سهلة
يبيلج فيزا او ماستركارد في وايد منهم بالبنوك اكثر شي مشهور اهي بطاقة الخير من التمويل بس ما تسوا ، عمولة فرق تحويل العملة كبييييرة !! حجزت رحلتين طيران داخلي بامريكا من نيوروك لأورلاندو ومن اورلاندو للاس فيغاس ، سعر التذكرتين 199 دينار ، اهم سحبو 215 دينار من بطاقتي !! 16 دينار فرق تحويل عملة لمبلغ 199 دينار كبيير ! يعني عمولة 80 دينار لكل ألف دينار !
اخذي ماستركارد x-change من بنك برقان ، عملتها بالدولار فماكو عمولة فرق تحويل عملة
ومو لازم يكون عندج حساب ببنك برقان ، وتستلمينها فوري بفرع المطار عموولتهم حيييل ارخص من التمويل ، 15 دينار وكسور لكل ألف ، فرق كبير !!
بالنسبة لحجز النت ، مادري ليش وايد ناس يخافون من الحجز الفنادق او التذاكر؟ وكله يوسون ما اعرف ، او يمكن اروح هناك واتوهق وما يقبلون التذكرة !! شدعوووووووة
مواقع الحجز الكبيرة ترا سستمها مرتبط بكل شركات الطيران والفنادق ، يعني اول ما تدفعون بيحجز فوري التذكرة او الفندق !
مواقع التذاكر طبعا المواقع الرسمية لشركات الطيران + المواقع الامريكية الكبيرة مثل اكسبيديا (expedia) / اوربتز (orbitz) بس ما يدعم الطيران من الدول العربية ، استخدمه حق الطيران الداخلي بامريكا / كاياك (kayak) / برايس لاين (princeline) هالمواقع الثلاثة شاملة بمعنى تحجزون عن طريقها تذاكر طيران او فنادق او تاجير سيارات
وفي مواقع متخصصة للفنادق مثل بوكنق (booking) / اقودا (agoda) / هوتلز (hotels)
موقع سكاي سكانر (skyscanner) احسن موقع لمقارنة اسعار تذاكر الطيران ، بس تحطون مكان الروحة والردة والتواريخ وعدد الاشخاص ويقارن لكم كل اسعار شركات الطيران
موقع هوتلز كومبايند (hotelscombined) يقارن لكم اسعار الفنادق بالمواقع ويعطيكم الارخص
انا موقعي المفضل اكسبيديا عشان نظام المكافآت عنده عجيييب ، استفدت منه واجد اخذت ليلة اضافية مجانية بفندق وأجلو تذكرة الطيران يوم زيادة ببلاش ، خصم 30% على تأجير سيارة 12 يوم باورلاندو ، مقعد درجة اعمال بسعر الدرجة السياحية بشركتين جت بلو (jetblue) وساوث ويست (southwest) برحلات الطيران الداخلي بأمريكا
واوربتز استخدمه حق تاجير السيارات وحجز تذاكر القطارات باوروبا ونظام المكافآت عنده حلو بفلوس ، قبل ما تحجزين يقولج بالضبط جم مكافأتج بالدولار وحتا تقدرين تستخدمينها بنفس الحجز اذا تبين
مرة كنا رايحين مطعم قصر فخر الدين بالديرة عند قصر العدل بمجمع الخطوط الجوية الكويتية
معروف المجمع كله سفريات ، طرت على بالي فكرة اقارن سعر اكسبيديا باسعارهم
باكسبيديا سعر تذكرة كويت لندن كويت مع اقامة بفندق ثيسل ماربل ارج (thistle marble arch) لمدة 13 ليلة بشهر 4 كان بالضبط 6500 دولار
بالسفريات اسعار 7500 دولار وطالع!!!
وفي وكالة قلتلي بنعطيج تذكرة عين لندن (london eye) بسعر مخفض 35 دينار ، سعر التذكرة بموقع عين لندن الرسمي حزتها كان 30 باوند ( 14 دينار) هههههههههههه !!
للأسف نقط فلوس على السفريات وفرق كبيييير لأن عندنا خوف من الحجز بالنت
بامريكا العكس ، عندهم اللي يروح وكالة سفريات هذا ما عنده سالفة هههههههههه كل شغلهم بالنت