المساعد الشخصي الرقمي

مشاهدة النسخة كاملة : الدرس السادس: مرقة اللحم


دندره
21-04-2005, 02:12:20 PM
سلام عليكم .. شلونكم .. شخباركم . عساكم بخير وعافيه

يابنات اليوم بنطبخ مرقة لحم ومشيخيله بطريقة بسيطه وعاديه وباجي الاضافات بذكرها وانتوا وهواكم ...ومرقة اللحم يحبونها الريايل وايد ومن ياكلونها يحوشهم عقر بقر .. عاد ماوصيكم تزهبون اللبينه وذيج التميره السنعه والخضره والمعيبيجه وان حصل زبيده بعد عشان يقمس فيها التمره يكون احسن .. يابنات كثروا من الاشياء اللي تدوخ الريايل .. ترى الريال همه هل كريشه دوبه يترسها ويخمد خمدت عليه دوبه محملة صلبوخ .. وترى ما اقصد كل الريايل بالعكس في منهم شزينهم يهبلون ماعندهم مفاسق ولا ينقدون على شي مثل الغالي دندرمه ... واااي ياحلاته وياحلات خديداته المذويه .. نرد حق مويضيعنا .. نحتاج حق مريقة اللحم .. كيلوم لحم وفيه عظمه .. 3 بصلات .. 4 طماطات .. قرعه نص كيلو .. بطاتين ..4 فصوص ثوم مدقوق .. فلفل اسود .. لومي سحاري ..كمون.. دارسين.. مسمار.. هيل ..كركم..ملح... اي على الطاري .ترى البهار يكون على مشتهاتكم في ناس تحب التعنفق والتبعطز اللي تحط ورقة مادري شسمونها قار مادري غار مادري دحل واللي تحط مادري شنو.. يعني على مشتهاتكم .. وفي ناس يحطون بهار خشن بالمرقه وانا افضل الناعم طبعا .. والخضره عاد على الذوق في ناس تحط جزر وكوسه و وفاصوليا ومادري شنو بعد وغيرها وغيرها يعني اللي تبون وفي ناس تفضل تحط كزبر وشبنت وفي ناس تحط كرفس انا قلتلكم كل شي وانتوا وهواكم ... اي الحين نغسل اللحم زين ولابد يكون مقطع وبعدين نيب الجدر ونحط قفشتين دهن ونحمس البصل المقطع وبعدها نحط الطماط والبهار ونحمسهم مع بعض لما الطماط يذوب .. عاد الحين نحط الثوم ونحمس شوي وبعدين نحط اللحم ونحمس اللحم مع الحميس ونتم نقلبه فتره لما يزل مايه وبعدين نحط فوقه قوطي معجون او قوطين على حسب ذوقكم لان في ناس تحب المرقه حمره وناس تحبها فاتحه ونحمس اللحم مع المعجون وبعدين نزل ماي حار فوقهم ونخلي اللحم يفوح .. هني في طريقه ثانيه في ناس يحبون يفوحون اللحم نص فوحه عشان يزلون اي زنخه فيه او يكون انظف .. وهذا يعتمد على الغسيل كل ماغسلتي لحمتج زين ماتلاقين فيها زنخه بس العيزانه تسوي جذي ... نكمل ..وتخلينه لمدة ساعه تقريبا وبعدها نحط الملح والقرعه والبطاط وطبعا بين فتره وفتره نشوف الماي اذا قاصر نزيده والقرعه تكون مقطعه مثل البطاط وديورا بالكم الماي لايصير زايد يعني يغطي الخلطه بشوي ولما تستوي المرقه شكلها يصير خاثر جنها دهن طقطاقي وعليكم بالعافيه .. طبعا المشخول ماني قايله شلون يسونه لاني تعبت ونبح صوتي وانا اقول .. قبل لا انسى ادري فيكم ماتفهمون لان المخ مصدي اللهم ياكافي .. ترى البهرات قياسها قفشة شكر والملح قفشتين او ثلاث كبار وطبعا لازم تذوقون عشان تعرفون قياس الملح
ولا تنسون تحطون لومي سحاري حبتين او ثلاث على عدالهم لان الخبل ريلج يحب يعصر اللومي على العيش وياكل .. تدرين من يشوف الاكل يتخسبق ويصير امخدي ..يعل الخداي يركبه من ساسه لكرياسه اذا كان مناشبج ويعل ربي يريح باله اذا كان مريح بالج..وهذي طريقة سريعه ومختصره للمريقه ويالله ورونا شطارتكم .
لاتنسين تزريقن معبوج في منقب ريلج عشان يحره وطلعين حرتج فيه ومن يعصب عطيه قلاص لبن خل يدردع لما تنتفخ كريشته

نصايح امكم العوده

من تخلصين الاكل لحسي ايدج عشان تلوع جبده ادري ماتلوع بس حاولي ... عصري اللقمه عشان ينزل المرق على ايدج .. واذا طلب لبن مسكي القلاص بنفس الايد اللي تاكلين فيها وعطيه .. خليه يطفر.. ادري مايطفرون جبال الاكل مصيبه صابتهم.. انتي حاولي ويمكن تصيب

ومثل ماقلنا اي وحده منكم امها او يدتها عيوز تقول شي او اتذمر على الطبخه عطوها ايميلي وانا اعرف شلون ارد عليها وهم اللي عندها استفسار او تبي طبخه معينه هم تقول


والحين شنو شعارنا يابنات؟؟

كونوا معنا في حملتنا ضد الرجال ومحاربتهم من خلال كروشهم .. والهوايه حمايه ..
مع تحيات
امكم العوده دندره

^^بنت الكويت^^
21-04-2005, 02:37:35 PM
تسلم الايادي

دندره
22-04-2005, 01:38:42 PM
يسلم عمرج ويحفظج من عين كل حاسد وعذول

حنـــــان
16-12-2006, 12:24:19 AM
http://www.moq3.com/pics/up_06/h_29_11_06/eb110c4202.gif

جارة القمر
16-12-2006, 12:23:55 PM
دندره

تسلم الأيادي




مشكووووووووووووووووره

حبيبتي:)

كويتيه بشموخي
18-03-2009, 09:14:34 AM
تسلم ايدج والله يعطيج العافيه يا بعد جبدي
والله اني حبيتج
ذكرتيني بأيام فيلجا و قعدتي مع العيايز الله يطول بعمرج
وخفي من هالخاتمه اشوي احس اني تشيشت على ريلي
بروحي مصرقعه خلقه هههههههههههههههه
ومثل ما قلت لج ترى في مينن مثلي يطبقون الكلام بالحرف
خصوصا اخر الكلام وترى بعدين لي وصلت المخافر يقطونها براسج
لووووووووووووووووووول
ما قصرتي حبيبتي

STYLISH STYLE
19-03-2009, 12:46:13 AM
تسلم ايدج

SOoSOo
21-03-2009, 11:49:09 PM
تسلــم ايــدج

قطوووة
22-03-2009, 10:16:04 AM
ِكراااااااااااااااااااااا اا