من نصايح امي .. تعالي اعلمج شلون توفرين

[نسمة الجنوب]

رد : ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

لا يوقف ......لا يوقف
الله يجزاك خير على هالنصايح الذهبية

 

[مرت بوعلي]

رد: ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

:

يعطــيـج ألف عافيه ياقلبي ..

عين العقل .. وربي يحفظها ويخليها لج ويطول بعمرها ..


:

 

[مريوومه12]

رد: ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

يعطيج العافيه والله استفدت والله يخلي لج الواااالده

 

[كنووووور]

رد: ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

كملي حبووووووووبه موضوعج رووووووووووووووووووعه
جزاج الله خيرر
انا ببدي من هالشي وسويت خطه بالتزاماتي
وداخله جمعيات لاني ادري ماقدر امسك عمري بس بحاول اوفر بعد واصكر القرض

 

[ariam2121]

رد: ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

الموضوع واااااااااااااااااااااايد حلو ليش وقفتيه

علمينا اذا جمعنا مبلغ وين نقدر نشغله شي مضمون وبسيط لا تقوليلي تجاره

حدنا ماكو مجال لووووول الا اذا شيي انا مالي يد فيه:balo:

 

[مشتاقه لك يبا]

رد : ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

مشكووره

 

[kaboOOOOOOOOsa]

رد: ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

مشاء الله عليج انا بحاول والله اعينا لاني مليييت من الصرف والله حتى الاغراض اللي تشترينها مالها زهوه ماكووو شي نشفي عليه كل شي موجود

 

[الزين 85]

رد: ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

الله يوفقج وينولج اللي ببالج
صراحه يازين ماربت أمج
الله يطول بعمر امج
ودزيت لج مسج عالخاص اتمنى تردين علي

ومشكوره يالغلا

 

[S.O.S]

رد: ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

مرحبا بنات ..
اشكر تفاعلكم وردودكم اللي فرحتني
واللي دزولي بالخاص ردي عليهم كلهم >> واذا في وحده ما ردي عليها تدزلي مره ثانيه .. يمكن ما وصلت او ما انتبهت عليها

انا جدا سعيده ان في بنات فعلا كلامي قاعد اييب نتيجه معاكم
تدرون شنو مشكلتنا
مشكلتنا ان الكل عارف ان لازم يقتصد ويمتنع عن التبذير
ويقول .. شلون ... ولازم
بس ما يطبق لان خصوصا باهالموضوع انا لا حظت ان عشان يطبق لازم يسمعه بشكل مكثف ومتكرر عشان يبدي بالتطبيق
الوحده فينا بس محتاجه احد يسمعها هالكلام بشكل مكرر ويومي عشان اهيا بعدين اتردده على نفسها لما تحس انها بتسوي شي غلط
ويمكن في أسر الاب وام بعيدين عن هالنقطه
يعني بس يقول حق بنته عن التفسفس او يقول حق ولده لا تلعب بالفلوس ترا ماراح اعطيك بس مره بالشهر ..
لازم نعلمهم قيمة الفلوس وشلون يتصرفون فيها وهم صغار ..

هذا الموضوع محتاج للنجاح والتطبيق بشكل اساسي على التكرار والحوار
يمكن اقدر افيدكم عشان تبدون تبلشون مع عيالكم من صغرتهم وهالشي بعد راح اعلمكم اياه بالتفصيل في الايام اليايه ان كنا من العايشين

انا اللي اكتشفته اللي معاشها 1000 يطير واللي معاشها بوزاره 500 يطير استغفر الله صج المعاش ماااااعاااااااش انا ينزل يعني اسبوعين يتم شي بسيط اخر الشهر
بس ما سالتي نفسج ليش؟؟؟؟؟؟؟

لان طبيعه الانسان انه يستطيع ان يؤقلم نفسه بالظروف والبيئه المحيطه فيه
فشي طبيعي بتعطيني 100 دينار لي اخر الشهر باقلم وماراح اموت من الجوع وبتكفيني
ابتعطيني 50 الف هم بصرفها كلها وباقلم نفسي عليها لي اخر الشهر
ابتعطيني 10 الف بعد اقدر اصرفهم على 30 يوم
والكل عايش الفقير والغني والكل يصرف
زين ليش ما ناقلم نفسنا جنه راتبنا الي ينزل نصه اهوا الحقيقي والباجي مزور او ورق فقط
شرايكم؟؟
واقلمو نفسكم على نص الراتب ..
والي ارادتها قويه تاقلم نفسها على ربع الراتب وتتخيل ان الباجي مجرد اوراق مزوره
شرايكم بهالفكره ؟؟
يمكن تخليكم تقللون المصاريف شوي
يلااا يابنااات
ابي اراده
قوه
عزيمه
لا للصرف
نعم للتوفير والاستثمار
خلج اقوى من شهواتج
ودايما كلمي نفسج بصوت عالي
انا غنيه
انا كل شي عندي
السوق ما يخلص
الاعلانات كلها خداع
الموضه ما تخلص
القناعه حلوه
باجر اصير غنيه واشتري الي ابيه
باجر افتح بدل البطاقه 3 بطاقات بنكيه
راح ابني روحي بروحي
ماراح احتاج او انتظر رجل يصرف علي
انا اقوى من الرجال
انا سعيده بما املك حاليا
رددو هالعبارات دايما او كتبوها بورقه صغيره
ولما تكونون بحاله نفسيه صعبه اقروها بصوت عالي >> هذا كلللله عبارة عن رسالة نحاول نوصلها للعقل الباطن الغرض منها تعديل السلوك يابنات
صدقوني جربوها
سحر وتعطي باور للروح

والحين نكمل الخطة

خطه التسوق الذكيه
-عندما تحتاجين الى التسوق يجب ان يكون الهدف الاساسي له الحاجه وليس التسليه , وتحت مود ومزاج مستقر, يعني مو متخانقه مع احد وطالعه , او مجرد وحده شرت بتقلدينها

-يجب ان تكونين قد قررتي للذهاب للتسوق قبلها بيومين على الاقل, مثل بعض البنات ( ياله خل نروح الافنيو الحين ..ياله ياله )
هذا مرفوووووض رفضا باتا , طريقه انج اتحددين وقت للتسوق قبلها بفتره يجعلك تكتفين من التسوق بمجرد التفكير فيه
يعني اذا اليوم السبت وقلتي بروح السوق الاربعاء مثلا تلقين نفسج تذكرين وتعددين شنو اللي بتاخذينه

وتفكرين هل هالشي احتاجه ؟؟
شنو راح يضيف للي عندي ؟؟
هل عندي واحد يشبه ؟؟ او موديل قريب من موديله ؟؟
ووووو
(( يعني تراجعين نفسج ))

-قبل التسوق او اول ما ينزل لمعاش تقومين بالتالي :
*تيبين اظرف فارغه الطويله ملوت البنوك ( بالمكتبات لونهم بني )

*تكتبين على كل ظرف من ورا بالخط الكبير حق شنو هالظرف يعني ظرف تكتبين عليه صالون والثاني الجمعيه والثالث الطبيب, بدله, ساعات , مطاعم , فواتير التليفون .......الخ
* تظعين مبلغ معين بكل ظرف مثلا الجمعيه 150 دينار الصالون 30 دينار الخدم 100 دينار الاطفال 50 دينار يعني تقسمين معاشج كلللللللللله عالاظرف

بعدين اذا بتروحين الجمعيه تاخذين ظرف الجمعيه وتصرفين منه بس بشرط مو تاخذين ظرف الجمعيه وتصعدين فوق تشترين لج عطور !
ديريبالج , الخردا حتى ال100 فلس ترجعينها بالظرف وتحطين بعد الفاتوره معاها بالظرف على مدى الشهور راح تلاحظين بعد ما جمعتي الفواتير احنا شكثر نصرف بالجمعيه وما نحس
وبجذي راح توقفين شوي وتفكرين انج لازم تقتصدين ,
طبعا نفس الشى تسوينه لباقي الاظرف , اخر الشهر تشيلين الي باجي من الاظرف وتحطينهم بظرف تكتبين عليه ظرف (الفائض) ,
بس لا تقترفين غلط فادح ولا جنج ما سويتي شي الا وهو انج تاخذين من ظرف الجمعيه وتشترين مثلا عطور لان خلص ظرف العطوور ,
ديري بالج جذي تكونين خربتي كل شي .
ظرف الفائض تاخذينه كل شهر وتفتحين حساب توفير جديد وتحطينه فيه بشرط ان لحساب ينفتح بدون بطاقه سحب الي
ظرف الجمعيه تكتبين عليه من الصوب الثاني كل اغراض الجمعيه الضروريه الي على طول تحتاجينها ,
سوي حصر وجرد للاغراض المنزليه راح تكتشفين وتنصعقين بان اللي تحتاجينه كميه قليله جدا,
نفس الشي لظرف العطور كتبي عليه لسته اغراضج الشخصيه كامله مثل عود الاذون منظف الاسنان معجون اسيتون كريم بشره دهن للشعر شموع ....

-قبل التسوق دخلي غرفتج او غرفه اعيالج او بيتج وسوي جررررررررررد كامل يعني كبتج نزلي كل الهدوم الي فيها والجواتي كلها طلعيها وصفيهم جدامج واجناطج بعد وساعاتج وخواتمج ومجوهراتج ,
كل شي كل شي , وحطي يمج صندوق او كيس كبير حطي فيه الي ما تلبسينه او ما تحتاجينه بالكيس بدون تردد شي ما تلبسينه حذفيه وانتي تظحكين ,

رتبي كبتج نفس المحلات القمصان بروح البلايز بروح الفساتين بروح البنطرونات بروح وبتدريج الالوان بعد عشان تعرفين شنو عندج,

بعدها رجعي حق الكيس الي حذفتي فيه كل الاغراض الزايده وطلي فيه ,
شوفي شنو الموديلات والالوان والماتيريال الي بس تشترينه وما تستخدمينه يعني خامه خايسه او قصه ماتلوق عليج او ماركه غير مريحه ,
طلي عدل وقولي بصوت عالي شنو هذا مو حرام الي انا اسويه بعد ماراح اشتري هالنوعيه من الملابس مره ثانيه طلي بالكيس عدل عشان تحفظين اخطائج ولما تروحين السوق ما تشترينهم مره ثانيه ,
الكيس هذا لا تعطينه حق احد لا لا ولا تتبرعين فيه لالالا , الكيس هذا عقاب لج تخلينه عند باب الغرفه لمده شهر بس علشان تشوفينه بالطلعه والدخله وتتحسفين كل مره وماتعودين الي صار مره ثانيه . >> عقب الشهر تقدرين تتبرعين فيه حق لجنه خيريه
نفس الشي تسوينه بالمطبخ والصاله , فتحي الكبتات وطلعي المنتهيه صلاحيته او مزهريه او شكل قديم او مكسور فتحي الجرارات قطي الاوراق والوايرات والبطاريات والاقلام الي فيها خلي البيئه المحيطه فيج مرتبه على طول لمها اهيا المسؤوله عن تشويش فكرج .

- التسوق على اصوله ..مثال: تروحين الجمعيه ما تشترين علبه كلينكس وحده وانتي عندج بيت 4 ادوار , لا لا تشترين كرتون او اثنين
لااا .. اشتري شي يكفيج شهرين وتحطين لج مخزن وقفل انتي تفتحينه مو الخدم عشان تعرفين شنو خلص الاشياء الي ما تخلص وايد مثل العيش , الشكر المعجون المكارونه الكلينكس المنظفات كلها الشاي القهوه اكياس القمامه الدهن الدجاج المجمد اللحم المجمد الخضار المجمده البصل الثوم .

..... هذي لازم بكميات مو كل يوم او كل اسبوع تروحين السوق تشترين لا لا لا

نفس الشي للاغراض الشخصيه مثل المناديل الشخصيه دهن الشعر الشامبو الشاوار جيل السبري المعجون الصابون ( انا بصراحه اخذ ملوت فكتوريا اكود 10 كريمات اب 10 سبراي جسم يقعدون عندي سنه كامله وكل ما اشوف شي بالسوق اذكر الي عندي بالكبت صافتهم جنهم مدرسه واتحسف وما اشتري اكيد كل وحده عندها شي ماتغيره ودايما ماشيه عليه حتى لو نزل شي يديد اجربه وترجع للقديم صح ؟

فليش المخاسير وتجربون وتقطون فلوس مو حرام , روحي اشتري كميات من الي متعوده عليه عشان ما تشترين شي ثاني اذا احد اغراج وتقولين لما اخلص الكميه الي عندي راح اشتري الحين انا مو بحاجه .

-عدم الذهاب للسوق بمجاميع وشلل بنات لان اذا وحده شرت شي حلو يناسبها يمكن بس ما يناسبج بتقولج اخذي نفسي يهبل يله بليز وبتاخذين وانتي مو محتاجه له

وبعدها بتقولج واااااااي تعبنا خل نقعد بالقهوه نشرب قهوه وبتقعدين وبتستحين وبتدفعين لها
شنوووو استفدتي من الطلعه ؟؟؟؟؟!!!!
شريتي اشياء مو لج ولا ذوقج ولا محتاجتها ودفعتي قهوه بعد اذا مو غدا
وماشالله الحين ستاربكس وكوستا قهوه وكيكه بس 7 دنانير شحقققققققه ؟؟

اروح البيت اشرب احسن وانظف .
- الزايد من المعاش بعد كل هذا تحطينه فوق الحساب الي فتحتيه بدون بطاقه سحب الي يعني يصير عندج حساب بس تودعين فيه المال .
-طبعا حبيباتي ادري شي صعب لكن بس تمشين فيه راح تتعلمين على النظام بحياتج واصلا راح تبدين تنتقدين الي كانو يسوون نفسج اول
-جذي راح تلتزمين فقط بالمهم والظروري الاساسي عندج بلا خرابيط وخلاجين بالوقت الحالي فقط لما يكبر عندنا حساب التوفير هذا عشان ابدي اعلمكم شلون تستثمرون مو توقفون عند التوفير وبس او توفرون وتسحبون من الي تم توفيره ترا جذي ما سويتي شي الاستثمار اهم نقطه بس يبيلها جرئه شوي وهذا الي بطرقله بالخطه اليايه .
بنات الي تبي توضيح تقول لا تستحي والي تبي بالتفصيل لها هم تراسلني عالخاص وانا اكتب واجزء ها الراتب بالاظرف عادي لا تستحي
ملاحظه * المستفيدين الاكثر في هذه المرحله الي مو متزوجه ولا تتحمل مسؤوليه احد وما عندها قروض او فيزا اوسلفه
مو معناته ان الباجي لا القصد ان حساب توفيرهم راح يكون اكثر وجمعون اكثر قياسا بالي عندها التزامات​

 

[lavelose]

رد : ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

مشكوووووووووووووووووووووووووره
لا يوقف لا يوقف:blueSmCLR::n2006107:

 

[Business Girl]

رد: ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

يعطيج الف عافيه على هالكلام المفيد والنصايح

 

[احلى صغيرونة]

رد : ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

واااااااو .. الكلام اينن اسم الله عليج ربي يحفظج



حدي حبيتج والله .. صرت اموت بمواضيعج اي موضوع اشوفه لج سيده ادش اطل عليه لان ادري اني راح القى درر ..

 

[احنا عشقناها]

رد: ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

مشكووووووورة وجزاج الله الف خير عالموضوع القيم وصاجة انا كنت مسويه نفس اللي قلتيه والحمد لله فادني لما مرضت وسويت عملية والحمد الله الله اغناني عن كل الناس بس هالايام صايرة مبذرة زيادة عن اللزوم وموضوعج جا بوقته احس انه صحاني من جد وجديد وانا الحين طلعت خمس اظرف وكتبت عليهم ارقام الاسبوع والخامس للسوق افكارج جديد وحلوة وغير هذا سهلة التطبيق بصراحة ماني عارفة اشلون اشكرج الله يوفقج ويعطيج كل اللي في بالج وانت بصحة وعافية امين . وبغيت اعرف اسم صالونج ؟؟؟؟؟؟؟؟؟؟؟؟؟

 

[احنا عشقناها]

رد: ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

كملي ناطرتج

 

[الخزاماوالنفل]

رد : ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

ربي يجعل كل حرف كتبتيه في ميزان حسناتج يااااااااااااااااااااااااااارب

 

[مطنـوخهـ]

رد : ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

الله يخلي لج الوالدة ويبعد عنكم عين كل حاسد

 

[برد ابو الذهب]

رد: ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

بعد بعد لايوقف

 

[شمس 20]

رد: ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

درر درر يا سوس ماشالله عليج كملي كملي صج غيرتي افكاري بواايد شغلات والله

صرت احسب للفلس وين يروح واكتب بورقه شنو اللي علي واللي مو علي


ربي يوفقج ان شالله يارب

 

[red flower]

رد: ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

هاي كلامج حلو يالطيبه بس بالنسبه لموضوعات الكافيهات والمطاعم لابد التغيير مره بالاسبوع والتوفير حلو عشان الواحد يقدر يقضي حاجاته من سفر او يبي يشتري شي محرز سياره او ساعه او اي شي ثاني الواحد يعيش مره بالعمر والفلوس تروح وتيي فليش الحرمان

 

[red flower]

رد: ََ من نصـــايــــح امـــــي ... تعـــــــالي اعلمــــــــج شلون توفــــريــن َََ

هاي كلامج حلو يالطيبه بس بالنسبه لموضوعات الكافيهات والمطاعم لابد التغيير مره بالاسبوع والتوفير حلو عشان الواحد يقدر يقضي حاجاته من سفر او يبي يشتري شي محرز سياره او ساعه او اي شي ثاني الواحد يعيش مره بالعمر والفلوس تروح وتيي فليش الحرمان