بنات اللي مغتربين في لندن و الا اسكتلندا وينكم حياااكم خل نتجمع و نسولف

السلام عليكم

شلونكم بنات

الله يعين الكل و الجميع على الغربه سواء المغتربين بالكويت والا برا الكويت و خاصه الدول الغير مسلمه والاجنبيه

الوضع صعب شوي من ناحيه الحلال و النجاسه و الطهاره و الوصاخه اللي فيهم شكل على الفاضي بس يقربون يمج تشمين ريحتهم استغفرالله ماتقدرين تتحملين شي موطبيعي

والله تشوفينهم من بعيد مرتبين و لبس واناقه و ذوق لكن وصخين بشكل ماتتوقعونه والله وحده سوريه عايشه هني في اسكتلندا قالت لي ان مايتسبحون بس يتنقعون في بانيو ويحطون رغوه وخلاص هذا يعني اتسبحوا و حتى لو كانت عليها الدوره الشهريه تكرمون عادي تتنقع بالحوض لان عادي ماعندهم شي اسمه نجاسه و طهاره و حلال وحرام
الحمدلله على نعمه الدين و الاسلام

وحتى شعورهم مايغسلونها يعني تشوفين العياييز الشعر مضبوط و تسريحه ماتتحرك تلقين تخليها اسبوع عااادي لا سباحه و لامشط
و طبعا يوفرون فلوسهم يموووتون على الفلوس و يحافظون عدل يعني يعرفون قيمه الفلس و هذا شي زين مو مثلنا نشتري و بس هههههه

المهم انا طلعت اللي بقلبي من القهر من سمعت جذي صج لاعت جبدي منهم بس صج احلى شي فيهم التعاون و الابتسامه يعني صج شي عجييييب

انا الحين في اسكتلندا و ما اشوووف كويتيات كلللش ماشاءالله كله سعوديات و عراقيات

ياريت لو في بنات نسولف معاهم شوي و ندردش

الحين زوجي يدرس و انا بالبيت و اليهال يداومون بالمدارس و الله يعينا على مدارسهم بعد

يقولون نوفر لحم حلال لان في وايد اطفال مسلمين بس والله انا مارتاح بعد يعني مادري شلون الجدور و الطباخ و المكان يكون فيه لحم حرام و نجس شلون بيعزلون اللحم الحلال مادري مومرتاحه بصراحه
عشان جذي احط حق بنتي وجبتها معاها و اعطيها فلوس و معلمتها ان هذا لحم حرام مال الكفار و هي عمرها 4سنين بس ماشاءالله تعودت خلاص لما نمر عند اللحوم بالجمعيه تقول ويييع حرام و حتى الشراب المحرم تعرف وتقول ماما وخري لاتروحين هناك مايصير حرام هذا مال الكفار

الله يحفظ عيالنا و يسهل عليهم وعليكم يااارب

وانا انشاءالله اكمل دراستي ,, الله يسهل ياااااارب

هلا والله حور
انا بعد بجيكم بسكوتلندا بعد شهرين انشاء الله زين خلنا ندردش مع بعض
انتي باي مدينه
انا بروح دندي ومعاي عيالي ولدين وبنيه واحاتي سالفة المدارس
وشلون البرد عندكم يقولون زمهريييييييييير
ناطرتج

هلا والله حياتي

والله نتشرف بتجمعنا الحلو حيااااكم الله

انا اقول ماشاءالله اغلب البنات في امريكا

وشكله ماكو احد في بريطانيا

يالله الحمدلله انشاءالله يزيد العدد

حياتي والله حياج الله انا في منطقه قلاسقو

والله الجو يوم مطر يوم برد يوم حلو

و يوم تطلعين تشوفين ثلج خفيف على الارض

و البرد اذا صار موطبيعي والله اصابع ايدج تتجمد

الله يسهل يارب هذا البرد بعد مابدا و يقلون هالسنه ابرد سنه عندهم بروحهم الاجانب يقولون هالسنه تضيق الخلق يعني مو متعودين ههههههه

حبيباتي شنو تدرسون ووالا مرافقين زوج ؟؟ شلون الجامعه لان الصراحه هني الجامعه وايد قويه و صعبه والكل يقول ان متشددين لان وايد عرب بعد ما ودنا نبدي فيها قاعدين ندور غيرها لان الحين كورس لغه

ياريت ناخذ معلومات مفيده و نحصل قبول عندكم و ننتقل

الله يسهل عليكم يارب

انا وزوجي وبناتي الكتاكيت

والمدارسه ياخذون من عمر 3 سنوات حضانه عالحكومه يعني بلاش بس تدفعين ملبغ اذا كان full time يعني لي 6 المغرب بس تكونين على الانتظار لان زحمه وايد و السفاره بالكويت مايدفعون حق مدارس عيالج الا من 4 سنوات و فوق اذا عندج اصغر على حسابج و الحضانات اغلى شي هني ارخص وحده ب250 بالشهر و الاسعار تصعط لي 400 دك بالشهر
لكن تلابتدائي من 4 سنوات ونص يصير اولى ابتداي و مجانا مدارس حكومتهم من الساعه 9 لي 3 العصر

و في مدرسه سعوديه حق يويم الويك اند يدرسونهم عربي و قران و في مدرسه ليبيه و في عراقيه

يعني الله يسهل

ريشه فنان الله يكون بعونج رايحه دراسه ومعاج ولدج شلون بتركزين بالدراسه حرام توقفين قيدج تتاخرين
شنو انتي بروحج يعني ماكو احد يقعد مع ولدج باالبيت مثل زوجج

انشاءالله نزور منطقتكم ونحصل قبول جامعه

والله احنا تونا شهرين هني مادري عن التزلج

بس عندنا جم مجمع حلوين

و المنطقه حليوه كل فيها كليات يعني مكان دراااسه اكثر وقديمه المباني فيها يعني الجامعه صار لها 500 سنه
و مدرسه بنتي الابتدائيه متاسسه سنه 1895 تخيلي واكثر المحلات يبيعون ملابس مستعمله يعني شوي سكانها على قد حالهم

بس اذا بتزورينا حياج الله

أختي حور بماإنج في غلاسكو حبيت أسأل عن الجو هالأيام لأن ولدي بيي مؤتمر بغلاسكو بأول شهر 1 ووايد ناس يقولون له برد موت أخذ ملابس ثقيله وبوت

السلام عليكم! أول شي مادري وين الأخت حور ماردت على سؤالي عن اسكتلندا .. ان شاءالله تكون بخير وعاذرتها أكيد مشغوله!! أختي orangia آنا العام رحت كنتربيري يوم واحد وهي في مقاطعة كنت وطبعا شفت منها جزء بسيط تمشيت بالشوبينغ سنتر وشفت فيها جامعة كنت.. عاد ولدي قاعد يدور جامعه حق الماستر وصديقتي تقولي أن هالجامعه زينه ووايد فيها أماراتيين وسعوديين والدراسه فيها أسهل...مادري أنتي اشرايج؟ زوجج بأي جامعه؟؟ وبعدين المنطقه شكلها وايد هاديه آنا أحب جذي بس حق الشباب مو ضيقة خلق وألا أحسن يجابلون دراستهم؟ واشلون الأجارات فيها غاليه؟؟

بعد فيه شغله أختي orangiya آنا لما رحت كنتربيري كانت المسافه أكثر من ساعه يمكن أنتو بجهه ثانيه من كنت.. آنا أسمع أنه فيها مكان أسمه غرين هيث فيه شوبينغ سنتر.. ان شاءالله بسفره ثانيه أقعد فيها أكثر وأشوفها عدل

أختي orangia آنا العام رحت كنتربيري يوم واحد وهي في مقاطعة كنت وطبعا شفت منها جزء بسيط تمشيت بالشوبينغ سنتر وشفت فيها جامعة كنت.. عاد ولدي قاعد يدور جامعه حق الماستر وصديقتي تقولي أن هالجامعه زينه ووايد فيها أماراتيين وسعوديين والدراسه فيها أسهل...مادري أنتي اشرايج؟ زوجج بأي جامعه؟؟ وبعدين المنطقه شكلها وايد هاديه آنا أحب جذي بس حق الشباب مو ضيقة خلق وألا أحسن يجابلون دراستهم؟ واشلون الأجارات فيها غاليه؟؟

أنقر للتوسيع...

هلا اختي Mr000 ... اي كانتربري يمنا ساعة الا ربع تقريباً ..احنا بينها وبين لندن ،، يمدحونها وايد بالربيع .. بس للأسف للحين ما رحنا لها ! فيها مكان نزهات بالقوارب .. مثل فيينا او مادري وين يقولون .. واجواءها ايطالية اكثر ..
بالنسبة للجامعة فيها وايد سعوديين صح .. والمنطقة عادية وبسيطة .. مو منطقة كبيرة حق سياحة وتسوق وجذي ... يعني اتصور تنفع لجو الدراسة ...

زوجي يدرس بجامعة غرينتش بس فرع من الجامعة الاصلية اللي بمنطقة غرينتش نفسها ... اسم منطقتنا تشاتام .. حدددها صغيييرة بس الحلو انها وايد قريبة من لندن .. ولندن كل شي فيها طبعاً

هالسنة زادوا الكويتيين بجامعة زوجي .. حتى يقول في كويتيات شوي .. والسعوديين قليييييييل .. عموماً العرب بمنطقتنا حددددددهم قلة ،، يعني احسن حق اللي يبي يقوي انجليزيته .. ما يصادف بويهه وايد عرب .. ولسانه انجليزي .. والجو جو دراسة اكثر من سياحة ..متى ما يبي الواحد سياحة يركب قطار وساعة الا ربع هو في لندن

الاجارات والله على حسب .. عموماً هي اغلى من المناطق اللي فوق .. لان كلما قربتي من لندن كلما زادت الاسعار .. لندن معروفة نااااااااااااااااار ... واللي حوالينها غالي شوي .. واللي فوق فوق ارخص ...

عموماً تحصلين فيها شقق او بيوت صغيرة ب200 او 250 دينار بالشهر .. او 300 او صاعد .. على حسب الموقع وعدد الغرف ..
وسكن مشترك بعد في .. ،

غرين هيث ،، جنه مر عليّ هالاسم من قبل .. بس ناسية !! ... بس ذكريني شنو فيه ؟ وشنو اسم المجمع ؟؟

هلا والله أختي orangiya آنا والله مارحت هالمنطقه Greenheath بس مره كنت أدور بقوقل معلومات عن كنت قلت كومعقوله بس فيها السوق الصغير اللي رحته فطلعلي هالأسم أعتقد أنها في suffolk! عاد أسم منطقتكم موغريب علي يمكن ماره عليه بالقطار لأنه كل ماأروح منطقه دايما أكتب بالنوته شنو المناطق اللي يمر عليها القطار بالطريج!!الله كريم ان شاءالله ولدي يتوفق في بعثه وتكون في بريطانيا علشان أقدر أييله بأي وقت!!صاجه الأجارات غاليه بلندن وحواليها ألحين ربع ولدي واحد بويلز يقول الأجار مو غالي ووايد مستانس والثاني في surry مو مستانس ويقول الأجار 300 على شقه كلش ضيجه وبدون انترنت ومادري شنو بعد يدفع عاد آنا رايحه هالمنطقه قعدت فيها 4 أيام في sutton وايد هاديه وكلشي يسكر بسرعه!!

الله يسهل عليكم ياااااااااااارب

هلا فيج حبيبتي ،، ...

ايييي تذكرت منطقة غرين هيث ، منها تطلعين تاخذين باص وتروحين لمجمع بلو ووتر ..اكبر مجمع في كينت ... تذكرت ليش ناسيتها لان مرة وحدة بس رحنا عن طريق الباص وبعدين من شرينا السيارة ما قمنا نمر بمنطقة غرين هيث .. ..

في مجمعات حلوة بمنطقة كينت .. ان شالله اكتب لج عنها * سوري شوي مشغولة الحين ^^"* ..

يمدحون ويلز بالطبيعة الجو حلو فيها زصح الاجارات ارخص .. واسكتلندا شعبها طيب وحبووب يقولون .. البرتش نفسيتهم مو ذاك الزود وشايفين نفسهم عالفاضي واصلاً مو فرندلي على قولتهم ... بس في نسبة منهم زينين ..

مانشستر روووعة ووايد شرحة .. حبيتها اكثر من لندن .. لندن ززززحمة موت و بالصيف شوي شمسها حادة ... وبالشتا زحمة كرسمس !!بس هم لها جوها الخاص .. حليوة

الله يسهل على ولدج ويكتب له الخير ان شالله ...


**

اختي سعودية واضحة ،،، اجمعين يسهل عالكل ان شالله ..

السلام أشلونكم بنات لندن!orangiya اشلونج! صج تذكرت هذا المجمع بلووتر كانوا البنات اللي مسافرين لندن بالصيف يتكلمون عنه وفتحت السايت ماله شفته! آنا أول دايما أروح لندن بالصيف بس ألحين طحت على خوش وقت الجو حلو وماكو زحمه وايد اللي هو بالأيستر.. العام بشهر 4 رحت بستر فيليج وبرايتون وكنتربيري وكان بخاطري مانشستر وبرمنجهام بس السفره قصيره 9 أيام ان شاءالله مره ثانيه! ورحت مره بلاكبول واسكتلندا! بالصيف اسكتلندا أبرد وأهدأ من لندن ومافيها عرب ولويه!اشرايكم بالغربه.. آنا ماأشوف اللي يروحون بريطانيا أو اسكتلندا متضايقين بالعكس أحس العيشه حلوه وهدوء ماكو توتر ولا حنه ومجاملات أهل ومشاكل.. صج الواحد يوله على أهله ويمكن يمل من طول المده بالغربه بس مادري جنه راحه نفسيه.. هذا رايي يمكن لأنه آنا أحب الهدوء!!

هلا اختي mr000 ... اييي والله احسن وقت الايستر فعلاً ماكو زحمة والجو حلوو ربيعي .. لا شمس حادة ولا ثلج صقيع ..

بلاك بول رحت لها .. ونااسة .. بس ززززحمة موت !! ودي اروح ألتون تاور يمدحونها بعد .. يم مانشستر ..
وودي اروح بعد اسكتلندا .. ان شالله اذا الله كتب لنا ..

وصح كلامج مو ضيقة خلق بالغربة ،، الجو حلو والطلعات وناسة وتجربة يديدة اصلاً ..
والاهم بعيد عن الروتينيات و الزوارات والرسميات بالديرة !! انا مثلج احب الهدوء

هلا خواتي اشلونكم.. ان شاءالله يوم الأثنين الياي ولدي رايح غلاسكو مؤتمر العلاج الطبيعي 10 أيام... عاد اشكثر حاول يقنعني أروح معاه بس قلت لامابي برد وايد وغلاسكو مو حلوه وايد وولدي عنده مدرسه بتخلص اجازته بعد الكريسمس ..يعني طلعت 60 عذر وألحين متحسسسسسسسسففففففففه... يالله ميخالف الله مو كاتب ان شاءالله أروح بالأيستر الياي!!انزين بسألج organiya عيالهم اشلون جذيه يطاوعون ويسمعون الحجي يعني بالمحلات لي سمعت صوت ياهل يبجي بشكل مزعج والله لازم يطلع عربي وهالصراخ كله علشان يشترون له شي يبيه يعني ماأشوف عيالهم يسوون جذيه.. والله حتى كلبهم تكرمون يسمع الكلام لي قالتله راعيته sitودشت السوبرماركت ظل واقف بره ينطرها لي تطلع ...ولاحظت حتى عيالهم البيبي يعني أقل من سنه ماشاءالله يقعد بالحديقه أو بمطعم وتوكله الأم وهو شحليله ماشاءالله ياكل بشهيه مفتوحه .. يضيق خلقي لما أشوفهم أتذكر اشلون بنت ولدي عسره بالأكل وكلشي ماتحب ويقولون وكلوهم خضره وفواكه غصب انزين شالفايده لما ترجعه كله...ماشاءالله على عيالهم تربيتهم حلوه