هلا حبيبتي شوفي اول شي تنظفين السمج عدل واتوقع السمج يايبينه نظيف بس عليج تغسلينه
واذا مو منظف انتي نظفيه وسفطيه عدل
عقب حطيله ملح وخليه يستملح عدل
خلي نص ساعه
على ما تجهزين باجي الاغراض الي اهي :
عيش حسب الكمية
طمام
فلفل بارد
كزبرة وشبنت "مفرومة"
بصل
فصين ثوم
بهارات حسب الرغبة وهذي البهارات الي دايما تستخدم
"كركم , بهارات مشكلة , فلفل اسود , لومي اسود مطحون , بهارات السمج "
عقب غسلي السمج عدل من الملح
وزهبي الحشو بالجدر الي بتسوين فيه العيش
الحشو عبارة عن
بصل اول شي طبخي على نار هادية وبدون زيت لما يتغير لونه يصير ذهبي
وحطي معاه ماي شوي شوي
وتمي قلبي فيه ليما يذبل ويتغير لونه يصير ذهبي
بعدها حطي البهارات وحطي الكزبرة والشبنت
وشوي زيت وتمي قلبيه
جذي يكون خلص الحشو
شيلي الحشو من الجدر بس خلي كمية صغيرة منه
وحطي فوقه الثوم والطماط والفلفل البارد وحمسيهم مع بعض
وبعدها ييبي السمج وحطي فوق الحمسة وقلبيه معا شوي شوي عشان ما يتفتت
خليه لمده 10 دقايق بس لا تقلبينه حيل عشان ما يتفتت مثل ما قتلج
بعدها شيلي السمج
وحطي ماي تقريبا نص الجدر خلي يطبخ مع الحمسة وحطي ملح للماي
بعدها لما يغلي ردي السمج مرة ثانية لمده 10 دقايق عشان يستوي
شيلي السمج من الماي شوي شوي عشان ما يتفتت
الحين شخلي ماي السمج عن الطماط والبصل والفلفل عشان ما يطلع لكم بالعيش
شخلتي الماي بعدها رديه بالجدر خلي يغلي وحطي فوقه العيش
تأكدي من الملح اذا يحتاج او لا
شوفي اذا العيش يحتاج ماي
يعني تقريبا لازم يصير الماي فوق العيش بشوي
عشان ما يطلع لا يابس ولا لين
وتاكدي من هالشغله عشان يظبط معاج حبيبتي
بعدها خلي لما ينشف الماي عن العيش
قصري على الجولة وحطي حديده تحت الجدر
حطي شوي زيت فوق العيش عشان ما يصير ناشف
وردي الحشو الي سويتيه بالبداية وعزلتيه فوق العيش
السمج حطيله شوي هيل ودارسين وا1ا تحبين تحطينه بالفرن او تقلينه او انج تخلينه مثل ما اهو
وبعدها هم تحطينه فوق العيش وتخلين العيش يتسكرمع السمج على راحته..
وعليج بالعافية حبيبتي
انشالله تكون عجبتج طريقتي
واي سؤال انا حاظرة انتي تامرين
