فتحت خزانة البلعه باخذ علبتين كريم كراميل نفس اللي بالصورة ولا اشوف جنبهم علبة بودرة كاسترد .. جان اخذها
.
ورحت الثلاجه باخذ حليب .. ولا اشوف على باب الثلاجه كيسين نسكافه بودرة واحد بنكهة اللاتيه والثاني بالموكا فأخذتهم معاي بالمرة
.
انا ورايح اجيب القدر اللي اسوي فيه الكريم كراميل .. ولا الاقي كيس بسكوت اوريو كانت ليون ناسيته بالمطبخ .. جان اخذه معاي
.
وبالقدر عالنار حطيت ثلاث ارباع لتر حليب سائل يعني ثلاثة أكواب .. وصبيت فيهم كيسين بودرة الكريم كراميل
.
وفوقهم ملعقه كبيرة كاسترد .. وافرغت كيسين النسكافه وطحنت الاوريو نااااعم (كسرتهم بداخل كيس الاوريو بالشوبك) واضفتهم بالقدر
.
اشعلت النار وتحريك مستمر شق شق شق لغاية ماصار ثقيل شوي .. جبت القالب اللي بالصورة ودهنته بخليط سكر الكراميل (الكيس الاسود اللي بعلبة الكريم كراميل)
.
وصبيت فيه الخليط وهو ساخن .. خليته بمكانه وما حركته ابداااااا لمده نص ساعه .. بعدين حطيته على صينية ودخلته الثلاجه اربع ساعات
.
لما طلعته كان جامد .. بطرف السكين وسعت الحواف عن القالب وجبت فوطه نظيفه وعليها ماء ساخن يغلي .. انتبهو لاتحرقون ايدكم .. وصرت امسح عالقالب من كل الجهات بهدوء .. وعدت الخطوة مرتين وشوي شوي ومع كم هزة ورقصه وتحريكه .. نزل الكريم كاراميل عالصحن .. زينته بكريمه لوتس وقشر برتقال وتوته توته .. خلصت الحدوته 😊👌