رد : ربيان بالبقسماط مع ماشد بوتيتوز (( صوره ))
الماشد بوتيتوز
المقادير للبطاطس ( لشخصين )
4 حبات بطاطس جيدة متوسطة الحجم
زبدة
(البهارات)
((فلفل أسود.ملح.زعتر بري.شطة سائلة, مكعب ماجي))
((الطريقة للبطاطس))
أولا نجيب فرشاة تنظيف البطاطس (أو أي فرشاة تنظيف خاصة بالخضار عندك) وطبعا كلنا نعرف البطاطس من أكثر الخضار إللي تشيل أتربه
إنقعيها في وعاء عميق مغمور بالماء الساخن وقليل من الملح والخل.. وبعد كذه نظفي البطاطس بهذا النقيع مع الفرشاة جيدا والسر في أن الخل والملح ينظفوا تمام القشرة من أي شي عالق بها.. وترى ضروري تنظيف القشرة
بعد كذه حطي في قدر على النار كل التوابل والبهارات السابق ذكرها
وماء سااااخن وقلبيها لين تفور مع بعضها تمام وبعد كذه غطسي حبات البطاطس فيها وخليها نصف ساعة تنسلق في هالنقيع لين تستوي
في هالأثناء راح نعمل الصلصة
((مقادير الصلصة))
علبة حجم صغير من قشطة الخفق
زبدة
نص فص ثوم مهروس(لاتكثروا لأننا مانبيه يطغي على طعم الصلصة)
بهارات(ملح وفلفل أسود وبابريكا)(هذي البابريكا أهم شي في الموضوع)
علبة جبن كرافت متوسطة ( تشدر وليست السائلة )
((طريقة عمل الصلصة))
نضع قليل من الزبدة في قدر صغير على النار حتى تسيح ثم أضع عليها الثوم مهروس لثواااااااااني بدون أن يحمر (إنتبهوا أنا أبغى النكهة بس)
وبعدين أضيف فوقه مقدار قشطة الخفق وأتركه يفور شويه لين يثقل قليل وبعدين أتبله بالملح والفلفل والبابريكا وإتركيها على جنب
طبعا ألحين البطاطس إستوت
جيبي البطاطس وقشريها بالشوكة وإذا كان فيه بقايا بسيطه من القشرة على البطاطس مو مشكلة خليها لأنك منظفتها وتقدري تاكليها بعد ماأستوت البطاطس..
((إنتبهي لاتكبي موية النقع ))
وألحين أقولك ليش..
أهرسي البطاطس بواسطة شوكة وحطي فوها شريحتين صغار من
الزبدة وقلبيها مع البطاطس تمام لين تمتزج نكهة الزبدة مع البطاطس..
بعد كذه نجي لسر الطعم الرهيب في البطاطس..
خذي تقريبا 4 ملاعق كبيرة من ماء سلق البطاطس المتبل بالماجي والبهارات وإعجنيها مع البطاطس بالشوكة
هالحركة راح تفيدك بكذا شي
أولا:راح تخلي البطاطس متماسكة
ثانيا:راح تتبلك البطاطس وتخليلك طعمها جنان
بعد ماعجنتيها ((مو تصير عجينه عجينه..يابنات أنا أقصد مفهوم العجن يعني المزج وليس العجن باليد فقط بالشوكة))
بعد ماعجنتيها جيبي صينية بايركس أو تيفال مو مشكلة ماكو فرق..وتكوني مولعة الفرن من فوق((يعني الشواية ))
جيبي البطاطس وإكبسيها في زبدية صغيرة مثل حقت الشوربة تمام وإقلبيها بعدين في الصينية البايركس بحيث يكون شكلها مثل القبة..بعد كذه إبدأي إضغطي عليها من المنتصف بحيث يصير شكلها
مثل البركان إنتبهوا لاتوصلوا لنهاية البركان لأ لنصفه فقط.. يعني الحفر بوسط القبة لايوصل للنهاية عشان لما نصب الصلصة فيها ونجي نشيل البركان ماتنكب الصلصة
وسوي كل مقدار البطاطس زي كذه حيصير عندك مجموعه براكين صغيرة
وبعد كذه صبي في داخل هالبراكين مقدار بسيط من الصلصة تمام ورشي الصلصة ببودرة البابريكا (قليل مو تكثروا)
شوفوا قبل ماتصبي خليط قشطة الخفق بداخل براكين البطاطس وتجهزيها لدخول الفرن..تبشري الجبنة التشيدر تمام وتخلطيها مع قشطة الخفق بالملعقة وتحطيها في براكين البطاطس..
أو في طريقة ثانيه وهي إنك تحطيها على وجه قشطة الخفق
بس بعد مانخرجها من الفرن مو قبل
وبعدين سيحي قليل زبدة وإدهني بالفرشاة أطراف البطاطس(البركان)
بعد كذه دخلي الصينية الفرن وراقبيه..بمجرد ماتحسي البطاطس إنها بدأت تحمر شوي وتنشف على طول طلعيها
والسر في حركة الفرن هو:
أولا : راح تخليلك البطاطس متماسكة أكثر مع حرارة الفرن مماهي عليه وقت صبها على البطاطس..
ثانيا: راح تخليلك الصلصة أغلظ
والسر في حركة دهن البطاطس بالزبدة هو
أولا:تطرية البطاطس عشان ماتنشف كثير.
ثانيا : تعطي لمعه للبركان
بعد كذه لما تحمر شوي شيليها بالأداة إللي تشيلون فيها المكرونة عشان تقدروا تشيلوا القطعه كلها دفعة وحده وحطوها في طبق التقديم جنب الستيك والخضار.
