موقف محرج في مطار دبي

[زلابية]

السلام عليكم
من اسبوع سافرت الى البلاد الشقيقة الامارات ورجعت امس حمدلله على سلامتي:eh_s(6):
المهم وانا بالمطار شايله ولدي وجنطتي الهاندباق وانا داشه ناحية السوق الحره ولا يصفر الباب اللي ناحية التفتيش قالي مري مره ثانيه مريت مره ثانيه ولا هم بعد يصفر تدرون شنو قالي عقبها موظف التفتيش ؟؟؟؟؟؟؟؟شي محد يتوقعه قالي فصخي بوتج وانتو بكرامه كنت لابسه بوت قالي فصخيه وبنحطه في الآله وفعلا ما رضا اني امر الا وانا حافية طبعا ويهي قط الوان ومن الاحراج قعدت اضحك بصوت عالي وسألت الموظفة قلت لها ليش فصختوني البوت اشمعنى قالت ممنوع البوت ؟؟؟؟ معقوله ؟؟؟؟؟؟؟ بس عقب هالموقف طبعا حرمت البس بوت اذا بروح الامارات ....

 

[srabeel]

أول شي حمدلله على السلامه ، ثاني شي ابيييييييييييييه وايييييييييييييي والله فشله لو أنا جان أقعد أبجي سنه بساعه مشاء الله عليج قعدتي تضحكين صج شر البليه ما يضحك والله درس حقنا بعد علشان ما نلبس بوت وااااااااااي والله فشله زين الحمد لله عدى الموقف على خير

 

[مسك]

هاهاهاهاهاهاهاااا

صارلج نفس الي صالنا بصيف في مطار لندن

تخيلي كانت وقتها سالفة الانفاجارات الي صارت وكانو مشديد التفتيش

في مطار هيثرو

وقت التفتيش قالو لنا فصخو جواتيكم وانتي بكرامه وشيلوهم

تخيلي المنظر رياييل وحريم ويهال وخدام كل من شايل جوتيه

وحــــــــافـــي خخخخخخخ اشكالنا تحفــــه

و أول ما توصلين دورج تحطين جوتيج بسله يعطونج اياها وتحطين

كل شغلج من جنطه اكسسوارات اذا كنتي لابسه وساعه

كل واحد يترس سلته و تمرين صوب التفتيش صج صج شعور يقص الويه

وانتي كاشخه من فوق وحافيه من تحت هاهاهاهاااا فشله


يعني لا تحطين في بالج كلنا بالهــــوا ســــوا ​

 

[فتون علف]

هههههههههههه
واي ضحكتوني

عاد تخيلوا واحد ريحة دلاغه خايسه ومقطن من السفر ويفصخونه جوتيه شيصير باللي وراه

يتروالي هذا الارهاب بعينه وعلمه هههههههههه

 

[om_jenan1978]

حمدالله علي السلامه . صج فشله وإللي يبط الجبد لما يصفر

 

[زلابيا]

هلااااااا بسميتي

حمدالله عالسلامه .. واول مره ادري ان البوت يخلي الجهاز يصفر !!

ولا يكون ظليتي حافيه طووول الوقت ؟؟

يالله ماعليه تجربه يديده والحمدالله انج مو بالكويت جان كلوج الناس بعيونهم

 

[.]

الحمدالله ع سلامتج..

تفصخين البوت احسن من شي 2..

 

[طماشه]

اي صااااااااااااجه

احنا مره كنا مسافرين تركيا انا واخوي واختي يوم يينا عند الجهاااز انا مريت ماكو شئ وبعدها اختي هم ماكو شئ ويوم يا دور خوي جان يصفر ولا ايقولون لها افصخ الجاكيت ويوم مر جان يصفر مره ثانيه ولا ايقولون له افصخ الساعه ويوم مر جان ايصفر ولييييييييييييييه وبعدين يعني جان ايقولون له افصخ الحزااام واخوي اموصل حدددده اشوي وبيكفخهم ولما فصخ الحزام ومر ولا عااادي ما صفر عااد اخوي من الحره جان يلتفت لهم ويأشر على البنطلون ويقولهم ماتبوني افصخه خخخخخخخخخخخخخخخخخخخخخخخخخخخخخ


جااان يبطونهاااا ضحك واعتذروا وقالوا هذه اجراءات امنيه ولا بد منهااااا

 

[lady_flana]

الحمدالله على سلامتج
تصدقين انا مريت بنفس الموقف. بس بمكار ايران واحنا راجعين الكويت كانت اختي تدز امي بالويل جيرل ومروا عادي جدام الكفتشة وعقبلهم انا جان توقفني وتاشر لي على البوت ان فصخيه.. فصخته وانا ميته من الضحك واختي من بعيد تطالع فيني مستغربة وفيها ضحكه علي...
بس انا متعودة لان بالمطارات لازم انا اتفتش زيادة عن اللي رايحة معاهم.. ما ادري شكلي مريب ولا شنو....حتى مرة بعد التحرير رايحين امريكا انا وخواتي طوفهم عادي ويت على وفتشتني زود.. مع اني كنت صغيرة....الكويتيين اللي معانا بالرحلة ضحكوا لما اشبعوا على... اشياء عجيبة

 

[supermarket]

دبي صارلهم مدة يفصخون جواتي الاوادم وانتي بكرامة

العام قالي فصخي البوت .. قلت له نعم!!! انت تدري البوت شطووولة اللي لابستة؟؟

لاني كنت لابس اللي اييج لي الركب

جان يقولي خلاص روحي عند الحريم وفصخيه طبعا لما مريت محد اهتم فيني جان اكمل طريجي ههههه

 

[الاسطورية]

عاد لو انا اصكها هوشه ومافصخه خخخخخخخخخخخخخخ

بصرخ ليما يقولون مينونه ويهدوني

 

[العـذوب]

وأحنا صار لنا الموقف من سنتين واحنا سايرين الكويت


ما كانت أختي لابسة بوت بس فصخوها اياه ..


عاد أختي ضحكت من خاطرها فديتها


شالت الجوتي بايدها وقامت تدخله ع الجهاز وايرن الجهاز ... جان اتقول لهم : الحقوا الجوتي مسكون ...!!



عادي ضحكنا يومها من الخاطر ,, بس لأن الجواتي أحيانا تكون فيهم شريحة حديد أو معدن بالكعب أو غيره عي اللي تسوي االصوت ..



بس تعالوا شوفوا فشلتي أنا ,,


ع كل المطارات وأماكن التفتيش ايرن الجهاز وايفتشوني .. ليش ايرن .؟



لأني ألله يسلمكم ويعافيكم ويبعد عنكم السوء عندي سيخ بلاتين صغير في ريلي .. مسوية حادث من زمان وهذا من بقاياه ..


شفتوا الاحراج ..!

 

[Harmony]

لووووول العذوب نفس حالتى بس اللى صج فشله اختى مره بالمانيا رن الجهاز و ايونها يسونلها اللى بالايد و كل ما قربت الجهاز عند الخلفية رن لوووووووووووووووول فشله و عقبها قالتلها خلاص مرى لأن كان يرن الزره الحديد اللى فى الجنز

 

[أميرة الورد]

هههههه حده موقف محرج

 

[جكورة]

حمدلله على سلامتج..

هم صارلنا نفس الموقف لما ردينا من ألمانيا فصخوني الجواتي وحزام زوجــي ودلاغاته وفصخوني شيلتي وشباصتي بغرفه بروحي .. قمة الفشله..:eh_s(22):

 

[وسن 11]

هههههههههه
مواقف محرج

 

[زيـنـه]

قاموا يشددون وايد .. و فصخة البوت و لا التصفر اكثر من مره و تالي يوديج الغرفه و يسوون لج تفتيش ذاتي

 

[aBoOoRa]

حبوبه مو بس البوت لا اي جوتي او نعال تكرمون اذا الي مر صفرله الانذار يسوون جذيه لان في ناس يخشون شغلات بجواتيهم مقل السجاجين او المخدرات او غيرها حتى بلندن سووها​

 

[زلابية]

طلعت مواقفكم المحرجة كلها نياهاهاهاهاهاها
مشكورين على تفاعلكم واللي قالت لي حمدلله عالسلامه عسى الله يسلمها ويوفقها وكل اللي مر ورد الله يعطيه العافية

 

[girl_in_abottle]

لا فشلة و لا يحزنون
انا كل مطارات امريكا و المانيا و غيرها افصج جوتيي تكرمون
ماينلامون العالم, من عقب الي يشوفونة
و حمد لله على السلامة