موضوع خاص للأستفسارات المتعلقة بالأسنان

[دكتورة أسنان]

مرحبا اختي 000 بغيت اسأل عن تركيب الاسنان هل ضروري يموت العصب عشان يلبس السن 000 لان انا الحين ملبسة تلبيس مؤقت من غير مايموت العصب واحس بالم خاصة في اسناني اللي تحت هالشي مؤقت والا في خلل ياليت تفيديني ؟؟؟

هلا حببيتي .. مو ضروري بس يفضل لان في بعض الاحيان اذا صارت مشكله بالعصب و الضرس متلبس يضطر الدكتور انه يشيل التلبيسه علشان يعالج العصب و هالشي يصعب الامور على الدكتور و المريض .. اذا حاسه بالم في نفس الضرس اللي عليه التلبيسه المؤقته و هالالم يستمر حتى بعد ما تشيلينها معناته في مشكله و الافضل ينشال العصب ..

 

[Angelicious™]

هلا حبيبتي ولكم باك
بخير عساج بخير ..

اذا دكتورج قال هالكلام معناته الضروس طالعه طبيعي و مو ضاغطه على الطواحين او بعيده عنهم حيل .. بس اذا خليتيهم راح تضطرين بين فتره و فتره تراجعين علشان تتاكدين انهم ماتحركو لان ضروس العقل تتحرك و ممكن تاثر على الاسنان الباجي و اكيد دكتورج فاهم هالشي و ماقال كلامه الا متاكد من الاشعه ان كل شي تمام .. في النهايه الموضوع راجع للمريض في ناس تقول ليش اقعد احاتي و كل ما ياني عوار اقول يمكن منه ؟ اشيله و ارتاح .. و ناس تقول بالعكس اخليه دام مو ماثر ليش اشيله ؟ .. فكري فيها و قرري اللي يناسبج طالما جدامج الخيارين الحمدلله ..
اما الاقرار باخلاء المسؤليه فهذا اجراء روتيني و لا تحاتين الكل يوقع عليه و لو صج العصب حيل قريب الدكتور نفسه ماراح يسويها لج

رحت للدكتور عباس الرامزي .. حيرني زياده
طقت جبدي من الاستشارات ابي واحد يقولي قرار نهائي
اول مادشيت عليه قالي شوفي اذا شلناه ماندري شيطلع وياه ( العصب يعني ) وممكن تفقدين الاحساس بس ماندري لمدة جم
واذا ماشلناه ممكن يقظ اسنانج الي يمهم وتضطرين تشيلينهم اهما الاثنين
غير انه ممكن يخرب منظرهم ويدزهم
والقراار بالنهايه راجعلي :0bee2e8d89:
بالله عليج شلون اقرر ؟؟؟
وسوري اذيتج

 

[ضحكة بريئة]

السلام عليكم
هل اللمونيرز يعطي السن بروز وسماكة ؟؟
وشنو الافضل التلبيس للسن او اللمونيرز ؟؟وليش ؟؟
ومشكوووووورة

 

[DLOOL]

بناات غزتني دكتوره ابره باللثه واااااااي خدي منتفخ

 

[Q8_QT]

يعطيج العافية حبيبتي خوش موضوع
عندي استفسار وياليت تفيديني عندي ضرس ناحية اليمين من فوق من ورى شوي ( ماعرف أساميهم بالضبط )شايلة العصب منه
ومن سنة حسيت بألم فيه ورحت الطبيب وطلع متسوس من تحت الحشوة وهوفي فجة شوي بينه وبين الضرس اللي يمة
عالجته وقالي الدكتور الأفضل اتلبسينه لأن ضعيف واحتمال ينكسر بس مالبسته وانكسر من مدة والحين آنا حاسة بعوار خفيف ومن فوق الضرس اللثة عندي منتفخة شوي فماأدري الألم منه ولا من الضرس وسؤالي حبوبة آنا ناوية أحما وخذت علاج يساعدني عالحمال بس ليلحين موعد دورتي الياية تقريبا بعد 11 يوم فهل يأثر علي إذا رحت الطبيب ومثل ماتدرين لازم بنج واحتمال يطلب مني أشعة فشتنصحيني فيه حدي خايفة وموعارفة شسوي وعندي استفسار حبوبة شنو أفضل عيادة للأسنان إذا تعرفين ياليت تفيديني وعذريني عالإطالة بس حبيت أوضحلج الصورة كاملة
بإنتظار ردج ومشكورة مقدما

 

[رجـــاوي .. }]

يعطيج العافية دكتورتنا انا ولدي عمره ثلاث سنين ويشتكي من ضرسه الي ورى يعوره واسنانه الي جدام كلها من ناحية اللثه صايره بني فاتح ومحفره شوي شالحل هل نقص فيتامين؟ ولا يلزم الامر اوديه دكتور اسنان ؟وشلون راح يعالجون طفل صغير ؟ ومشكووووووووووووووره

 

[الجوٍهرٍه]

يعطيج العافيه ع هالموضوع ،،

حبيت اسأل انا استشرت دكتور بالخاص علشان احط تقويم إبي اسكر الفتحه صغيره إللي بأسناني قدام قال ماتحتاجين تقويم احط لج حشوة تجميليه بس شيلي ضرس العقل إللي فوق طالعين بس ،، وانا بسألج دكتورة اقدر اشيل الحشوة إللي سكرت فيها الفتحه بعدين ولا مايصير اشيلها ،، وشلون احافظ عليها علشان اللون مايغير وشنو افضل حشوة تجميليه ؟؟ واكووون شاكره لج

 

[ANGELICA]

السلام عليكم

انا لمن اكل سويت احس بلمعه صوب ضرسي مادري شلون اوصلج الشعور كأني ضاغطه على حديد ساعات مو دايم وانا حاطه حشوه من زمااان سويت اشعه قالي ماكو تسوس تحت الحشوه فمادري شالسبب

شغله ثانيه انا مسكره فتحات صغيره بس كان الاسنان فجت اكثر من اول الحشوه قولي من اربع سنوات فمادري اغيرها ولا اخليها لان عندي مناسبه وودي اضبطها هل الثانيه راح تكون اقل قوم من الاولى وبعض بنات مسوين واللثه يتغير لونها ليش؟؟

وجزاج الله عنا كل خير

 

[كويتية مينونة]

السلام عليكم

ودي أستفسر عن التقويم أنا راح أحط تقويم و الدكتورة قالت تحتاجين خلع ضرسين من الفك السفلي و من الضرسين إلي حددت لي إياهم فيه عصب و نص الضرس مكسور و أنا شلعت الضرس الأول بس الضرس المكسور إنكسر قبل ما أشلعه عند الدكتورة يعني جذوره باقية فما أدري الجذور تعيق الشد بالتقويم و له لا و أقدر أسوي تقويم و الجذور باقية و إذا ما شلت الجذور و حطيت التقويم هل راح ينشدون أسناني و يلصقون في بعض و تسلمين أختي عالموضوع.​

 

[ام عبوووودي]

السلام عليكم دكتورة انا قبل خمس سنين كنت مركبة تقويم (عندي بروز بالفك العلوي بسيط)بس الدكتور ماخلع ولا ضرس لان كانت اسناني مفرقة ---بعد التقويم سنة ونص صارت اسناني اوكي بس مونتيجة اللى كنت اطمحلها ----والحين احس اسناني كل مالها وترد نفس قبل ----فودي اسوي تجميل لثة يعني عملية بس اكثر من دكتور يقول لاتسوين ماتحتاجين ----بس انا موعاجبني كلش ماحب اضحك والسبة اسناني -----بغيت اعرف هل العملية صعبة ؟ سمعت انة يسونها ليزر مادري بالكويت والا لا؟ عمري 28

 

[**توفا**]

دكتوووورة الله يعافيج أختي حامل بالشهر التاسع ...و من مدة تشتكي من التهاب ضرسها .. و الله ما تنام الليل .. تكفييييييييييييين ساعديها شتسوي ..؟؟؟؟راحت أكثر من دكتور و ما عطوها إلا مضاد يقولون مانقدر نسوي شي لأنج حامل..
بس اهي خلاص وصلت حدها من التعب .. الله يرحم والديج ساعديها ..
و للعلم راح تولد قيصرية ..

 

[جاي الضحى]

الله يعطيج العفو والعافية.​

 

[مغروره بس معذوره]

مشكوووووره دكتوره عالموضوع

انا الحمدالله اسناني مافيهم شي بس مادري ليش هالسنه صارلي 4 فجات بين ضروسي اهما شكلهم عادي بس خايفه يكبرون
اشرايج احط تقويم ؟؟ اناالحين عمري 21 ومنحرجه احط تقويم
واشلون انا مابي تقويم يبين لان الصراحه ماحب شكله ووين اروح علشان يحطولي التقويم ؟

 

[hona elkuwait]

السلام عليكم والرحمه ..

شلونج دكتورة ؟؟
الله يعطيج العافيييه ، وماتقصرين والله ، يزاج الله خير ..

دكتورة مااعليج امر انا عندي جم استفسار ..
وياريت إتجاوبين عليهم فضلااا لا أمراااا
..

1\ دكتورة انا امس لبست ضرسي " كراون " اهو من الطواحن الي فوق اقدر بعد فتتره اكل عليه علج ؟ عادي ؟
اخاف يطيح ولا شي ! ..

2\ انا عندي ضرس تحت من جهة اليمين تقريبا اول طاحن خالعينه ، وعندي الناب الي فوق من جهة اليمين بيخلعونه
لانه قاضي !! مومال تلبيس ، حتى الدكتورة تقولي انتي شكلج ماتبين تشلعينه مربيه اسنانج على العز والدلال لوول بيني وبينج شسوي اخاف ..
واساسا انا ناويه احط تقويم ان شاء الله فمادري تهقين كافي ؟؟ ماراح يشلعولي اسنان بعد ؟؟
واهي تقولي بتزرع مكانهم ! بس انا مابي ازرع مستغنيه عنهم مومحتاجه يعني احس مايحتاي ! اهي خاص بس ماتحط تقويم

3\ ممكن اعرف نجمات هووليوود بالضبط شنو مسوين بأسنانهم ؟؟
زركون ؟ ولا سيراميك ؟ ولا لومينير ؟؟ ، فيدني ؟

4\ انا لثتي شوي حمره بحكم اني اعاني من مرض الذيبه الحمرا ، وودي احط تقويم احس ماراح يرضون يحطولي يمكن بسبب لثتي ! وبنفس الوقت مابي اطول فيه واخاف من الالم .. وبيني وبينج احس اخاف اشرق ولا شي !!! ويعوقني التقويم

5\ شرايج بالتقويم الملون ؟! وجم تكلفته تقريبا بالنسبه للعادي ؟؟

6\ انا اساسا ماقدر اسكر حلجي كله ، واتنفس من حلجي اسناني تحتاج تنرد لي ورى بس اخاف من التقويم اخاف من العوار
واخاف من صعوبة الاكل ! واخاف لما سمح الله تتسوس اسناني ولا شي واتوهق .. ياليت تفيديني دكتورة

7\ وانا مافهمت قصدج عن التقويم الشفاف ، شلون ينشال حزة الاكل ؟؟ والتفريش ؟؟ تقصدين التقويم المتحرك ؟! ولا الاساسي ؟؟

والله يعطيج العافيه ، وسوري اذيتج معاي​

 

[paco de lucia]

دكتوره يعطيج العافيه

الفتحه بالنص الاسنان او الفلجه مثل ما يسمونها

شنو الحل لها


الفينيير ولا تلبيس سيراميك ولا زركون؟

ويصير اسوي وحده من هالثلاث عند حكومي ؟

ولا راح يقولون لي تجميل ما يصير ؟

 

[مس كيوت]

شلونج دكتوره
يعطيج العافيه انا حابه اسوي تبييض اسنان ليزر عند الميدان
ومو عارفه اي شي بهالخصوص يعني مثلا هل يرد لون الاسنان مره ثاتيه هل يضر التبييض واهم شي هل يسبب الام
انشالله ماثقلت عليج واتمنى اتفيديني

 

[cup-cacke]

يعطيج العافيه يا قلبي

انا ف رمضان اللي فات..طلع لي سن العقل..بس كان ف بدايته..شالوه لي ب جراحه

الحين طلع لي ضرس ثاني بس كلش مو باين فيه إلا جزء صغيييييييييييييييييييييييييييير...بين فتره وفتره احس ف عوار

شرايج انطر لين يطلع..أو اشيله..خصوصا اني مركبه تقويم

 

[دكتورة أسنان]

رحت للدكتور عباس الرامزي .. حيرني زياده
طقت جبدي من الاستشارات ابي واحد يقولي قرار نهائي
اول مادشيت عليه قالي شوفي اذا شلناه ماندري شيطلع وياه ( العصب يعني ) وممكن تفقدين الاحساس بس ماندري لمدة جم
واذا ماشلناه ممكن يقظ اسنانج الي يمهم وتضطرين تشيلينهم اهما الاثنين
غير انه ممكن يخرب منظرهم ويدزهم
والقراار بالنهايه راجعلي :0bee2e8d89:
بالله عليج شلون اقرر ؟؟؟
وسوري اذيتج

انا اذا تبين رايي حسب الكلام اللي فهمته منج ( بدون لا اشوف الاشعه ) من وجهة نظري .. خليهم طالما دكتور عباس متردد معناته اهو شايف شي لان عموما و من عشرتي معاه دكتور عباس مو تردد ابدا و اسهل شي عنده الشيل ! طالما قالج القرار لج معناته يا اما ماله داعي الشيل اوو فعلا العصب قريب ..

انا اذا تبين تسمعين كلامي خليه و من تحسين بعوار شيليه .. ترى ضرس العقل صحيح انه يضر بس مو بيوم و ليله ! يعني علشان يقظ اسنانج و يخرب منظرهم مثل ما قالولج يحتاج اشهر و سنين بعد .. فانتي خلج بالسيف سايد و مسكي العصا من النص .. خليهم لا تشيلينهم و اذا حسيتي بعوار اكيييد راح تحسين انهم يتحركون هذيج الساعه شيليهم و انا قلت هالكلام لان شكلج مهتمه باسنانج و متاكده انج اذا حسيتي بشي ماراح تهملينهم لين يخربون اسنانج ..

هذا رايي الصراحه و صلي استخاره و شوفي

حياج الله حبيبتي و طمنينا عليج

 

[دكتورة أسنان]

السلام عليكم
هل اللمونيرز يعطي السن بروز وسماكة ؟؟
وشنو الافضل التلبيس للسن او اللمونيرز ؟؟وليش ؟؟
ومشكوووووورة

وعليكم السلام ورحمة الله و بركاته ..

اي حبيبتي كل انواع التلبيسات ممكن تعطي سماكه مزيفه للسن .. بالنسبه للافضل فهو الامينيت طبعا لان لا يتم خلاله ازالة طبقات كثيره من السن ..

حياج الله

 

[دكتورة أسنان]

يعطيج العافية حبيبتي خوش موضوع
عندي استفسار وياليت تفيديني عندي ضرس ناحية اليمين من فوق من ورى شوي ( ماعرف أساميهم بالضبط )شايلة العصب منه
ومن سنة حسيت بألم فيه ورحت الطبيب وطلع متسوس من تحت الحشوة وهوفي فجة شوي بينه وبين الضرس اللي يمة
عالجته وقالي الدكتور الأفضل اتلبسينه لأن ضعيف واحتمال ينكسر بس مالبسته وانكسر من مدة والحين آنا حاسة بعوار خفيف ومن فوق الضرس اللثة عندي منتفخة شوي فماأدري الألم منه ولا من الضرس وسؤالي حبوبة آنا ناوية أحما وخذت علاج يساعدني عالحمال بس ليلحين موعد دورتي الياية تقريبا بعد 11 يوم فهل يأثر علي إذا رحت الطبيب ومثل ماتدرين لازم بنج واحتمال يطلب مني أشعة فشتنصحيني فيه حدي خايفة وموعارفة شسوي وعندي استفسار حبوبة شنو أفضل عيادة للأسنان إذا تعرفين ياليت تفيديني وعذريني عالإطالة بس حبيت أوضحلج الصورة كاملة
بإنتظار ردج ومشكورة مقدما

الله يعافيج حبيبتي ..
والله حبيبتي بما ان وضعج شوي حرج انا برايي نطري شويه لحد موعد الدوره لان طبعا نبي منج اشعه و في بنج هذا شي اكيد ..

اما بالنسبه للضرس و حسب شرحج اللثه ملتهبه بس ماني عارفه مكان الالتهاب هل فيها شي بارز مثل حبه ؟ يعني جنها دمل ؟ ولا بس انتفاخ حولين الضرس و لونه احمر ؟

انصحج علشان لا تاذيج اسنانج بالحمل تروحين تسوين تنظيف لثه اما اذا كان هذا الالتهاب مثل الدمل فاخذي المضادات الحيويه الخفيفه و اللي ماتاثر على الحامل ( اموكسيل + اوجمنتين ) فقط غيرهم لاتاخذين تحسبا ..

و احسن حل انج تفحصين هالايام قبل موعد الدوره فحص فقط للاطمئنان و قولي للطبيب حامل لاتقولين ممكن اكون حامل لان في ناس تستهون بهالموضوع و يقولج طالما ممكن معناته مو مشكله بس في نظري وضعج يحتاج عنايه و الله يسهل عليج و يرزقج الذريه الصالحه و يقر عينج فيها امين

وطمنينا عليج و ان شاء الله تبشرينا بالحمال يارب