الجزء الثالث
(غضبت آمنه وردت بصوت عال على سلمان مستهزئة به ) : طا هذا ! وعليا ! ، الظاهر الى مرو عليك بحياتك كلهم يستشرفون علبالك كل الاوادم مثلهم ، على العموم هذا مستواك (مشيرة باصبعها باحتقار على سلمان , ثم استدارت واخذت تلوح بيدها ) اي شي .
( ذهبت الفتاتين فقال سلمان ) : شفيها هذا تسوي روحها شريفة روما؟! مقطعه الشرف الصراحه.
حمد : لا سلمانو حرام عليك ، صج خوش بنيه هذي ، يعني هي اي ملسونه شويه ، بس ماتستشرف , صج ما تحب.
سلمان : ايه (بوجه متأفف) الحين بيسافرون .
حمد : اي الحين.
(مضى بعض الوقت ، ففي احدى الايام عندما كانت آمنه تجلس مقابل المرآة ، بدأت والدتها بالتحدث اليها).
أم آمنه : امونه اميمتي ، درسي عدل حق الدور الثاني .
آمنه : ان شاءالله يما ان شاءالله .
أم آمنه : يمه ميخالف اهتمي بروحج بس مستقبلج اهم ، شدي حيلج امي ترى شهادتج اهم من مجابل المنظره .
(بعد مرور سنه كامله منذ عودة سلمان للكويت ، والتي قضاها بجديه تامه في دراسته ليستطيع ان يأتي بمعدل يمكنه للحصول على بعثه دراسيه).
(لم يرد سلمان الدراسه خارج البلاد بقدر ما اراد السفر ليكون حرا اكثر).
(في المطبخ حينما كانت ام براك تطهو الغداء).
عادل : يما حجيه ، شنو غداج؟
ام براك : ربيان يابس.
عادل : ايبا احلى شي.
(قاطعته ام براك قائله): عدول.
عادل: هلا يما .
ام براك: وين سلمان .
عادل: راح التعليم العالي .
ام براك: يووو! ويعه ، احاجي الطوف انا ! ماقلت له لا تسافر مو لازم تدرس بره؟ يروح يستخف لي هناك ، يتزوج لي وحده منهم وما يرجع ، والله ما ادري ! اربيهم انا وهالحمر ياخذونهم بارده مبرده .
عادل: ههااي! لاتحاتين يما لاتحاتين ، موويه زواج هذا عديم مسؤوليه عبالج نفس عمي عيسى!
ام براك: مويا يمه مايسمعون كلامي ، ولا يبوني اخطب لهم ، وهذول العنجريز يلوتون روسهم .
عادل: يما طوفي طوفي ، حتى لو ماسافر ماراح يخليج تخطبين له ، بييب لج وحده تزوجينه اياها ، طاف يما طاف طاف ، انا اخليج تخطبين لي ، تروحين انتي وامي تسوون حزب وتنقون لي عروس.
(و بعد مضي 10 ايام , كان سلمان خلالهم يحضر نفسه للسفر الى الخارج).
(و حان موعد سفر سلمان , فأخذه الجميع إلى المطار يدعون له بالسعادة و التوفيق , الا ان والدته كانت تنظر اليه بعينيها التي تفيض بالدموع).
ام براك: والله يا يمه انا مو مرتاحه , راح تروح هناك و تاخذ لك وحده نفس اخوك , و تحرمني من فرحتي فيك.
(قال سلمان متذمرا): يما لا تسوين جذي , يما لا تصيحين و لا تحاتين برجع لج , اييب لج ذيك الشهاده اللي تخليج تتشيحطين فيني طول عمرج ام براك(و قبل رأس والدته).
ام براك: والله يا يمه مو الشهاده اللي تخليني اتشيحط فيك , السنع , يوز يا يمه يوز من عويتك.
