ظاهرة في البنات وللاسف انها ظاهرة ----------تعالوا نتناقش:

[toolate]

السلام عليكم

الحقيقة من زمان ودي اكتب عن هالموضوع وافضفض وكل ما احاول انسى ، مشهد من فلم Brave heart يذكرني فيه

http://www.youtube.com/watch?v=Pzj_f3Iw6NI&feature=related

مشهد الخيانه ، لما يكتشف ان حليفه خانه ، مع انه متأمل فيه خير وكان يبي يوصله لانه يصير ملك .

هالشي صار معاي ايام الدراسة ، وحدة كنت اظنها صديقتي وكنت اعزها وأثق فيها واقول لها كل اللي بقلبي وبعض المرات حتى خصوصياتي وحتى لما احش بأساتذتنا كله عندها ، وشنو كانت تسوي ؟؟ يا ترى شنو اتوقعون ؟ تقول حق البنات ؟؟

لا !

كانت تقول حق الاساتذة وبالخصوص واحد منهم .. يا بنات ، كنت الاحظ تصرفات غريبة من الاساتذة معاي وردود افعال غريبة .. يا ترى ليش ؟؟

وطبعا الله سبحانه وتعالى كشفها لي ، واذكر لما اكتشفت خيانتها وانها كانت جاسوسة مزروعة من قبل هالاستاذ المنحط
كنت اتحلف فيها واقول لو الله يطيحها بيدي والله لاسوي ووالله لافعل .

صادفتها بعد سنوات بالسوق وكان شكلها متغير وجنها كبرانه الف سنه ، شكلها تعيس واستغربت لما ابتسمت لي وحسيت اني اعرفها بس منو ؟؟

ولما وصلت الكهربا لمخي تذكرت انها اهي ، والله وحقرتها وجنها الباب.. سبحان الله يمكن الله مو كاتب افشلها جدام الناس ؟
عموما الفشلة كانت بتصير علي بعد لان كنت بطقها وطبعا عيب جدام الناس .. وقررت بيني وبين نفسي اني احقرها للابد واحشم نفسي منها ومن الناس اللي من نوعيتها مع ان الضرر اللي حاشني من وراها مو هين كنت اكره الدوام وما ادري ليش الاساتذة جذي معاي مع اني متفوقة ، بسببها تخرجت بتقدير جيد .. حسبي الله ونعم الوكيل فيها وفي الاساتذة ودعائي هذا مستمر مع كل صلاة وكل لحظة اتذكر فيها خيانتها .

كانت تقعد وتسولف وتضحك معاي وساعات تشتكي لي وانا يا غافلين لكم الله

والحين السؤال هل مرت عليكم هالنوعيات بحياتكم ؟؟

 

[mee.mee]

مريت بهالشي وللاسف لما الحين الجرح بقلبي مابرى


وللحين مو مصدقه انه من هالانسانه بالذاات يطلع منها كل هالشي

هذي رفيجتي من 5سنين تقريبا انصدمت منها والحمدلله اللي الله كشفها على حقيقتها

كانت اقرب الناس لي كنت اعزهاا حييل حييل حييل ويضييق خلقي لما اشوفها متضايقه ما احب اشوفها متضايقه كلش
وكنت دايمن وياها واذا ماكلمها باليوم احس يومي سخييف
المهم العام كنا متفقين نتيمع فبيت وحده من البنات
عاد انا اتصلت من البنت واعتذرت كنت يومها تعبانه شوي
واهي راحت

وثاني يوم اتصلت فيني وحده من البنات اللي انا وياهم تقولي فلانه ابيج ضروري ضروري قتلها قولي بالفون تقولي مايصيير
قتلها انزين خلي بالمدرسه
وداومت وشفتها جان تقولي انه فلانه اللي اهي رفيجتي تقول عنج كيت وكيت وكيت انا طبعا ماصدقت وزفيتها قتلها شوفي حركتج مكشوفه روحي لعبيها على غيري كنت مو مصدقتها كلش كلش مستحيل هذي الفلانه بالذات تقول جذي

وطبعا هذيج ماكنت اكلمها زعلانه عليها

وتالي انصدمت لما عرفت انها مرافجتني للمصلحه تخيلي جدامي انا اعز ناسها ومن وراي انا كيت وكيت وكيت

والحين تقريبا سنه وثلاث شهور مادري عنها اشوفها بالمدرسه واصد عنها وبسببها نقلت كلاس ثاني

ومن اذكر السالفه تصك فيني الدنيا ومالي خلق شي مصدومه مصدومه :eh_s(2)::eh_s(2)::0bee2e8d89::0bee2e8d89:[/b]

 

[كوكيتي]

زين سويتي ... هالأشكال حرام تنزلين مستواج لها

أنا من دشيت الجامعة وأنا ماسحة كلمة صداقة من معجم حياتي ...
صديقاتي صج... اهما اللي معاي من الابتدائي والا المتوسطة والا الثنوي ...
أما اللي بالجامعة أسميها زمالة... ليش؟؟؟ لأن أغلبهم يكونون علاقة وياج لمصله معينه إهيا الدراسة ...
هذا ما يعني اني ما أحبهم ... لكن ماخذه حذري شوي ....​

 

[شويهينه]

ويييييييييييي عدي وخربطي


في بنات مريضات نفسيا وغيورات لما يشوفونج ناجحه ومناقصج شي ودهم يخربون عليج ولو شي واحد:eh_s(14):


اول شي عندي رفيجتي كنا حييييييييييييييييييل مع بعض كل يوم وحده في بيت الثانيه

لين البنت صارتلها مشكله مع امها كانت شاكه فيها وقطتها براسي .... ومن بعدها تركتها



والثانيه بس نقالة سوالف وحكي.... بس ماخليتها .... قاعده اقطع علاقتي وياها تدريجيا



والله يحمينا من بنات الحرام وعيال الحرام:tek:

 

[Ibtisama]

الحمد الله ما مريت على هالأشكال او يمكن مريت بس انا من النوع الحذر جدا جدا مو اي وحده اقول لها اللي بقلبي الحمد لله وان شا الله ما اشوف هالاشكال يا رب.. اذا حبيتي ترافجين دوري البنت اللي بقلبها خوف من الله.. اشلون تعرفين البنت اللي جذي؟؟ هالشي راح يبيين من تصرفاتها

بس حبيت اعلق على شغله:: انا اشوف الأساتذه او المسؤولين اللي يتبعون هذي الطريقة ويدزون جواسيس لهم ان دل فا هالشي يدل على ضعف شخصيتة وتذبذبه و بصراحه غير مؤهل انه يمسك منصب او يكون استاذ

ياليت في جهة تقييمهم و تحاسبهم ما تخلي الجمل بما حمل يسرح و يمرح على كيفه

 

[حجيه هيونه]

عز الله خوش مشهد لما يطالعه واهو مصدوم نظرته مو طبيعيه


امممم


مرت علي كثييييييييييييييييييييييييييييييييييييييييييييييييير

عدد شعر راسي

يمكن بصوره اقسى من الى انتي قلتيه

واحيان كثيره بصوره اخف

بس مرت علي وايد

عن نفسي صحيح اهاوش وكل شي

بس بالحاالات هذي بالذات اسكت وامشي

اترفع عنها واتركها لربها

والحمدالله الحمدالله ما يخيب رجا عبيده


عادي يالغلا طوفي الدنيا جذي مالها امان

 

[ام الحلوه والمزيون]

ذم النميمة التي فيها فساد ذات البين


أخبرنا أبو الحسين بن بشران ، أنبأنا أبو جعفر الرزاز ، حدثنا العباس بن محمد بن حاتم الدوري ، حدثنا يعلى بن عبيد ، حدثنا الأعمش ، عن إبراهيم ، عن همام قال : كنت جالسا عند حذيفة مر رجل ، فقالوا : هذا يرفع الحديث إلى السلطان ، فقال حذيفة : قال رسول الله صلى الله عليه وسلم : « لا يدخل الجنة قتات (1) » قال الأعمش : والقتات : النمام . وروينا في حديث ابن عباس وغيره ، عن النبي صلى الله عليه وسلم ، في اللذين كانا يعذبان في قبرهما : « أما أحدهما فكان يمشي بالنميمة ، وفي حديث عبادة بن الصامت عن النبي صلى الله عليه وسلم في البيعة : » ولا يعضه بعضنا بعضا « ، ثم في حديث ابن مسعود عن النبي صلى الله عليه وسلم : » ألا أنبئكم ما العضه ؟ هي النميمة ، القالة بين الناس « ، وفي حديث سنان عن أنس عن النبي صلى الله عليه وسلم في تفسير ذلك . » نقل الحديث من بعض الناس إلى بعض ، ليفسد بينهم وروينا عن ابن مسعود عن النبي صلى الله عليه وسلم قال : « لا تبلغوني عن أحد من أصحابي شيئا ، فإني أحب أن أخرج إليكم وأنا سليم القلب » ، وروينا عن يحيى بن أبي كثير أنه قال : « النمام يفسد في ساعة ما لا يفسد الساحر في شهر
__________
(1) القتات : النمام الذي يتسمّع كلام الناس من حيث لا يعلمون ثم ينقل ما سمع
أخبرنا أبو عبد الله الحافظ ، حدثنا أبو العباس محمد بن يعقوب ، حدثنا الحسن بن علي بن عفان ، حدثنا ابن نمير ، عن الأعمش ، عن أبي صالح ، عن أبي هريرة قال : قال رسول الله صلى الله عليه وسلم : « تجد شرار الناس يوم القيامة ذا الوجهين : الذي يأتي هؤلاء بحديث هؤلاء ، وهؤلاء بحديث هؤلاء »

 

[PinKiSHo]

مروا علي هالأشكاااال

وحده كانت رفيجتي حيييل وكنت ابديها حتى على بنات خالتي واحبها اكثر من اختي وما ارضى عليها وبعدين صار بينا تج بسبب موضوع تافهه ودقيت عليها ونفست علي وانا مو نوعي احب اعتذر حق احد وانا مو غلطانه بس تنازلت عشانها ونفست فا مارديت دقيت واهي بعدها دقت تبي تطلع معاي وطلعت معاها ماكسرت فيها وردينا بس مونفس قبل بعدها انصدمت انها متكلمه عني عند واحد من اهلي صدمتنييي
انزييين ليييش ونص الي قايلته اهي جذب الله ياخذها ولايوفقها انشالله صج حرقت قلبي وانقهرت منها لان انا مع الي صار ماتكلمت عنها إلا بالزين عشان العشره الي بينا اما اهي شوهت سمعتي وياريت بس عند الي يصير لي عند وايد ناس والله يجازيها انشالله لاتقولون الله يسامحها لان لو تابت واعتذرت جان قلت ميخالف بس مبكره راسها وشايخه وناسيه اهي شنو الله لايوريها يوم حلو يااااارب

والثانيه هذي انا مسحتها من حياتي والله يسامحها انشالله لان رافجتها وكنت اعزهاا حيل بنات والله كانوا يقولون لي ترى موزينه ورايحه فيها وخري عنها وكنت اقوول حراام انتوا ماتعرفونها عدل وكنت مغمضه عيوني عن الي يقولونه اخر شي طعنتني بظهري وصدمتني والمشكله انها يت وقالتلي بويهي انها سوت جذي فيني انزييين ليييش ماكان عندها اي رد بس سويت فيها جم حركه حقيره والحين لما تشوفني تنحاش لوووووووول

والثالثه قبل فترة تعرفت على بنات وصاروا حيل معاي بس انا ماقمت اثق بأي وحده يعني بس اسولف معاهم سوالف عاديه واهي على قولتها كانت تعزنيييي حيييل وطلعات وروحات ومره كنا قاعدين تقريبا 6 بنات نسولف ولا وحده تقول بنات انا ملاحظه شي على وحده قلت لها لايكون الي فبالي وقمنا نسولف بالنغزااات بعدين البنات فهموا وعرفوا عن منو نتكلم إلا هذي قالت منو تقصدوون قالوا فلانه اليوم الي وراه رايحه قايله كل شي حقها والمشكله انها تدري ان انا وهالبنت بينا تج واهي راحت كرهتها فيني زياده وترست راسها علي زييين لييش !! ومن يومها قطعت علاقتي فيها وبرفيجاتي الي يماشونها وصار بس سلاااام بينا والحين مفتكه من القيل والقال

 

[Queen NOoori]

انا مستغربة منكم بنات انتو شنو متوقعين من الدنيا ؟؟!!


تبونها حلوة وكاملة وسعيدة !!!!


عيل شفايدة الجنة اذا كل شي بالدنيا حلو وصح!!


كلنا جربنا هالنوع من "الخيانة" بس مامتنا ولا تعطلنا......

انا اقول الدنيا فيها خير وعلى النيات ترزقون لا تحاتون الله فوقكم ويشوف وكل شي خيرة​

وتقبلوا رايي بصدر رحب:eh_s(7):

 

[أحبه موت]

مرت علي هالأشكال هذي واااااااااايد ومن أقرب الناس لي الي اهي رفيجتي وكانت كانت توأم وحي 7 سنين معاها واخر شي تتهمني بشي انا ماسويته لها وشوهت سمعتي عند اهلها الي كانوا يعزووووني حيل الله يسامحها ان شاءالله

 

[Cander]

اي صح في نوعية تبني صداقاتها مع الناس

على النميمة والنفاق والخيانة

ما تدري انها وسيلة راح تنتهي صلاحيتها بأقرب وقت

انا للاسف مروا علي اهل من هالنوعية مو اصدقاء

 

[توته وااااااااو]

ماااااااااااااالت عليهم اللي جذي :cxxxp:

 

[• قلبه نصيبي •]

بـفهم شي واحد ليش الناس الحيين مايقدرون شي اسمه صداقه !

قليل قليل الي ينحطون علي الجرح يبري ! والله toolate عدي وخربطي بتشوفيين هالنوعيه وايييييييييد !

 

[بنات حواء2]

وييييييييييع هذي النوعيه ويع
عمومن احنه بزمن مافيه خير
زمن الصداقه و الوفى انتهى
انا اقول فكو نفسكم لا ترافجون و لا شي
بتحسين نفسج مرتاحه من المشاكل و عوار الراس

 

[al_reef]

والله حدها هالظاهرة منتشرة !!!

بس يعني شتسويين بعد يعني مانرافج خلاص ! صج اريح بس الوحدة تبي تسولف وتونس مو كالشيي مع خواتي طلعات وسوالف أتطق أجبودنا !!

أنا صارتلي هالشغلات عدي وخربطي بس انا من النوع اللي ماوقف عالوحدة وأحاسب عموماً دايماً أطنش صج اني اتضايق بس ما أحب تكبر السالفة أفوت !!!

وألحيين هابين بشي ألعن من الخيانة
بلا ( الخيانة ) مصيرها تنفضح بس شتسوون إذا كانت رفيجتج
أتطنش وماتدق وإذا شافتج أتسلم أبرود :cxxxp:

وإذا تبي شغلة أتصير أتدق وتسلم وجنى البخت :eh_s(14):

بلا شتسوين ؟؟؟؟؟

انا إذا شفت الوحدة أتعاملنى بجفى أسامحها يمكن ظروف بس إذا مصختها عاد والله أطنشها حتى لو تسنعت خلاص ماأرد مثل أول

"ما ينفع الصوت إذا فات الفوت "​

 

[ReeMoh]

بوجهة نظري انهاا مو ظاهرة يعني
وما اشوفها منتشرة وايد والحمدلله ما سارلي موقف معا احد
ومن كل شي في الزين والشين
مشكوورة

 

[أإلع ـشق دلع ـهـأإ]

سلآم على الدنيأ أن لم يكن بهأ .. صديقٌ صدوقٌ صأدق الوعد منصفأ ..

 

[toolate]

مريت بهالشي وللاسف لما الحين الجرح بقلبي مابرى


وللحين مو مصدقه انه من هالانسانه بالذاات يطلع منها كل هالشي

هذي رفيجتي من 5سنين تقريبا انصدمت منها والحمدلله اللي الله كشفها على حقيقتها

كانت اقرب الناس لي كنت اعزهاا حييل حييل حييل ويضييق خلقي لما اشوفها متضايقه ما احب اشوفها متضايقه كلش
وكنت دايمن وياها واذا ماكلمها باليوم احس يومي سخييف
المهم العام كنا متفقين نتيمع فبيت وحده من البنات
عاد انا اتصلت من البنت واعتذرت كنت يومها تعبانه شوي
واهي راحت

وثاني يوم اتصلت فيني وحده من البنات اللي انا وياهم تقولي فلانه ابيج ضروري ضروري قتلها قولي بالفون تقولي مايصيير
قتلها انزين خلي بالمدرسه
وداومت وشفتها جان تقولي انه فلانه اللي اهي رفيجتي تقول عنج كيت وكيت وكيت انا طبعا ماصدقت وزفيتها قتلها شوفي حركتج مكشوفه روحي لعبيها على غيري كنت مو مصدقتها كلش كلش مستحيل هذي الفلانه بالذات تقول جذي

وطبعا هذيج ماكنت اكلمها زعلانه عليها

وتالي انصدمت لما عرفت انها مرافجتني للمصلحه تخيلي جدامي انا اعز ناسها ومن وراي انا كيت وكيت وكيت

والحين تقريبا سنه وثلاث شهور مادري عنها اشوفها بالمدرسه واصد عنها وبسببها نقلت كلاس ثاني

ومن اذكر السالفه تصك فيني الدنيا ومالي خلق شي مصدومه مصدومه :eh_s(2)::eh_s(2)::0bee2e8d89::0bee2e8d89:[/b]

يا بعد عمري ، ولا يهمج انسي موضوعها وعيشي حياتج واعتبريه درس من دروس الحياة المهم ما نكرر الخطأ ونتقرب من ناس ممكن يضرونا ، الله يهون عليج يا قلبي

 

[toolate]

زين سويتي ... هالأشكال حرام تنزلين مستواج لها

أنا من دشيت الجامعة وأنا ماسحة كلمة صداقة من معجم حياتي ...
صديقاتي صج... اهما اللي معاي من الابتدائي والا المتوسطة والا الثنوي ...
أما اللي بالجامعة أسميها زمالة... ليش؟؟؟ لأن أغلبهم يكونون علاقة وياج لمصله معينه إهيا الدراسة ...
هذا ما يعني اني ما أحبهم ... لكن ماخذه حذري شوي ....​

عين العقل ، ومنكم نستفيد
نورتي الصفحة

:33_1185028183:

 

[toolate]

ويييييييييييي عدي وخربطي


في بنات مريضات نفسيا وغيورات لما يشوفونج ناجحه ومناقصج شي ودهم يخربون عليج ولو شي واحد:eh_s(14):


اول شي عندي رفيجتي كنا حييييييييييييييييييل مع بعض كل يوم وحده في بيت الثانيه

لين البنت صارتلها مشكله مع امها كانت شاكه فيها وقطتها براسي .... ومن بعدها تركتها



والثانيه بس نقالة سوالف وحكي.... بس ماخليتها .... قاعده اقطع علاقتي وياها تدريجيا



والله يحمينا من بنات الحرام وعيال الحرام:tek:

اللهم آمين

حلو ان الوحدة تتعلم من تجاربها وتعيد حساباتها من وقت للثاني وتصفي حياتها من الشوائب ، بالنسبة للغيرة انا عادي اسامح عالغيرة الا في حالة انها حاولت تضرني بسبب الغيرة هني اوقفها عند حدها ، واقلب الصفحة :eh_s(8):