يوم في حياتي

[ام البوشيه]

السلام عليكم
حبيباتي وخواتي حبيت اكتب لكم قصه عن يوم في حياتي
كان يوم عجيب بالنسبه لي وان شاء الله تعجبكم قصتي.
اعرفكم بنفسي انا ام يوسف عندي خمسه من العيال
يوسف عمره 16 سنه ,وأحمد عمره 14 سنه , ونوف وفوز توأم عمرهما 12, والجعده مبارك اللي عمره 9 سنوات
طبعا كأي ام كويتيه كل شي اسويه أقعد الفجر اصلي وأجهز الريوق واقعد العيال الساعه 5,30 علشان يمديهم يتجهزون للمدرسه ونطلع من البيت الساعه 6,30 علشان اوصلهم للمدارس وأروح الدوام قبل زحمة الشوارع .
في ذاك اليوم قعدت من النوم اطالع الساعه ولا الساعه 6,30 جان أصرخ :"اوف تأخرت الله يهديك بويوسف ما عرفت تقعدني " ونقزت من فراشي ركضت علي غرف العيال ,ما لقيت أحد ,نزلت بسرعه على الدرج زين ما تكرفست وطحت الله الحافظ,شنو تتوقعون شفت انصدمت ,
العيال قاعدين يتريقون مع ابوهم وهم مستانسين,
جان أصرخ عليهم "ليش ما قعتوني " رد علي حبيبي مبارك "يمه أشفيج أبوي قال خلوها ترتاح ,مبين على أمكم تعبانه ,خلوها تنام ,وسوالنا الريوق وبعد بيوصلنا المدارس"جان أرد عليهم وأنا مستغربه عمره ما سواها الابو "انزين أنا بصعد ابدل وأروح الدوام"
غسلت وبدلت وانا أكلم نفسي "مالي عاده أتأخر في النوم,عدل أهلي تغدوا عندي امس وقعدوا عندي لوقت متأخر من الليل .صج ستانست وايد وياهم بس تعبت وايد من الطباخ والشيل والحط لان مابي قصور على أهلي ,وبعد ما اطلعوا قطيت روحي على الفراش وما حسيت بروحي الا الساعه 6,30 الصبح حتى صلاة الفجر طوفتها ,وبو يوسف أول مره بحياته يسوي جذي ياالله جزاه الله خير .ولبست وطلعت من البيت الساعه 7,30 يعني عز الزحمه الله يعيني على الزحمه ,واتصلت على رئيس القسم اطلب منه أذن تأخير ,ودخلت الخط السريع ولا الشارع ماشي ,في زحمه بس مو الشارع واقف لا ماشي سلس ,حمدت ربي ان ماكو الزحمة
وصلت الدوام قبل لا ينحسب لي تأخير علشان الاذن ما يروح علي شنو تتوقعون شفت بالدوام.....................

 

[ررروووان]

حبوبه كملي بدايتج حلوه

 

[kookiss]

شنو ؟؟؟؟؟؟؟؟؟؟

 

[نــوال]

شنووو شوقنيناا؟؟؟

 

[ReRez]

ان شاءالله حياتج كلها سهالات مو بس هاليوم

وناطره اشوف الشي اللي شفتيه ان شاءالله يكون حلو بعد

 

[رجااوي]

يالغلا كملي معاااك .......؟؟؟؟

 

[ام البوشيه]

السلام عليكم
شكرا حبيباتي :
ررروووان ,kookiss , نوال , rerez , رجاوي
على تشجيعكم لي ,هذا شي جميل منكم ,ولكم جزيل الشكر على متابعتي
وعلشان عيونكم الحلوه اكمل لكم القصه.

 

[أم حيدر]

أم البوشية


وناسة

انا بعد متابعة

 

[ام البوشيه]

:hjy5jewf:السلام عليكم
( الجزء الثاني )

لقيت كل الموظفين والموظفات قاعدين على مكاتبهم محد منهم متأخر غيري أنا ,ولا يوجد غياب ولا طبيات ,ولا كلهم يطالعوني ويسألوني "عسى ما شر أم يوسف " رديت عليهم وأنا كلي استغراب "ما شر بس راحت علي نومه"
بصراحه قلتها وأنا مستحيه منهم.
قعدت على مكتبي وانا مستغربه شلون جذي كلهم قاعدين على مكاتبهم ,ومحد منهم يتطحلطم على الشغل ولا المعاملات ولا نزول العلاوات أو الاعمال الممتازه ولا متنرفز ,والمراجع يدش المكتب بدون مبالغه ماني قايله ثانيتين بل أقول دقيقتين ولا معاملته مخلصه وهو يضحك ويدعوا لنا بطولة العمر.
ومشى اليوم بسلاسه وهدوء وانتهى الدوام وما حسينا فيه ,وبصمنا هم بهدوء محد يزاحم أحد ولا أحد يترجى من أحد يبصم قبل الآخر علشان مستعجل .
ركبت سيارتي الشارع زحمه بس مو مثل كل يوم الكل ماشي بطريجه لاأحد يحذف روحه على السايد الثاني واللي وراه يشكل عليه بالهرن ,وما سمعت هرنات ,ولا اطل بويوه الناس بسياريهم محد عاقد النونه الكل على وجه ابتسامه او تحسون انه مرتاح مو منزعج,
نسيت اقول لكم ان بو يوسف اتصل علي وقال "لا تحاتين العيال انا أجيبهم من المدارس"
اليوم أحسن يوم عندي كل شيء رلاكس ماكو شدة الاعصاب اللي امر فيها كل يوم.
وصلت البيت ولا السفره جاهزه والغدا منجوب وبويوسف يقول "ناطرينج تغسلين ايدينج ولا تبدلين أول" رديت عليه وأنا ميته من اليوع "أغسل ايدي لاني يوعانه"
أول مره اتغدا وعيالي بهذا الهدوء محد يناجر الثاني ,ولا أحد يداحر أخوه على قطعة يدام ولا ليش ماكو جدامه كلاس ماي ,جان يقطع بو يوسف الهدوء وهو يقول لي :"بعد الغدا روحي ارتاحي ,أنا أجابل العيال ,وأشوف واجباتهم وشنو يبون"رديت عليه"جزاك الله خير ,ممكن أروح عند أختي حصه متصله فيني تبيني امر عليها "رد علي بو يوسف"افا عليج روحي حبيبتي ولا تحاتين شي ومو مهم الربع والدوانيه اليوم لاحق عليهم "
لا لا لا في شي اليوم شنو صاير وأنا ما أدري عنه تهقون أهلي البارحه كلموه ولا أخواني شدو عليه بالحجي ,بس أخواني مثله حتى حريمهم يشتكون منهم شنو صاير ؟؟؟؟؟؟؟؟؟؟؟؟؟؟؟؟؟؟؟؟؟؟؟:080402ask_prv:

 

[ررروووان]

يمكن عيد ميلادج اوو مسويلج مفاجا
او مثل ماقلتي يمكن اهلج كلموه

 

[أم@الحلوين]

بدايه حلوه

كملي ..... متابعتج

 

[رافعه الحاجب]

متابيعين

 

[دنيتي غريبه]

؟؟؟
شي غريب بصراحه

انا اتوقع كل هالاشياء اوهام ودج انها تتحقق لوووووووول

 

[ReRez]

يمكن حلمانه لوول لا ان شاءالله حقيقه تستاهلين كل خير

 

[نــوال]

والله ماأدري بس بنتظارج لاتطوليين علينا بليييز

 

[الدانه_83]

اتوقع حلمانه اكيد ولا قاعد اتخيلين لووول

 

[ام البوشيه]

السلام عليكم
حبيباتي انا آسفه على التأخير بس مو مني جم مره اكمل القصه وأبي أعتمدها والا الموقع تحت الصيانه
وأعذروني
مشكورين لكم كلكم ررروووان,ام الحلوين,ورافعة الحاجبين,دنيتي غريبه,نوال ,ودانه -83 ,آسفه الحبيبه ام حيدر وReRez لتشجيعكم ومتابعتكم

 

[ام البوشيه]

الجزء الثالث والاخير
كل هذي الافكار تمر علي وأنا صاعده الدرج ,عاد تصدقون ريلي من النوع اللي يموت على الدوانيه ولو خوفه من الله سبحانه وتعالى جان عبدها بعد,,تصدقون بالله صارلي 17 سنه متزوجه هالريال ما كو يوم طوف الدوانيه لو كنت تعبانه بموت اول شي الدوانيه وبعدين انا,انا تروالي لو ربع الدوانيه ما حضرواعرسنا جان ما حضر العرس ,قطع حبل أفكاري صوته "أم يوسف اذا تبين شي من الجمعيه اكتبيلي على اورقه"
"لا لا لا في شي مو طبيعي اليوم"
انزل واسأله ,لأ اخاف ترد حليمه لعادتها القديمه ,مي خالف شنو كان سبب التغيير اللي صاير المهم عشت يوم من ألف ليله وليله طبعا بالنسبه لي,ولا بعد بو يوسف وعياله شالو السفره من غير ما أترجا أو أحن .
دشيت داري غسلت وبدلت علشان اريح شويه علشان المغرب أروح عند أختي أشوفها شتبي تقول لي ,تهقون تقول لي سالف ريلي وشقصته ,ليكون مسويلا سالفه قاعد يدللني يعني مساحل ,ولا تهكون متزوج وقاعد يسوي جذي علشان اغفرله ,أعوذ بالله منك يا أبليس , ما كو الا الأفكار السوده.
ما اطول عليكم الظاهر غفت عيني ولا أسمع صوت عيالي "يمه يمه يمه"
الصوت ياي من بعيد لا أكيد حلمانه ولا يوسف يقولي "يمه...يمه..يمه قومي اشفيج" ولا مبارك يقول "يالله يمه تأخرنتي "
جان أفز بسرعه "خالتكم حصه اتصلت"ردتي علي نوف "يمه خاتي حصه ليش تتصل ها الحزه يمه الله يخليج شفيج اليوم ترى وايد تأخرنا"
"وايد تأخرنا على شنو " للحين انا مو مستوعبه هذا اليوم الحلو اللي عشته كان مجرد حلم حتى ما طول 24 ساعه.:denya:

 

[ام البوشيه]

صدقت حبيبتي ReRez كان حلم
وان شاء الله تكون ايامكم كلها حلوه ,ولاتشدون على اعصابكم الدنيا ماشيه ,وما يصير الا اللي كتبه الله لنا
ومشكورين وما قصرتوا على متابعتكم قصتي:hjy5jewf:


:bye22:

 

[أحلى همبه كويتية]

يعطيك العافية
اشحلات القصة


اشفينا احنا الحريم ليه دلعنا الريال شكينا بشي ؟؟

ما ننلام ياعمري

الله يتمم السعادة وراحة البال للكل ويصير صج مو حلم



انا مابيه يسويلي مثل حلمك

انا ابيه صج يفاجأني بسفرة حلوة :gr4uu:بروحنا من غير العيال

ويقولي يالله ماكو وقت جهزي الجناط الليلة مسافرين

:RoadRunner:فرييييييييييييرة الجنطة جاهزة