بعد عشرة 12 سنة...فرقتنا عن بعض الدكتورة شيرين...الكرشة راحت

[BlackRose]

السلام عليكم يابنات

وأخيرا شديت وشفطت البطن والخواصر

سويت العملية يوم السبت عند المبدعة دكتورة شيرين

اليوم طلعت من المستشفى

بالنسبة حق الآلام محتملة لكن حاسة ان صحتي العامة تعبانة

وان روحي مسحوبة مني

طبعا لا قعدة ولا نومة ولا اكل ولا شرب ولا مشي نفس العالم

مااقدر اسولف لكم بعد لاني تعبانة

ادعوا لي اعدي هالمرحلة على خير

 

[عطر البوادي]

ألف الحمدلله على سلامتج حبيبتي والله يقومج بسلامه وتتهنين باللوك اليديد
عاد أنا مفكره أروح حق هالدكتورة بس قوليلي جم كلفت العملية ووين سويتيها وشلون النتيجه ولا للحين ماراح يبين وسامحيني على كثر الأسئلة

 

[engnera]

الحمدلله على سلامتج

 

[<ظبيه>]

الف الحمدالله على السلامه ومبروك اللوك الجديد
ديري بالج على نفسج لا تشيلين شي ثقيل
وخلي احد يساعدج بالقومه والقعده
كلها كم يوم وتردين طبيعيه
نحن السابقون وانتم اللاحقون

 

[!الجادل الصعب!]

وين هالدكتوره ورقم عيادتها وماتشوفين شر حبيبتي

 

[roseydoll]

الحمدالله علي السلامه والله يهنيج بالنتيجه

 

[مدرسة طفشانة]

الحمد لله عالسلامة حبوبة
اذا ارتحتي كتبي لنا التفاصيل

 

[eman84]

الحمدلله على سلامتج

 

[مزيونة العجمان]

الحمد لله عالسلامه ممكن اعرف تكاليف العمليه ووين سوتها لش الدكتوره باي مستشفى وكم التوتال وشنو الخياط شق بطن تجميلي والا غرز اناااااااااااااااااااا بصراحه شايفه عمليات يسوونها الاجانب عجيبه يشدون البطن من السره الجرح يكون بس داخل السره ما كو ولا شق بالبطن ودي بالطريقه هذي ما جروح وخياط بره

 

[حضن امى]

الحمدلله على السلامه والله يهنيج بجسمج
ويبعد عنج العين
حياتى انا اسألتى نفس اختى مزيونه العجمان
وحبيت اعرف البنج كان كامل او موضعى
وموفقه ان شاء الله

 

[تختوخه بس قشطه]

الحمدالله على سلامتج ومبروك على ستايل الجديد ...

ومشالله البنات ما قصروا بالاسئله وناطره تجربتج ....

 

[BlackRose]

مشكورين حبيباتي على دعواتكم الحلوة

وفعلا فعلا محتاجة الدعاء

اشرايكم انزلكم تفاصيل عمليتي على شكل يوميات واقولكم يوم بيوم شنو قاعد يصير معاي

شوفوا الله يسلمكم

قررت اني اسوي العملية بالضبط في عيد رمضان اللي طاف كنا ماخذين السالفة غشمرة انا وزوجي لمن قريت تجربة الاخت شمس المنتدى وتشجعت ورحت حق الدكتورة وارتحت لها وارتحت لكلامها

وعيادتها تصير بميدان حولي في علاج كلينك وفتح الملف والاستشارة ب 25 دينار
وبعدها يمكن رحت لها 5 مرات كله كانت زيارات مجانية ووايد حسستني انها مو مادية او استغلالية
قلت لها ابي اسوي اشياء ثانية بس اهيا رفضت قالت لي ماتحتاجين

اللي سويته بالضبط شد البطن والخواصر وشفط شوي من الفخوذ

سويت التحاليل الخاصة بالعملية واتفقنا على يوم 14 -11 في مستشفى دار الشفاء
وطبعا دمي كان نازل كان 10.3
وانصح كل وحدة بتسوي عملية انها ترفع نسبة دمها بالاول

اليوم الاول:

قمت الصبح ورحت المستشفى الساعة 10 الصبح دخلت الغرفة بدلت ملابسي وقعدت على السرير انطر

وتعرفون الحالة اللي اتيي بهاللحظات
حالة توهااااااااااااااان وزههههههههههههقة وملللللللللللللللللللل وشعور بالندم والحسافة
وانا شنو سويت بعمري
لو ظالة على كريشتي مو احسن لي

لين يات السستر وحطت لي الدرب وقاموا يعطوني ابر اللوعة ومادري شنو

جان اتيي الدكتورة عاد انا قلت لها دكتورة ماابي دكتورة التخدير تحط اي شي على ويهي لا كمام ولا غيره ولا ابيهم يربطوني
نوموني وبعدين سووا اللي بتسوونه

قالت لي اوكي

وبعدها قامت تخطط على جسمي وكانت جدا محترمة يعني كنت بملابسي بس كشفت بالاجزاء اللي اهيا محتاجة تخططها

واللي عجبتني اكثر انها تخطط بالمتر انا شايفة اشلون يخططون اشوفهم بس بقلم
لكن الدكتورة اسم الله عليها خططت بالمتر وبقياسات مضبوطة
وخذت لي صور حق الكرشة المفقودة وقالت لي بعد العملية هم راح نصور ونشوف الفرق


شوي والا يايه السستر تعطيني دوا طعمه مررررررررررر قالت لي شربيه هذا حق الريلاكس

انا شربته ماوعيت بنفسي الا قمت اغيييييييييب واعية ومو واعية
اذكر ان نزلوني بغرفة العمليات وحطوني بسرير العمليات وعقبها ماوعيت الا واهما يقعدوني ويقولون لي قومي خلصنا وشفت مركبين لي كيس دم

واذكر صعدوني فوق بغرفتي وامي تقول الساعة 8 ونص بالليل يعني العملية طولت 6 ساعات وطبعا قضيت الليل كله وانا نايمة ومو واعية ومااقدر اتحرك

هذي قصة اليوم الاول

اذا شفت تفاعل راح اقولكم قصة اليوم الثاني

 

[amani]

ألف الحمد لله على سلامتج وربي يقومج بالسلامه وأنا متابعه معاج بإذن الله

 

[bint_q8]

حمدلله علي سلامتج

الله يقومج بالسلامه ويعطيج الصحه والعافيه

 

[^^المهره^^]

واي ذكرتيني فيما مضى
الف الحمدلله على سلامتج حبيبتي
اجر وعافيه ان شاءالله
وناطرين باقي يومياتج

 

[رومنسيه]

ناطرين اليوميات واجر وعافيه

 

[sugar lip's]

الحمدلله على سلامتج يارب ... يالله ناطرينج

 

[عطر البوادي]

أجر وعافيه أختي وناطرين على أحر من الجمر

 

[أحلى^حياه]

يالله ناااااااااااطرررررررين بسرعه انا بسويها عالاسبوع الياي اذا قدرت

وين سويتيها ؟

 

[ام زين العابدين]

حمدالله على السلامه
بس جم ساعه كانت العمليه