خطوه بخطوه للتفوق ... <جريبها ماراح تخسرين >

يا هلا ومرحبا بمن حبا ودبا وركب القليلبا :eh_s(17): >> عادي شوي فاصله


شلونكم بناات ؟
شو الاخباار ؟؟


اليوم حبيت اشارك بهالموضوع
وخاصة اني من زمااااان مو داشه القسم

المهم ..


بما ان احنا في بداية الامتحانات > الله يعين
فحبيت اعطيكم خطواات حلوه ويمكن بطريقتج تحسين انها غير ممله

اول شي :

التفوق والنجاح يبنى على ثلاث اسس مهمه اهيا

-القدره ( ان التفوق يعتمد احيانا على القدرات )
- العزيمه ( لازم تكون عندج عزيمه واصرار انج تحققين هالهدف )
- المثابره ( تشدين حيلج وما تهملين دروسج )


ثاني شي :

عشان تحققين التفوق لازم تكون عندج عزيمه لهالشي عشان تقدرين تحققينه
ولازم تشدين حيلج كثر ما تقدرين ..


ثالث شي :

يلا نبلش بالخطوات .. ( بس لازم تعرفين شلون راح تيمعين الدرجات من كل صوب )



Step 1


السلوك بالصف ( درجات السلوك )

حاولي تكونين قد ما تقدرين انج تكونين هاديه ومؤدبه بالصف .. لان صج صج ترى حيل تأثر بمستوى الطالبه .. واذا الابله زفتج على شي حاولي انج تكظمين غيضج >> مقطعه الثقافه

،، اما اذا كنتي من النوع اللي مشالله حرجه بالصف و وشيطانه شوي لج خطوات ثانيه .. بعرضها لكم الحين ..

شوفي اختي الطالبه >> مطوعه الاخت
دام انج شيطانه .. جربي تعيشين دور البنت الهاديه بالصف ،، تخيلي انج قاعد تمثلين
انتبهي للدرس عدل وسمعي كل كلمه تقولها الابله واذا مافهمتي شي حاولي تسألين عنه بس بكل هدوء عشان شوي شوي تتغير نظرة الابله عنج .. لان من الصعب ان الابله تكون عارفتج انج شيطانه وما تقعدين بمكان وفجأه تبينها تغير نظرتها لج ، فشوي شوي حاولين تكسبين درجات السلوك


Step 2


الشفوي ( درجات الشفوي )

الشفوي وما ادراك ما الشفوي .. هذا ادري ان مصيبته مصيبه ووايد بنات مايحبون يشاركون وايد بالصف والسبه انهم مالهم خلق والمصيبه انهم عارفين الاجابه بس ما يرفعون ايدهم ليش ؟ .. الاجابه المعروفه : دايخه مالي خلق :ch12: .. عشان تبتعدين عن الـ " مالي خلق " حاولي تتنشطين بأي طريقه قبل الحصه عشان بالحصه تصيرين كده:eh_s(15):

شلون تيمعين درجات الشفوي ؟؟ >> السؤال المنتظر

حاولي كل ما تاخذين درس تراجعينه بالبيت .. و اذا مالج خلق مراجعه بس خططي بس على الاشياء المهمه واللي تحسين انها حفظ ،، وبالخمس دقايق قبل الحصه راجعيهم واللي تقدرين عليه حفظيه >> كله اسوي هالحركه


step 3

الدفتر ( دراجات الدفتر )

هني يبدي التفنن والترتيب ..

خلي دفرتج مرتب وحاولي تحسنين من خطج
اهوا مو شرط لازم يكون خطج حلو عشان تاخذين الفل مارك بدرجات الدفتر
لا .. بس لازم يكون خطج مرتب ومو حوسه وتكتبين عالماشي
وزيني الدفتر .. وحطي صور متعلقه بالدرس ...
مثلا الانجليزي حطي صور على كلمات الدرس اليديده
ولزقيهم بالدفتر بطرقه حلوه ومتربه
صدقيني الابله راح تتكلم عن دفترج بالصف وتمدح فيه
( وحتى المواد الثانيه مثل : العربي حطي صور على الدرس ، والاجتماعيات بعد ، واي ماده )

وخلي دفترج دايماً كامل ... ( حركات انج تسولفين بالحصه وتالي تنقلين الدرس من بنيه ثانيه ماني ها ) خخخخ


step 4

الامتحااااااااااااااان

وما ادراك ما الامتحان فيه يكرم المرء او يهاان :eh_s(1):

بعطيج طريقه وااااايد حلوه تساعدج على دراسة الامتحان و صدقيني ترى تعطي نتيجه بالاخير ( انا كل ما اسويها اييب درجه حلوه ) يعني ترى هالطريقه انا بنفسي مجربتها :eh_s(15):

شوفي قبل لا تفتحين الكتاب وقبل لا تدرسين
تقرين الفاتحه ، والمعوذات ، آية الكرسي ، دعاء " اللهم لا سهل ..... > تعرفون التكمله " ، وسمي باسم الله وبطلي الكتاب ودرسي ان جان في حفظ حفظي بس هاااا .. مو تحفظين وبس !!
حفظي على فهم يعني فهمي اللي حافظته عشان لو بالامتحان نسيتي كلمة مني ولا مناك ما تتوهقين تتصرفين من اللي فاهمته ..

وبكل صلاة تدعين ربج ان يوفقج وتييبين درجه كامله وانتي كملي من عندج >> صلي باخلاص جود تستجاب الدعوه

وادعي قبل لا تنامين مع قراءة الفاتحه والمعوذات والكرسي طبعاً
وقبل لا تستلمين ورقة الامتحان سوي نفس الشي بس زيدي عليهم هذا الدعاء

" اللهم اني استودعك ما قرأت وما تعلمت وما حفظت ان ترده لي عن حاجتي إليه "



step 5

طريقة الدراسه في البيت >> اكره هالمرحله وقصبن عنج تحبينها ههههههه >> امنا وانا مادري


شوفي .. اول ما تردين من المدرسه ..
طبعا الروتين اليومي تصلين الظهر
وبعدين انصحج تنامين على ما يحطون الغدا على الاقل تاخذين راحه حتى لو شويه عشان بعد الغدا ماكو نووووووووم > لوول
وبعد الغدا .. تبلشين اول شي تكتبين واجباتج
بس هاا اذا عندج امتحان ! انا عن نفسي انسى ان عندي واجبات وابدي بالامتحان
يفضل انج اول شي

1- تدرسين الإمتحان
2-وتالي تحلين واجباتج
3- وتحظرين
4- وترااااجعييين > Don`t forget that

امشي نفس الطريقه ونفس الترتيب من الأهم بالنسبه للأبله ليييين اللي يهمج انتي اللي اهوا المراجعه

وبعدين اذا بقى عندج وقت سوي فيه اللي تبين >> لا تنسين تسيرين علينا هني بالمنتدى



step 6 ( والأهم )

النــــــفــــــــــســـــــــــــيــــــــــــــه !!!! >> حطي تحتها مليون خط > على قولة ابلة الرياضيات

لازم تكون نفسيتج اوكي للدراسه .. وتاخذين الدراسه بالمتعه عشان تقدرين تتخطين اي شي صعب ..
واذا واجهتي شي صعب .حفزي نفسج ان هالشي ماراح يكون صعب باذن الله اذا درستي ..

وصدقيني اذا قنعتي نفسج ان هالشي سهل مو صعب راح يصير صج سهل اما اذا العكس راح يصير العكس >> حلفي خخخخ









وبس جذي نكون خلصنا كل الخطوااات

وانشالله اكون افدتكم من تجاربي ومعلوماتي ومعارفي


بس لا تنسون كل شي بفضل الله ثم الدراسه والجد والاجتهاد

" من جد وجد .. ومن زرع حصد "


اذا استفدتوا منهم عفيه ادعولي
ان الله يوفقني واطلع الاولى على مرحلتي عشان يكرموني مع الشيخ > هذا حلمي


وبس مع السلااااامه حبوبااات :eh_s(8):




لا تبخلون علي بالردود " احبكم وايد " :eh_s(22):

مشكورين حبايبي على المرور

والله يوفقكم يآآرب

تسلمون روح مغليها وFsForya على الدعوه الحلوه

روح مغليها عجبتني البدليه هههههههههه (( يكرفج )) ههههه

هلا والله بكلكم >>

نورتوا موضوعي والله

والله يوفقنا وإياكم انشالله

العفوو

تسلمووون