ديوانية شموسه ورينبو...الي ولادتها بالصيف تتفضل تقرق معانا

[شمس و قمر]

ذكريات 6-5-2007

كات وومن 26-5-2007

مي الحلوه 20-6-2007

دموع الذهب 23-6-2007

ام عواشي 1-7-2007

شروفه 2-7-2007

جاكليت 12-7-2007

ظروف الليل 14-7-2007

رينبو 1-8-2007

زقرتيه 1-8-2007

شمس وقمر 1-8-2007

بنت النوخذه 2-8-2007

fjnt ام شيوخه 5-8-2007

منال88 5-8-2007

اوشال 8-8-2007

ام عبدالعزيز 9-8-2007

كويت ليدي 16-8-2007

lailalaila ليلىليلى 18-8-2007

ام فيونه 21-8-2007

ريماس 26-8-2007

ملاك هدية 3-9-2007

دونات 30-9-2007

 

[شمس و قمر]

ام عواشي هذا التوقيع الي طلبتيه

 

[شمس و قمر]

باي الحين بنات

بنتي جننتني

على فكره توقيعي راح للسادس

بس دكتوري اليوم قالي تدخلين السادس على حسب قياسات الجنين بتاريخ
10-4

يعني باقي عشر ايام

 

[rainbow_brite]

بنات صباح الخير انا بالدوام واليوم صايره خوش موظفه مداومه وطالبه ريوق حدي يوعانه بطاط شبس وكرواسون جبن وطماط اتفضلو معاي عالريوق

 

[rainbow_brite]

شموسه انا جذي مع ريلي ساعات اكون حاطه في بالي مكان ابي اروحه مكان معين وادري ان اهو ما له خلق فاسوي فيلم واكشن ان ظايق خلقي وغلقه وفيني ظيقه بس تعال ابي اطلع مخنوقه خخخخخخ مع اظافة بعض التاثيرات الجانبيه وبس اركب السياره يقولي انزين الحين وين تبين تروحين اقوله انا بس ابي افتر بالسياره وشوي شوي تلقيني اقوله روح مني ومناك واحس مع الوقت قام ما يعطيني ويه عرف حركاتي

وبصراحه في اشكال يبيلها طق خخخخخخ يمكن الحبيبه تبي تروح وعرس وقالت دام انها كاشخه مره وحده اتروح الفينيوس خخخخ

 

[rainbow_brite]

بنات انا لاحظت شغله ما ادري انتو ملاحظينها معاي لان صارت معاي بكل حملاتي من قبل


انتو تعرفون ظاهرة الخز لم وحده تكون مع ريلها وصار شي عادي تعودنا مع الوقت بس انا يوم احمل تصير معاي ظاهره يديده واهي خز البطن اتخيلو هذاك اليوم وانا امشي والا وحده اتخز ريلي ذيك الخزه وبعدها خزت بطني خزه وما شالت عينها الا لم طافت من جدامي وحتى مره يوم كنت حامل بولدي اللي قبل وحده من كثر ما خزت بطني ريلي انتبه حتى قالي شفيها اطالع بطنج ولازم قبلها اتشوف الريل بس ما ادري اهي ظاهره طبيعيه والا الظاهر ان كرشتي ملفته للنظر خخخخخخخ

 

[rainbow_brite]

بنات حدي محتره من الدوام برد لكم بعد شوي

 

[fjnt]

شلونكم حوامل كلكم...:eh_s(8):

شموسة .. هلا فيج وماتشوفين شر إن شاللة ... ترى كلنا على هالحال ه\ا وأنا عندي بنت وحدة بس مطلعة عيني وهم بدون خدامة نفسيتي صايرة X
بس مانقول إلا الحمدللة على كل حال وهذي سنة الحياة.... بالنسبة للافينيوز رحتلة بيوم الافتتاح فما لحقت أشوف أشكال غريبة بس هالاشكال لابدمنهم ومانقول إلا سترك يارب.

أم عبدالعزيز و أم فيونة .... حياكم اللة بالديوانية :eh_s(7):

أوشال.... أنا بعد أستحرم أراجع عند دكتور دكتورة وفشلة بس لوماإني مظطرة بس وايد أعرف بنات ماترتاح إلا عند دكتور وأنا حاليا أراجع عند دلال السالم بس خايفة أولد عندها وايد سمعت إن عندها أخطاء بالولادة ومرات أقول كل دكتور ممكن يغلط لأنهم بالنهاية بشر مو معصومين عن الغلط بس الوحدة قاطة فلوسها تبي شي مضمون واللة يسهل والة محتارة منو بولد عندها إهي ولا فوزية القطان ... بالنسبة للتجهيز بديت أجهز وخلصت كفري مع شغلة كامل من قميص نوم وسلبر ولفة البيبي والمفارش والزبالة وإنتي بكرامة سويتهم عند الاقتصاد المنزلي وطلع روعه وناوية أخلص باقي الاشياء قبل الثامن واللة يسهل أنشاللة وتجهيز البيبي عندي أشياء جديدة ملوت بنتي وبشتري كم شغلة بعد...

 

[fjnt]

رينبو.... عادي وايد تصير معاي وعلى قولتج لازم يخزون الريل قبل لايخزون البطن بس شتقولين مرات أضطر ألبس عباية عشان أفتك من هالسافة بس ماكو فايدة..... وعموما البنات من غير ماتكونين حامل لازم الخز فيج وبريلج...طبع خايس واللة يعين

أنا اليوم زايد نشاطي ومداومة وداقة الكرت مبجر ومجابلة النت من ضيقة الخلق حدة دوامنا مافية شغل وبس قاعدين وسوالف

 

[rainbow_brite]

ام شيوخه شالسالفه خوش موظفات هالاسبوع
انا عن نفسي ادري اسبوع اداوم واسبوع لأ تلقيني مرضيه اقزر شسوي

وعالتجهيز انا بصراحه قاعده اجهز حق النفاس بس البيبي ولاشي انشا الله الشهر الياي

 

[مي الحلوة]

شلونكم حوامل... والله مشتاقه لكم..:eh_s(7): :eh_s(7):
شلونج شموسه..واوشال..ورينبو..وكل البنات..
انا صار لي اسبوعين تعبانه وما اقدر اقعد احس الثقل كله تحت..
واحس ودي امشي بس من الثقل مالي خلق..:eh_s(10): :eh_s(10):
بس الحمد الله قربت اخلص اغراضي واغراض البيبي..
وان شاء الله كلها كم يوم واسكر شنطه المستشفى..
بس تخيلوااااا طلعتلى مناسبه ما كانت على البال..وانا عاد مالي خلق كلش
حماتي ملجتها الخميس الجاي وبيسوون حفلة ملجه وانا الحين محتارة ما ادري من وين اجيب بدله حلووووة...خاصة اني صايرة متينه متينه..
تكفون بنات اللى تعرف محل حلووووة يبيع بدلات حوامل ذربه تقول لي..
او مشغل او حريم...انا ابي شيء ناعم وحلوووو وبنفس الوقت راقي...
:eh_s(11): :eh_s(11): وبصراااحة ما في وقت..

 

[rainbow_brite]

وي شموسه شالسالفه خليج ريلاكس هدي عشان البيبي والله يعينج على عيالج لانه يهال والصغيره يبيلها مجابل وهز يالله تنام اصلا انا اكفخ ولدي تكفخ وساعات يمد البوز شبرين ومن كثر الهز يدوخ وينام بس عقب ما ينام يكسر خاطري يحوشني تانيب ظمير ودي بس ابوسه واي حبيبي وما تشوف شر العنونه بعد الله يعينج بروحج حامل وعندج بيبي صغير ترا كلنا هالفتره مقصرين بعيالنا بس انشا الله فتره وتعدي

 

[rainbow_brite]

اوشال والله كسرتي خاطري انتي تدرسين وعليه الله يعينج والله يوفقج

 

[rainbow_brite]

مي الحلوه اشتاقتلج العافيه

عاد اكره شي اذا صار عندج مناسبات وانتي حامل اتحسين وهقه وخاصه اذا كان الشخص قريب


بس ما عرف وين يبيعون ملابس حق سهرات حوامل وانشا الله البنات ما يقصرون

 

[أم عواشي]

مشكوره يا شمس و قمر عسى الله لا يحرمنا
نطري خل اكشخ فيه

 

[د.شريفة]

شلونكم بنات شخباركم
بنات عندي عرس حماتي بعد 10 ايام ان شاء الله وتوهقت على شنو البس والله ورحت طرت البلوكات وشريت خام ظل بالسيارة شهر نقع نقعه عدله خفت حتى لونها راح من الشمس احترت على الموديل ووين اخيطه
والله البنات بالمنتدى ماقصروا دلوني على خياط والله الحمدلله امس بالليل استلمت نفنوووفي بس تصدقون اول مناسبة تصادفني وانا حامل احس الشكل غلط
بقى بس الحين المكياج وين احطه شرايكم بنااااااااات دلوووني دلوووووني
وين مكياج حلووو

بنات صارلي تقريبا 3 او 4 ايام احس بثقل مو طبيعي ظهري يعورني
واحس جنه شي راح يطلع مني العوار من تحت فظيع فظيع احس عظام العانه راح تتوسع تعورني تعورني
لدرجة والله اليوم ماقدرت اقوم من الفراش عشان اروح الدوام
انا احسن منكم خذيته عرضي ماخذيته مرضيه هاهاهاهاي

 

[جاكليت]

شلونكم بنات شخباركم شسالفة النفسيه اللي رايحه فيها الظاهر كلنا جذيه ..
بليز سوولي توقيع كل ما أدش ما يضبط وياي ..

 

[donat]

قوة كروووشات
اشلونكم قطيت عنكم شوي بس انا حدي مكتئبة
حاسة اني بالسابع من الثقل مع اني توني داشة الرابع و اليوم رحت حق الدكتورة قلت لها قيسي ضغطي احس بضيقة و نفسي ماني قادرة اسحبه ثقيييييل وايد و قلبي تيييني رقعه قوية والله احس قلبي يطق ببلعومي وبعدين تروح
قالت لي تو الناس على هالكلام توج 14 اسبوع و قاست ضغطي اوكي وقالت اذا استمرت الرقعه معاج احولج على طبيب قلب يشوف لج النبض

منو صار معاها جذيه؟ انا بصراحة خفت اليوم من كلامها

 

[donat]

هاي جاكليت شخبارج؟

 

[د.شريفة]

دونات انا صار معاي جذي وطحت ولي الاسعاف وصلت السالفة
طلع الدم عندي نازل والحديد سوي تحاليل
والله ذكرتيني بنفسي يوم قلتي طقات قلبج ببلعومج