قصتي مع شاي بايوجي

صباحكم صوم وعباده ورضا الرب


بنات لاحظت ان في مواضيع وايد تتعلق في شاي بايوجي
وانا لي قصه مع هالشاي وكنت قايله بكتب قصتي معاه بس انا يومي عن سنه كل مره اقول باجر ليما بردت
بس هالموضوع احس لو ماقلته وصار في بنت شي بيكون بذمتي ..

اول شي يا طويلات العمر بداية السالفه كان في اخر شهر فبراير تقريبا يوم طلبته واذكر انه يوم 24 فبراير رحنا العمره انا وامي واخوي وكنت ماخذه معاي الشاي عشان ابدا رجيم هناك حتى لو اضعف كيلو بهالاربع ايام مع المشي وقلة الاكل ( استغفر الله حتى بيت الله نستغله للرجيم )

المهم

صار جدولي هناك نقعد على صلاة الفجر اخذ حبوب الغده
نسيت اقول لكم اني فيني خمول بالغده
ونروح نصلي الفجر على ما ننطر الشروق نصلي ونرجع الفندق نتريق

طبعا ريوقي اول شي هالشاي طبعا هو بودره احطه مع شاي وحليب واشربه ويشبعني بس اكل معاه فواكه ويالله اكلهم لانه خلاص يترس البطن خصوصا ادا الكوب كبير


غدا ماكو

عشا احيانا اكو لان امي تكسر خاطري تتعشا وتتغدا بروحها لان اغلب الاوقات اخوي مو معانا فاضطر اطلب معاها مع اني ما اكون مشتهيه كلشش بس ادا دخلت اللفمه بحلجي انفتحت الشهيه ..

ومن باجر نفس الجدول

طبعا عمرتنا كانت تقريبا 3 او 4 ايام والله ماذكر بالضبط
-هالجم يوم طبعا نومي ولا شي يعني عادي انام ساعه ساعتين واقوم بس لا وما تكون النومه الي هيه
وانا كنت احسب في البدايه انه عشان مو مرتاحه من الفراش الي نايمه عليه
لانهم كانو حاطين لي السوفا الي تنفتح وتصير فراش وكانت صج مو مريحه ..

-اعصابي تلفت وكنت حيل عصبيه ومحد عاني مني الا امي ( الله يعينها علي )

-كنت كل ما اركب الاصانصير اشوف فيني شي مجكر بس اقول يمكن من قلة النوم
بس لما تفحصت شكلي لقيت ان عيوني صار فيها جحوظ البياض بيطلع من مكانه وضاق خلقي احسب ان هالشي فيني بس توني الاحظه ..

-كان عندي خفقان بالقلب بشكل ملحوظ ( سرعه الدقات طبيعيه بس الدقه تكون قويه زين ما تبين حتى من ورى الهدوم )
قلنا يمكن الدقات من قلة النوم وقلة الاكل
بس هم خفت ورحت لدكتور الفندق وفحصني وقال دقاتج طبيعيه بس قويه
اذا صار باجر وما خفت تعالي اعطيج تحويل للمستشفى

قلت ادا ما خفت باجر اذا الله احيانا انا بالكويت ان شاء الله

ورجعنا الكويت وعينا من الله خير
واول ما رجعت وزنت ولقيت نفسي نازله 2 كيلوات

يعني 3 كيلوات في 3 ايام ... منو حاصله!!!

وكنت اسولف بي بي مع وحده من البنات وكان خبري فيها تسوي رجيم
وقلت لها يا فلانه ولله يانا طحت لج على سحر يضعف من غير تعب

قالت شنو قلت شاي شربته بالعمره وبلا بلا بلا .. قلت لها السالفه كلها

قالت انا سامعه عن شاي خطر واصلني برود كاست قالت شلون صاير دزيت لها صورته
الا تدز لي البرودكاست بالصوره الا صورة الشاي نفسه الي انا اشربه
ضاق خلقي في البدايه بس قلت اشاعات معقوله محد قال لنا عنه وما سمعناه وو وو
وقلت اكيد مالي اصلي وهذا تقليد ..

تعرفون سوالفنا اذا الشي عاجبنا ما نصدق فيه ولا كلمه تنقال عنه ونصير انتحاريين عشانه
وهذا الي صار
كنت اقول لامي لو بيموتني دام بيضعفني انا راضيه
وكنت ابجي اقول والله انا ابي اضعف حتى لو بعيش سنه وحده عقب هالضعف
(والله هالكلمه للحين خايفه منها لاني كنت وايد ارددها ولاني بديت اضعف )
اعوذ بالله من الوسواس

وين وصلنا ؟ اممممممم

المهم تميت اشربه ومرتن من المراريت كنت رايحه الصيدله مادري شنو بشتري وبعد ما حاسبت تذكرت الشاي وطلعت البرودكاست ووريته الصيدلي قلت له اقرا لي المكونات بليز شوف في لها مخاطر

قراها وقال في مادة ردكتل , سيبوترامين هذي ماده ممنوعه اصلا من دخول الكويت
انا > :eh_s(2): ليش ؟!!

قال لانها تسبب ضيق في الشرايين ولانها تعمل على قطع اتصال المخ في باقي اجزاء الجسم لثواني
المهم قلت يعني في خطوره لو اخذه بس مو كل يوم ؟
قال ادا انتي مصره اخذيه يوم وترك او مرتين بالاسبوع بس اذا استمر عندك الخفقان اتركيه

طبعا نسيت اقول لكم ان الاعراض الي كانت في مكه ( قلة النوم , العصبيه , الجحوظ . خفقان القلب ) طلعت بسبة الشاي

المهم سمعت كلامه بس هم كنت حاطه الرشاقه بين عيوني فما ركزت عليه
وعقب جم يوم رحت الطبيب اخذ دوا الربو <يا كثر ادويتج:krkrkr:
وقلت فرصه اسال الدكتوره عن هالمادتين بعد ( الردكتل والسيبوترامين)
وقالت لي نفس الشي وانه ممنوعين من دخول الكويت ودول الخليج وان كل الي يدخلونهم تهريب
وقالت ان هالدوا يسبب ضيق في شرايين القلب فما تندفع كمية دماء كافيه
وان اهو يضعف صح بس طريقته في التضعيف تعتمد على فصل اتصال المخ بالمعده فما توصل المعده الشعور بالجوع للمخ .. وهالشي يحسسج انج شبعانه
وقالت مع الوقت راح يصير فيج مرض والله ماني ذاكره الزهايمر او فقدان الذاكره مادري شنو بالضبط بس مرض عقلي

جاان اتخرع !!

بس هم ابليس راكب راسي

قمت رجعت البيت وسألت دكتور عربي بس في احدى الدول الاوروبيا وقال الي اعرفه ان هالدوا ممنوع عندنا وممنوع في امريكا وكندا شلون قدرتي تحصلين عليه ؟ بس للامانه هو قال لي ان ما سمعت ان له مخاطر بس الي اعرفه انه ممنوع < اكيد ما منعوه لانه مفيد


وفجأه !! قلت شهالخبال رحت سألت كل هالناس ونسيت ولد عمي دكتور

وكلمت مرته وسألته
هو في البدايه ما عرفه بس تقول راح سوى سيرتش وسأل
وقالت لي الشي الي حسم الموضوع
قالت ان هالمكونات ممنوعه في كندا لانها تسبب






السكته القلبيه







على اغلب المرضى الي استخدموه في علاجاتهم ( ترا الردكتل كان يستخدم في علاجات ثانيه مالها شغل بالرجيم ,, اعتقد لمرضى القلب )

انا وقتها :eh_s(2)::eh_s(2)::eh_s(2): تكفين قولي شي غير جذي

واذكر قالت لي اشياء ثانيه بس انا من سمعت طاري السكته القلبيه انصمخت عن الاشياء الثانيه
وبسرعه قبل لا اصحى من الصدمه واعطي مجال حق ابليس يلعب بمخي
قمت وفتحت كل اجياس الشاي وكبيتهم بالزباله عزكم الله عشان ما يكون لي مجال استخدمهم

وعقبها اول شي سويته دزيت مسج حق التاجره الي شريت منها وقالت لي
انا " انا كاتبه كل المكونات في الموقع وما نصبت على احد " يعني بهالشي برت ذمتها
ورجعت قلت لها تراه يسبب الوفاه وادا مو وفاة امراض عقليه وقلبيه
وطبعا ردت علي تقريبا بنفس المسج

اهيا مو موضوعنا .. موضوعنا الحين شاي بايوجي


صح ان ضعفني بوقت قياسي والي يشوفني بالشكل يقول ضعفت اكثر من 3 كيلوات
بس والله اكتشفت حياتي اغلا واني ما سويت شي لاخرتي عشان انهي حياتي بهالسرعه
وحتى لو مسويه شي لاخرتي .. مجرد شربي لشي ادري في احتمالية وفاتي باي لحظه يعتبر انتحار
والانتحار = النار لا حساب ولا عقاب


والله يكافينا واياكم شر شاي بايوجي ويقينا عذاب النار



اللهم بلغت اللهم فاشهد

عميمة

اميين وياج يارب

sh-q قال:

صح انا اكثر البنات في المنتدى يستخدمونه
وانا كنت ابي اشتريه
واختي قالت لي ان كاتبين بالجريده ان ممنوع
ويسبب السرطان الله يبعدنا ويبعدكم عنا

مشكوره حبيبتي

أنقر للتوسيع...

اميين يا رب اي والله بلاويه وايد

بس والله تصدقين ماكو احسن من ماي زمزم شربيه بنية الضعف وتوكلي على الله حتى لو خففتي اكل بتضعفين ومع الوقت بتلقين نفسج تنسد عن الاكل

فلبينية عبدة قال:

جزاك الله خير ع التنبيه

انا كنت شارية علبتين خلصت وحده وباقي الثانية

لازم اشرب ماي وايد ولا احس بحرقان ف البلعوم

تركته وقلت اشرب جاي اخضر احسن

أنقر للتوسيع...

ايييي صح انا بعد كان ينشف ريجي بس كنت اقول من قلة الاكل وقلة الماي و وكثرة الحركه

والله الشاي الاخضر له مفعول بس قصتي قصه معاه ادا جيت اشربه تقولين داخله الغوص لازم اسكر خشمي واغمض واشربه دفعه وحده وتكون يمي حلاوه وعطر لوول

oum^zozo قال:

يعطيج العافيه انا جربه مره و قلبي قام يرقع ر جسمي يرجف جني مدمنه عقبهه توبه باجي القوطي بالزباله

أنقر للتوسيع...

احسن شي سويتيه

ام علاوي ومريوم قال:

مشكوره ع التنبيه
وان شاء الله ينزل وزنج
موفقه

أنقر للتوسيع...

امين يارب وياااج ومن يدور الضعف ان شاء الله

black doll قال:

يزاج الله خير ,,

إن شاء الله تنزلين بصحة وعافية يا رب

أنقر للتوسيع...

اجمعين يارب

اميين ومن قال يارب

زهور قال:

واي هالشاي هذا شربته مره ويالله ينبلع وووووع


حتى السيبوترم جربته سببلي نفسيه واعصاب

أنقر للتوسيع...

ترا اهو السيبورتيم جزء من مكونات شاي بايوجي واغلب منتجات الرجيم

مكاييل قال:

جعله فميزان حسناتك يارب

أنقر للتوسيع...

جزاك الله خير بعد عمري

miss_7ezan قال:

انا جربته علبه وحده بس

ولاحظت شي اذ سويتي حليب ابيض وحطيتي الشاي هذا ينقلب اللون وردي

ما ادري ليش والله اني خفت وما قمت اشربه


وجزاااك الله خير ياعمررري

أنقر للتوسيع...

مادري ما لاحظت لاني احطه مع شاي وحليب عشان الطعم وكان طعمه حااالي حتى يخليني اخفف شكر لانه يسبب حارج من كثر حلاوته مع الحليب

Ather ُ قال:

كنت اشربه
اشوا اني لحقت عمري
والله يجزااها خير خويتي قالت لي انه يجيب امرااض وقطعته


والله اسد حلقي واضعف ابرك لي من هالاشياء اللي مانعرف شنو فيها

يعطيج العافيه
وجزاج الله خير

أنقر للتوسيع...

اييي والله ابرك مرتين بس احنا دلع ندور الشي السهل
نبي ناكل وننام ونضعف :eh_s(10):

مسك وطيب قال:

جزاج الله خير على التنبيه ياليت الكل يقراااه

أنقر للتوسيع...

اجمعين يا رب .. يالييت بس لا حياة لمن تنادي

شتاء الحب قال:

يزاج الله خير
الله يخلي الزعتر و الجاي الاخضر و الزنجبيل و القرفه و الكمون خخخخخخخ

في احسن منها .. لا لا ..

الله يحفظنا

أنقر للتوسيع...

لالا هههههههههههههههه