العين الكحيله
New member
بـنت الـزين
New member
انا برووح انام النوومة وصلت لي خشمي :dddds: :eh_s(1):
وانشالله باجر اقراء البارت الأخير
و اكتب احلى رد لعيوون احلى همسات حالمة
وانشالله باجر اقراء البارت الأخير
و اكتب احلى رد لعيوون احلى همسات حالمة 
بـنت الـزين
New member
دكتوره دلال
New member
- إنضم
- 8 أغسطس 2009
- المشاركات
- 1,340
- مستوى التفاعل
- 0
- النقاط
- 0
- العمر
- 34
- الإقامة
- kuwait- AlFaiha
- الموقع الالكتروني
- www.kifee.com
همســات حالـمه
New member
بـــسم الـله
البارت واحـد وعشـريـن
الأخيــــــــــــر
يوسف مسك جوى وخلاها تمشي جدامه وحاط ايده على ظهرها.....
راشـد كان مو بعقله وثايـر و مقهوور ويبي ينتقم بأي طريقه....طلع المسدس من جيبه والناس بس شافته قامت تصرخ......يوسف بس سمع الصراخ لف على طول وشاف راشد واقف ورافع بايده مسدس.....ما امداه يوسف يلتفت الا اطلق راشد النار ويات الرصاصه بصدر يـوسف......
جوى بس سمعت صوت الطلقه وقف قلبهااا تسمررت بمكانها ثواني خايفه تلتفت....واول ما انشالت الأيد اللي كانت على ظهرهااا التفتت بسرررعه الا طق جسم يوسف الأرض....
وصررخت من قمة راسـها لدرجه عروقها طلعت : يـــوووســف
انزلت على الأرض وقلبها كان يررقــع بقوووه وقامت تنتفض وتطالعه ما تدري شنو تسووى واهوه يتنفس بصعوبه وبس يطالع فيــهااا وحايشته صدمه...
رياييل راحوا حق راشد وطيحوه على الأرض وخذوا منه المسدس....وناس ركضت على يوسف....وناس دقت على الاسعاف والشرطه.... والعالم كاان حــاايس ويصررخ....
جوى كانت تبجي و حاطه ايدها على ويهه وتررجف: يووسف...يووسف
يوسف بداا يدووخ ومو مركز مع الناس اللي تكلـمه....
قامت جوى شالت راسه وحطته على ريولهاا وتناديـــه عشان يرد عليـها....
جوى وصوتها يررجف: يووسف يوسف طاالعنيي...يوسف حبيبي افتح عيوونك .. طالعني
........: يا جماااعه وخرووا خلووا مجال عشان يقدر يتنفس
ورياييل كانوا قاعدين عند يوسف يبون يحاولون يساعدونه بس مو عارفين يتصرفون...
جوى كل ما تشوفه يغمض عينه تصرخ تناديــه قبل ما يروح منها....
جوى بانفعال: يوووسف لا تغمض عيوونك.... طااالعنييي
يوسف من كثر العوار دايــخ وبالغصب قادر يفتح عيونه...
...........: تشهد....تشهد
جوى بس اسمعت واحد يقوله جذي قلبهااا قاام يرقع بقووه وصررخت: يووسف لااااااااااء.....افتح عييينك....طااالعنيييي يووسف
يوسف مو قااادر خلاااص حااس نفســه قاعد يحتضر.....قام يحاول يرفع صوبه واهوه يرجف عشان يتشهد...
جوى شهقانه من البجي و بس شافته قاعد يحاول يرفع صبعه ينننننت ومسكت ايده وقااامت تصررخ عليــه : يووووسف لا تفكر تركتني وتروح....يوووسف افتح عيووونك طااالعنييي...اناا جوى مرتك....كااني يمك شووفني يوسف
يوسف بدا يفتح عيونه وطالعهااا جان تنزل دمـعه منه....
جوى: يوسف انت ما فيك شي....راح نوديك المستشفى وراح تقوم بالسلام
جوى كلمته بكل هدوء عشان تحاول تريحه بس روحهاا كااانت تصرررخ....
..........: اي اي كلميــه
جوى: يوسف اليوم كانت ملجتناا وما بقى شي على عرسنا وشهر العسل
يوسف ظل يطالعهااا ويسمعلهاا ويبتسملهاا ابتسامة راحه....
جوى: وين ودك يكون شهر العسل؟؟
يوسف كان دايـخ حيـل وبالغصب يحاول يتكلم : فـ..فـ..فرنساا
جوى ابتسمتله : ما ودك نغير؟؟
يوسف يأشرلها بويهه بمعنى لا....
جوى كانت حاطه ايد على راسه والثانيه ماسكه ايده و ظلت تسولف معاه بكل هدوء عشان تسيطر على الوضع ولا كأن من دااخل قاعده تتقطع واهيه تشووف حبيبها وزوجها على الأرض قاعد يتعذب ويصارع الموت....
وصـلت الشـرطه والاسعاااف.....الشرطه مسكت راشد وطلعته من المطعم
المسعف: وخروا...وخروااا عنه
جوى ما كانت ودها تقووم ولا تبي تترك ايده واهوه ماسك ايدهاا بقوووه....
المسعف: اختي يلا بسررعه قومي وخري عنه
واضطرت تترك اييده....وراحت وقفت وراه وتطالعهم يسعفونه...
يوسف كان دايخ حيل وجسمه كله متخدر وعيونه تتحرك يمين ويسار تدور على جوى.....
يوسف : جـ..جوى
جوى اول ما اسمعته يناديـهاا حاولت تغير مكانها وتقرب أكثر عشان يقدر يشوفها
جوى: حبيبي كااني كااني موجوده
وحطوه على العربانه ودزووه.... جوى طلعت معاهم وظلت ماسكه ايده لين وصلوا سيارة الاسعاف.....
اركبت معاهم سيارة الاسعاف وكانت تحت صدمه ومو قادره تصدق اللي قاعد يصير بيوسف!!
جوى بعدها تنتفض وقلبهاا شوي ويطلع من مكانه وحاطه ايدها على ويهها وتطالعه وتبجي.....
يوسف: جـ...جوى
جوى وصوتها مخنووق: يوسف حبيبي انا اهني يمك
واوصلوا المستشفى ولما نزلوا العربانه ظلت ماسكه ايده وتكلمه...
جوى: يوسف حبيبي الحين راح يدخلونك غرفة العمليات
يوسف بدا يدوخ اكثر :............
جوى: يوسف انا راح انطرك بره ترجعلي هااا
جوى تكلمه واهيه ماسكه نفسهااا بقوووه ما تبي تبجي جدااامه عشان لا يضعف اكثر....
يوسف:..............
جوى: يوسف انا راح انطرك ترجع انزين؟؟
يوسف:................
جوى: يوسف رد علي...انزين؟؟؟
يوسف:.................
جوى: يوسف اسمعني....اذا انت رحت راح تاخذني معاك
يوسف كان يبي يحاول يتكلم يقولها ان احتمال ما يرجع والشي مو بأيده ويبيها تفهم ان لازم تكمل حياتها اذا راح بس مو قادر ودايخ حيــل وعطاها اخر نظره حسها انها راح تكون الأخيـره وانزلت منه دمعه....
آنا الرآحل من الدنيا تعانق روحي الآحزان
بلحظة يائس تعصفني اودع كل خلآني
انا موعود لتابوتٍ يطويني مع النسيان
انا رحلة عذآب تعيش بدمي وشريآني
الدكتور: اختي يلا تركي ايده ما يصير تدخلين غرفة العمليات
جوى تغورقت عيونها: لااا....يلا يوسف رد عليي...انا راح انطرك انززين؟؟؟
يوسف خايف يرد عليـها لان الشي مو بأيده....
الدكتور: اختي يلا ما يصير وخري
جوى قامت تصرخ وعطته نظره حاده: يوسف رد علييي
يوسف: انـ....انـزين
وتركت ايـده وراااااح..........
بــس دخـل غرفة العمليات جوى شافت دمه على ايدها وهدومها.... قامـت تبـجي من قلب وطاحت على الأرض وانهاااااارت.....
واركضوا عليها السيستراات يحاولون يشيلونها من الأرض وحاولوا يهدونها بس مو قادريـن لانها شهقانه من البجيي....وظلوا ربع ساعه يحاولون يهدون فيها لما بدت تهدى شوي....
السيستر: حبيبتي أهلك بيعرفوا انك هنا؟؟؟
جوى بعدين تذكرت ان اهلها ما يدرون عن شي ووتذكرت انها قطت جنطتها على الأرض بالمطعم....
جوى: لا
السيستر: أومي حبيبتي تعالي معايه
وودتهاا اول شي الحمام ( عزكم الله) تغسل ويهها وايدها وبعدين خذتها الرسيبشن عشان تدق على اهلها....
جوى تتكلم وصوتها يرجف: يمه
ام جيهان: هلا عمرري...ها متى يايه؟؟ وينكم؟؟
جوى العبره خانقتها : بالمستشفى
ام جيهان تصروعت: شنوو؟؟؟ ليش؟؟ شنو صار؟؟
جوى: يمه تعالي الأميري بسرعه
ام جيهان: انتي فيج شي؟؟
جوى: لا يمه ما فيني شي
ام جيهان: ويوسف؟؟
جوى: يمه بس تعالي يلا
ام جيهان: انزين انزين الحين يايه
جوى: يمه الله يعافيج ييبيلي معاج بعد اي جينز وبلوزه
ام جيهان: ليش؟؟
جوى: يمه بس
ام جيهان: خلاص انزين
جوى راحت قعدت في غرفة الانتظار وحاطه ايدها على قلبــها وميــته خوووف...وبس شافت امها ركــضت عليــها ولمتهااا وقامت تبجي....
ام جيهان كان ميته من الخرعه وخصوصا لما شافت دم على هدوم بنتها: حبيبتي فهميني شنو صااير؟؟ طيحتي قلبي ...
جوى: يمه يووسف
ام جيهان : شفييييه؟؟؟
جوى واهيه ميته بجي: راشد طقه بالمسدس والحين اهوه بغرفة العمليات
ام جيهان اشهقت : شنووو؟؟!!
جوى بعدين ارجعت قطت روحها على امها وتبجي...
ام جيهان: بس حبيبتي ميخالف ان شاء الله ما فيه الا العافيه
جوى: يمه انا خايفه
ام جيهان: لا لا راح يقوم بالسلامه ان شاء الله
جوى: يمه انا بدونه اموت
ام جيهان: لا قلبي لا تقولين جذي...ان شاء الله راح يرجعلج بس انتي ادعيله
جوى كانت بحضن امهاا وما تبيها تتركها وتصيح مثل اليهال.....
يايـمّـه شـوفـي الـدنـيـا تـزعـلـني و تـبّـكـيـنـي
تـشـتتني .. تـعــذبـني .. تـمـوّتـني و تـعــنيني
تـفـرّقـني عـن أحــبـابي وتـقـفـل دونهـم بــابـي
بـ آهـ الحـزن والحـسـرة تـصبحـني وتـمـسـيني
تـعـيّـشني بغـربة روح يجاورني سهـر وجـروح
عــلام الـدنيـا تـقـهـرني رجيـتـك يـمّـه عـلـمـيني
خذيني بحضنك الدافـي أبحكـي أمـسـي الخـافي
تــعــبـتْ أشكي من دموعي و مناديلي تواسيني
تــعــبـتْ اتـنّـهـد الفرقـا تـزيد الـضـيقـة ثم ترقـا
الين اغـص بـأنفاسي وأشوف المـوت يحـويني
احس بوحشة أوجـاعي تهـوّن وحشة أضـلاعي
تــبـلل صــدري الخــالــي تـشيّـعـني و تـغـطـيني
ام جيهان: حبيبي بس عورتي قلبي خلااص لا تبجين ان شاء الله راح يقوم بالسلامه
جوى: يمه ليش قاعد يصير جذي معانا؟؟
ام جيهان: حبيبتي ميخالف بعد شتسوين!!! اهم شي الحين ان يقوم بالسلامه
جوى: يمه اليوم كانت ملجتنا
ام جيهان: جوى امشي معاي
وراحت اول شي معاها الحمام تبدل اهدومها وبعدين راحوا قعدوا بغرفة الانتظار.....
ام جيهان: حبيبتي لازم تكونين قويه وقاعده اقولج ان شاء الله ماكو الا العافيه وان شاء الله يقوم بالسلامه ويرجعلج
جوى واهيه تبجي: يمه انتي ما شفتيييه!!!
ام جيهان: جوى ادري...اكيد شي صعب بس يلا الحين انتي ادعيله
جوى: ان شاء الله يقوم يارب
ام جيهان: ان شاء الله
جوى: يمه ترى ما عندي رقم امه
ام جيهان: ااااه...خلاص الحين ادق عليها
جوى: اي
ام جيهان: مادري والله شلون اقولها!! الله يعينها
ويات ام فيصل بعد ثلث ساعه واتعبت نفسيا لما عرفت ان ولدها بالعمليات وظلت ام جيهان تحاول تهديها وما تحملت جوى وقامت من عندهم ومشت...
راحت عند غرفة العمليات وظلت واقفه بره تنطره يطـلع....كرهت كل دقيـقه تمر وما عندها خبر عنه...وشقاعد يصير فيه!!!
مــرت ساعتيـن وبعده في غرفة العمليات من التعب قعدت على الأرض جدام باب الغرفه.....وحالتها قاعده تصير من سيء الا أسوأ....قامت تخاف أكثرر....وتحاتي زياده....وما تدري شنو راح يكون مصيره؟؟؟ وشنو مصيرهاا من عقبه؟؟!
تغمض عيونها ووتتذكرر....ضحكته....صوته...عيونه....لمسة ايده....
وترجع تبجيي....
حبيبي لا تمووت .. الموت طعنة تقتل الرغبات
تدامَـى قلبي المرهف.. من الفرقا وطعناته
:
حبيبي غابت الفرحة بـ ليل الهم والصرخات
حبيبي آآه لو تـَسمع ألم قلبي وصرخاته
:
حبيبي .. يا بداية شوف عيني واجمل الغايات
تعزيني دروب الشوق.. في بعدك وساعاته
:
تربى في عيوني طفل تلعثم بك غلا وعبرات
تنادي لك حروف الحب في عينه وعبراته
:
بكى لك مثل ما يبكي على أ ُمه لحظة الغفوات
يصحيها.. على نغمة انينه من معاناته
:
تخيل .. لو قدرت أنك تحمّـل ( همهم ) الونات
. تخيل.. قد ما تقدر .. تسوّي لحظه اسواته
:
تخيل .. لي منّـك .. دموع \ ولهفه وحسرات
ولك مني.. غلا واشواق ..دموع الحب واهاته
:
عرفت أن الفراق الموت ... على قلبي انا بالذات
لأن الموت والفرقا .... مثل ( عمر ) ونهاياته
:
تذكر لا بغيت تموت .. يا خلي بعض كلمات
أحبك من شروق الكون حتى اخر أوقاته
في المخـفر.....
الضابط: يلا تكلم....ليش كنت تبي تذبح الريال؟؟
راشد: انا ما كنت حاط في بالي راح اذبحه...اللي صار اني كنت في البيت بعدين دق علي واحد من الربع يسألني عن زوجتي!! اهوه يعرفها و ما كان يدري اني تطلقتها ومستغرب ان شايفها قاعده مع واحد في مطعم....ينيت وعصبت وكنت ابي اروح اشوفها بنفسي واشوف منو الريال اللي معاها وخذيت المسدس وطلعت
الضابط: انزين بس مو تقول انك طلقتها!!!
راشد: اي بس مادري ما تحملت فكرة انها قاعده مع وااحد خصوصا ان ما صارلنا فتره متطلقين
الضابط: انزين كمل
راشد: بس دخلت وشفتهم مع بعض وكانت ماسكه ايده يانتي حااله وهسترت وكنت بروح اطقه بس قررت اول شي اروح اييب مسدسي من السياره
الضابط: من وين لك هالمسدس؟؟
راشد: هالمسدس مرخص انا مطلعه من زمان
الضابط: انزين كمل
راشد: انا اول شي كنت على أساس بس برجع اطقه والمسدس عشان احمي نفسي فيه اذا احتجته بس اهوه استفزني,,,,استفزني وايد
الضابط: المهم هذا اللي سويته جريمه لو شنو ما كانت الأسباب والشهود عليك وايد والمسدس مالك وباسمك وعليه بصماتك
راشد: بس انا ما كنت حاط في بالي ابي اذبحه!!!
الضابط: دام انت كنت يايب المسدس من البيت ورايحلهم معناته كنت مخطط على شي
راشد: لا حضرة الضابط انا ما كان قصدي أقتله
الضابط: الريال الحين بالمستشفى ما ندري اذا بعده عايش او لا وتقول مو قصدي!!! تمشي و تذبح بخلق الله وتقول مو قصدي!!!!
راشد وبقوة عين: انا محامي واعرف شلون القانون يمشي وراح اعرف شلون اطلع نفسي
الضابط عصب: اخذوه اخذوه النظاره
ومسكوا راشد وطلعوه من مكتب الضابط.......
بعد ما مر أربع ساعات على وجود يوسف بالعمليات...أخيــرااا طلع الدكتور
جوى فززت من مكانهاا.....
جوى قلبها كان يطق بقوه: هاا دكتور طمني؟؟
الدكتور: انتي منوو؟؟
جوى: انا زوجته
جوى مو قادره تفهم شي من تعابير ويه الدكتور وقلبها قام يرقع زيااده وبدت ترتعش...
جوى مفزوعه: دكتور قولي شلون يوسف؟؟
يوسف: والله الحمدالله قدرنا واخيرا نطلع الرصاصه من صدره لان كانت داخله حيـل وكانت قريبه من قلبه بس الله ستر....حالته مستقره و الحمدالله ان شاء الله مع الوقت يتحسن
جوى خذت نفس عميـق وقلبها ارتاااااااااح.....
جوى: الحمـــد الله ......دكتور ما اقدر اشوفه؟؟
الدكتور: الحين بس قاعدين يضمدون الجرح ويطلعونه... بس حتى لو شفتيه راح يكون متخدر من البنج
جوى: مو مشكله بس المهم اشوفه
الدكتور: يلا خطاكم السوو
ومـشى الدكتور....
وظلت جوى واقفه بره تنطره يطــلع وبعد نص ساعه أخيـرا طــلعوه...
اول ما شافته كل جسمها قشعررر وراحتله وامسكت ايده وكان نايم تحت تأثير البنج وودها بس تقط روحها عليـها وتلمه بقووه وما تخليه....
وصلوا الغرفه وانقلوه الفراش ومشوا.....
اول ما مشوا جان تبوس خده وظلت قاعده معاه وبس تطالعه وبايد ماسكه ايده والثانيه تلعب بشعره....
وتحاول تكلمه يمكن يسمعها...
جوى بصوت هادي واهيه خانقتها العبره: يوسف....الحمدالله على سلامتك قلبي
شوي جان يدخلون امها وامه....
وراحت امه وحبته على راسه وقامت تبجي....
بعد نص ساعه دخلت الممرضه...
الممرضه: يلا بأى خلوا المريض يرتاح...انتهت وأت الزيارات
جوى: انا بظل اهني
الممرضه: لا ما يصحش..تعالي بكره
جوى: لا ما راح اروح
مشت الممرضه
ام جيهان : حبيبتي تعاليله باجر امبجر
جوى: يمه ما راح امشي من اهني
شوي جان يدخل الدكتور...
الدكتور: ها مو تروحون ترتاحون احسن وتييون باجر
جوى: لا دكتور انا بظل
الدكتور: ترى البنج يبيله وقت عبال ما يروح لان بنج قوي وراح يظل نايم
جوى: حتى لو دكتور... ابي أظل عنده
الدكتور: امممم انزين خلاص ممكن تظلين بس على الأقل بس انتي
ام فيصل: ما أقدر اظل انا بعد؟؟
الدكتور: لا عاد ميخالف لان أصلا مفروض كلكم تمشون
ام فيصل: خلاص انزين
جوى: خالتي ميخالف...اول ما يقوم ابلغج
ام فيصل: خلاص حبيبتي
وطلعوا ام جيهان وام فيصل من الغرفه.....
جوى ظلت قاعده على الكرسي اللي يم الفراش وماسكه ايده وبعدين حطت راسها على الفراش ومن التعب غفت....
السـاعه 6 الصبـح.....
يوسف وعـى واول ما فتح عيونه كان مو مستوعب ولا شي!! ووين اهوه!! بعدين شاف جوى على الكرسي وحاطه راسها علي ايده وماسكته...
اهوه فرح بس شافها وانكسر خاطره عليها وكانت نايمه بوضع حيل غلط ومو مريح...
يوسف قام يحاول يصحيها بكل هدوء: جوى....جوى
حست بأحد قاعد يناديها وافتحت عينها وشافته قاعد ويطالعها ويبتسم...
اول ما شافته يطالعها حست ان الرووح ارجعتلها وقلبها بدا يطق حيـل
جوى بصوت واطي: يوسف
وقطت روحها عليه ولمته....
يوسف: اااه
تذكرت ان حاشت مكان الجرح واخترعت وقامت عنه..
جوى واهيه منفعله: وي وي اسفه يوسف تعوورت؟؟؟
يوسف: لا لا عادي
جوى كانت حيل مرتبكه : يوسف متأكد؟؟ اخاف تعورت..خل انادي الممرضه
كانت تبي تروح بس مسك ايدها...واول ما مسكها حست بجسمها كله يرتعش وبنفس الوقت حست بحراره مو طبيعيه وقلبها كل ماله تزيد دقاته....
يوسف: جوى حبيبتي ما فيني شي والله
جوى: تبي اييبلك شي؟؟ تبي ماي؟؟؟
يوسف: جوى
جوى: اي صح خل اقول حق امك انك قمت....
جوى كانت متوتره حيــل وكلش مو على بعضها ومختبصه....
يوسف: جوى
جوى: اهيه قالتلي ابلغها لانها وايد قاعده تحاتيك
يوسف: جوى ممكن تسكتين شوي هههههه
جوى انحرجت وهدت وعضت على شفايفها ....
يوسف: تعالي هالصوب
وأشرلها انها تروحله الصوب الثاني من الفراش....
جان تلف وتروحله من ذاك الصوب وتوقف واهوه دنى شوي وفتح ايده بمعنى صعدي الفراش وتعالي بحضني....
تعالي محتاجك
محتاج ابكي على كتفك
ومحتاج اغفي غفوة طفل على يدك
ومحتاج
اضمك ..... والمك ...... واتنفسك ....... واشمك
محتاجك
اكثر من حاجتك لـ امك
محتاج
احكيلك ….. اشكيلك
منك إلك
محتاجك
تلميني انوثه ......... لمت بشوق الرجوله
محتاجك
تضميني امومه ...... ضمت في حناياها طفوله
محتاج بعينك تلميني دمعه خجوله
يمين الله انزل على خدك
وابوسه
واقول ابكيني
م
ح
ت
ا
ج
ك
الف مره تضميني
جـوى على طول سوت اللي يبيه لانها ما صدقــت....وانسدحت يمه وادخلت بحـضنه وحست بدفااا الكووون....حست بحرارة جسمها على جسمه...ذااابت وغاااصت فيـه وتمنت هاللحظه ما تنتهي وتظل للأبد بحضنه....
واهمه بأحضان بـعض قعدوا يسولفون ويضحكون ويتكلمون عن الأشياء اللي يبون يسوونها بعدين عقب ما يطلع من المستشفى.....
جوى: من صجك تبي شهر العسل يكون بفرنسا؟؟
يوسف: اي بفرنسا وايطاليا وأسبانيا وغيره...يبه انا باخذج وبلف فيج العالم
جوى: هههه الللله يا بختي
يوسف: اي شعبالج
جوى: يوسف
يوسف: عيون يوسف
جوى: انا اسفه
يوسف: على شنوو؟؟
جوى: انا السبب بكل اللي صار
يوسف: لا جوى لا تقولين جذي
جوى: يوسف لو انا من البدايه ما وافقت على...
يوسف ما خلاها تكمل : جوى خلاص الشي صار وكاني الحين قمت وما فيني شي
جوى: اي بس كان ممكن....
يوسف: اااااااه
جوى مااتت من الخرعه: شفييك؟؟ شفييك؟؟ عورتك؟؟
يوسف: هههههه لا بس عليج واحد
جوى: واااااي بذبحك
يوسف: لا تبين تستغلين الفرصه وانا متعور
جوى بدلع: يوووووسف
وقامت طقته على جتفه عالخفيف...
يوسف: ااااح
جوى تصروعت: ويي عورررتك؟؟؟
يوسف: ههههه عليج أثنين
جوى عصبت: بس خلاص بقوم هدني
يوسف: أفاااااا
جوى: لا بس صج نرفزتني
يوسف: تقومين وتخليني؟؟
جوى: بقوم أقول حق امك ....حرام تلاقيها قاعده تحاتي الحين
يوسف: اممم لا ما راح اخليج تقومين
جوى: يلا عاد يوسف بس خلني اقوم
يوسف: اهدج على شرط
جوى: شنوو؟؟
يوسف: بوسيني على خدي
جوى انحرررجت وقلب ويهها أحمررر: لأ ماكو
يوسف: يلا عاد الحين انا ريلج
جوى: اممممم هم لأ
يوسف: من صجج!!! يلا بوسيني
جوى: مابي
يوسف: اااااااه
جوى: هاها ههههه لا مو علي هالمره
يوسف: انزين انزين خلاص يلا كيفج روحي
وتركها عشان تقوم...
جوى: يوسف.....زعلت؟؟
يوسف لف ويهه الصوب الثاني يعني زعلان وما يرد....
جوى : تزعل مني انا؟؟
ما رد عليها جان تقرب منه جوى بكل هدوء ونعومه وتبوسه على خـده...
يوسف: ااااااخ ياااا قلبي
جوى استحت حيل ويهها قلب ألوان: هههههههه
يوسف: عفيه بعد وحده
جوى: واااي شنو طمااع!! بس يلا عاد كافي
يوسف: هههههه خلاص راح اخذها منج بعدين
جوى: يصيررر خير
وراحت دقت على امه وبلغت امها انه صحى.....
مرت الأيام ......جوى خذت اجازه وكل يوم كانت عنده وتقعد معاه لين ينام وترجعله الصبح امبجر عشان تكون موجوده قبل ما يقعد من النوم.....
كان وايد حاز بخاطره يوسف ان حتى واهوه كان يصارع الموت وبالمستشفى كل هالأيام ابوه ما تطمن عليه ولا راحله ولا حتى سأل عنه!!!
يوسف بالغرفه بروحه لان جوى راحت تيبلها نسكافيـه وراجعه....جان تدخل عليه الغرفه سحر...
يوسف تفاجئ: سحر!!!
سحر منفعله: يوسف توني دريت من امك انك بالمستشفى....سلامتك ما تشوف شر
قربت من الفراش وكان ودها تركض عليه وتلمه بس مسكت نفسها ووقفت...
يوسف: الشر ما اييج
سحر: وشلونك الحين ان شاء الله أحسن؟؟
سحر كانت من صجها حيل مخترعه عليـه....
يوسف: لا الحمدالله أحسن
سحر: اشووه الحمدالله....مالت عليه اللي سوا فيك جذي
يوسف: اي
سحر: متى راح تطلع من المستشفى؟؟
يوسف: باجر ان شاء الله
سحر: الحمدالله.....والله بغيت أموت لما قالتلي امك انك بالمستشفى
يوسف: هاه؟!
سحر: يوسف انا بعدني أحبـ....
ادخـلت جوى الغرفـه وقطعت الحديث وانصدمـت ان سـحر عنده وقاعده معاه بالغرفه وبروحهم!!!
وعصبـت حيـل ووحست بنااار داخــلها وشوي و تنفجر....
يوسف: هلا جوى
سحر متفاجئه وبينها وبين نفسها : هذي شتسوي اهني!!!
جوى دخلت من غير ما تسلم ومشت رايحه حق يوسـف وطول ما اهيه ماشيه بينها وبين سحر نظرات كأنهم شوي ويهاجمون بعض...
جوى راحت لي عنده وحطت ايدها عليه : حبيبي بغيت شي؟
يوسف: ها لا عمري مشكوره
على ويـه سحر كله تساؤلات...ومو فاهمه شنو اللي بينهم بالضبط!!!
يوسف: سحر هذي جوى...زوجتي
سحر انصعقت: شنووو؟؟
يوسف: ملجنا الأسبوع اللي طاف
سحر: بس...بس شلون؟؟!
يوسف: شنو شلون؟؟؟
سحر: لا بس اهيه مو كانت أساسا مالجه؟؟
يوسف: اي صح بس تركته
سحر انصدمت ومو قادره تستوعب ان تزوج وظلت ساكته!!! وجوى مو متحمله وجودها بالغرفه ومو حابه تاخذ وتعطي معاها
يوسف: سحر انتي بغيتي تقولين شي توه صح؟؟
سحر ابلعت ريجها: هاا؟؟! لا لا بس بقولك مبروك
يوسف: الله يبارك فيج
سحر: يلا انا بمشي عيل بس حبيت أتطمن عليك
يوسف: مشكوره ما قصرتي
سحر: مع السلامه
وقامت سـحر واهيه خانقتها العبره ومو مصدقه ان خلاص خسرت يوسف للأبد!
يوسف: سحر
لفت ويهها عشان تطالعه...
يوسف: الله يوفقج
تغورقت عيونها وابتسمتله ومشت......
ثاني يوم الصبح.....
حالة يوسف تحسنت عن اول وخذته ام فيصل من المستشفى وركب معاها السياره.....
يوسف يتكلم بالتلفون مع جوى....
يوسف: اي خلاص طلعت
جوى: اشوه الحمدالله....جان زين لو خليتني ايي اخذك
يوسف: ميخالف حبيبتي خلصي دوامج وأشوفج اوكي
جوى: الحين رايح الفندق صح؟؟
يوسف: ااااه على أساس جذي....أقول عمري شوي واكملج
جوى: اوكي حط بالك على روحك
يوسف: يا قلبي وانتي بعد
جوى: مع السلامه واذا بغيت أي أي شي قولي
يوسف: ولا يهمج...يلا مع السلامه
صك التلفون........
يوسف: يمه احنا وين رايحين؟؟؟ مو طريج الفندق هذا!!
ام فيصل: بس يوسف خلاص لي متى بتظل قاعد في فندق!!
يوسف: بس هاليومين عبال ما أأجر شقه ونأثثها انا وجوى
ام فيصل: راح ياخذ منكم أكثر من يومين
يوسف: يمه اذا بتوديني البيت.....انا ما راح ادخل
ام فيصل ما ردت عليه........
يوسف: يمه انا كنت كل هالفتره بالمستشفى ما سأل عني!!! يعني بسألج... انا مو ولده؟؟؟
ام فيصل : ميخالف يوسف
يوسف: ليش يكرهني؟؟
ام فيصل: اااه يا يمه ما يكرهك اكيد بس مادري مادري شفيه
يوسف: بس لحظه يعني معقوله للهدرجه وجودي وعدمي عنده واحد!!!
ام فيصل: يوسف طلبتك تدخل معاي البيت الحين وتكلمه
يوسف: نعم؟؟ لا يمه لا
ام فيصل: يوسف يعني لي متى جذي؟؟ انت تكابر واهو يكابر!!
يوسف: يمه اهوه طردني من البيت..شلون ارجع ادخل؟؟
ام فيصل: انت وقتها بعد كنت مينن أبوك بتصرفاتك فحاول تعذره
يوسف بعصبيه: والله يمه كل تصرفاتي كانت بسبته
ام فيصل: خلاص يوسف هذا مهما كان أبوك..عشاني روحله
يوسف: لا يمه قلتلج مابي
ام فيصل: الحمدالله الحين انكتبلك عمر يديد يلا عشاني يمه تروحله
يوسف: خلاص بعدين ان شاء الله بس مو الحين
ام فيصل: خل نروح الحين يوسف
يوسف: يمه الحين لأن تكفين حدي تعبان
أم فيصل: توعدني يعني تروحله بعدين
يوسف: يصير خير يمه ان شاء الله
وراحوا فندق ثاني غير اللي كان قاعد فيه.....
فالكليـه.....
جنى ونوره رفيجتها قاعدين يمشون من المواقف وداخلين الكلـيه....
نوره شافت لؤي بسيارته وكان مغيرهاا واهيه كانت قايلتله ان جنى مو عاجبتها سيارته وبينيها وبين نفسها قالت : ها من صجه!!!
نوره: تشيكي...تشيكي
جنى: شنوو؟؟
نوره: لؤي بال x5
جنى: وين؟؟! اااه زين والله غير سيارته
نوره: اي!!!
جنى: مسكين احسه يحاول وايد
نوره: شلون يعني.؟؟
جنى: لا يعني مادري أحسه يبي يلفت وبس
نوره: يلفت منو قصدج؟؟؟
جنى: يلفت منو يعني؟؟؟ يلفت الناس عليه
نوره: بس عاد الحين جنه خلاص بعد مو قاصره شي
جنى: انزين وانا شعلي!!!
نوره: اووف جنى بديتي تنرفزيني
جنى: شنوو؟؟
نوره: امبييه جنى خلاص بقولج مو قادره
جنى: تقوليلي شنوو؟؟
نوره: ترى كل اللي قاعد يسويه عشانج
جنى انصدمت: شنووو؟؟
نوره: عدل شكله وستايله و غير سيارته كله عشانج مع ويهج
جنى: لحظه لحظه...شنووو؟؟
نوره: جنى الريال يحبج وكل مره يسألني عنج وقاعد يحاول كثر ما يقدر ان يخليج تحبينه
جنى: الشكوو!!! من متى؟؟!
نوره: من زمان من قبل عطلة الربيع كان يسألني عنج
جنى سكتت وقاعده تحاول تستوعب كلام نوره....
نوره: جنى مسكين احسه من صجه يحبج وكافي قاعد يسوي كل هذا عشانج
جنى: اي بس انا....ما احبه
نوره: انزين عطيه فرصه يمكن تحبينه!! وترى خوش واحد ومؤدب وطيوب
جنى: بس عمره ما حسسني انه يحبني!!
نوره: امبيه جنى مادري شلون ما حسيتي!! عل طول يحوس جدامنا ويطالعج ويبتسملج
جنى سكتت.....
نوره: شبتسوين الحين؟؟
جنى: شبسوي يعني!!! نوره انا ما احبه
نوره: يعني راح تسكتين عن الموضوع؟؟
جنى: اي أحسن جذي واسوي روحي ما ادري عن شي ولا تقوليله انج قلتيلي
نوره: اي أكيد ما راح اقوله لان اهوه أساسا ما كان يبيني أقولج
جنى: اي زين احسن.....اقول امشي خل نمر من ذاك الصوب عشان أشوف عذاب العاشقينا
نوره: والله استغرب منج انتي
جنى: ليش؟؟
نوره: يعني عندج واحد ميت عليح وانتي ميته على واحد ما يدري عنج !!
جنى: واي هذا عذاب العاشقينا... أحب فيه كل شي وكافي انه على طبيبعته
نوره: والله شكله راح يتخرج وبعده ما يدري عنج
جنى: لاااه لاااه لا تقولين جذي ترى أبجي
نوره كانت حدها متنرفزه منهاا وودها لو تكفخها.....
راحوا الأثنين وقفوا بالممر قبل ما يدخلون المحاضره....
جنى: يلا ما راح تدخلين؟؟
نوره: شوي وايي..انتي دخلي
جنى: اوكي
ونطرت نوره يمشون ربع لؤي و يصير بروحه عشان تروح تكلمه...
نوره: السلام
لؤي: وعليكم السلام
نوره: أشوف غيرت سيارتك
لؤي اشتط: اي شافتها جنى؟؟؟
نوره: هههه اي شافتها
لؤي: شرايها الحين؟؟
نوره: لؤي بقولك شوي..ابيك تسويه
لؤي: شنوو؟؟
نوره: أبيك ما تعطيها ويه موليـه
لؤي: هاه؟؟
نوره : شوف ابيك مره وانا واقفه معاها تكلمني وما تعبرها كلللش
لؤي: ااااه بس.....
نوره: انت اسمع كلامي وبس عاد ما ابيك تسوي أي شي بعد عشانها
لؤي حاشه احباط: اممم يعني حتى عقب السياره ما غيرت رايها فيني؟؟
نوره: انت بس سو اللي قلتلك عليه وتشوف
لؤي: انزين....مشكوره
نوره: ولوو..يلا مع السلامه
لؤي: مع السلامه
كل واحد راح محاضرته وبعدين بس خلصوا كان واقف لؤي بره ينطرهم يطلعون من المحاضره وبس شاف جنى اررتبـك حيــل وقلبه قام يطـق وبس تمالكت أعصابه راحلهم....
لؤي: السلام عليكم
سلم على نوره وما طل بويه جنى خير شر...
لؤي: شلونج؟
نوره: تمام بخير وانت؟؟
لؤي: بخير....كان عندج توه مبادئ الاقتصاد الكلي صح؟؟
نوره: اي صح
لؤي: تبين أعطيج قشي كله؟؟ راح تستفيدين منه,,فيه كل شي
لؤي كان يتكلم بكل ثقه ومو سائل بجنى......وجنى تضايقت ليش مو معبرها وكانت تخزه بس ما طل بويهها ولا مره..
نوره: اي ياريت مشكور
لؤي: خلاص اييبلج اياهم باجر
نوره: تمام يعطيك العافيه
لؤي: الله يعاافيج.... يلا مع السلامه
نوره: مع السلامه
مشى لؤي.....
نوره طالعت جنى وكان معفوس ويهها وباين عليها متضايقه ومتنرفزه...
نوره: جنى....جنى شفيج؟؟
جنى بانفعال: شفتيه شلوون كان معطيني طاف قوي؟؟؟
نوره: اي ويعني؟؟
جنى: انتي مو تقولين انه يحبني؟؟
نوره: مادري يمكن خلاص قام ما يحبج
جنى: شنوو؟؟؟
نوره: حتى انا لاحظت كلش مو سائل فيج
جنى بحزن : اي!!
نوره: شفيج شكلج متضايقه!!!
جنى: هاااه!!! لا الشكو عادي
بعد حوالي شهر ونص....
جوى ويوسف كل يوم يطلعون مع بعض...ولقوا شقه عشان يسكنون فيها عقب ما يرجعون من شهر العسل وقاموا يأثثونها.....
يوسف كان قاعد في كافيه ودق على جوى.....
يوسف: يلا جوى ابييي اشووفج
جوى: لا ماكو أصبر باقي 5 أيام
يوسف: شوي بس تعاليلي الحين
جوى: لأ لأ
يوسف: ما اشتقتيلي ؟؟
جوى: قاعده اتقطع من الشوق بس هم لأ
يوسف: جذي تسوين فيني جوى؟؟
جوى: يلا صبرت يومين وما باقي الا 5 ايام على العرس
يوسف: مو حرام عليج تحرميني منج أسبوع!!!
جوى: ههههه امبله أحسن أحسن....واااي بس يوسف تصدق خايفه يصير شي
يوسف: واااي عليج انتي بس عاد لا تفاولين...ان شاء الله ما راح يصير شي
جوى: والله يوسف حدي خايفه
يوسف: جوى وبعدين معاج؟؟ قلتلج لا تفاولين
جوى: خلاص انزين
يوسف: تدرين دق علي اليكس ومتضايق حيل ليش صارلي فتره ما سويت لوحات وكاشت بالمعرض
جوى: وييه!! انزين وشقال؟؟
يوسف: قلتله ان بتزوج ورايح شهر العسل وجذي فسكت وقالي اوكي بس عقبها لازم اروحله ضرروي لان يبي يكلمني عن الشغل
جوى: اهااا...يعني عقب ما نرجع راح ترد تسافر؟؟
يوسف: مادري حبيبتي يصير خير بعدين...بس يلا تعاليلي الحين ولهااان عليـج
جوى: اي انا ما سويت كل هذا الا عشان أبيك توله علي
يوسف: انزين على الأقل يوميـن بس مو أسبووع
جوى: بس يوسف يلا هانت كلها 5 اياام واشووفك وتشوفني
يوسف: انززين
جوى: يلا قلبي لا تتأخر بره
يوسف: شوي و اقوم
جوى: اوكي يلا حبيبي مع السلامه
يوسف: مع السلامه
شوي جان يرن تلفون يوسف.....
يوسف : هلا يمه
ام فيصل: يوسف بسرعه تعال ابوك بالمستشفى تعبان
يوسف فز من مكانه : شنوو؟؟ شفييييه؟؟؟
ام فيصل تبجي: مادري فجأه طاح علينا
يوسف: أي مستشفى؟؟
عقب ما قالتله اي مستشفى على طوول ركض و ركب سيارته عشان يشوف ابوه....
وصل المستشفى وكان قلبـه يطق بقووه...وخايف ما يلحق عليـه... خصوصا لان صارله سنيــن مو شايفه ولا مكلمه وولا يدري عنه.....
سأل الرسيبشن عنه وراح ركض الغرفه اللي فيـهااا ابووه...واول ما وصل وقف برره وقلبـه يررقع بقوووه وخايف يدخل...ومو مصدق ان عقب كل هالسنين راح يشوف ابوه!!! يوسف مع ان ثقته بنفسه زادت وايد عن أول بس يظل يهتز جدام أبوه....
بعدين فتـح البـاب ودخـل.....
شاف ابوه على الفراش وحاطيله درب وشكله تعباان وضعيـف وكبيــر حيـل...وكانوا امه واخوه طلال بالغرفه
يوسف قام يرجف وقلبه معوره ومو هاين عليه يشوف ابوه جذي....
يوسف : يـ...يـبه
ابوه لـف ويهه وطالع يـوسف وتبققت عيونه مو مصدق انه جدامه....وصارت لحـظه صمـت
يوسف كان وده يركض على ابوه ويحضنه بس تجمد بمكانه وخايف....
بو فيصل ظل يطالع ولده بعدين ادمعت عيـنه....
وبس شاف يوسف دمعة ابووه جدامه اللي عمره مااا شافها من قبـل انهززززز وحس بقلبه يتقطع وتمنى الأرض تنشق وتبلعه ولا يشوف دمعة أبوه.....وراحلــه وباس راسه وقعد يمه ومسـك ايـده وكانت خانقته العبره حيـل بس ما يبي يجبي جدام ابوه....
يوسف: سلامتك يبه....ما تشوف شر
أم فيصل أشرت حق طلال بمعنى خل نقوم نطلع بره ونخليهم على راحتهم...
بو فيصل: يوسف سامحني
يوسف: لا يبه انا اللي اسف...سامحني
بو فيصل: انا غلطت بحقك وايد
يوسف: لا يبه خلاص انسى وانا الحين مو هامني شي من الدنيا الا صحتك وانك تقوم بالسلامه
بو فيصل: يوسف انت ما كنت تستاهل كل اللي ياك مني....ادري كنت انت بالذات وايد شديد وقاسي عليـك ومع كل هذا الحمدالله قدرت توصل حق اللي تبيه
يوسف: يبه لو مو انت جان انا ما وصلت
بو فيصل: لا يوسف انت وصلت نفسك بنفسك....وسامحني يوسف على كل شي
نزل يوسف راسه وسكـت بوفيصل شوي وبعدين رجع تكلم......
بوفيصل: تدري ليش كنت أعاملك بكل هالقسوه؟؟
يوسف رفع راسه بسرعه: ليش؟؟؟
بو فيصل: لانك تشبه ابوي...كنت أشوف أبوي فيك وصرت أعاملك من غير ما احس مثل ما كان ابوي يعاملني
يوسف انصدم....ما توقع ان يكون هذا السبب!! طول عمره كان يظن ابوه يعامله بهالطريقه عشان فـاشل ما توقع ان عشان سبب ماله ذنب فيه!!!
بو فيصل: يوسف لا تفهمني غلط...انا أحب أبوي بس كنت كل ما أشوفك اذكر أبوي وكل اللي شفته منه وانقهرر... أبيك تسامحني
وحاول بو فيصل يرفع نفسه عشان يبي يحضن ولده....
قامله يوسـف على طول واحضـنه أبوه لأول مره بحايـته.... وقام يبجي ابوه وما تحمل يوسف يسمع ابوه يبجي وقام يبجي معاه....
رجع يوسف مكانه وقاله: يبه بس تكفى لا تبجي....ما عاش اللي يبجيك...
بو فيصل: الله يخليك لي
يوسف : الله يطول بعمرك يبه
بو فيصل وولده مسحوا دموعهم وهدوا....
بو فيصل: مبروك يوسف....قالولي ملجت
يوسف: اي يبه وعرسي مفروض بعد 5 أيام بس.... راح أأجله
بو فيصل: ليش؟؟؟
يوسف: مستحيل احتفل بعرسي وانت تعبان
بو فيصل: لا يوسف ميخالف راح اكون تحسنت ان شاء الله
يوسف: لا يبه ابيك موجود هناك معاي...لو أأجله أحسن
بو فيصل: راح اكون موجود ان شاء الله
يوسف: يبه ميخالف ما يصير شي لو أجلته
بو فيصل: قولي وين راح تسوي عرسك؟؟
يوسف:امم بصالة
بو فيصل: شنو؟؟ لا لا بسويلك اياه بالرايه او الشيراتون
يوسف: لا يبه ميخالف أصلا كروت الدعوه طلعت وما راح يمدي نحجز بفندق وجذي
بوفيصل: مالك شغل انا أتصرف
يوسف: يبه ميخالف مو شـ.......
بو فيصل: قلتلك انا أتصرف
وخذا تلفونه ودق على واحد....
بو فيـصل غني حيل وعنده نفوذ ومعارف واي شي يبيه يوصله لي عنده....
حاول بو فيصل انه يدبرله قـاعه في فندق بأسرع وقت بس ما قدر وأقرب شي عقب أسبوعيـن وما كان حاب يأجل عرس ولده.....
بو فيصل: يوسف شرايك نسوي العرس في بيتنا؟
يوسف: هاااه!!
بو فيصل: اخليهم يرتبون كل شي بهالخمس أيام وراح يكون أحسن من أي قاعه بأي فندق
يوسف: يبه والله ماله داعي كل هذا
بو فيصل: بخاطري يوسف..عشاني
يوسف: خلاص يبه اللي تشوفه
بيـتهم في الخالديـه كان ولا قصر....كبيــر..كبيـر حيـــل و طلب ابوه أحسن المتخصصين بالديكور وحط ناس يتحملون تجهيزات العرس كلها عشان يطلع أروع ما يكون....
جوى ما مانعت ان يتغير مكان العرس المهم يتم في موعده وطلعت بطاقات دعوه ثانيـه وكانت راقيـه حيــل....
بالكليـه....
لؤي كلش ما قام يطالع جنى ولا يعبرها ولا يدري عنها مع ان بالصج بعده ميـت عليـها ....اهيه قامت يوم عن يوم تحترق وتموت وتعرف شاللي غيره فجأه....قامت تلاحظه أكثرر...واذا ما شافته يوم صارت من غير ما تحس تدور عليه.....لما قامت تحس انها بدت تحبـه وتبيـه وما تفكر الا فيه لدرجه نساها عذاب العاشقينا اللي كانت ميته عليه....
نوره: شفيج سرحانه؟؟
جنى: هاه؟؟ لا عادي مو سرحانه
نوره: جنى قوليلي الصج..بديتي تحبينه صح؟؟
جنى: منوو؟؟
نوره: اللي سرحانه فيه
جنى: ههههههههه
نوره: ترى على فكره بعده يحبج
جنى: حلللفي!!! شدرااج؟؟؟
نوره: ادري
جنى: لا صج شدراج؟؟
نوره: اهوه قالي
جنى: والللله؟؟؟
نوره: اي
جنى: نوره مادري شفيني بس صج احس اني قمت أحبه
نوره: اي باين عليج من غير ما تقولين
جنى: الحين شلون اقوله؟؟
نوره: هههههه ممكن تهدين شوي
جنى اسـتحت....
نوره: عندي ايميله...تبينه؟؟
جنى: من ويلج ايميله؟؟
نوره: المهم عندي اياه..تبينه او لا؟؟؟
جنى: اممم انزين عطيني اياه
في بيت ام جيهان......
جيهان وجوى قاعدين بالصاله.....
جوى: وااااي جيهان كل ما يقرب يوم العرس اخاف اكثر
جيهان: ههههه اي طبيعي
جوى: وااااي ماني مصدقه ان خلاااص باقي يومين
جيهان: الله يتمم عليكم يارب
جوى: اميـــن....اااه وللللهت علييييييه
جيهان: هههههه يلا راح يكون عندج بعدين وبتشبعين منه
جوى: لااا وين!! الا يوسف مستحيل أشبع منه ولا اهوه يشبع مني
جيهان: هههه يا عيـني عليكم
ورن تلفون جيهان وكان رقم غريب وشالته.....
جيهان: الوو؟؟
سعود: جيهان
جيهان: انت!!! وبعدين يعني كل مره داق علي من رقم غريب
سعود: جيهان بس عطيني فرصه...سمعيني
جيهان: سعود مالي خلق أسمع نفس اسطوانة كل مره
سعود: جيهان ماني قادر أعيش بدونج....مشتاقلج...أبيج
جيهان: سعود انا كنت لك والحين انت خسرتني خلاص
سعود: انتي قوليلي شسوي عشان أرضيج واسويه
جيهان: لا تتعب روحك....ما ابيك تسوي شي عشاني
سعود: جيهان انا طول عمري أحبج ولحد الحين أحبج
جيهان: ترى ماله داعي هالكلام خلاص
سعود: انتي ما تحبيني؟؟؟
جيهان: انا حبيت ذاك الانسان اللي ما جرحني....وانت جرحتني سعود
سعود: كل شي يتصلح جيهان
جيهان: انا انكسرت ورجعت قمت بروحي من غيرك...شاللي يخليني احتاجك الحين؟؟
سعود سكت مايدري شيقولها وخانقته العبره.....
جيهان: شوف حياتك سعود وخلاص انساني مثل ما نسيتك
صكـت الخــط وتغورقت عيونها....
جوى: جيهان لا تبجين....اذا بعدج تحبينه خلاص رجعيله
جيهان: جوى انا مو قاعده ابجي عليه....انا قاعده ابجي على نفسي
جوى: حبيبتي ان شاء الله اييج واحد بعدين يستاهلج ويكون احسن من سعود بمليون مره
جيهان: هههههه عادي حبيبتي مو مهم عندي
جوى: لاااااه لا يكون صرتي نفسي اول...امبله مهمممم
جيهان: هههههه الله كريم
اليــوم الموعود.....( يـوم العـرس)
جوى قامت من صباح الله خيـر وبالغصب نامت أصلاا وبس تفكر وخايفه يصير شي.....خايفه يصير شي غلط بالعرس وتحاتي كل شي....قامت انزلت تحت لقتهم مجهزين الريوق وكل شي وقاعدين على الطاوله كلهم جيهان وجنى وامها واول ما شافوها شقوا الحلج وظلوا يطالعونها....
جوى استحت : بس شفيكم تطالعوني؟؟؟
وظلوا يطالعونها وكل وحده منهم فيها بجوه.....
جوى: هههههه بس خلاص ترى بمشي
ام جيهان: لا لا قعدي تريقي
جوى: لا يمه تكفين مالي نفس كلش
ام جيهان: لا قعدي والله لا تاكلين
جوى: انزين انزين بقعد
خلصت ريوق وراحت خذتلها شاور وبعدين طلعت قفلت جناطها حق السفر اللي مزهبتهم من يوميـن....
بعدين يوها خبيرات المكياج والشعر لي عندها لان اتفقت معاهم اييونها البيت.....
سوت مكياجها وتسريحتها وخلصت كل شي وكل ما يقرب وقت العرس ترتبك أكثرر وكل ما يدق عليها يوسف ترتبك أكثر وأكثررر وطول الوقت حاطه ايدها على قلبها خايفه يصير شي....
خلـصت كل شـي ولبست نفنوفها العرس اللي كان واااااااااااو عليـها وطالع شكلها خيااااال وياخذ العقـل.....
ركبت الليموزين مع امها وخواتها ورايحين بيت بو فيصل.....
اهيه وبالطريـج حست انها راح تمووووت من كثر الخووف وقلبها يرقع ويرقع لدرجه شوي وراح تبجي...
ام جيهان: مو تبجيييين تخربين شكلج
جوى قامت تتنفس بصعوبه لانها قربت توصل: يمه مو قادره قلبي قلبي راح اموووت
ام جيهان: لا جوى حبيبتي شكلج اينن اسم الله عليج لا تبجين وتخربينه
جنى: اي عشان لا تخرعين يوسف ههههههه
اهمه قاموا يضحكوون واهيه كل ماله خوفها يزييد
وايدها قامت تررررجف وكلها أعصاااب بأعصاااب...
ام جيهان: حبيبتي سمي بالرحمن وشوي شوي
وصلوا البيـت وبعدين راحت جوى وقعدت في غرفه بالبيت عبال ما يصير الساعه 10 عشان تدخل....وقاعده ورفيجاتها معاها يحاولون يهدونها ويقولوها ان الديكور روووعه والكوشه تهبللل والمعازيم وايد والدي جي فضيع وشكلها ياخذ العقل...يعني كثر ما يقدرون قاعدين يحاولون يطمنونها....
صارت الساعه 10 بليل وقلبهااا بس يدق ويدق..... دخلت القاعه و كانت رووعـه...خياااال....أحسن من اي قاعه بأي فندق...و كله مدخلين فيها درجات البنفسجي وأبيض ....والكوشه كان لونها أبيـض....
بس دخلت العيون كلها صارت عليها وكنت متوترره وبالغصب قادره تمشي وما تبي تشوف امها عشان تخاف تبجي.....تمشي وريولها مو شايلتها ومو مصدقه متى توصل حق الكوشـه وقلبها بررقع بقووه....
يوم أقبلت أحلى عروس صابت الصاله سكون
عم الهدوء كل المكان والكل يناظر زينها
الناس من كثر الجمال ماهي مصدقه العيون
يحسبون أنها ملاك يوم رمشت في عينها
لولا خوفها على الحضور يصيبهم عشق الجنون
كآن ضحكت بشفاتها أو أشرت بيدينها
حرف الجيم بداية أسمها معطر بعطر الدخون
يزيدها روعه وحيا ونور وسط جبينها
والواو ثاني حروفها معطيها بهجه مع شجون
الواو زودها حلات وزود حلا لسنينها
والألف اخر حروفها يعطيها فن من الفنون
الألف ختام لأسمها جوى الله شزينها
الخير طير بقدومها غرد على كل الغصون
الخير كله ياملا في قلبها وفي أيدينها
الورد خدر في كفها من لمسه الكف الحنون
يذوب من لمسه أيدها وعطرها وحنينها
ومالوم أنا الصاله اذا صابها صمت وسكون
مادام جوى هي العروس بنسكت ونطالع زينها
ما صدقت على الله وصلت الكوشـه وقعدت.....
والساعه 11 دخـل يـوسف وكان باين عليه انه مرتبك بس مسيطر على الوضع وفرحان بوجود ابوه....داخل معاه....جوى كانت تطالعه بكل حياا وقلبها كان يررقع من الخوف وشكله كان اينن وعوار قلب وما شالت عينها من عليه وبس وصل باس راسها وذاابت جوى......
وكل خواتها ورفيجاتها والحضور ذابوا معاها وخقوا عليهم لان شكلهم مع بعض صج كان يزوغ القلب...
يوسف وجوى يطالعون بعض ومستحين ومتوترين شوي ويوسف ...يوسف سرحان فيها.....ذااايب.....منسحرر بجمااالهاااا وحسنها...
واهيه تطالعه ناطرته يقولها شي...يعلق....!!! بس من كثر ما اهوه منبهر فيها مو عارف شيقول!!!
يوسف: صايره كيـكه
جوى: ههههههههههههه
ودها تقوله الحين عقب كل هذا وأخيـرا نطقت ما قدرت الا على هالكلمه!!
يوسف: ولهت عليـج
جوى بنعومه : وانا أكثر
تموا سـاعه قاعديـن بعدين قاموا وزفوهم وراحوا تصوروا مع بعض وكانوا بروحهم وفي قمة الانسجام عقبها قصوا الكيـكه وتعشوا.....
الأثنين كانوا متشققين من الفرحه وصج كان أسعد يوم بحياتهم....
وراحوا الفنـدق.......
يوسف وجوى راحوا شهر العسل وعايشين أحلى أيامهم وما يتحملون يتفارقون عن بعض لو ثواني .....
اول سفره لهم كانت فرنسا ولفووا باريس كلها ومروا نفس المكان اللي جمعهم عند نهر السيـن وقاعدين بأحضان بعض ويسترجعون ذكريات أحلى لقاءاتهم مع بعض في هالمكان بس هالمره ما في بـاخرهـا وداع .....
اشتغل يوسف بشركة أبوه وعلاقته معاه كل يوم عن يوم تقوى...ولحد الحين مستمر بالرسم وكل شهر صار يروح فرنسا بس عشان يفتتح المعرض ويرجع......
جنى ولؤي عايشين قصة حـب وذايبين في بـعض وراح يتقدملها اول ما يتخرج...
جيهان عايـشه حيـاتها وعلى أمـل ان تستعيد ثقتها بالحب مره ثـانيه....
راشد انحكم عليـه بالحبـس 10 سنيـن......
تـــــــم البـــارت الأخيـــــــر
بنااااااااااااات
أكيــد الكل فـهم اهم شس كنت حابه أوصله بالروايـه
ان شنوو؟؟
شوفوا الخيـر في كـل شي سواء كان صغير او كبير
صدقوني ما يصير شي الا لسبب
يعني ممكن تكرهون الشغله الحيـن وبعدين تكتشفون بعد فتره انها صج كانت خيـره لـكم
نـكابر؟؟ :bbbiu:
نفارق؟؟ :eh_s(10):
ننجرح؟؟
وبعدين نقعد بس نتندم ونتحسر على نفسنا.... :eh_s(2):
مو جنه تضييع وقت؟؟؟
قـولوا
" قدر الله وما شاء فـعل"
ومثل ما طحتوا رجعـوا قـومـوا :eh_s(15):
تعلموا من اخطاء الماضي بس لا تفتشون عنـه
لانه ضاع ومـضى
وماله رجـعه
ومستحـيل يتغيـر
عيـشوا الحـاضر
كل يوم بيـومه
وكل لـحظه بلحـظتها
وحلو نعيـش وقته
لانه أهم من الماضي
أما
المسـتقبل
يـا كثـر مفاجئاته
ويـا حـلو غمـوضـه
والأحلـى ان نشـوفه
صــج كانـت الروايــه معاكــم
مـتعه ما بـعدها متـعه
أحبــكم
ما راح أنساكم
وأشكـركم من كل كـل قلبـي
لان صـج لو مو انتو ما كانت الروايـه
ما تتصورون شـكثر كانت رودودكم تأثر فيـني
والله اني أكـتب وغاصـتني العبـره
ان شاء الله تجمـعني فيـكم الأيـام مـره ثـانيه
*يقولون ما بعد اللقاء الا الفـراق*
وانا أحب أقول
*ما أحلـى اللقاء بـعد الفراق*
:sfg:
ان شاء الله الروايه أعجبـتكم
سـامحوني على القـصور
وعســـاكـم مـن عـواده
انــا همـسات حالمـه
و
روايـتي الثـانيـه
**أرهقـني انتـظاره **
تمــــت
اللى اللقــــاء :hjy5jewf:
:bye22: :bye22:
التعديل الأخير:
بـنت الـزين
New member
inspiring-girl
New member
Bq
New member
همســات حالـمه
New member
أهلااااااااااااا مســاء النووووور :eh_s(6):
حلوه مـوـؤسـي اعجبتني :dddds:
صججججج :eh_s(6):
واااااي حياااااتي والله فديـــــــــــــــــــتج
بعد قلبي ان شاء الله اذا الله سـهل يكون في كتاب بس شكله تو الناس عليه :ada:
بعد عمرررري صج صج مشكوووووووووره حدج ونستيني :eh_s(6):
همســات حالـمه
New member
•ː̗̀»AghLa 7υB«ː̖́:
New member
- إنضم
- 29 يونيو 2009
- المشاركات
- 156
- مستوى التفاعل
- 0
- النقاط
- 0
:ggdw::ggdw::ggdw::ggdw::ggdw::ggdw::ggdw::ggdw::ggdw::ggdw::ggdw::ggdw::ggdw:
Thaaaaaaaaanks Thaaaaaaanks 3l Riwayaaaaa il waaaaaaaaaw
:s142: 9ij Abd3taay Fehaa
a7laa riwayaa Gret'haaaaa
y36eech Alf Alf 3aaaaafyaa::eh_s(7):
Thaaaaaaaaanks Thaaaaaaanks 3l Riwayaaaaa il waaaaaaaaaw
:s142: 9ij Abd3taay Fehaa
a7laa riwayaa Gret'haaaaa
y36eech Alf Alf 3aaaaafyaa::eh_s(7):
فافا7
New member
تسلم ايدج همووس على الروايه الأكثر من رووعه
والبارت الأخير قمت ابجي عليه عشت الأحداث معاهم
وان شاءالله نشوف لج روايات اكثر واروع
وانا قبل ما كنت احب شي اسمه روايات بس من بعد روايه الزين عشقى وارهقني انتظاره صرت احبهم
واشكرج مره ثانيه وتقبلي مروري
والبارت الأخير قمت ابجي عليه عشت الأحداث معاهم
وان شاءالله نشوف لج روايات اكثر واروع
وانا قبل ما كنت احب شي اسمه روايات بس من بعد روايه الزين عشقى وارهقني انتظاره صرت احبهم
واشكرج مره ثانيه وتقبلي مروري
