علانه وبس!! لا تزودونها ولا تطيحون المسلمة معاهم لان اذا زودتوها وطيحتوا الميانة استغلوها بالاحتياط والمراقبة والإشراف !!

الناظرة خلكم عاديين ورسميين معاها والابتسامة حلوة وبس واذا احضرت لك حصة قبل تطلع عطبها ملف اي نسيت اقولكم عنه ملف يكون لج انت منها ذكري ومنها دليل وشهادة موثقة لج
اذا احد حضر لك حتي لو معلمة ( لان في نظام تبادل الزيارات ) قبل يطلعون عطيهم الملف يوقعون فيه مع كلمة حلوة طبعا كلن وذوقه
وبعد الحصة اللي خضرتها ناظرة راجعوها سيدة لا تقعدون تنتظرونها تدق!!!
وأي شي تقوله قولوا ابشري وان شالله وانتبهوا مهما قالت من انتقادات لا تهتز ثقتكم بنفسكم انتبهوا طبيعي الانتقاد لأنكم في بداية المشوار ولانكم في مجتمع الحريم ههههه ولا اردين عليها بشي الا لما تخلص كل كلامها تالي اذا عندكم رد يكون بهدوء ولباقة وصوت واطي والله لو انها شريرة راح طخ عنكم شوي.

اعرفوا حقوقكم وبالكلام الهادي العقلاني تاخذونهم والاهم أنكم تعطون الحقوق اللي عندكم للطلبة عشان ربي يبارك لكم في كل شي

اخر نصيحة :
لا تشطوون عمركم وتتعبون وايد لان اول سنة مافي امتياز لكن لو تبون تكونون مميزين فان اول سنة هي البصمة عند التوجيه والله يوفقكم دنيا واخره يارب

 

[fri2010]

مشكوره على الموضوع الحلو

بس شنو انادني المدرسات والناظره والوكيله ورئيسه القسم لووول يعني باسمائهم والا ابله فلانه والا شنو؟

خاصه ان اكيد بيكونون كبار في السن ههههههه

وفي شغله اذكرتها نجمة العطا اللي اهوا الملف الانجازي يعني شنو ما فهمت عليه؟

ولما تدخل علي الناظره حصه انا اودي لها دفتر التحضير والا اهيا تيي تاخذه مني؟

يقولون مافي تقدير اول 3 سنين صج؟

 

[@ نجمة العطااا @]

من باب الاحترام والتقدير قولي أبلة فلانه بالنسبة المدرسات
اما الناظرة والوكيلات أكيد لازم أبلة قبل اسمها

الملف الانجازي اللي هو ملف تحطين فيه كل شي سويتيه بالمدرسة إذاعة لوحه حايط درس نموذجي او ريادي او ورش عمل او اجتماع فمي الخ مصورا طبعا مع نسخ من شغلك

واول سنة بس مافي امتياز وباقي السنين عادي*

 

[@ نجمة العطااا @]

الدفتر غالبا أهي تاخذه منج اول ما تدخل

 

[fri2010]

اها اوكيه

الحين لما خلصت الدورة وبروح مدرستي وين اروح اول شي وشنو اقول وشنو اخذ وياي واهما اهناك شنو راح يسون معاي ؟

ومشكوره وايد نجمه العطا بتعبج بالاسئله

 

[Blonde B]

انا راح ادرس صفي اللي باوى صاروا كبار ب ثانيه
فديييتهم والله
فشريت اجياس هدايا مالت العيد ميلاد اللي 6 ب 100 فلس
وحطيت بكل وحده طين اللي يجي 6 ب 100
وقلم وستيكر ولعبة باربي وبحط ستيكر ابيض مكتوب عليه اهداء من ابله ......
وبربط فيه شريطه فيها بلونه مكتوب عليها الدراسه وناسه كاتبتها بقلم صبوره
عشان اونسهم
اما 4 بزفهم واوريهم العين الحمرا من البدايه لوووووووووووووول

 

[ذكريات عشاق]

موضوع وااايد ححلو وانا اقرى استفدت من نصايح نجمة العطا والله ماقصرتي
محتاجين لمثل هالمواضيع خاصة لنا احنا التعيين الجديد

فراي سوالج اللي اول يوم شنو نسوي انا اسالت اختي وقالت لي تروحون للناظرة وطبعا اهيا عندها اسماء المدرسات اليدد اللي عندها واحنا معانا ورقة من المنطقة فبعدين لما تخلصين من الناظرة اتوقع تروحين للسكرتارية تسوين باقي الاوراق وبعدها للوكليه والوكلية بدق على المدرسة الاولى عشان تيي تاخذنا
واختي قالت لي ان اول ما راحت مع المدرسة الاولى ودشوا الغرفة عرفتها على الابلات بعدين بدت تعطيها الشغل بس اختى من اول يوم عطوها احتياط

 

[^^ريهام^^]

عادي

انا عن نفسي اسلم على المدرسات والادارة

وطبعا اول اسبوع ماف طالبات , اجهز نفسي اسأل عن صفوفي وبعدها بجم يوم اخذ الجدول واسماء الطالبات

واحضر لاسبوعين جدام

واذا داومو الطالبات اتعرف عليهم واعرفهم على نفسي وابين لهم نظامي من اول حصة

وسلامتكم

 

[مشغوله و محتاسه]

​

وفي شغله اذكرتها نجمة العطا اللي اهوا الملف الانجازي يعني شنو ما فهمت
عليه؟

ولما تدخل علي الناظره حصه انا اودي لها دفتر التحضير والا اهيا تيي تاخذه مني؟

يقولون مافي تقدير اول 3 سنين صج؟ ​

​

​

لما تزورج المديرة او اي زائر .. انتي علطول عطيها الدفتر مفتوح على صفحة اليوم
افضل

و التقدير في طبعا من اول سنه ..بس الغالب ان ما في امتياز .. يعني تاخذ المعلمة جيد ... و في ناظرات لا والله يعطون امتياز اذا الابله متميزة .. عالاقل تعطيها 90




معلماتنا الجدد .. في ملف الانجازات .. يفرق عن الملف الانجازي

ملف الانجازات .. اهو اللي قالت عنه نجمه ... ملف حطي فيه اي شي تسوينه .. وانا هالسنه بطلبه من معلماتي عشان يحفظ حقوقهم




الملف الانجازي ... نظام تقويم التلميذ
من الصف الاول الى الثالث فقط

في سيستم بالكمبيوتر عند الاداره مقسمة فيه المهارات اللي يدرسها التلميذ و تم تقييمه على اساسها

مثلا عندنا بالانجليزي 4 مهارات رئيسية ... تتفرع الى مهارات ثانوية .. كل مهاره نسوي لها اختبار و نرصد درجته




و يا ابلاتنا الجدد ... لا تترددون بطرح اي سؤال علشان تروحون مدارسكم جاهزين عالاقل نفسيا موفقين ​

 

[fri2010]

مشكورة نجمه العطا وذكريات ومشغوله ما قصرتو الله يعطيكم العافيه وموفقين

 

[ذكريات عشاق]

الله يعافيج حبيبتي اججمعين يارب

 

[@ نجمة العطااا @]

لعفو حبيبتي وأي شي حنا حاضرين يالغلا