قوه بناتي الحلوين .. شلونكم وشخباركم
اليوم بنسوي حلو عتيييج شوي .. وهو الخنفروش .. شحلاته مع الريوق وخصوصا مع حليييبه مهيييله او الشاي ..يالله نبدي
بسم الله بدينا وعلى النبي صلينا ... نحتاج حق الخنفروش .. ثلاث قلاصات طحين عيش .. 6 بيضات .. قلاص ماي ورد ..نص قلاص ماي ورد مخلوط بزعفران ..قلاص وربع شكر .. قفشه كبيره هيل ناعم ... قفشه صغيره بيكنق باودر ... وهيل خشن وسمسم حق التكشخ
اول شي نشخل الطحين وبعدين نحط عليه الشكر والهيل الناعم والبيكنق باودر ونخليه على كتر .. ونيييب باديه كبيره شوي ونكسر فيها البيض ونجرخه عدل وبعدين نحط الطحين المخلوط شوي شوي وبنفس الوقت نحط ماي الورد المخلوط مع الزعفران .. يعني شوي شوي نخلطهم مع البيض .. واذا شفتي ان الخلطه صارت صاكه شوي يعني يابسه صبي عليها ماي ورد عشان تلين وتصير رخوه .. الحين جهزي الورق هذا اللي يبيعونه بالجمعيه مال الكيك ورشي شويه من الهيل الخشن والسمسم وبعدين حطي الخلطه ولما تخلصين .. حطيهم بالفرن على نار هاديه او متوسطه وعليكم بالعافيه
ويابنياتي ترى قبل مانعرف هذا البيكنق باودر وماكنا نستخدمه لان طريقتنا غير شوي كنا نخلط الخلطه ونقليها ونحط المقله وفيها شوية دهن ونقلي الخنفرووش ونقلبه على الويه الثاني وبعدين ناكله .. واول كانا نسوي قرص كامل او اشكال مادري شلون صايره .. وهذي الطريقتين عندكم واختاروا وحده فيهم
اليوم ماكو نصايح .. وان شاءالله ريايلكم يكفخونكم عدل اذا ماعرفتوا تسونها لانها سهله ومايبيلها شي
وماكو شعارات بعد واللي مو عاجبها تنتف حاجبها
مع تحيات امكم العوده
دندوونه
